Bosupi Bo Lere Koketsego ya Bogosi

“Yehofa, . . . a a kè a lo ntsihatsè ga makgolo a shomè, go heta yaka lo nntse yana, a a lo segōhatsè, yaka a sholoheditsè!”—DUTERONOME 1:11.

1, 2. (a) Jehofa o ne a solofetsa lseraele eng? (b) O ne a diragatsa ditsholofetso tsa gagwe jang, mme go ikaegile ka eng?

KOKETSEGO E E MENAGANENG GA MAKGOLO A SOME! Seo ke sone se Moshe a neng a se lopela “chaba e e boitshèpō” ya ga Jehofa, eleng Iseraela. Jehofa o ne a solofetsa morafe oo dilo tse dikgolo. (Ekesodo 19:5, 6; bona gape le Genesise 12:2, 3.) A o ne a diragatsa ditsholofetso tseo?

² Tota, dingwaga tse di ka nnang 500 morago ga Moshe al sena go bua mafoko a a fa godimo, go ne ga bolelwa jaana: “Ba Yuda le ba Iseraela ba bo ba le bantsi, yaka moshawa o o ha lewatleñ ka bontsi, ba ya ba nwa ba diha mekete hèla.” Mohumagadi wa Sheba a tswa kgakala-kgakala go tla go bona borena jwa bogosi joo, o ne a goa ka kgakgamalo go Solomone jaana: “Bōna, leha e le bontlha ñwe ke ne ke sa bo bolèlèlwa: botlhale yoa gago, le letlhōgōnōlō ya gago go heta tumedi e ke e utlwileñ. . . . A go bakwè Yehofa Modimo oa gago, . . . ereka Yehofa a ratile ba Iseraela ka galè ka galè.” (1 Dikgosi 4:20; 10:7-9) Fa fela batho bao ba ne ba direla ka boikanyegi jaaka basupi ba ga Jehofa, eleruri o ne a ba tlhogonolofatsa le go ba oketsa.

3. (a) Petere o ne a supelang kaga ‘batho ba Modimo ba leina la gagwe’? (b) Ke ka ntlhayang fa leina Bashupi ba ga Jehofa le tshwanela batho bao?

³ Go feta dingwaga tse di sekete morago ga ga Solomone, moaposetoloi Petere fa a ne a supa fa pele ga setlhopha se se laolang mo Jerusalema, “o boletse kaha e rileñ pele Modimo oa lekola Badichaba, go re o tlhaolèlè leina ya ōna batho mo go bōnè.” (Ditihō 15:14) Baiseraela e ne e le batho ba leina la Modimo. Mme jaanong, gape, Modimo o ne a phutha ‘batho ba leina la gagwe’—phuthego ya Bokeresete, Iseraela wa semoya—bao gape ba neng ba tla supela Jehofa, ba itsise maikaelelo a Bogosi jwa gagwe. (Bagalatia 6:16) Ka mo go tshwanelang, batho bano ba lemogwa lefatshe ka bophara gompieno ka leina leo Jehofa ka boene a ileng a le tlotlomatsa mo go Isaia 43:10-12, ‘Basupi ba ga Jehofa.’ Go kopanyelediwa eng mo go nneng ga bone batho ba leina la ga Jehofa?

“Bashupi ba Me”

4. (a) Ke ka ntlhayang fa Basupi ba ga Jehofa gape ba tshwanetse go nna ‘basupi ba ga Jesu’? (b) Go ya ka Dikwalo, Jesu o ne a re tlogelela sekao sefe mo go neeleng bosupi ka Jehofa?

