Bagolwane, Tsayang Maikarabelo a Lona a Bodisa Ka Masisi

“Disañ lecomane ya Modimo ye le mo go lona.”​—1 PETERE 5:2.

1. Ke ka baka lang fa go tshwanela gore dinku di tshwanetse tsa dirisediwa go tshwantshetsa batho ba ba amogelwang ke Jehofa?

A BO go tshwanela jang gore dinku di tshwanetse tsa dirisediwa go tshwantshetsa batho bao ba ratwang ke Jehofa Modimo! Dinku ke dibopiwa tse di bonolo tse di arabelang lentswe la modisa wa tsone ka bofefo di bo di mo sala morago. Batho ba Modimo ba seka-dinku ka mo go tshwanang ba itetlelela go gogwa ke Modisa yo o Molemo, ebong Jesu Keresete. Ba a mo itse, ba arabela lentswe la gagwe, mme ka boitumelo ba amogela boeteledipele jwa gagwe. (Yohane 10:11-16) Tota, fa go se na modisa yo o molemo, dinku tsa sebele di tsenwa ke tsebe-tsebe le go tlhoa-tlhoega. Ga go gakgamatse, he, go bo Jesu Keresete a ne a tlhomogela batho bao ba neng ba “patikegile ba gasagasame, yaka dinku tse di senañ modisa” pelo.​—Mathaio 9:36.

2. Jehofa o ne a leba batho ba seka-dinku jang ba ba neng ba boga tlase ga “badisa ba Iseraela” ba ba seng lorato?

² Jehofa Modimo o kgatlhegela fela thata boleng jwa semoya jwa batho ba ba dipelo tse di ikanyegang ba kafa Dikwalong ba bitswang “dinku.” Ka motlhala, ka moperofeti Esekiele, Modimo o ne wa bolela fa go latlhega “badisa ba Iseraela,” banna ba ba nang le maikarabelo ba ba neng ba ikotla ka bobone ba tlhokomologa dinku. Mme Jehofa o ne a se ketla a letlelela batho ba seka-dinku go boga kwa ntle ga kgololo, ka go bo a ile a re: “Ke tla batla tse di timetseñ, ke tla ba ke lere tse di lelekilweñ, ke tla hapa tse di robegilèñ ke thatahatsa tse di botlhoko.”​—Esekiele 34:2-16.

3. Jesu Keresete o ile a bontsha dinku kamego jang?

³ Modisa yo o Molemo, ebong Jesu Keresete, ka mo go tshwanang o amegile ka batho ba seka-dinku. Pele ga a tlhatlogela kwa legodimong, ka gone, Jesu o ne a supa keletso ya gagwe ya gore dinku di amogele tlhokomelo e e tshwanetseng. O ne a bolelela moaposetoloi Petere gore, ‘Hudisa dikwanyana tsa me, disa dinku tsa me, hudisa dinku tsa me.’ (Yohane 21:15-17) Mme go tlhomamisa ka tlhokomelo e e lorato e e tswelelang mo dinkung, Jesu o ne a neela “bahwe badisa” go agelela “mmele oa ga Keresete.”​—Baefesia 4:11, 12.

4. Moaposetoloi Paulo o ne a kgothaletsa “bagoIwane” ba ba tlhomilweng ka moya o o boitshepo go dira eng?

⁴ Ereka ka bobedi Modimo le Keresete ba na le lorato lo lo tebileng thata le kamego ka batho ba seka-dinku, go nna modisa yo o tlhokometseng dinku tsa Modimo ke kabelo e e boikarabelo bo bo tona. Ka gone moaposetoloi Paulo o ne a kgothaletsa “bagolwane” ba ba tlhomilweng ka moya mo Efeso go ‘disa phuthego ya Modimo,’ ka go e tlhokomela ka botswerere. (Ditiho 20:17, 28) Ka jalo bagolwane ba ba tlhomilweng ba ka tlhokomela jang ka tshwanelo boikarabelo jwa bone?

