A O Ka Ipaakanyetsa Pogiso Gone Jaanong?
“Ha ba mpogisitse, le lona ba tla lo bogisa.”—YOHANE 15:20.
1, 2. Ke kgato efe e e sa lebelelwang e mebuso mengwe e e tsereng kgatlhanong le Basupi ba ga Jehofa?
AKO O ikakanye o ikhuditse mo bolaong mo maphakeleng mangwe. Ka ntlha ya letsapa o sa ntse o ipotsa gore a ke o tsoge gone jaana kana o ikhutse metsotso e sekaenyana e e tlang. Mme sa ntlha, o atamela fa seromamoweng sa gago go se bulela go utlwa dikgang tsa mo mosong. Ka tshoganyetso, mmala-dikgang o go thaakanya ditsebe mo o bileng o tsoga. O itsise go re: “Go ya ka taolo ya ga goromente, lekoko le le itsiweng jaaka Basupi ba ga Jehofa le thibetswe mo nageng yotlhe.” Ga go sa tlhole go na le kgomo ya boroko!
2 Seno, kana sengwe se se tshwanang le sone, e ile ya nna boitemogelo jwa Bakeresete mo dinageng tse dingwe mo metlheng ya segompieno. Gantsi, go ile ga nna le ditlhagiso tsa seo se ka nnang sa diragala. Mme ka dinako tse dingwe thibelo e ile ya tla gotlhelele e sa solofelwa. A seno se tshwanetse sa re gakgamatsa?
3. Ke maitemogelo afe a a fapaaneng a Jesu a neng a nna le one ka 33 C.E.?
3 Gotlhelele nnyaa. Go ne ga diragala dilo tse di tshwanang mo lekgolong la ntlha la dingwaga. Gakologelwa kafa Jesu Keresete, mo bosimologong jwa dikgakologo tsa 33 C.E., a neng a goroga mo Jerusalema a palame esela. Batho ka boitumelo ba ne ba mo galaletsa, ba ala diaparo tsa bone mo tseleng gore a tsamaye mo go tsone. Mme go ne ga diragala eng malatsi a se kae moragonyana, Jesu o ne a sekisiwa mo pele ga ga Ponto Pilatwe, mme segopa go tswa mo go one motse oo sa kurueletsa gore a bolawe ka go re: “A a bapolwè. . . . A a bapolwè.” (Mathaio 21:6-9; 27:22, 23) Seemo se ne sa fetoga ka ponyo ya leitlho.
4. Jaaka balatedi ba ga Jesu, ke itshwaro efe e re tshwanetseng go e lebelela?
4 Ka jalo, ga re a tshwanela go gakgamala fa mo mafatsheng a mangwe gompieno seemo se fetoga mme pogiso e tlhagoga e sa solofelwa. Gakologelwa, fa ruri re le balatedi ba ga Jesu, re tshwanetse go lebelela pogiso. (Yohane 15:20) Seno se tlotlomatsa botlhokwa jwa mafoko a ga Jesu, “Ke gōna, disañ.”—Mathaio 24:42.
5. Ke dipotso dife tse di tlhokang kakanyetso ya rona?
5 Re ka dira seno jang? A go na le tsela eo re ka ipaakanyang ka yone, fa e le gore dilo di ka ya masweng go feta?
Baakanya Mogopolo wa Gago le Pelo
6, 7. (a) Ke ka baka lang fa go le bokete go dira dipaakanyetso tsa mmele tsa pogiso? (b) Ke paakanyetso efe e e botlhokwa-tlhokwa e e ka direIwang pogiso?
6 Go bokete go baakanyetsa mmele wa gago pogiso ka go bo o sa itse gore seemo se tla bo se ntse jang. Go fitlhelela fela go diragala, ga o ne o itse gore a jaana thibelo e tla gagamala kana e tla diragadiwa fale le fale, kana le eleng gore go tla thibelwa eng. Ka gongwe ke tiro ya go rera ka ntlo le ntlo e e tla ilediwang, kana ka gongwe dipokano tsa bodumedi. Ka dinako tse dingwe lekgotla la semolao la Basupi ba ga Jehofa le a phatlaladiwa, kana batho bangwe ba ba rileng ba latlhelwa mo kgolegelong ka bofefo. Re ka akanya ka mafelo a le mantsi a a farologaneng koo dibuka di ka hitlhwang gone fa go tlhokafala. Mme kwantle ga moo, ga go na sepe se se kalo kalo se re ka se dirang mo go baakanyeng mmele.