⁴ Jesu ka boene o ne a laela barutwa bano, ka gore: “Lo tla nna bashupi ba me . . . le go ea hèla kwa sekhutloñ sa lehatshe.” (Ditihō 1:8) “Bashupi ba me”—a mafoko ano a ga Jesu a raya gore bosupi bo tshwanetswe jwa neelwa malebana le Jesu fela, mme eseng go Jehofa? Lebogologolo! Mo nakong eo e e botlhokwa-tlhokwa, fa kamogelo ya ga Jehofa e ne e lebisiwa go tswa Iseraeleng wa nama go ya go wa semoya, go ne go tlhokafala go neela bosupi jo bo popota malebana le Keresete ene yoo thulaganyo eno e ntšha e neng e tla agelwa go ene. Lefa go ntse jalo, Jesu o sala a ntse a le kutlo go Rraagwe. O ne a re tlhomela sekao mo go neeleng bosupi malebana le leina le Bogosi tsa ga Jehofa.—Yohane 5:30; 6:38; 17:6, 26; 18:37.

5. (a) Re tshwanetse go neela bosupi malebana le dikarolo dife tse di amanang le Jesu? (b) Mo go seno, re latela dikgato tsa ga Jesu jang?

⁵ Jesu Keresete ke Motsereganyi wa kgolagano e ntšha mme Bakeresete ba ba tloditsweng ba ba mo go yone ba bileditswe go rua Bogosi. Ke “Kgōsana ea botshelō” yoo Jehofa a mo dirisang mo go rekololeng setho mo losong. Jesu ‘o tshwanetse go busa jaaka kgosi’ go fitlhela baba botlhe ba Modimo le batho ba gatakelwa fa fatshe mme paradaise e e galalelang e tsosolosediwa lefatsheng leno. Ke “Morwa Modimo” yo o bitsang baswi go tswa mabitleng a bone go ya tsogong. (Bahebera 9:15; Ditihō 3:15; Pesalema 110:1, 2, 5; 1 Bakorintha 15:25-28; Luke 23:42, 43; Yohane 6:25-29) Ka jalo, jaaka Basupi ba ga Jehofa, re supela gape malebana le karolo e e tlhomologileng ya Morwa mo go tlotlomatseng leina la ga Jehofa. Mo go seno, re latela dikgato tsa Morena wa rona, yoo ka boene e neng e le mosupi wa konokono wa ga Jehofa—“moshupi eo o ikanyègañ.”—Tshenolō 1:5; 3:14; Yohane 18:37; 1 Petere 2:21.

Ke Mang Yo O Supang?

6. (a) Ke bomang bale bosi ba ba neelang bosupi jwa Bogosi gompieno? (b) Ke ka ntlhayang fa go ka bolelwa gore bano ba ‘dira ditiro tse dikgolo’?

⁶ Gompieno, batho ba ba utlwanang ba neela bosupi “le go ea hèla kwa sekhutloñ sa lehatshe.” Ke batho bao go buiwang ka bone ke moaposetoloi Petere—‘batho ba leina ja Modimo’—bao ba neelang bosupi go Jehofa le Bogosi jwa gagwe ka Keresete Jesu. Malebana le seno, Jesu ka boene o ne a bolelela barutwa ba gagwe gore: “Eo o dumèlañ mo go nna, ditihō tse ke di dihañ, le ènè u tla di diha; me u tla diha ditihō tse dikgolo go heta tse; ka gonne kea kwa go Rara.” (Yohane 14:12) A le kafa letsogong le legolo la ga Rraagwe kwa magodimong, Kgosi Jesu Keresete jaanong o kaela bosupi jo bo atlabetseng fela thata-thata jo bo kileng jwa diragadiwa mo godimo ga lefatshe leno. Jaaka Jesu a ne a bolelela pele, fa “Mahoko a a Molemō a, a bogosi” a sena go “rèrwa mo lehatshiñ yeotlhe, go nna chupō mo merahiñ eotlhe; hoñ ke gōna bokhutlō bo tla . . tlañ.”—Mathaio 24:14.

7. (a) Ke ka ntlhayang fa makoko a La-Bodumedi a palelwa ke go supa? (b) Phapaanong le seo, ke ka ntlhayang fa Basupi ba ga Jehofa ba le tlhaga mo go kana-kana mo tirelong ya bone?