Badisa ba Amogela Kaelo

5. Ke kgakololo efe e Petere a neng a e neela balebedi ka ene?

⁵ Moaposetoloi Petere, yo o neng a lebeletswe go otla dinku tsa ga Jesu, o ne a bolelela balebedi ka ene jaana: “Disañ lecomane ya Modimo ye le mo go lona, lo nntse lo lebèla, e señ ka go patèlèlwa, me ka pelo e e ratañ, kaha mokgweñ oa Modimo: e señ gore lo tlè lo bōnè khumè, me ka boikutlō yo bo itumèlañ: Leha e le ka mokgwa oa go rèna mo go ba lo ba chwaecweñ, ha e se ka go itiha dikaō mo lecomaneñ.” (1 Petere 5:1-3) A re boneng kafa bagolwane, ba ba tlhomilweng ka moya o o boitshepo, ba ka dumaianang ka teng ka mo go kgotsofatsang le kgakololo eno.

6. Bagolwane ba tshwanetse go direla “lecomane ya Modimo” ka boikutlo bofe?

⁶ Petere o ne a kgothaletsa bagolwane ka ene gore: “Disañ lecomane ya Modimo ye le mo go lona, lo nntse lo lebèla, e señ ka go patèlèlwa, me ka pelo e e ratañ.” Bao ba nang le tshiamelo ya go direla jaaka badisa ba semoya ga ba a tshwanela go dira jalo ka go ngongola, fela ka go bo ba ikutlwa gore ba a patelesega go tlhokomela letsomane. Ga ba a tshwanela go ikutlwa ba patikwa jaaka ekete seno e ne e le sebopego sa tiro nngwe e e lapisang kana jaaka ekete ba bangwe ba ne ba ba kgoromeletsa go disa letsomane. Go na le moo, bagolwane ba tshwanetse go direla ka moya o o ratang. (Bapisa Pesalema 110:3.) Fa motho a rata go direla ba bangwe molemo, ka metlha o tla dira ka pelo yotlhe, a iteka ka natla le go ipha matsapa a go direla dikgatlhego tsa bone. Mogolwane yo o ratang o ntsha nako ya gagwe ka kgololesego le maikatlapelo a gagwe. O itse gore ka dinako tse dingwe dinku di ka nna tsa latlhega, mme o eletsa go ba thusa, go etsa kamego ya Modimo mo go batho ba seka-dinku. Aitse, kamego ya ga Jehofa e ne e le kgolo fela thata mo Baiseraeleng ba ba neng ba latlhega mo mafoko a gagwe e neng ya nna gore: “Ke reile morahe o o no o sa bidiwa ka leina ya me, ka re, Mpōnañ, mpōnañ.”​—Isaia 65:1.

7, 8. (a) Go raya eng go diragatsa tiro ya bodisa kwantle ga lorato lwa khumo e e seng yone? (b) Go direla ka go rata go raya go dira eng?

⁷ Petere o ne a re tiro ya bodisa e tshwanetswe gore e dirwe “e señ gore lo tlè lo bōnè khumō, me ka boikutlō yo bo itumèlañ.” Bagolwane ba ba tlhomilweng ga ba eletse go nna mokgweleo mo letsomaneng. Boikutlo joo e ne e le jwa ga moaposetoloi Paulo, ka go bo a ne a bolelela Bakeresete mo Thesalonika a re: “Gonne loa gakologèlwa, ba ga echo, mohuhucō oa rona le thekisègō: e ne ea re re nntse re diha bosigo le motshegare, gore re tlè re se ka ra imèla opè oa lona, ra lo rèrèla Mahoko a a Molemō a Modimo.” O ne a ba gakolola gape a re: “Gonne ga rea ka ra diha ka go tlhokomologa molaō mo go lona: Me le gōna ga rea ka ra yèla motho opè diyō ka lehèla, ha e se ka mohuhucō le thekisègō, re diha bosigo le motshegare, gore re se ka ra imèla opè oa lona.”​—1 Bathesalonia 2:9; 2 Bathesalonia 3:7, 8.

⁸ Ka mo go tshwanang, badisa ba ba ikanyegang ba letsomane la Modimo gompieno ga ba na keletso e e bogagapa ya se dinku di nang le sone kana go leka go ikhumisa kafa go sa tshwanelang ka bone. (Luke 12:13-15; Ditihō 20:33-35) Paulo o ne a bontsha gore bao ba tshwanelegang jaaka balebedi ‘ga ba a tshwanela go bolaelwa pelo ke khumo e e maswe.’ (Tito 1:7) Go na le moo, ba tshwanetse go direla ka go rata ka kgatlhego e e matlhagatlhaga mo tirong ya bone le go senka go solegela dinku tse ba di neilweng go di tlhokomela molemo. (Bafilipi 2:4) Ka tsela eno, badisa bano ba bontsha kamego e e seng bogagapa e e tshwanang le e e supiwang ke Jehofa Modimo le Morwawe, ebong Jesu Keresete.