7 Lefa go ntse jalo, o ka baakanya mogopolo wa gago le pelo, mme seno se botlhokwa fela thata-thata. Tlhoma mogopolo wa gago mo lebakeng la gore ke eng pogiso e dumelelwa le gore ke ka baka lang o ka isiwa mo pele ga babusi. “Go tla lo nna chupō,” Jesu o ne a rialo. (Mathaio 10:16-19) Fa pelo ya gago e ipaakanyeditse ka botlalo go sala o ntse o ikanyega, go sa kgathalesege se se tla tlang, Jehofa o ka senola tsela e e botlhale ya go dira ka yone fa go tlhokafala jalo. Jalo, re ka ipaakanyetsa jang ka borona kafa moyeng pogiso?
O Dirisana Le Batho Jang?
8. Ke ka baka lang fa Paulo a ne a ka re o ne a ‘itumelela dikutlwiso botlhoko’?
8 Moaposetoloi Paulo o ne a re: “Ke gōna ke itumèlañ mo makoeñ, le mo dikutlwishoñ botlhoko, le mo go tlhokeñ, le mo dipogishoñ, le mo dipitlaganoñ, ka ntlha ea ga Keresete.” (2 Bakorintha 12:10) A moaposetoloi Paulo o ne a itumelela go utlwisiwa botlhoko? Gotlhelele nnyaa. Mme pogiso gantsi e kopanyeletsa go utlwisiwa botlhoko, mme fa e le gore seno ke sone se se neng sa diragala go tlisetsa leina la Modimo pako, he Paulo o ne a itumelela go e itshokela.
9. Re ka ipaakanyetsa jang go itshokela ‘dikutlwiso botlhoko . . . ka ntlha ya ga Keresete’?
9 Le rona, gape, re ka tlhomamisega gore ka nako nngwe re tla itshokela ‘dikutlwiso botlhoko . . . ka ntlha ya ga Keresete.’ Re ka nna ra gobololwa ka mafoko, kana le e leng mo mmeleng. A re tla go itshokela? Legale, rona ka borona re go leba jang jaanong? A re itsaya re le batho ba ba botlhokwa fela thata mme re galefa ka bofefo fa re utlwisiwa botlhoko tota kana re go akanyetsa? Fa go ntse jalo, he ke ka baka lang re sa direle mo ‘bopeloteleleng, . . . boingotlong, le boikgapong’? (Bagalatia 5:22, 23) Eno e tla nna thapiso e e molemo-lemo mo go tsheleng jaaka Mokeresete jaanong, mme e tla babalela botshelo jwa gago mo dinakong tsa pogiso.
O Leba Tirelo ya Tshimo Jang?
10. Ke itshwaro efe e e siameng kafa Dikwalong fa tiro ya rona ya go rera e thibelwa?
10 Gantsi, selo sa ntlha se se kganelwang tlase ga thibelo ke go rera phatlalatsa “Mahoko a a Molemō.” Legale go rera le go dira barutwa ke tsa botlhokwa-tlhokwa mo metlheng eno ya bofelo. Batho ba ka itse jang kaga Bogosi jwa Modimo? Ka jalo, karabelo e e tshwanetseng mo thibelong e e ntseng jalo ke yone e e tlhalositsweng ke baaposetoloi, fa baeteledipele ba bodumedi ba Sejuda ba ne ba leka go thibela tiro ya bone ya go rera. (Ditihō 5:28, 29) Tlase ga thibelo, dikarolo dingwe tsa go rera di ka tswalwa. Mme, ka tsela nngwe, tiro e tshwanetse ya dirwa. A o tla nna le nonofo ya go tswelela o rera tlase ga kgatelelo ya pogiso?
11, 12. O ka tlhomamisa jang boo o na le nonofo e e tlhokelwang go tswelela o rera fa re bogisiwa?
11 Legale, o leba jang tiro ya go rera jaanong? A o letlelela dikgoreletsi tse dipotlana go kgoreletsana le yone le go go dira gore o se nne wa ka metlha mo tirelong ya tshimo? Fa go ntse jalo, o ka dira eng tlase ga thibelo? A o boifa batho jaanong? A o iketleeditse go rera ka ntlo le ntlo mo mmileng wa gaeno? A o boifa go dira o le nosi? Mo mafatsheng a mangwe, batho ba babedi ba ba dirang mmogo gantsi ba gogela tlhokomelo e ntsi thata. Jalo, koo go babalesegileng go go dira, ke ka baka lang o sa leke gone jaanong go dira o le nosi nako le nako? E tla nna thapiso e e molemo.