⁷ “Mahoko a a Molemō a, a bogosi” ke mafoko a a kgatlhisang fela thata ao a kileng a bolelwa ke batho. Ke mafoko a a molemo a a galalelang ao makoko a dikereke tsa La-Bodumedi a sa bueng gotlhelele kaga one. Ga ba na tsholofelo ya Bogosi ya isagwe. Ga go gakgamatse go bo ba palelwa ke go supa! Ba ile ba palelwa ke go tlhokomela tiragalo e e kgatlhisang segolo-bogolo mo ditsong tsotlhe-go goroga ga Morwa Motho ka kgalalelo ya selegodimo, go nna mo setulong sa gagwe sa bogosi se se galalelang le go atlhola merafe le batho ba lefatshe. Seo ke sengwe sa go supa kaga sone! Ka jalo, tlase ga kaelo ya boengele, Basupi ba ga Jehofa le ba ga Keresete wa gagwe jaanong ba bolela “Mahoko a a Molemō a a sa khutleñ go a bolèlèla ba ba agileñ mo lehatshiñ, le chaba ñwe le ñwe, le locō, le puō, le batho.” A o abalana ka tlhagafalo mo bosuping jono?—Tshenolō 14:6, 7; Mathaio 25:31-33.

Bosupi jo Bogolo ka 1984

8. (a) Ke ka ntlhayang fa re tshwanetse ra itumelela Pego ya Ngwaga wa Tirelo wa 1984? (b) Ke eng seo se gogelang barutwa ba basha?

⁸ Pego ya Ngwaga wa Tirelo wa Basupi ba ga Jehofa Lefatshe ka Bophara ya 1984, e e bonalang mo ditsebeng 20-23 tsa makasine ono, e supa kafa Modimo wa rona, ebong Jehofa a segofatsang maiteko a basupi ba gagwe ba ba ikokobetsang ka botlalo ka gone. Mo go se sotlhe, mafatshe a a 208 a emetswe. Mo go ano, mafatshe a le 172 a bega koketsego ya baboledi. Mme ka boitumelo, baboledi bano ba Bogosi gape ba bua kafa ‘Morena a ileng a ba ntsifatsa ka teng, ee, a ba totafatsa, mo go rataneng le mo go rateng batho botlhe.’ (1 Bathesalonia 3:12) Kutlwano e e lorato gareng ga batho ba ga Jehofa, gammogo le bosupi jwa Bogosi, e gogela matshwititshwiti a barutwa ba basha. Go bano Jesu o ne a re: “Lo tla itse boamarure, me boamarure bo tla lo golola.”—Yohane 8:31, 32.

9. (a) O ka tswa o ile wa nna le tshiamelo ya go nna le seabe mo go direng pego eno jang? (b) Dipalo di supang fa e le ka ga Jehofa le batho ba gagwe?

⁹ Pego eno ya tirelo e e kgatlhisang e ile ya sobokanngwa jang? E ile ya dirwa go tswa dipegong tsa tirelo ya tshimo tseo wena —mmoledi ka bongwe wa Bogosi—o ileng wa di isa kgwedi le kgwedi ka boikanyegi A ga o ipelele go bo o ile wa nna le karolo e potlana ka sebele mo pegong eno e e kgatlhisang? Dipalo tseno di bontsha kafa Jehofa a ileng a ‘goromeletsa morwalela wa masego’ godimo ga Basupi ba gagwe ka kgakgamatso ka gone —‘batho bano ba leina la gagwe’—bao ba ileng ba utlwana mo tirelong e e lorato e e bofaganyang ya kgolokwe.—Malaki 3:10; Pesalema 56:10, 11; Bakolosa 3:14.

10. (a) Ke eng seo se otlelelang gore basupi ba tshwanetse ba intsha-setlhabelo? (b) Dikwalo di reng kaga baboloka-bothokgami le tuelo ya bone?