9. Ke ka baka lang fa modisa wa Mokeresete a sa tshwanela go ‘rena mo go bao e leng boswa jwa Modimo’?

⁹ Petere gape o ne a re bagolwane ba ne ba tshwanetse go disa batho ba ga Jehofa e seng “ka mokgwa oa go rèna mo go ba lo ba chwaecweñ, ha e se ka go itiha dikaō mo lecomaneñ.” Modisa yo o lorato ka kelotlhoko o dira gore a se ka a atlafala ka taolo ya gagwe ka go ikutlwa a le kwa godimo thata le go rena mo godimo ga dinku. Moya wa boikgodiso ga se wa Bokeresete mme o tshwanetse go tilwa ke botlhe ba ba eletsang go itumedisa Jehofa. Diane 21:4 e re: “Matlhō a a kalegileñ, le pelo e e ikgodisañ, le e leñ lobōnè loa baikepi, ke boleo.” Mme Jesu o ne a bolelela balatedi ba gagwe gore: “Loa itse ha balaodi ba Badichaba ba bo ba le bogōma mo go bōnè, le bagolo ba bōnè ba gagamatsa taolō mo go bōnè. Ga go ketla go nna yalo mo go lona: me leha e le mañ eo o ratañ go tla a nna eo mogolo mo go lona, a a nnè modihedi oa lona; Le gōna leha e le mañ eo o ratañ go nna oa pele mo go lona, a a nnè motlhanka oa lona.” (Mathaio 20:25-27) Eleruri, bagolwane ba tshwanetse go gakologelwa gore bao ba dirang letsomane ke dinku tsa Modimo mme ga ba a tshwanela go tshwarwa ka go tlhoka maitseo.

10. (a) Bangwe ba badisa ba batho ba motlha wa ga Esekiele ba ne ba dira eng? (b) Balebedi ba ba ikanyegang ke dikao tse di molemo mo letsomaneng jang?

¹⁰ Mo badiseng ba ba ikgopolang bobe ba motlha wa ga Esekiele, Jehofa o ne a re: “Tse di bobolañ ga loa di thatahatsa, ga loa hodisa tse di lwalañ, ga loa hapa tse di robegileñ, le gōna ga loa bosa tse di lelekilweñ, ga loa batla tse di timetseñ; me lo di laotse ka kgolō le patikō.” Modimo gape o ne a bolela gore badisa ba ba bogale ba ne ba ‘kgorometsa ka metlha tse di neng di Iwala go fitlhelela di bo di halalela kwantle.’ (Esekiele 34:4, 20, 21) Mme ga go a nna jalo ka badisa ba ba lorato ba “lecomane ya Modimo” gompieno. Ga ba belahale ka taolo ya bone mme ba kelotlhoko go sa kgopise epe ya dinku. (Bapisa Mareko 9:42.) Go na le moo, bagolwane ba ba ntseng jalo ba baakanyetsa ka thuso le kgothatso tse di lorato. Mo godimo ga moo, ka thapelo ba ikanya mo go Jehofa le go dira ka natla go nna dikao tse di molemo “mo puoñ, le mo mokgweñ oa go tshela, le mo loratoñ, le mo tumeloñ, le mo boitshekoñ.” (1 Timotheo 4:12) Ka ntlha ya gone moo, dinku di ritibetse le go ikutlwa di babalesegile, di itse gore di tlhokomelwa ke badisa ba ba lorato, ba ba boifang Modimo.

Dinku Di Lebane le Dikotsi

11. Ke ka baka lang fa badisa ba motlha wa segompieno ba tshwanetse go tlhokomela letsomane la Modimo sentle thata gore dinku di ikutlwe di babalesegile?

