Kganetsano ya Bogosi e Tshegeditswe ke Merafe-rafe

“U atisitse morahe, Yehofa, u atisitse morahe; u galaledicwe: u katisitse melelwane eotlhe ea lehatshe.”—ISAIA 26:15.

1. (a) “Morahe” wa segompieno o diragaditse Isaia 26:2 jang? (b) “Morahe” ono o fapaana jang le merafe ya lefatshe?

KA GONE, ke morafe ofe o Jehofa a o segofatsang ka katologo? Ke “Morahe o o siameñ, o o tshegetsañ boamarure.” (Isaia 26:2) Ke morahe wa semoya wa Bakeresete ba boammaaruri ba mosadi wa selegodimo wa ga Jehofa, “Yerusalema o o kwa godimo,” o o tsetsweng “ka letsatsi le le leñwe hèla,” mo ngwageng wa segompieno wa 1919. Phapaanong le merahe ya lefatshe le baruti ba yone, bao ba neng ba lwela bolaodi jwa lefatshe ka Ntwa ya Lefatshe I, “morahe” wa ga Jehofa kwantle le go itatola o tshegetsa Bogosi ja Bomesia jwa gagwe, jo bo tlhomilweng kwa magodimong ka 1914. (Bagalatia 4:26; Isaia 66:8; Tshenolō 11:15-18) Jehofa o ne a lere “morahe o o siameñ” ono mo paradaiseng ya semoya ya tiro ya Bogosi mme a o fa tiro ya go neela bosupi jwa bofelo go merafe le batho ba lefatshe.—Mathaio 24:14; 25:31-33.

2. Ke ka mabaka afe “morahe” ono o ileng wa ipela?

² Tiragatsong ya sehela sa polelelo-pele sa ga Isaia 26:1-6, maloko a morafe o o sa tswang go tsalwa a ne a tsena ka dikgoro tse di atlhamologileng thata mo go atameleng ga bone “mo thabeñ ea Siona, le mo motsiñ oa Modimo o o tshedileñ, mo Yerusalema oa selegodimo.” (Bahebera 12:22) Baruaboswa bano ba Bogosi ka boipelo ba tsaya-tsia mafoko a sehela: “Ikanyeñ mo go Yehofa ka bosakhutleñ; gonne mo go MORÈNA YEHOFA go na le lehika ya bosaeeñkae.” Jehofa “u atisitse morahe,” go nna le maloko a a tletseng, mme banni bano ba morafe o o boitshepo bagalaletsa Jehofa jaaka “Lehika” ja bone le ‘Morena Modimo,’ ba na le tsholofelo tota go re o gaufi le go diragatsa boikaelelo jwa gagwe jo bo molemo.—Isaia 26:15; 25:8.

3. Ke ka tsela efe e nngwe e e kgatlhisang e Jehofa a galaleditsweng ka yone?

³ Mo dingwageng tsa bosheng Jehofa o “katisitse melelwane” ya lefatshe la gagwe la bolegodimo go ya kgakala. Seno o se dirile ka go dira go re gonne le sebaka sa “dilō tse di eletsegañ” mo merafeng yotlhe ya lefatshe—“boidiidi yo bogolo” jo bo nnang karolo ya batho ba gagwe ba ba ineetseng. Bano ba ‘tlatsa ntlo ya gagwe ka kgalalelo’ jaaka le bone gape, ba neela bosupi ka leina la gagwe le Bogosi.—Hagai 2:7; Tshenolō 7:9, 15.

Jehofa O Atisitse Morafe ka 1982

4. (a) Ke jang Esekiele 9:1-11 e tlhomileng sekao se se molemo go bao ba tseneletseng mo tirong ya go ‘tshwaya’ gompieno? (b) Ka ntlha ya go ikanyega ga rona mo go begeng tirelo ya rona, ke kgotsofalo efe e re ka nnang le yone?