¹⁰ Bontsi jwa bosupi jono bo ile jwa fitlhelelwa tlase ga pogiso le mathata mme le go intsha-setlhabelo mo go golo. Mono go tshwanetswe ga solofelwa, ka jaana lefoko “bosupi” jaaka le dirisiwa fano ke thanolelo ya Segerika martýs kana martyr, leo go lone go ntshitsweng lefoko “martyr,” leo le kayang yo o sikereng bosupi ka loso lwa gagwe. Seno se otlelela gore rona, jaaka Basupi ba ga Jehofa, re tshwanetse ra intsha-setlhabelo, ra ititaya sehuba ka metlha yotlhe go itirisa le go boloka bothokgami tlase ga maemo otlhe le eleng mo losong fa go tlhokafala.—Luke 9:23; bapisa Yobe 2:3; 27:5; 31:6; Ditihō 22:20; Tshenolō 2:10.

Baboloka-Bothokgami ba Segofaditswe

11, 12. (a) Jehofa o re neela ditlhomamisetso dife tse di nonotshang? (b) Batho ba gagwe ba ile ba fenya dikgatelelo tsa bobusaesi jwa bokgokgontshi jang?

¹¹ Mo dipakeng tsa pogiso, ‘batho ba leina’ la ga Jehofa ba ile ba ‘tlhoka nonofo e e fetang segolo bogolo’ e le gore ba tle ba kgone go fenya ditlhaselo tse di mahehe tsa ga Satane le masomosomo a gagwe a badimona. Jehofa o baakanyetsa ka nonofo eo mme a golole le go atlegisa Basupi ba gagwe ba ba ikanyegang. (2 Bakorintha 4:7-9; Isaia 54:17; Yeremia 1:19) Tsaya ka sekai boemo mo Axis powers ka Ntwa ya Lefatshe II, e e neng e eteletswe pele ke Jeremane, Italy, le Japane. Ka go dirisa mebuso ya bobusaesi e e setlhogo, Diabolo ‘o ne a tlhatsa ka molomo wa gagwe noka’ ya pogiso, go beta tiro ya bosupi e e kaelwang ke phuthego ya selegodimo ya seka-mosadi ya Modimo. A mme Satane o ne a atlega mo go seno? Gotlhelele nnyaa! Jehofa o ne a tsamaisa dilo gore mebuso ya puso ya batho ka batho ya lefatshe e metse morwalela oo. ‘Baikepi ba ne ba kgaolwa’ mme basupi ba ba ikanyegang ba ga Jehofa jaanong ba tlhogonolofala ka mo go gakgamatsang mo mafatsheng ao.—Tshenolō 12:15, 16; Pesalema 37:28, 29.

¹² Bosheng jaana, mo mafatsheng ao a mararo, Mokgatlho wa Watch Tower o ne wa tlhoka go aga le go tlhomelela difeketiri tse dikgolo e le gore go tle go romelwe morwalela wa mofuta o o farologaneng—dimilione tsa dimilione tsa Dibibela le dikgatiso tse di nyalanang natso tsa Bogosi go lemofalela Basupi ba ga Jehofa le batho ba bangwe semoyeng ba ba bolaetsweng boammaaruri ke tlala. Mo Jeremane, Italy, le Japane gompieno, baboledi ba Bogosi ba ba fetang 300 000 ba tsweledisa bosupi mo magaeng a batho. Abo Jehofa o segofatsa batho ba gagwe ba ba bolokang bothokgami ka koketsego mo tshimong ya lefatshe lotlhe jang ne!—Bapisa Pesalema 115:12-15.

13. (a) Ke eng seo se leng gone go Pego ya Ngwaga seo se bontshang gore basupi ba ba ikanyegang ba ile ba tshelela temana ya ngwaga wa 1984? (b) Seno se tshwanetse sa re tlhotlheletsa jang?