12 A o tlhakanela mo tirong ya kabo ya dimakasine? A o na le bopelokgale le boiteko jwa go batla diphatlha tsa bosupi jo bo sa ikaelelwang? A o dira masimo a kgwebo? A o boifa go atamela batho ba ba humileng kana ba ba itsegeng? Fa o tlhakanela fela mo dikarolong tse di rileng tsa go rera, o ne o ka dirang fa, tlase ga thibelo one mofuta oo wa thero o bo o sa tlhole o ka kgonega?
13. O ka dirang kaga bodihedi jwa gago e le gore o tle o ipaakanyetse botoka go rera mo dinakong tsa pogiso?
13 A o lemoga gore o na le bokoa mo karolong nngwe? Ke nako jaanong ya go direla mo go yone. Ithute go ikanya Jehofa le go tshwanelega jaaka modihedi. Go tswa foo o tla kgona go itlhomelela botoka go rera jaanong le go ipaakanyetsa go itshokela dinako tsa pogiso botoka.
A O Boikanngo?
14, 15. (a) Ke Bakeresete ba mofuta ofe mo lekgolong la ntlha la dingwaga ba ba tshwanetseng ya bo e ile ya nna tlhotlheletso e e wetsang dibete fa pogiso e ne e tlhagoga? (b) Motlhanka wa motlha wa segompieno wa ga Jehofa o ka nna a tiile sentle jang jaaka bone Bakeresete bao ba pele?
14 Mo dikwalong tsotlhe tsa Segerika tsa Bokeresete, go umakiwa batho ka bongwe bao e neng e le dipilara tsa nonofo mo phuthegong. Ka sekai, Onesiforo ka bopelokgale o ne a thusa Paulo fa a ne a le mo kgolegelong mo Roma. (2 Timotheo 1:16) Febe o ne a akgolwa ka ntlha ya tiro ya gagwe ya bonatla mo phuthegong kwa Kenkerea. (Baroma 16:1, 2) Banna le basadi ba ba ntseng jalo ba tshwanetse ya bo e ne e le tlhotlheletso e e wetsang dibete fa pogiso e ne e tlhaga. Ba ne ba ‘nna ba tsogile, ba tia thata mo tumelong, ba dira jaaka banna, ba nonofa.’—1 Bakorintha 16:13.
15 Bakeresete botlhe, segolo bogolo bagoIwane, ba tshwanetse go leka go dira botswelelo pele le go nna jaaka Bakeresete ba pele ba ba nonofileng. (1 Timotheo 4:15) Ithuteng go boloka dikgang tsa sephiri di sa itsiwe le go dira diphetso tse di aegilweng mo melaometheong ya Dikwalo. Ithuthuntshe go lemoga dinonofo tsa Bokeresete mo go ba bangwe e le go re o tle o itse gore ke mang yo e ka reng go le maswe a ikanngwa. Dira, ka nonofo ya ga Jehofa, go nna pilara mo phuthegong, motho yo o thusang ba bangwe go na le yo ka metlha a tlhokang gore a thusiwe.—Bagalatia 6:5.
O Tsamaisana Jang Le Batho?
16, 17. Go dirisa Bakolosa 3:12, 13 jaanong go ka go thusa jang go ipaakanyetsa pogiso?
16 Moaposetoloi Paulo o ne a re kgothatsa a re: “Lo aparè pelotlhomogi, le pelonomi, le boikokobeco, le bonōlō, le bopelotelele; Lo iphapaanyanè moñwe le eo moñwe, lo ichwarèlanè.” (Bakolosa 3:12, 13) A seno se motlhofo mo go wena? Kana go sa itekanela ga batho ba bangwe go go kgopisa kafa go sa tlhokafaleng? A o gakatsega motlhofo fela kana o kgobega marapo motlhofo? Fa go ntse jalo, karolo e nngwe ke eno eo boipaakanyetso bo tshwanetseng jwa dirwa mo go yone.
17 Mo mafatsheng ao go one dipokano di thibelwang, Bakeresete ba kopana ka metlha ka ditlhopha tse dipotlana. Mo maemong a a ntseng jalo, ditlhaelo tsa bone di bonala le e leng go feta. Ka jalo ke ka baka lang o sa ithapise ka bowena jaanong go emelana le makoa a ba bangwe, fela jaaka kwantle ga pelaelo ba dira kaga a gago? O se ka wa nyatsa ba bangwe mme ka gone wa ba kgoba marapo. Gape, ithapise le bana ba gago go tlotla dithoto tsa batho ba bangwe fa lo le mo Dithutong tsa Buka tsa Phuthego. Tlase ga pogiso, tlotlo e e ntseng jalo e tla goletsa dikamano tsa kagiso.