¹¹ Batho ba seka-dinku gompieno ba tlhoka go ikutlwa ba babalesegile, ba tlhomamisediwe tlhokomelo e e molemo e bagolwane ba e neelang go sireletsa letsomane. (Isaia 32:1, 2) Seno se ntse jalo segolo bogolo e re ka Bakeresete ba lebane le dipharagobe mo ‘dipakeng tseno tse di tlhokofatsang’ tse di tshwayang ‘metlha ya bofelo.’ (2 Timotheo 3:1-5) Mopesalema Dafide le ene o ne a lebana le dikotsi, mme o ne a ka re: “Yehofa ke modisa oa me. . . . E, me leha ke ralala mogōgōrō oa moruti oa losho, ga nketla ke boiha boshula bopè; gonne u na le nna.” (Pesalema 23:1-4) Badisa ba motlha wa segompieno ba letsomane la Modimo ba tshwanetse go tlhokomela dinku ka kelotlhoko thata, mo e leng gore jaaka Dafide, batho bano ba seka-dinku ba ka ikutlwa ba atamalane thata le Jehofa. Gape ba tshwanetse go ikutlwa ba babalesegile jaaka karolo ya phuthego ya Modimo.

12. Dinku di tlhoka go sirelediwa mo tshekamelong efe ya motlha wa segompieno, mme bagolwane ba ka thusa jang mo ntlheng eno?

¹² Nngwe ya dikotsi tseo go tsone bao eleng letsomane la Modimo ba tlhokang go sirelediwa mo go tsone ke tshekamelo ya motlha wa segompieno malebana le boitshwaro jo bo sa laolesegeng, boitsholo jo bo maswe jwa dikobo. Seno segolo bogolo e le ka ntlha ya dibopego tsa bosheng jaana tsa boitloso bodutu, boo e ka tswa e le ka thelebishene kana ka ditsela tse dingwe, batho ba bantsi ba ile ba tlhagolela ka tlhamalalo mokgwa wa botshelo o o thulanang le ditekanyetso tse di tlhomilweng mo Lefokong la Modimo. Gompieno, boikutlo jwa lefatshe jeno jwa sengwe le sengwe se siame, ka boitshwaro jo bo boatla jwa lone jwa kafa dikobong jo bo maswe, bo tshwanelwa ke gore bo tlhabantshiwe ka kgakololo e e utlwalang ya Dikwalo e e baakanyediwang moteng ga phuthego. Jalo badisa ba letsomane ba tshwanetse go itse ka botswerere se Bibela e se rutang mo dikgannyeng tsa boitsholo. Go feta moo, ba tshwanetse go boloka mo pele ga dinku boikarabelo jwa tsone go sala ba ntse ba le phepa mo tirelong ya ga Jehofa.​—Tito 2:13, 14.

13. (a) Lokwalo lwa ga Jude lo baakanyetsa ka kgakololo e e utlwalang kgatlhanong le kotsi efe? (b) Ke boemo bofe jo bagolwane ba tshwanetseng go bo tsaya malebana le batenegi?

¹³ Go na le dikotsi tse dingwe gape tse di tswang mo bateneging. Gakologelwa gore makgolo a dingwaga a a 19 a a fetileng, ‘batho bangwe ba ba sa reng Modimo sepe’ ba e neng e le baruti ba maaka ba ne ba kukunetse mo phuthegong. Ba ne ba le diphatsa jaaka “malika a a ikepetseng [kwa tlase ga metsi],” badisa ba maaka ba ba neng ba ikotla ka bobone fela, banna ba seholoholo ba ba neng ba dira dikgaogano le ba ba neng ba tlhaela ōomoya. Lokwalo Iwa ga Jude lo baakanyetsa ka kgakololo e e utlwalang e e ka kgonisang bagolwane, le botlhe ba ba ikanyegang, go nna “tlhōahalō go ganèlèla tumèlō.” (Yude 3, 4, 12, 19) Kwantle ga pelaelo, bagolwane ba tshwanetse go tsepama thata malebana le bape ba ba senkang go dira dikgaogano, ka go bo Paulo o ile a re: “Lepañ ba ba cosañ dikgaoganō le dikgopishō tse di hapaanyeñ le thutō e lo e ithutileñ: me lo kgaoganè nabō.” (Baroma 16:17) Badisa ka gone ba na le boikarabelo jwa go sireletsa letsomane mo go bano kana ‘mo diphiring tse dingwe tse di apereng jaaka dinku.’​—Mathaio 7:15.

Go Thusa Dinku ka Ditsela tse Dingwe

14, 15. Bagolwane ba ka kgona go thusa badumedi ka bone jang ba ba sa tsaaneng ka lorato?