¹³ Lefa go ntse jalo, Diabolo, ka a itse gore lobaka lwa gagwe lo khutshwafetse, o tswelela go tlhabantsha bao ba “nntseñ ba bolokile ditaolō tsa Modimo, ba dumetse chupō ea ga Yesu.” (Tshenolō 12:12, 17) Kganetso ya ga Satane e befile segolo-bogolo mo mafatsheng ao a thathamesitsweng tlaseng ga pego ya “Mafatshe a Mangwe a a 28.” Basupi mo dikgaolong tseno ba ile ba tshelela temana ya ngwaga wa 1984 ka boikanyegi, “ba nna chosologō bogolo go bua lehoko ya Modimo ba sena poihō.” (Bafilipi 1:14) Koketsego ya bone ya baboledi ya diphesente tse 3,1 ke e e akgolegang segolo-bogolo. Re tlhotlhelediwa ke sekao sa bone, ekete rotlhe ka tlhagafalo re ka tswelela re neela Modimo “chupèlō ea pakō ka èna ka metlha eotlhe, eboñ louñō loa melomo e e ipolèlañ leina ya gagwè.”—Bahebara 13:15.

14. (a) Ke eng seo se ka re ‘diragalelang gore re itshupe’? (b) Re tshwanetse go tswelela go supela ka bopelokgale go sa kgathalesege maemo afe, mme ka baka lang?

¹⁴ Jaaka maemo a lefatshe a senyegela pele, ba bangwe ba rona kwa ntle le pelaelo, ba tla bogisiwa ba gogelwa mo dikgotleng le go golegwa. Jesu o ne a bua ka maitemogelo a a ntseng jalo mo dilong tse di neng di “tloga di dihala” pele ga bofelo mme a oketsa ka gore: “Me mo go tla lo dihalèla gore lo ichupè.” Jalo, Basupi ba ga Jehofa ba tshwanetse go tswelela go neela bosupi malebana le Modimo le Keresete mo maemong otlhe. Bontsi bo tswelela go dira seno go sa kgathalesege kganetso e e mahehe ya lelapa, ditshotlo tsa badiri ka bone kgotsa balekane ba sekolo, le dikgobo tseo ba di koegwang godimo mo tshimong ya bone ya go rera. A o supa ka bopelokgale go sa kgathalesege maemo a a lekang? He o mongwe wa bao Jesu a reng ka bone: “Lo tla ipolokèla meōea ea lona ka bopelotelele yoa lona.”—Luke 21:7, 9-19.

Koketsego ya Bogosi!

15. Dintlha dingwe tse di tlhomologileng mo tšhateng e e mo tsebeng eno ke dife?

¹⁵ “Koketsego ya Bogosi”—abo ke setlhogo se se tshwanelang jang ne sa dikopano tsa rona tsa kgaolo tsa selemo sa 1984! Ka go bo ngwaga eno eleruri e ile ya nna e e molemo thata ya koketsego. A ke o lebe fela mo tšhateng ya tsebe eno! Eno e ile ya sobokanngwa go tswa dipegong tsa makala a Mokgatlho wa Watch Tower a le 95 ao a okamelang tiro ya bosupi mo dinageng di le 203.

16. Tsopola dipolelwana dingwe tsa boipelo tse di itsegeng go dikologa kgolokwe.

¹⁶ Phatlha ga e re letle go kwala dipolelwana tsotlhe tse di kwadilweng tsa boitumelo tseo di ileng tsa amogelwa mo diofising tsa makala ao ga mmogo le dipego tsa one tsa ngwaga, mme go na le ditshobokanyo di se kae fela go dikologa kgolokwe:

Alaska: Motse otlhe wa Metlakatla o ne wa bona Basupi ba ga Jehofa ba ba 230 ba aga Holo ya Bogosi e ntle mo dioureng tse 32; e ne ya kgakolwa ka Sontaga sa mafelo beke one a a tshwanang ao.

Honduras: Tlhora e e kwa godimo fela thata go di feta tsotlhe ya baboledi ba ba 3 663; ka palo ya ba ba neng ba nna gone Segopotsong ya ba ba 17 005 go sa na le mo gontsi go dirwa.

Brazil: Ditlhora tse disha di ne tsa felela ka baboledi ba ba 160 927, ka batho ba ba 474 450 ba nna gone Segopotsong.

Thailand: Moya wa bobulatsela o a tshela, ka diphesente tse 22 tsa baboledi botlhe ba ne ba le tirelong ka April.

