Go Tlhoafalela Kobamelo ya ga Jehofa

MORAGO ga go ya lenyalong kwa Kana, Jesu o ya kwa Kaperenama, motse o o gaufi le Lewatle ja Galalia. O na le barutwa ba gagwe, mmaagwe, le bomannawe, eleng Jakobe, Josefe, Simone, le Judase. Lefa go ntse jalo, pele ba dira loeto lono, ba ka tswa ba ile ba ema lwantlha mo legaeng la ga Jesu mo Nasaretha e le gore lelapa le ka phutha dilo tse ba tla di tlhokang.

Mme ke ka baka lang fa Jesu a ya kwa Kaperenama, go na le go tsweledisa bodihedi jwa gagwe mo Kana, mo Nasaretha, kana mo lefelong le lengwe mo dithabeng tsa Galalia? Ntlha ke go re, Kaperenama o agilwe sentle fa e leng teng ebile o a itsege ebile go bonala e le motse o mogolo. Gape, barutwa botlhe ba ga Jesu ba a ba boneng bosheng ba nna moo kana ba baufi le Kaperenama, mme ka jalo ga ba ne ba tlhoka gore ba tlogele naga ya bone ba tle ba amogele thapiso e e tswang mo go ene.

Ka nako ya fa a nna mo Kaperenama, Jesu o dira ditiro tsa kgakgamatso, jaaka fa ka boene a supela dikgwedi moragonyana. Mme ka bofefo Jesu le balekane ba gagwe ba mo tseleng gape. Ke dikgakologo, mme ba mo tseleng ya bone go ya Jerusalema go ya kwa Tlolaganyong ya 30 C.E. Fa ba le koo, barutwa ba gagwe ba bona sengwe kaga Jesu se gongwe ba neng ba ntse ba sa se itse pele.

Go ya ka Molao wa Modimo, Baiseraele ba ne ba tlhokwa go dira ditlhabelo tsa diphologolo. Jalo, go sola paka e molemo, barekisi mo Jerusalema ba rekisa diphologolo le dinonyane ka boikaelelo jwa se. Mme ba rekisetsa gone fela moteng ga tempele, mme ba tsietsa batho ka go ba lopa bobe.

Ka kgakalo e kgolo, Jesu o tshopha seiteo sa mogala le go lelekela barekisi kwantle. O tshololela fa fatshe madi a ditshipi a baananyi ba madi le go pitikolola ditafole tsa bone. “Tlosañ dilō tse ha!” o goeleletsa kwa go bao ba rekisang maphoi. “Se ntsheñ ntlo ea ga Rrè ntlo ea thèkèlō.”

Fa barutwa ba ga Jesu ba bona seno, ba gakologelwa boperofeti kaga Morwa Modimo jo bo reng: “Tlhōahalèlō ea ntlo ea gago e tla nya.” Me Bajuda ba a botsa: “O re shupetsa seshupō sehe, ka e le ha u diha dilō tse?” Jesu o a araba: “Senyañ tempela e, me ke tla e cosa ka malatsi a le mararo.”

Bajuda ba ithaya ba re Jesu o bua kaga tempele ka sebele, mme o bua kaga tempele e eleng mmele wa gagwe. Mme morago ga dingwaga tse tharo barutwa ba gagwe ba gakologelwa puo eno fa a tsosiwa mo baswing. Yohane 2:12-22; Mathaio 13:55; Luke 4:23.

◆ Morago ga moletlo wa lenyalo kwa Kana, ke mafelo afe a Jesu a yang go one?

◆ Ke ka baka lang fa Jesu a gaketse, mme o dira eng?

◆ Barutwa ba ga Jesu ba ne ba gakologelwa eng fa ba ne ba bona ditiro tsa gagwe?

◆ Jesu o ne a reng kaga “tempela e,” mme o ne a rayang?