Batlhanka ba Bodihedi—Bolokang Boemo jo bo Molemo!
‘Banna ba ba dihelang ka mokgwa o montle ba ipapalela ka bobone boemo jo bo molemo le tshosologo e kgolo ya puo mo tumelong e e mo go Keresete Jesu.’—1 TIMOTHEO 3:13.
1. Morago ga go tlhomiwa jaaka motlhanka wa bodihedi, mokgele wa monna yoo e tshwanetse ya nna eng, mme ba bangwe mo phuthegong ba tshwanetse go batla go dirang?
BANNA bao jaanong eleng batlhanka ba bodihedi ba ile ba ‘lekwa pele gore a ba a tshwanela.’ (1 Timotheo 3:10) Mme go tlhomiwa ga bone e ne e se bofelelo jwa tiro. Mokgele wa bone ke go tswelela ba ntse ba ‘ipapalela ka bobone boemo jo bo molemo’ ka go diragatsa ditiro tsa bone ka ‘mokgwa o montle.’ (1 Timotheo 3:13) Leloko lengwe le lengwe la phuthego ya Bokeresete e e kutlwano le tla batla go ba tshegetsa mo go fitlheleleng mokgele ono.
2. Maloko a phuthego a amiwa jang ke seo se dirwang ke batlhanka ba bodihedi?
2 Moaposetoloi Paulo o ne a supa gore maloko otlhe a mmele wa semoya wa ga Keresete a solegelwa molemo ka go dira mmogo le go tshegetsana. (1 Bakorintha 12:12-31) Ka mo go tshwanang, fa batlhanka ba bodihedi ba dira tiro ya bone e ba e abetsweng ke Modimo ka ‘mokgwa o montle,’ leloko lengwe le lengwe la phuthego ya Bokeresete ya motlha wa segompieno le solegelwa molemo. Mme fa batlhanka ba bodihedi ba thulana le mathata ao a ba kgoreletsang mo go diragatseng ditiro tsa bone ka tshwanelo, seno se ka bakela maloko otlhe a phuthego bothata.
3. (a) Ke mathata afe a a tlwaelegileng mo batlhankeng botlhe ba ga Jehofa? (b) Kanoko ya bosheng jaana e thusa go supa eng?
3 Batho botlhe ba ga Jehofa ba na le ntwa e e tshwanang, “ga re lwe le nama le madi, mme . . . le mashomōshomō a meōea ea boikèpō mo mannoñ a selegodimo.” (Baefesia 6:12) Mo godimo ga moo, batlhanka botlhe ba ga Jehofa ba na le ntwa kgatlhanong le bosaitekanelang jwa bone le ditshekamelo tsa bone tsa boleo. Lefa go ntse jalo, jaaka setlhopha, batlhanka ba bodihedi ba lebane le mathata a a rileng ka tsela e e tsepameng go na le ditlhopha dife tse dingwe fela tsa Basupi ba ga Jehofa. Se se thusang mo go tshwantsheng seno ke kanoko ya bosheng jaana ya diphuthego tse di fetang 320 tse di nang le batlhanka ba bodihedi ba le 1 360 mo nageng nngwe ya bophirima ya Yuropa.
Ba Ba sa Nyalang le ba ba Nyetseng
4. Batlhanka ba bodihedi ba ba iseng ba nyale ba tshwanetse go leba go sa nyale ga bone jang, mme ke kgothatso efe e ba bangwe ba ka ba e neelang?
4 Mo batlhankeng ba bodihedi ba ba ileng ba kanokwa, ba feta diphesente di le 10 go se kae ba sa ntse ba ise ba nyale. Ka gone ba ipelela kgololesego mo maikarabelong mangwe a a tlwaelesegileng a ba ba diphesente tse di batlileng di nna 90 tsa ba ba nyetseng. Mme bakaulengwe ba ba sa nyalang ba tshwanetse go nna kelotlhoko mo go sa diriseng kgololesego ya bone mo go lelekiseng fela dilo tsa botho tse di jaaka go itlosa bodutu mo go feteletseng kana go itsalanya bobe le batho. Lefa e le gone gore ba tshwanetse ba letlelela keletso ya bone ya tlholego ya lenyalo go digoga kwa pele mo go sengwe le sengwe mo botshelong. (Mathaio 6:33) Le gone ga ba a tshwanela go dumelela kgatelelo e e tswang mo ditsaleng tsa bone tse di nyetseng go ba betelela go potlakela go nyala kana go tsenelela lenyalo le le sa rulaganyediwang. Mme, eleruri, Bakeresete bao ba tlhokomelanang ba tla tlotla boemo jwa go sa nyale jwa badumedi ka bone ba ba sa nyalang mme ba tla ba kgothaletsa go itsholela paka e e molemo ya kgololesego ya bone go senya nako e ntsi thata mo ditelekisong tsa bolegodimo, ka gongwe ba tsaya bodihedi jwa nako e e tletseng.
