A O Ka Atolosa Tshimo ya Gago Jaaka Mmulatsela

JESU KERESETE o kile a re: “Ke na le go rèrèla le metse e meñwe Mahoko a a Molemō a bogosi yoa Modimo: gonne ke romilwe go diha yalo.” (Luke 4:43) Kwantle ga pelaelo, Jesu e ne e le mmoledi wa bogosi yo o tlhomologileng, mmulatsela wa boammaaruri mo tirelong e e boitshepo ya ga Jehofa.

Jaaka Jesu, moaposetoloi Paulo e ne e le modihedi wa nako e e tletseng yo o neng a kgatlhegela tiro eno ya boefangele ka botlalo. Tota, o ne a na le keletso ya mmatota ya go godisa tshimo ya gagwe ya bodihedi.​—Bapisa Baroma 15:23, 24; 2 Bakorintha 10:15, 16.

Kwantle ga pelaelo ka moya o o tshwanang, basupi ba ga Jehofa ba motlha wa segompieno ba le bantsi ba ithaopetse go direla jaaka barongwa mo mafatsheng a seeng. Badihedi ba bangwe ba Bakeresete ba direla koo tlhokafalo eleng kgolo gone. Mme ba bangwe ba bantsi ba ile ba go fitlhela go kgonagala gore e nne babulatsela, bareri ba nako e e tletseng ba mafoko a a molemo.

Mme go tweng ka wena? Fa jaanong o sa direle jaaka mmulatsela, a o ka atolosa tshimo ya gago, jaaka go ka bolelwa, ka go nna mmoledi yo o ntseng jalo wa Bogosi?

Melemo ya Tirelo ya Bobulatsela

Babulatsela ba ba tlhoafetseng le ba ba nang le matswela ba tlhotlhelediwa eseng ke go ikgatlhegela mme ke go rata Modimo le keletso ya go thusa ba bangwe. Badihedi ba ba ntseng jalo ba nako e e tletseng ba utlwa tlhokafalo ya go dirisa Lefoko la Modimo mo matshelong a bone ka maatla mme ba ipelela go ka tlhagolela tirelo ya nako e e tletseng. Mme go na le melemo ya go dira jalo.

‘Go bolela mafoko a a molemo a poloko ka Jehofa letsatsi lengwe le lengwe’ ke molemo o mongwe wa tirelo ya bobulatsela. (Pesalema 96:2) Eleruri, go bua ka metlha ka Modimo le maikaelelo a gagwe go a kgotsofatsa, segolo-bogolo ka gonne seno se thusa ba bangwe mo tseleng ya botshelo. “Ga go na boitumelo jo bo fetang jwa go ithuta Bibela le mongwe le go mmona a nna moobamedi wa ga Jehofa,” go boletse jalo kgaitsadi mongwe yo o nang le dingwaga di le 46 a le mo tirelong ya bobulatsela.

Bokgoni jo bogolwane mo go tshwareng ‘chaka ya moya, Lefoko la Modimo,’ ke molemo o o nnang teng go tswa mo go diriseng Bibela ka metlha mo bodiheding jwa bobulatsela. (Baefesia 6:17) Nngwe e e tshwanang le dikakgelo tseo di diriwang ke babulatsela ba le bantsi ke e e latelang: “Mo godimo ga go oketsa bopelokgale jwa me, bobulatsela bo nthusitse go tlwaelana le ditemana tse di ntsi tsa Bibela tseo di neng di tshwerwe ka tlhogo, di emetse go dirisiwa.”

Tlhotlheletso e e molemo ya tirelo ya bobulatsela gape e ka utlwiwa mo phuthegong. Mabapi le seno, mogolwane mongwe o kwadile jaana: “Abo bo dirile pharologano jang ne! Mosepele wa phuthego o ne wa fetoga. Re sekametse mo go oketseng go nna le seabe mo tirelong ya ga Jehofa go feta pele.” Ee, ba bangwe ba ka tlhotlhelediwa ke sekao se se tlhoafetseng sa badihedi ba babulatsela.

Go ikanya Jehofa go go golwane go ka nna teng go tswa mo go nneng le seabe mo bodiheding jwa bobulatsela. Tota, badihedi ba nako e e tletseng ba tshwanetse go fenya mathata mangwe. Mme banyalani bangwe ba babulatsela ba ile ba tlhagisa tsholofelo ya bone ka mafoko ano: “Re leboga Jehofa, le ka motlha ga re ise re ke re tlhaele sepe. Jaaka babulatsela re ile ra ikaega ka Jehofa mme re bone ka moo a re neelang thuso ka gone fa re e tlhoka thata.”​—Pesalema 34:10; 37:25.

Masego a go Bo Fitlhelela

‘Lo tle lo nteke ka gone lo bone bo ga nkitla ke lo bulela dikgoro tsa legodimo, ke lo goromeletsa lesego,’ Jehofa o boletse jalo makgolo a dingwaga a a fetileng. (Malaki 3:10) Mo ngwageng wa tirelo wa 1984, palogare ya babulatsela lefatshe ka bophara e ne e le 258 936. Mme abo o segofaditse badihedi bano ba nako e e tletseng jang ne!