Papua New Guinea: Tlhora ya babulatsela ba ba thusang e ne ya oketsega ka diphesente tse 91; palo ya batla-Segopotsong e ne ya tlhatlhoga ka 1 000—go ya go 7 704.

Austria: Moya wa bobulatsela o ntse o anama, mme re nnile le ditlhora tse tlhano tse di tlhomaganeng mo tshimong eo; re ne ra nna le ditlhora tsa baboledi tse supa, ya morago jaana e le 15 618.

Zambia: Re ne ra fitlhelela tlhora ya ka metlha yotlhe ya baboledi ba ba 58 925: batla-Segopotsong e ne e le 393 431—go feta ngwaga-tlola ka 110 447.

17. (a) Tirelo ya bobulatsela e atologa jang? (b) Ke mekgele efe e e popota e e akgolelwang, mme go bomang? (c) Tlhora e ntšha ya baboledi ke efe, mme ke eng se se ka tswang se ile sa tlatseletsa go seno?

¹⁷ Dipego di bontsha gore barongwa le babulatsela ba ba ikanyegang ba tswelela go etelela pele mo go neeleng bosupi mo masimong a masha le a magologolo. Go a kgothatsa eleruri go bona koketsego mo babulatseleng. Palo yotlhe ya babulatsela ba ba thusang ba ba neng ba bega ka April e ne ya kukumotsega go ya go tlhora e e kwa godimodimo ya 323 644 ya koketsego ya diphesente tse 49. Ke ba se kae fela bao ba neng ba se ka ba bona tshiamelo ya bone ya go fetela mo ditlhopheng tsa babulatsela ba ka metlha. Gape, bontsi jwa baboledi ba rona ba basha ba Bogosi ba tlhomile tirelo ya bobulatsela jaaka mokgele wa bone mme ba dira dipaakanyo tse di dirang go kgona seo mo dingwageng tsa bone tsa bofelo tsa sekolo se segolwane. Matswela otlhe a supiwa ke koketsego e ntle-ntle ya bobulatsela. Seno se ile sa thusa gape go agelela moya o o tlhagafetseng mo diphuthegong, o tlatseletsa kwa ntle le pelaelo, go tlhora e ntšha ya lefatshe ka bophara ya baboledi baba 2 842 531, koketsego ya diphesente tse 7,2 go feta tlhora ya 1983. A ga o ipelele go bo o ile wa nna le seabe mo kgatelong-pele eno?

18. (a) Ke dikoketsego dife tse dingwe tse di kgatlhisang tse di neng di le gone ka 1984? (b) Pego ya Segopotso e supa katologo efe e e ka nnang gone, mme babadi ba rona baka arabela jang?

¹⁸ Bosupi jo bo ipedisang jo bo neng jwa neelwa ka 1984 bo bonala gape mo koketsegong ya tsamaiso ya dimakasine le dibuka tse dingwe, palo e kgolo e e begilweng ya dioura tsa tirelo ya tshimo, koketsego e e tlhomologileng ya maeto a a boelang go batho ba ba kgatlhegang le dithuto tsa magae tsa Bibela tseo di ileng tsa tshwarwa le bano. Abo re lebelela pele go maungo a mangwe gape jang ne go tswa tirelong eno e e tlhagafetseng! Mme go sa na le kgolo e nngwe gape e e saleng gone ya go phuthiwa mo go golo fela thata! Seno se bontshiwa ke palo e e tlhomologileng ya bao ba nnileng gone ngogola mo Sejong sa Morena sa Maitseboa ka April 15. Mo diphuthegong tsa Basupi ba ga Jehofa go dikologa lefatshe, palo yotlhe ya ba ba neng ba nna gone e ne e le 7 416 974, mme le ba ba 9 081 bao ba supileng gore ke ba “lecomanyane” la Morena ka go ja senkgwe le beine. Ekete babadi botlhe ba rona ba ka tswelela go gola semoeng, ele gore go tle go nne le sebaka sa go ka abalana mo bosuping jo bo molemo le mo go phuthiweng mo go sa ntseng go larile fa pele.—Bapisa Baefesia 4:15; Bafilipi 1:9-11.