5. Ke kotsi efe e kgolo e e gone go batlhanka ba bodihedi ba ba nyetseng go na le bao ba iseng ba nyale?
5 Go ya ka kanoko e e umakilweng fa godimo, mo e ka nnang 62 lekgolong ya batlhanka ba bodihedi. Ka bone, bodiphatsa jwa dipelo tsa bone go “imahadiwa” ke “ditlhodiègèlō tsa botshelō” bo bogolo fela thata go na le joo jwa bakaulengwe ba ba sa nyalang. (Luke 21:34-36) Ka gone, mo go bueleleng go sa nyale, Paulo o ne a re: “Me ke rata loa bo lo sena ditlhodiègō. Eo o sa nyalañ o tlhokometse dilō tsa Morèna, kaha o ka kgatlhañ Morèna ka gōna. Eo o nyetseñ o tlhokometse dilō tsa lehatshe, kaha o ka kgatlhañ mosadi oa gagwè ka gōna. . . . [Le ene yo o neelang bokgarebane jwa gagwe mo nyalong o dira sentle,] me eo sa [bo] neeleñ nyalō, o tla bo a diha sentlè bogolo.”—1 Bakorintha 7:32-38.
6. Batlhanka ba bodihedi ba ba nyetseng ba tlhoka go dira eng, mme ke bafe ba ba ka kgonang go neela dikakantsho tse di mosola?
6 E re lemororo batho ba ga Jehofa ba sa dumele gore ‘manyalo a dirwa kwa legodimong,’ ba itse gore botlhale jwa selegodimo bo a tlhokwa mo go rarabololeng mathata a lenyalo. (Pesalema 19:7; Diane 3:5, 6) Ka gone moo, batlhanka ba bodihedi ba ba nyetseng ba tlhoka go latela ka katamelo e kgolo kgakololo ya Lefoko ja Modimo. Ba tshwanetse go lekela go nna tekatekano e e tshwanetseng mo go diragatseng maikarabelo a bone a lelapa, mme legale le ka motlha ba sa dirise ano jaaka seipato sa go tlhokomologa ditiro tsa bone tsa bolegodimo mo phuthegong. Gareng ga dilo tse dingwe, thulaganyo e e akanyeditsweng ka botswerere e a tlhokafala. Banyalani ba ba godileng ba bile ba na le boitemogelo ba ka kgona go neela ba babotlana dikakantsho tse di mosola malebana le seno fa ba kopiwa go dira jalo.
7. (a) Lelapa la motlhanka wa bodihedi yo o nyetseng le ka ama jang maiteko le botswelelopele jwa gagwe jwa semoya? (b) Batlhanka ba bodihedi ba ba rulaganyetsang go nyala ba tla bo ba dira sentle go gakologelwa eng?
7 Tshegetso e e tswang mo lelapeng la gagwe ke thuso e kgolo thata go motlhanka wa bodihedi yo o nyetseng. Tota, maloko a lelapa ao a bayang ditopo tse di feteletseng mo nakong le tlhokomelong ya gagwe kana bao ba gakaletseng go batla dilo tse di bonalang mo go ene ba ka kgoreletsa tswelelopele ya gagwe ya semoya. Mme ke lesego fa lelapa lotlhe la gagwe le tshegetsa maiteko a gagwe ‘go direla ka mokgwa o montle.’ (1 Timotheo 3:13) Ka jalo abo go le botlhokwa-tlhokwa gore pele motlhanka wa bodihedi yo a iseng a nyale a gokaganya maikutlo le molekane wa lenyalo yo o mmeileng leitlho a leke go bona gore a jaana o tla tsholetsa tswelelopele ya bone ya semoya!