Ka sekai, tlhokomela masego a a ipeletsweng ke babulatsela mo karolong ya Amazon ya Brazil. Ka kakaretso, mekorwana e dirisediwa go ya kwa metseng e e gasagasameng le dipota tsa noka. Ditulo dingwe di mo meleng ya dinoka, matlo a dikgong a agilwe mo godimo ga dipale go a boloka a le mo godimo ga metsi mo setlheng sa merwalela. Matlo ano a tshwaragantswe ka ditselana tsa maoto tsa logong lo lo magwata, tse di leng kotsi ka dinako dingwe, segolo-bogolo go batho ba bakima. Fa metsi a le kwa tlase, go kgabaganya go thata mme go kgonagala ka go ralala ditlhatshana kana mo moleng wa noka o o diretse. Go tsamaya ka mekorwana e e botlhoswana go ka nna diphatsa tota, gonne tseno di a pitikologa ka dinako tse dingwe. Go tlatseletsa mo go seno sotlhe ke mathata a a nnang teng go tswa go malaria, letshoroma la mala, dibokwana tsa diparasite, mogote o o feteletseng, le go tsenngwa botlhole ke ditshitshiri. Lefa go ntse jalo, go sa kgathalesege mathata ano moya wa ga Jehofa o thusa bakaulengwe ba rona go atlega mo go boleleng mafoko a a molemo mo mafelong ao.​—Sekaria 4:6.

Kgaitsadi mongwe wa mmulatsela yo o direlang mo kgaolong ya Amazon o boletse jaana: “Tiro ya rona e ne e kgotsofatsa thata.” Fa a ne a tsopola boitemogelo bongwe jo bo molemo, o ne a bolela ka loeto longwe Iwa go boela go monna mongwe yo o rileng yoo a neng a amogetse dingwe tsa dibuka tsa rona mo nakong e e fetileng. o ne a tshwanelwa ke go tsamaya dioura di le pedi ka mokorwana, mme fa a goroga o ne a fitlhela monna yoo a besitse boupi jwa manioc mo ontong e kgolo. O ne a sa kake a kgaotsa go besa goo kwantle ga gore a dire kotsi ya gore bopi joo bo she. Jalo a ka dirang? Aitsane, mmulatsela yoo o ne a kopa yo o neng a mo patile go nna a fetola bopi ka lefuduo le legolo la logong. Jalo monna yoo o ne a nna le sebaka sa go reetsa ka kelotlhoko fa mmulatsela yoo a ne a bontsha ka moo buka eo a neng a na le yone e neng e ka ithutiwa ka gone.

Gantsinyana, bakaulengwe ba ba dirang mo kgaolong eno ba tsoga ka mahube e le gore ba fitlhelele magae a batho go sa le gale. Morago babulatsela bano ba tswelele ka go supa letsatsi lotlhe. Mme abo Jehofa o ba segofatsa ka mo go humileng jang ne!​—Diane 10:22.

Kwa gongwe kwa Brazil, le gone, babulatsela ba ipelela masego a mantsi mo tirelong ya ga Jehofa. Ka sekai, akanya ka boipelo jwa mmulatsela mongwe yo o neng a kgona go thusa seboswa go ithuta boammaaruri. Monna yono, yoo pele a neng a boifiwa ka ntlha ya go nna bogale ga gagwe, o ne a goga sekwebo se seleele sa kgolegelo. Lefa go ntse jalo, fa a sena go tlhatswiwa pelo ke boammaaruri, botho jwa gagwe bo ne jwa fetoga go ya bokgakaleng jwa gore balaodi ba kgolegelo ba ne ba kgatlhega thata mme ba mo naya tetla ya go rera mo kgolegelong. Jaanong a kolobeditswe, monna yono o beilwe leitlho ke molao mme o tshwara dithuto di le mmalwa tsa Bibela.

Mmulatsela yono gape o ile a kgona go thusa ba bangwe mo go yone kgolegelo eo. Malebana le tiro eno, o tlhalosa jaana: “Ke lebaka la boitumelo jo bogolo mo go nna, gonne peo eo ke kgonneng go e jala e setse e medile le go ntsha maungo.” Bobotlana banna ba le bane bao ba ileng ba gololwa mo kgolegelong jaanong ba nna teng kwa dipokanong tsa Bokeresete ka metlha. Ba bangwe ba le bane ba tsaya boammaaruri ka masisi, mme mongwe wa bone o ipaakanyetsa go kolobediwa.

Tshimo e Kgolo

Go oketsega go go tswelelang pele mo mephatong ya baobamedi ba ga Jehofa go neela bosupi jo bo ka se ganediweng jwa gore Modimo o santse a na le batho ba bantsi go ba phutha go kgabaganya tshimo ya lefatshe ka bophara. (Bapisa Ditihō 18:9, 10.) A o ka nna ’le seabe se segolwane mo tirong eno ya go dira barutwa?

Fa e le gore ga o buletsela, ke ka ntlhayang fa o sa buisane le bao ba nnileng le katlego mo tirelong ya nako e e tletseng? Le wena, o ka kgona go atlega jaaka mmulatsela. Morago ga o sena go sekaseka maemo a gago ka thapelo, o ka nna wa kgona go atolosa tshimo ya gago jaaka mmulatsela.

[Setshwantsho mo go tsebe 26]

Mekorwana ke di dirisiwa tse di tlwaelegile thata tsa go rwala batho go babulatsela mo kgaolong ya Amazon