¹⁴ Go disa “lecomane ya Modimo” go ka nna ga tlhoka go thusa dinku ka mathata a a farologaneng ao a ka tlhagogang moteng ga phuthego. Ka dinako tse dingwe, nku e ka nna ya simolola go tlhabantshana le nku e nngwe. Ka ntlha ya dikgang tse dipotlanyana fela, bangwe ba ka nna ba simolola go sa tshwarane ka tsela e e lorato. Batho bano ba ka nna ba bo ba sebana kana ba re kgabagare ba khutlela go tlhola ba kopanela le balekane ba bone ba pele mo tirelong ya ga Jehofa, e le go itshenya ka bobone mo moyeng.​—Diane 18:1.

¹⁵ Badisa ba semoya ba tshwanetse go nna podi-matseba go thusa badumedi ka bone ba ba ntseng jalo. Ka motlhala, bagolwane ba ka tlhoka go supela kafa go leng phoso ka teng go sebana le kafa Bakeresete botlhe ba ba ikanyegang go dira go boloka kutlwano ya phuthego. (Lefitiko 19:16-18; Pesalema 133:1-3; 1 Bakorintha 1:10) Bagolwane ba ka nna ba kgona go thusa ka go supela go tlhagiso e ya ga Paulo: “Ha lo lomana, lo yaana, lo itisè gore lo se nyeletsanye.”​—Bagalatia :13-15; Yakobe 3:13-18.

16. Bagolwane ba tshwanetse go dira eng fa e le gore ba lemoga ditshekamelo dingwe tse di seng tsone mo phuthegong?

¹⁶ Bagolwane, gakologelwang gore Diabolo o ntse a potologa “yaka tau e e dumañ, a batla eo o ka mo kometsañ.” (1 Petere 5:8) Bakeresete botlhe ba boammaaruri ba tshwanetse go tlhabana, e seng kgatlhanong le nama le madi, mme kgatlhanong le masomosomo a meya ya boikepo. (Baefesia 6:10-13) Badisa ba ba ikanyegang eleruri ga ba ketla ba batla gore dinku di fenngwe ke Satane. Fa batho bangwe ba seka-dinku ba simolola go sa tle dipokanong tsa Bokeresete, bagolwane ba ba kelotlhoko ba tla batla go bona gore lebaka e ka tswa e le eng mme ba neele thuso ya semoya e e tlhokafalang. Badisa ba tshwanetse go itse tebego ya letsomane le go nna podi-matseba mo ditshekamelong dipe tse di sa itekanelang mo phuthegong. (Diane 27:23) Fa ba lemogile tshekamelo ya go tlhokomologa tirelo ya tshimo, go tlhokomologa thuto ya botho, kana go kopanyelediwa fela thata-thata mo ditelekisong tsa menate kana tsa dilo tse di bonalang, banna bano ba ba nang le boikarabelo ba tshwanetse go senka pheko ya boemo. Mo go etseng Jehofa le Modisa yo o Molemo, ebong Jesu Keresete, bagolwane ba ba tlhokomelang “lecomane ya Modimo” ka tshwanelo ba neela thuso ya botho kana, ka dinako tse dingwe, ba baakanyetsa kgakololo e e tlhokafalang kwa dipokanong. (Bagalatia 6:1) Mo go tseno le mo ditseleng tse dingwe, bagolwane ba ba lorato ba neela bosupi jwa gore ba tsaya maikarabelo a bone a bodisa ka masisi.​—Ditihō 20:28.

Bodisa ke Kgang e e Masisi

17. Go tlhokafala eng e le gore motho a tshwanelegele jaaka mogolwane?

¹⁷ Go disa “lecomane ya Modimo” jaaka mogolwane ke namane e tona ya tiro. Ditekanyetso tse di kwa godimo tse di tshwanelwang ke go fitlhelelwa e le gore go tle go tshwanelegeIwe tshiamelo e e ntseng jalo di papamaditswe sentle mo go 1 Timotheo 3:1-7, Tito 1:5-9, le 1 Petere 5:1-4. Ga se mokaulengwe mongwe le mongwe fela yo o ka direlang mo boemong jono, ka go bo ke banna ba semoya fela ba ba ka sikarang boikarabelo jono. (1 Bakorintha 2:6-16) Banna ba bantsi ba jaanong ba sa direleng jaaka bagolwane ba ne ba ka tshwanelegela tshiamelo eno, mme ba tshwanetse lwantlha ba ‘lekela tiro ya molebedi.’ Ba tshwanetse go nna diithuti tse di tlhaga tsa Lefoko ja Modimo e le gore ba tle ba nne le kutlwisiso e e tebileng ya lone. Eleruri, ba tshwanetse go itshupa ka bobone ba tshwanela go ka hakiwa ka ntlha ya go fitlhelela dipatlafalo tsa Dikwalo jaaka bagoIwane ba ba tlhomilweng, badisa ba ba tshwanelang ba “lecomane ya Modimo.”