A O Mahega?
18. Ke ka baka lang fa ka dinako tse dingwe go babalesegile go itse bonnyennyane jo o bo itseng fela?
18 Ka tlholego, bangwe ba rona re mahega fela thata. Re ka se itshokele go nna fela re “sa itse.” A o ntse jalo? Fa go ntse jalo, akanyetsa se: Ka dinako tse dingwe, fa tiro ya Basupi ba ga Jehofa e ile ya thibelwa, bagolwane ba puso ba leka go ribolola dithulaganyo tsa bone tsa phuthego le maina a balebedi ba ba nang le maikarabelo. Fa e le gore o mongwe yo o ka bong a itse ka dilo tseno, o ne o ka gobololwa mo go botlhoko ka boiteko jwa go patelediwa gore o ba senole. Mme fa e le gore o ne o ka ba senola, tiro ya bakaulengwe ba gago e ne e ka amiwa mo go maswe. Ka jalo, ka dinako tse dingwe go botoka go itse bonnyennyane jo o bo itseng e seng go feta moo.
19. Ke eng seo se ka go thusang go tila go senola dikgang tsa sephiri fa o bogisiwa?
19 A o ka ithapisetsa seo jaanong? Ee. Ka sekai, fa go na le kgang ya komiti ya boatlhodi mo phuthegong, batho ka bongwe ba tshwanetse go kgotsofalela gore e ka tswa ke eng se bagolwane ba se bonang se siame go se bolela mme e seng go itshunya nko go batla go itse diteng tsotlhe. Basadi le bana ba bagolwane ga ba a tshwanela go leka go ba pateletsa gore ba senole dikgang tsa sephiri. Mo tseleng e nngwe le e nngwe, re tshwanetse go ithuta go sa ‘tsena-tsene mo dilong tse di sa re ameng.’—2 Bathesalonia 3:11.
A O Seithuti sa Bibela?
20, 21. Thuto ya Bibela e e matsetseleko e ka go thusa jang fa tiro e thibetswe?
20 Bibela ke motheo wa nonofo ya bomoya jwa Mokeresete. E mo neela dikarabo mo dipotsong tse di botlhokwa-tlhokwa le go mo kgonisa go bona botlhale jwa Modimo sebele. (2 Timotheo 3:14-16) Bakeresete botlhe ba dumalana le seno ka botlalo, mme tota Bibela e na le seabe se se kana kang mo botshelong jwa gago? A o e ithuta ka metlha le go e letlelela go go kaela mo go sengwe le sengwe seo o se dirang?—Pesalema 119:105.
21 Gantsi, go bona dikwalo tsa rona tsa Bibela go kganelwa fela thata fa tiro e thibetswe. Ka dinako tse dingwe, le e leng Dibibela ga di motlhofo go bonwa. Tlase ga maemo a a ntseng jalo moya o o boitshepo o tla go gakolola dilo tse o di ithutileng mo nakong e e fetileng. Mme ga o ketla o go gakolola dilo tse o iseng o ke o di ithute! Ka gone, fa o ithuta fela thata jaanong, o tla kgona go boloka mo mogopolong le mo pelong ya gago mo gontsi mo moya o o boitshepo o tla kgonang go go go gakolola ka dinako tsa fa go tlhokafala.—Mareko 13:11.
A O A Rapela?
22. ‘Go nnela ruri mo thapelong’ go ka itshupa go thusa jang mo go baakanyetseng pogiso?
22 Eno ke potso e e botlhokwa fa re akanya ka pogiso. Bibela e ya gakolola: “Lo nnèlè rure mo thapelon.” (Baroma 12:12) Thapelo ke puisano e e tlhamaletseng le Jehofa Modimo. Ka yone re ka kgona go mo kopa nonofo go itshokela mathata le go dira diphetso tse di siameng, ga mmogo le go aga kamano ya botho le Jehofa. Le e leng fa baganetsi ba ka tsaya dibuka tsa rona, Dibibela tsa rona, le bolekane jwa rona le Bakeresete ba bangwe, le ka motlha ga ba ketla ba re kgomorolola tshiamelo ya thapelo. Mo kgolegelong e e tiileng sentle, Mokeresete a ka buisanya le Modimo. Go itsholela molemo ka botlalo tshiamelo eno ya thapelo, he, ke tsela e e molemo go ipaakanyetsa se e leng go re isagwe e ka tswa e se tshotse.