Mmereko le Moya wa Dilo tse di Bonalang
8. (a) Ke kotsi efe e e ka nnang gone e batlhanka ba bodihedi ba lebaneng le yone malebana le tiro ya boitshediso? (b) Ke go tlhatlhanya ka dikwalo dife mo go ka thusang motho go tlhabantshana le dilo tse di bonalang?
8 Batlhanka ba bodihedi ba roba bobedi mo go bangwe le bangwe ba le lesome ba ba neng ba kanokiwa ba ne ba le tlase ga dingwaga tse 60. Ka jalo mo makgetlong a le mantsi ba ne ba tla bo ba sa ntse ba bereka le go ikotla le go otla malapa a bone. Mo e ka nnang ba le batlhano mo go bangwe le bangwe ba ba lesome ba bone ba magareng a dingwaga tse 20 le tse 40—fa batho ba lefatshe gantsi ba itshetlela mo mmerekong kana mo tirong nngwe ya isagwe le go lekela go ntsha tlhogo le go itshwarelela kafa mading. Fa o le motlhanka wa bodihedi mo dingwageng tseo, le ka motlha se nyatsise bodiphatsa jwa go tlhagolela maikutlo a selefatshe, a dilo tse di bonalang ao a ka go koafatsang semoyeng. Go na le moo, gakologelwa go re Paulo o ne a re: “Me e re ha re na le diyō le diaparō, re tla ritibatsa pelo mo go cōna.” (1 Timotheo 6:8) Jesu, le ene, o ne a neela kgakololo e e molemo eo e ka re thusang rotlhe mo go tlhabantsheng dilo tse di bonalang. E ipalele ka bowena mo go Mathaio 6:19-34.
9. Tumalanong le Mathaio 16:26, ke tsela efe e e botlhale ka batlhanka ba bodihedi ba babotlana segolo bogolo?
9 Lona batlhanka ba bodihedi ba babotlana segolo, lebelelang banna ba selefatshe ba ba “atlegileng” ba ba lelekisitseng ditiro dingwe tsa isagwe kana ba ba ikokoanyetsang letlotlo mme ba kgaphela Jehofa ntle mo dithulaganyong tsa bone. (Bapisa Diane 16:3; 19:21) Tota go ka nna botlhale go le kana kang go bopela matshelo a lona go batho bangwe ba ba rileng ba e seng ba semoya, ba ba ratang dilo tse di bonalang bao matshelo a bone ka bofefo a tla tlogang a komediwa ka nako ya “sepitla se segolo”? (Mathaio 24:21) Ke motlhanka ofe wa ga Jehofa yo o ka lekang go ananya boemo le bone? Jesu o ne a re, “Gonne motho o tla bo a thusèga eñ, leha a ka henya lehatshe yeotlhe, me a latlha botshelō yoa gagwè?” (Mathaio 16:26) Eleruri, tsela ya botlhale ke go aga isagwe e e babalesegileng le phuthego ya ga Jehofa go na le e tota e sa babalesegang ebile e le khutshwanyane le lefatshe leno le le swang le le mo thateng ya ga Satane.—1 Yohane 5:19.
Go Ikanyega go Bogosi jwa Modimo
10. Malebana le dikgang tsa sepolotiki, ke boemo bofe jo bo tsewang ke palo e e oketsegang ya ‘setlhopha sa makawana,’ go akareletsa le batlhanka ba bodihedi?