19. Re ka lebogela Jehofa eng, mme thapelo ya rona malebana le isagwe ke efe?

¹⁹ Eleruri, re ka nna ra boeletsa mafoko a ga Moshe mo go boleleng ka Basupi ba ga Jehofa, ‘batho ba leina la gagwe’ ba motlha wa segompieno: “Yehofa Modimo oa lona o lo ntsihaditse, me bōnañ, gompiyeno lo chwana le dinaledi tsa legodimo ka bontsi.” (Duteronome 1:10) Ke thapelo ya rona gore Morena Modimo wa rona, ebong Jehofa, o tla tswelela go atlegisa bosupi jwa Bogosi le go tlatseletsa mo koketsegong!

O Ne O Ka Reng?

◻ Ke ka baka lang fa Basupi ba ga Jehofa ba tshwanetse gape ba nna ‘basupi ba ga Jesu’?

◻ Ke bosupi bofe jo bogolo jo bo neng jwa neelwa ka 1984?

◻ Ke eng se se bontshang gore Jehofa o segofatsa basupi ba gagwe ba ba ikanyegang?

◻ Pego ya 1984 e tshwanetse ya re tlhotlheletsa ka ditsela dife?

[Lebokoso mo go tsebe 23]

‘Ba Itumetse, Baa Ipela, Baa Leboga’

Go tswa lefatsheng leo tiro ya Basupi ba ga Jehofa e sa leng e thibetswe go feta dingwaga tse di fetang 40 go tla pego eno: “Boipelo jo bogolo jo re neng ra bo ipelela ke go itemogela koketsego ya tiro ya go rera le go ruta mo tshimong. Bontsi bo ile jwa direla jaaka babulatsela ba ba thusang. Mongwe wa bone o ile a supa maikutlo a gagwe ka mafoko ano: ‘Ke tletse ka boipelo le boitumelo, mme le kgotsofalo e e boteng.’ Mmulatsela yo mongwe yo o thusang o ne a re: ‘Ke itumetse fela thata go bo ke dira sengwe seo se kgatlhang Jehofa. Ke ne ka kgona go simolola dithuto tsa magae tsa Bibela tse disha di le tlhano.’ Yo mongwe o ne a oketsa ka gore: ‘Ke lebogela Jehofa yo o neng a nthusa go tlhagolela lorato lo lo tlhokafalang go thusa batho ba bangwe.’ Mo phuthegong e nngwe ya baboledi ba ba 61 ba le 38 ba ne ba direla jaaka babulatsela ba ba thusang mo kgweding e le nngwe. Jalo, go ne gs simololwa dithuto tse disha tsa Bibela di le 66.

[Tšhate mo go tsebe 18-21]

PEGO YA NGWANGA WA TIRELO WA 1984 WA BASUPI BA GA JEHOFA LEFATSHE KA BOPHARA

(See bound volume)

[Tšhate mo go tsebe 22]

Papiso ya Pego ya Lefatshe

1984 1983 Koketsego

Makala a Watch Tower 95 94

Mafatshe aa Begang 203 205

Tlhora ya Baboledi 2 842 531 2 652 323 7,2%

Palogare ya Baboldedi 2 680 274 2 501 722 7,1%

Palogare ya Babulatsela 258 936 206 098 25,6%

Babulatsela ba ba Thusang (April) 323 644 217 860 48,6%

Dioura Tsotlhe 505 588 037 436 720 991 15,8%

Tshimo Dibuka tse di Tsamaisitsweng 36 639 925 36 039 400 1,7%

Dipeeletso tse di Bonweng 1 812 221 1 756 153 3,2%

Dimakasine tse di Tsamaisitsweng 287 358 064 258 698 636 11,1%

Maeto a a Boelang 195 819 093 174 687 309 12,1%

Palog. Dithuto tsa Bibela 2 047 113 1 797 112 13,9%

Batla Segopotsong 7 416 974 6 7677 707 9,6%

Baji Segopotsong 9 081 9 292