18. Paulo o ne a ikutlwa jang kaga diphuthego, a mme bangwe ba na le boikutlo jwa gagwe?

¹⁸ Yo o direlang kafa tlase ga Jehofa Modimo ke tlhogo ya phuthego ya Bokeresete, Modisa yo o Molemo, ebong Jesu Keresete. (Yohane 10:11; 1 Bakorintha 11:3; Baefesia 5:22, 23) Mme abo Jesu a tshwanetse abo a itumelela go nna le badisa ba letsomane ba ba kafa tlase ga gagwe ba ka tshwanelo ba etelelang le go sireletsa dinku! Banna bano ba semoya ba fitlhelela ditshwanelego tse di kwa godimo tsa Dikwalo tse di tlhometsweng bagolwane ba Bakeresete. Mo godimo ga moo, ba na le kamego e e tshwanang e e boteng ka dinku jaaka e e neng ya bontshiwa ke moaposetoloi Paulo, yo o neng a kwala ka gore: “Kwa ntlè ga dilō [mathata le dipogo] tse di kwa ntlè, go na le mo go nkimèlañ ka malatsi aotlhe, ke raea tlhobaèlō kaga diphuthègō cotlhe. Go na le mañ eo o bokōa, me nna ke se bokōa? mañ eo o kgopisiwañ, me nna ke sa gakale?” (2 Bakorintha 11:23-29) Paulo o ne a tsamaya mesepele e meleele, mme letsatsi le letsatsi o ne a itemogela “tlhobaèlō kaga diphuthègō cotlhe,” le e leng jaaka balebedi ba ba etang ba dira gompieno. Ka mo go tshwanang, bagolwane ba ba tlhomilweng mo diphuthegong tse di farologaneng ba itemogela tlhobaelo kaga dinku moteng ga letsomane le ba le neilweng go le tlhokomela jaaka badisa ba semoya.

19. Go tla felela ka eng fa Bahebera 13:17 e diragadiwa mme bagolwane ba tswelela pele go tsaya maikarabelo a bone a bodisa ka masisi?

¹⁹ Go disa “lecomane ya Modimo” ke tiro e e bokete, mme e a duela tota. Ka gone, badisa ba letsomane, ka kelotlhoko dibelang tshiamelo eno ya lona e e rategang. Tlhokomelang ka kelotlhoko dinku tsa Modimo. Mme ekete botlhe ba seka-dinku ba ka dira mmogo ka botlalo le badisa bano ba ba botlana ba ba tlhomilweng ke moya o o boitshepo. “Utlwañ ba ba lo laolañ, me lo ba ineèlè,” Paulo o ne a kgothatsa, “gonne ba disitse meōea ea lona, yaka ba ba tla ikarabèlañ.” (Bahebera 13:17) Fela jaaka botlhe bao ka pelo yotlhe ba ineetseng mo tirong ya ga Jehofa ba dira mmogo ka kutlwano, masego a magolo a semoya le melemo di tla tswelela go nna gone mo tirelong ya boikanyego ya bagolwane ba Bakeresete ba ba tsayang maikarabelo a bone a bodisa ka masisi.

A O Ka Tlhalosa?

◻ Ke ka baka lang fa badisa ba semoya ba tshwanetse go direla ka go rata?

◻ Ke ka baka lang fa bagolwane ba tshwanetse go sa rate khumo mo go maswe?

◻ Ke ka baka lang fa go tla bo go le phoso ka bagolwane go rena mo letsomaneng ja Modimo?

◻ Ke ka baka lang fa balebedi ba tshwanetse go nna dikao mo letsomaneng?

◻ Ke dikotsi dingwe dife tse badisa ba tlhokang go sireletsa “lecomane ya Modimo” mo go tsone?

[Setshwantsho mo go tsebe 25]

Fela jaaka badisa ba ba kelotlhoko a metlha ya bagologolo, bagolwane ba motlha wa segompieno ka lorato ba ‘disa letsomane ja Modimo’