A O Ikanya Taolo?
23. Ke ka baka lang fa o agelela ikanyo mo bagoIwaneng ba ba tlhomilweng le mo ‘motlhankeng yo o boikanngo le yo o botlhale’?
23 Go agelela ikanyo e le gone go botlhokwa. Bagolwane mo phuthegong ke karolo ya paakanyetso ya Modimo go re sireletsa. Bagolwane ba tlhoka go dira ka tsela eo e tlhokang ikanyo, mme phuthego yotlhe e tlhoka go ithuta go ba neela ikanyo ya bone. (Isaia 32:1, 2; Bahebera 13:7, 17) Se se bileng se le botlhokwa go feta, re tshwanetse go ithuta go ikanya “motlhanka eo o boikañō le eo o botlhale.”—Mathaio 24:45-47.
24. Go ka dirwang go baakanyetsa go ganana le ditlhaselo tsa maaka tsa baba ba batho ba ga Jehofa?
24 Baba ba ka phatlalatsa maaka kaga phuthego ya Modimo. (1 Timotheo 4:1, 2) Mo nageng nngwe, Bakeresete bangwe ba ne ba tsiediwa mo go dumeleng gore Setlhopha se se Laolang sa Basupi ba ga Jehofa se ile sa latlha Bokeresete, lemororo bone ba ne ba sa ntse ba ntse ba ikanyega mo go sone. Tsela e e molemo ya go ipaakanyetsa go ganana le ditlhaselo tse di ntseng jalo ke go aga lorato lo lo tiileng mo bakaulengweng ba gago le go ithuta go ikanya thulaganyo ya dilo ya ga Jehofa.—1 Yohane 3:11.
O Ka Fenya
25. Ke eng seo se tla re thusang go tswa re le bafenyi fa re bogisiwa?
25 Fa a se na go bogisiwa, moaposetoloi Johane yo o tsofetseng, o ne a re bolelela jaana: “Gonne señwe le señwe se se tsecweñ ke Modimo se henya lehatshe: me e ke eōna phenyo e e henyañ lehatshe, eboñ tumèlō ea rona.” (1 Yohane 5:4) Ga o ka ke wa fenya ka nonofo e e leng ya gago. Satane le lefatshe la gagwe ba nonofile go go feta. Mme ga ba a nonofa go feta Jehofa Modimo. Ka jalo, fa re utlwa ditaolo tsa Modimo, re rapelela moya wa gagwe go re tshegetsa le go ikanya gotlhelele mo go one go itshoka, he re ka tswa bafenyi.—Habakuke 3:13, 18; Tshenolō 15:2; 1 Bakorintha 15:57.
26. Le eleng fa e le gore ga o boge jaanong ka ntlha ya pogiso, o tshwanetse go dira eng?
26 Mo mafatsheng otlhe, go na le Bakeresete ba bangwe ba le jaana ba ntseng ba bogisiwa, e ka tswa e le ka balekane ba lenyalo ba ba ganetsang kana ka tsela nngwe e sele. Mo mafatsheng a mangwe, batlhanka botlhe ba Modimo ba boga ka ntlha ya ditiro tsa bagolwane ba goromente ba naga eo. Mme le e leng fa, jaanong jaana, ka sebele o sa boge kganetso kana bothata bope jo bo sa tlwaelegang, gakologelwa gore go ka diragala nako nngwe le nngwe. Jesu o ne a bolela gore pogiso ya Bakeresete e ne e tla nna karolo ya sesupo sa motlha wa bofelo; jalo, re tshwanetse ka metlha ra e lebelela. (Mathaio 24:9) Ka jalo ke ka baka lang o sa ipaakanyetse jaanong? Ititeye sehuba gore, lefa go ka tswa go le eng kwa pele, boitshwaro jwa gago ka metlha bo tla galaletsa Rrago wa selegodimo, Jehofa Modimo.—Diane 27:11.
O Ka Araba Jang?
◻ Ke dipaakanyetso tsa mofuta ofe tsa pogiso tse o ka di dirang jaanong?
◻ O ka dira eng jaanong go tlhagolela nonofo e e tlhokafalang go tswelela o rera fa re bogisiwa?
◻ Go dirisa Bakolosa 3:12, 13 jaanong go ka thusa jang fa pogiso e diragala?
◻ Ke ka baka lang o agelela ikanyo mo bagolwaneng ba ba tlhomilweng le mo ‘motlhankeng yo o boikanngo le yo o botlhale’?
◻ O ka nna mofenyi jang fa pogiso e tla?