⁴ Jaaka ka peloyotlhe ba tshegetsa kganetsano ya Bogosi, Basupi ba ga Jehofa ba kwala dipego tsa tirelo ya bone ya kgwedi le kgwedi. Ka ntlha ya seno, ba tshwana le monna yo o neng a tshotse kurwana ya inka ya mokwaledi, yoo tlhalosiwang mo go Esekiele 9:1-11, yo o laotsweng go tshwaela batho phalolo mme e re ka boikanyegi morago a bege gape go Jehofa, ka go re: “Ke dihile hèla yaka u ntaotse.” Abo go ka ipedisa jang ko Dipokanong tsa Tirelo go utlwa ka pego e ntle e e feletseng ya phuthego le go itse gore pego ya gago, le fa e ne e lekana le ‘madinyana a mosadi wa motlholagadi,’ e tlatseleditse matsweleng ao! Gape, jaaka ngwaga mongwe le mongwe re tlhatlhoba palo e kgolo ya tiro mo pegong ya ngwaga le ngwaga ya lefatshe ka bophara ya Basupi ba ga Jehofa, go ka kgatlhisa go akanyetsa ntlha ya go re dipego tsa rona ka borona, le fa di ka ne di le dinnye go le kae, le fa go le jalo ke bontlhanngwe jwa rekoto e e boitshegang lefatshe ka bophara!—Mareko 12:42.

5. (a) Jehofa o ikgalaleditse jang mabapi le Pego ya Ngwaga wa Tirelo wa 1982? (b) Tiro ya go ‘dira barutwa’ e tlhagisitse maungo jang?

⁵ Mo ditsebeng 20-23 o tla bona “PEGO YA NGWAGA WA TIRELO WA 1982 WA BASUPI BA GA JEHOFA LEFATSHE KA BOPHARA.” Leina le le galalelang la Morena Modimo Jehofa e le ruri le galalediwa ke pego eno ya tirelo e e gakgamatsang! Go lebelela dipalo tsa kakaretso ko tlase ga tsebe ya 23, re bona koketsego e e kgothatsang bogolo ya 4.2 lekgolong mo palong ya bao ba ileng ba arola kgwedi le kgwedi mo tirelong ya Bogosi mo kutlong ya taolo ya ga Jesu: “Ke gōna tsamaeañ, lo dihè merahe eotlhe barutwa.” Gape, go na le tlhora e e molemo-lemo ya Basupi ba ba 2 477 608 ba ka nako nngwe mo ngwageng ba ileng ba arola mo go rereng mafoko a a molemo “mo ponoñ, le ka go nna [ba] tsamaea le matlo.”—Mathaio 28:19; Ditihō 20:20.

6. Mabapi le thomo ya bone, ke tsholofelo efe e e tlhagcifetseng e Basupi ba ga Jehofa ba nang le yone?

⁶ Lefa gontse jalo, Basupi ba ga Jehofa ga ba lebelela go sokolola lefatshe lotlhe. Go na le moo, taelo e ba e filweng ya bomodimo ke “go bolèla ñwaga o o lebosègañ oa ga Yehofa, le letsatsi ya pusholoshō ya Modimo oa rona.” Ke tsholofelo ya rona e e tlhagafetseng le thapelo gore didikadike tse di oketsegileng tsa dibilione tse dintsintsi tsa batho ba lefatshe di tla arabela molaetsa wa Bogosi pele “sepitla se segolo” se tlosa dilo tsotlhe tse di gobatsang le tse di senyang. Ka gone he, “lehatshe le tla bo le tletse kicō ea go itse Yehofa, yaka metse a khurumeditse lewatlè.”—Isaia 61:2; Mathaio 24:14, 21, 22; Isaia 11:9.