10 Go ne ga bolelwa jaana, ka seperofeti ka Kgosi ya Bomesia ya ga Jehofa: “Batho ba gago ba italetsa ka pelo e e thamileñ mo letsatsiñ ya thata ea gago: u re u le mo mekgaboñ ea boitshèpō, ua bo u na le monyō oa bokau yoa gago, o cwa sebopeloñ sa moshō.” (Pesalema 110:3) Boperofeti jono bo ile jwa diragadiwa fa e sa le 1914, mme palo eo e e oketsegang ya ‘setlhopha sa makawana’ e lemoga go re boikanyegi jwa bone jwa ntlha bo tshwanetse go nna go Bogosi jwa Modimo le Jesu Keresete jaaka Kgosi e e galaleditsweng. Jalo lemororo banna ba ba ineetseng, go akareletsa le batlhanka ba bodihedi, ba utlwa “babusi ba bagolo” ba bogoromente ka tekanyetso, mo thulanong efe fela ya dikgatlhego ba ‘tshwanetse go utlwa Modimo bogolo go batho.’ (Baroma 13:1; Ditihō 5:29) Jaaka Jesu a ne a bua, balatedi ba gagwe ga se “ba lehatshe.” (Yohane 15:19; 18:36) Ba sala ba itlhaotse mo dikgannyeng tsa sepolotiki tsa merafe, ba lemoga gore go dira ka tsela epe fela go ka ba dira baba ba Bogosi jwa Modimo.
11. Bakaulengwe ba ba bogang ka ntlha ya go boloka boitlhaodi jwa Bokeresete ba ka tlhomamisega ka eng?
11 Go tweng fa e le gore batlhanka ba bodihedi kana ba bangwe ba latlhegelwa ke mmereko kana le eleng kgololesego ya bone ka ntlha ya go boloka boitlhaodi jwa Bokeresete? (Isaia 2:2-4; Yohane 17:16) Ka jalo he ba itse gore bakaulengwe le bokgaitsadi ba bone ba semoya ba tla ba neela tshegetso yotlhe e e ka kgonegang semoyeng, mme, le ka dilo tse di bonalang, fa go tlhokafala. Seno se ntse jalo ka go bo batho ba ga Jehofa ka lorato ba a tlhokomelana.—Bapisa Yohane 13:34, 35; 1 Bakorintha 12:24, 25.
Tlhokafalo ya Boitemogelo jo Bogolwane
12. ‘Go ipapalela boemo jo bo molemo’ go tla akareletsa eng?
12 Go batla e nna ntlha nngwe ya seraro ya batlhanka ba bodihedi ba ba ileng ba kanokiwa ba ile ba nna Basupi ba ga Jehofa kwa tlase ga dingwaga tse di lesome. Go phepafetse gore, banna bano ba ile ba amogela thuso le kaelo ya maloko a a nang le boitemogelo jo bogolwane a phuthego. Mme ‘go ipapalela boemo jo bo molemo’ go tla akareletsa go tswelela ba ithuta mo go ba bangwe le go ikokoanyetsa boitemogelo. Go tla raya gape go itlhomela mekgele ya botho ya ka metlha le go tlhagafalela go lekela go e fitlhelelela. Jalo fa e le gore o eletsa ka matlho a mahibidu go direla maikaelelo a a mosola jaaka motlhanka wa bodihedi kana o lekela tshiamelo eo, a o itlhometse mekgele mengwe ya botho? Ka sekai, ke goreng o sa fetse ka go re o bale Bibela yotlhe ka lobaka longwe lo lo rileng kana go nna mmulatsela yo o thusang mo dikgweding dingwe tse di rileng?
13. Ke kgakololo efe e e neilweng Timotheo eo e tla solegelang molemo mokaulengwe yo o eletsang go nna motlhanka wa bodihedi kana yoo jaanong a direlang mo boemong joo?
13 Fa e le gore o mmotlana mo dingwageng kana mo boitemogelong, o ka solegelwa molemo ke seo se buiwang mo go 1 Timotheo 4:12-15. Lemororo mafoko ao a ne a lebisitswe go molebedi yo monana Timotheo, bontsi jwa seo Paulo a se buileng kaga puo le boitshwaro di tla solegela molemo mokaulengwe ope fela yo o eletsang go nna motlhanka wa bodihedi kana yo o setseng a direla mo boemong joo. Moaposetoloi o ne a kwala ka go re: “Opè a se ka a nyatsa bokau yoa gago; me u nnè sekaō sa ba ba dumèlañ, mo puoñ, le mo mokgweñ oa go tshela, le mo loratoñ, le mo tumeloñ, le mo boitshekoñ. U tlhōkōmèlè go bala, le go laea, le go ruta, ke tlè ke tsamaeè ke tlè. U se ka ua tlhokomologa nèō e e mo go wèna, e u e neilweñ ka perofesho e pataganye le peèō ea diatla tsa bagolwane. U tlo u tlhōahalè mo diloñ tse; u ineèlè mo go cōna ka boyotlhe yoa gago; gore bocwèlèlō pele yoa gago bo bōnatshègè mo go botlhe.” O tlhoka go re o berekele segolo bogolo mo go eng go re “bocwèlèlō pele yoa gago bo bōnatshègè mo go botlhe”? Batlisisa ka thapelo se o tlhokang go se dira, mme go tswa foo o go dire ka thuso ya ga Jehofa!
Go Emelana Le Kgobego-marapo
14, 15. (a) Ke kgothatso efe ya Dikwalo e e gone go batlhanka ba bodihedi bao ba tshwanelwang ke go Iwantshana le botsofe kana botsogo jo bo bokoa? (b) Banna bano ba ka kgothatsa ba bangwe jang mo phuthegong?
14 Batlhanka ba bodihedi ba bantsi-ntsi ga ba sa tlhole ba na le go emelana le mathata ao a lebaneng thata-thata le makawana. Ba lebagane le botsofe kana botsogo jo bo bokoa, seo se ka gogelang kwa kgobegong-marapo. Mme bao ba ipolokileng ba nonofile semoyeng ba ka bona kgomotso mo mafokong ano a ga Paulo go Bakeresete ka ene ba ba tloditsweng: “Ke gōna ga re ñōdiege: me leha motho oa rona oa kaha ntlè a ōnala, leha go nntse yalo motho oa rona oa kaha teñ oa ba a nntse a shahadiwa ka letsatsi le letsatsi; Gonne pitlaganō ea rona e e motlhoho, e e emen ka lobakanyana loa gompiyeno hèla, e re dihèla segolo se segolo se se heteletseñ sa bokete yo bo sa khutleñ yoa kgalalèlō; Ka re sa lebe dilō tse di bōnalañ, me e le dilō tse di sa bonaleñ: gonne dilō tse di bōnalañ ke tsa lobaka lono hèla; me dilō tse di sa bonaleñ ke tsa bosaeeñkae.” (2 Bakorintha 4:16-18) Batlhanka ba ga Jehofa ba ba nang le ditsholofelo tsa selefatshe le bone ba na le ditebelelo tse di kgothatsang tota—tseo tsa botshelo jo bosakhutleng mo paradaiseng ya selefatshe.—Luke 23:43; Yohane 17:3.
15 Jalo batlhanka ba bodihedi bao ba sa kgoneng go dira ka bogolo fela jaaka ba bangwe ka ntlha ya botsogo jo bo bokoa kana ka ntlha ya botsofe ba na le lebaka le le molemo la go boloka boikutlo jwa boipelo le jo bo tlhamaletseng. Seno se supela kanaanelo ya boammaaruri le tumelo e e nonofileng mo dilong tse e leng tsa bosakhutleng. Moya o o molemo o o ntseng jalo, o tshwaragane le tirelo e e boikobo, di tla nna tsa mosola o mogolo le kgothatso go mongwe le mongwe mo phuthegong.
16. Ke ka baka lang fa motlhanka wa bodihedi a sa tshwanela go kgobega-marapo fa e le gore ga a tlhomiwe mogolwane?
16 Fa o le motlhanka wa bodihedi, tswelela o “senka boèmo yoa mookami” ka go tokafatsa kgono ya gago ya go ruta le dinonofo tsa semoya. (1 Timotheo 3:1) Mme o se ka wa kgobega-marapo fa o sa tlhomiwe mogolwane ka bofefo. Gakologelwa gore jaaka motlhanka wa bodihedi go tlhokomela ditiro tsa gago ‘ka mokgwa o montle’ o direla maikaelelo a a mosola mme o letlotlo la mmatota mo phuthegong. Ke tshiamelo e kgolo go direla mo pakeng efe fela moteng ga phuthego ya ga Jehofa le go thusa badumedi ka rona go tsweledisa thomo ya go rera ka Bogosi.—Mathaio 24:14; 28:19, 20.