7. Ke jang phuthego ya ga Jehofa e ipaakanyeditseng katologo e e oketsegileng?

⁷ Ka go lebela pele koketsegong e e potlakileng ya tiro ya Bogosi, Basupi ba ga Jehofa lefatshe ka bophara ba ne ba tshwaregile mo dingwageng tse di fetileng mo go atoloseng didirisiwa tsa bone tsa diphuthego. Ntlo-kgolo kwa Brooklyn, New York, e ne ya tlhabolola le go godisa didirisiwa tsa diofisi kwa 25 Columbia Heights, ebile ditsamaiso tsa feketiri kwa Brooklyn le kwa Watchtower Farms di ne tsa tsenngwa metšhine ya khomputara le go tlhabololwa ka metšhine e e gatisang ya segompieno ya “offset.” Go kgabaganya lefatshe, makala a Mokgatlho a a fetang 30 a ntse a aga didirisiwa tse disha, le go di godisa, dingwe tsa tsone ke tse di tshwantshitsweng mo tsebeng ya 19. Phuthego ya ga Jehofa e tlhomeletswe koketsego e nngwe e kgolo le katologo!

8. Mabapi le koketsego ya baboledi ba Bogosi, ke dintlha dife tse di go kgatlhileng fa o ne o tlhatlhoba tshate e e mo ditsebeng 20-23?

⁸ Mo godimo ga tsotlhe, dinaga tse 95 gareng ga tseo di rulagantsweng mo Pegong ya Ngwaga wa Tirelo di ne tsa fitlha tlhoreng e e kwa godimo ya palo ya baboledi ba Bogosi ka 1982, mme ebile dingwe tsa tseno di ne tsa dira se se sa tlwaelegang. Ka sekai, kgaolo e e nyeulang ka batho ya Hong Kong e ne ya berekwa e le lwantlha ke badihedi ba Bogosi ba ba 1 000. (Isaia 60:22) Brazil e ne ya gatela pele thata, ka tlhora e ntšha mo tshimong ya ba ba 133 377, eno e nna “lecomane” le legolo thata la Basupi kwantle go la United States. (Mika 2:12) Jaaka setlhopha sa bobedi se segolo sa bodumedi mo Italy ya Katoliki, Basupi ba ga Jehofa ba ipeletse koketsego ya 8% mo tlhoreng ya baboledi ba Bogosi ba ba 98 172. (Mareko 4:8, 20) Ditlhaketlhakeng tsa lewatle, tse dikgolo le tse di potlana, go tloga go Australia go ya go Caribbean, di ile tsa gatisa ditlhora tse dintsha tsa baboledi. (Isaia 42:10) Go na le boipelo jwa go elatlhoko go re go nnile le tswelelo pele e ntle mo mafatsheng a a nang le mathata a a botlhoko, jaaka Argentina, EI Salvador, Pakistan le Uganda. (Pesalema 91:9, 10) Dinageng tseo phuthego ya ga Jehofa e sa leng e tlhomilwe le tsone di ile tsa ipelela gape go gatela pele eleruri—Britani, Canada, Federal Republic ya Jeremane—mme ga mmogo le U.S.A., eo ka August ngogola e neng ya fitlhelela tlhora ya baboledi ba ba 613 007 ba Bogosi mo tshimong, koketsego ya 8,8%.—Ditihō 16:5.

Go “Bula tsela” ka Mafoko a a Molemo

9. (a) Pego e reng ka koketsego ya babulatsela? (b) Ke ka ntlha yang fa tshiamelo eno e hakelwa botlhe bao ba ka kgonang go ka e dira?

⁹ Go baboledi bano ba lefatshe ka bophara ba Bogosi, palogare ya 172 859 e ne ya bega kgwedi le kgwedi jaaka badihedi ba “babulatsela,” ba senya nako e e bonalang letsatsi le letsatsi mo go boleleleng ba bangwe mafoko a a molemo. Go bapisiwa le ngwaga o o fetileng, ditlhopha tseno tsa badihedi ba nako e e tletseng di oketsegile ka 14%! Ba bantsi gape, ba rulaganyetsa go tsenelela tirelo eno e e ipedisang. A o mongwe wa bano? Eleruri, e tla go kgonisa go ‘supa ka botlalo thata,’ ka go latela sekao sa boaposetoloi, mabapi le masego a a galalelang a a fela fa gaufi a botlhe ba ba tlang go Jehofa, ka go bontsha “tumèlō mo go Morèna oa rona Yesu Keresete.”—Ditihō 2:40; 8:25; 10:42; 20:21, 24; 23:11; 28:23.