Kafa Ba Bangwe Ba Ka Thusang
17. Motlhanka wa bodihedi a ka thusiwa jang ke mosadi le bana ba gagwe?
17 Ka go lemoga maikaelelo a a mosola a a direlwang ke batlhanka ba bodihedi, batho botlhe ba ga Jehofa ba tshwanetse go batla go rotloetsa maiteko a bone. Ka sekai, go tla nna motlhofo ka monna yoo go tswelela a ‘direla ka mokgwa o montle’ fa mosadi le bana ba gagwe ba kgotsofetse ka ditlhokafalo tsa botshelo mme ba sa lope bobe menate e mentsi eo e ka tlhokang gore a senye boiteko jo bo oketsegileng mo tirong ya boitshediso.—1 Timotheo 6:6-8.
18. (a) Bagolwane ba ka thusa batlhanka ba bodihedi jang? (b) Ke ka baka lang fa puisano e e molemo e le botlhokwa-tlhokwa magareng ga bagolwane le batlhanka ba bodihedi?
18 Bagolwane ba ka thusa batlhanka ba bodihedi ka go ba neela kaelo le kgakololo dipe fela tse di tlhokafalang. Mme fa tokafatso e ile ya dirwa, kakgolo ya mmatota e tshwanetse ya neelwa. Gareng ga dilo tse dingwe, bagolwane ba ka pata batlhanka ba bodihedi mo bodiheding jwa tshimo, ba ba thusa mo go baakanyetseng dipolelo, le go tlhakanela le bone letlotlo la bone la boitemogelo jwa Bokeresete. Go bonala e le gore kgatlhego le puisano e e ntseng jalo di ile tsa tlhokomologwa ka dinako tse dingwe. Ka sekai, fa a ne a bodiwa ka pego ya gagwe ya tirelo ya tshimo e e kwa tlase, motlhanka mongwe wa bodihedi o ne a bolelela molebedi wa potologo mongwe gore: “Ke ka baka lang o botsa? E ile ya nna kwa tlase jalo ka dingwaga, mme o motho wa ntlha go umaka sepe kaga yone.” Bagolwane bao ba neelang batlhanka ba bodihedi kgakololo e e nonofileng, e e lorato mme ka bopelotelele ba ba thusa mo mathateng a bone gantsi ba na le go bona matswela a a tlhomologileng.
19. Leloko lengwe le lengwe la phuthego le ka thusa batlhanka ba bodihedi jang go boloka boemo jwa bone jo bo molemo?
19 Tota, leloko lengwe le lengwe la phuthego le ka thusa batlhanka ba bodihedi go boloka boemo jo bo molemo jwa bone. Jang? Ka go dira mmogo le bone le go bontsha kanaanelo e e tswang mo pelong ya tiro ya bone. Le eleng fela jaaka ditokololo tsotlhe tsa mmele wa motho gantsi di dira mmogo go boloka botsogo jwa mmele, jalo maloko otlhe a phuthego a tshwanetse go dira mmogo go tlhomamisetsa botsogo jo bo molemo jwa yone jwa semoya. (Bapisa 1 Bakorintha 12:24, 25.) Ka ntlha ya gone moo, go dirwa mo go ntsi ke batlhanka ba bodihedi ba ba dirang ka natla ba ba direlang maikaelelo a a mosola le go boloka boemo jo bo molemo. Ekete bone, le basupi botlhe ba ba ikanyegang ba ga Jehofa, ba ka lebelela isagweng e e itumedisang ka bosaengkae mme ka kutlwano ba tswelele go ipedisa pelo ya “Modimo o o itumetseng.”—1 Timotheo 1:11, NW; Diane 27:11.
Tswee-tswee Tlhalosa
◻ Ke mathata afe a a lebaneng le batlhanka ba bodihedi?
◻ Basadi le bana ba batlhanka ba bodihedi ba ka dira eng go ba thusa?
◻ Bagolwane ba ka dirang go thusa batlhanka ba bodihedi?
◻ Leloko lengwe le lengwe la phuthego le ka dirang go thusa batlhanka ba bodihedi?
[Setshwantsho mo go tsebe 20]
Batlhanka ba bodihedi ba tshwanetse go diragatsa maikarabelo a bone ka boikanyegi mo tirong ya go dira barutwa le moteng ga phuthegong
[Setshwantsho mo go tsebe 23]
Batlhanka ba bodihedi ba bagolwane ba ka dira mo gontsi go thusa le go godisa phuthego