10. (a) Ke ka tsela efe eo tirelo ya bobulatsela gompieno e ka tshwantshiwang le tirelo ya Banasirita ba Iseraele? (b) Ke Jang Basupi ba ga Jehofa eleruri ba itekileng mo mafatsheng a a farologaneng?

¹⁰ Leha ba sa dire maikano ape a go nna bareri ba nako e e tletseng, babulatsela bano ba ba ikanyegang, go akaretsa le “babulatsela ba ba thusang” (bao gongwe ba ka direlang jalo mo kgweding kana tse pedi), ba tshwana le Banasirita mo Iseraeleng wa bogologolo, ka go bo mo makgetlong a mantsi ba direla Modimo ka go intsha setlhabelo mo go golo. Mo mafatsheng a mangwe batlhanka ba ga Jehofa ele ruri ba ile ba dira mo go golo ka go ‘isetsa Modimo tshupelo ya pako ka ena ka metlha yotlhe.’ Ka sekai, ka April ngogola, Venezuela e ne ya bega babulatsela ba ba thusang ba le 2 464—136% go feta tlhora ya palo ya ngogotlola. Mme kwa Trinidad 51% ya baboledi ba yone botlhe e ne e le babulatsela ba ba tlhagafetseng. Ka June ngogola, nako e pula e nang matsorotsoro kwa Japane, ba ba 25 140 ba ne ba arola mo tirelong ya bobulatsela—36% ya baboledi botlhe ba Bogosi mo lefatsheng leo. A boipelo le kgotsofalo tse di bonwang fa mongwe a iitatola e le gore a bake Jehofa ka botlalo bogolo!—Bahebera 13:15; Dipalō 6:8; Luke 9:23-25.

11. (a) Ke ka ntlha yang fa bao ba sa kgoneng go bula tsela ba sa tshwanela go kgobega marapo? (b) Ke pego efe e e molemo-lemo ya tirelo le go nna go ne ga batho go bontshang gore Basupi ba ga Jehofa gongwe le gongwe ba ne ba tlhagafetse thata?

¹¹ Lefa gontse jalo, eseng fela babulatsela ba ba ineetseng mme eleruri “morahe” otlhe wa Iseraele wa semoya, gammogo le didikadike tsa balekane ba bone ba “boidiidi yo bogolo,” ba dirile boiteko jo bo akgolegang bogolo mo therong ya Bogosi ka 1982. Botlhe ba ile ba tsenya letsogo mo tlhoreng e ntšha ya dioura tse di fetang tsotlhe tse di 384 856 662 e e sentsweng mo tirelong ya tshimo ka ngwaga oo, mme ba bantsi ba ile ba arola mo go tsamaiseng dithuto tsa Bibela tse di tshwarwang beke le beke mo magaeng a batho ba ba kgatlhegelang tse di 1 586 293. Mo letsatsing la Segopotso sa loso la ga Jesu, lo lo neng lwa ketekwa ka April 8, 1982, palo ya lefatshe ka bophara ya ba ba nnileng gone mo diphuthegong di le 44 953, e ne e le batho ba le 6 252 787—ele ruri matshwititshwiti! Mme ekete re ka nna tlhaga mo go tsweleleng go tlhokomela gore re otle “dikwanyana” tseno tsotlhe semoyeng!—Johane 21:15-17.

12. Ke lesego lefe le le bolelwang mo go Dipalō 6:24-26, mme le ka dirisediwa go bomang jaanong?

¹² Morago fela ga go umaka molao mabapi le Banasirita, Jehofa o ne a bolelela Moshe go segofatsa morafe otlhe, ka go re: “A Yehofa a gu segōhatsè, a gu bolokè: A Yehofa a gu phatsimisetsè sehatlhōgō sa gagwè, me a nnè pelochweu go wèna: A Yehofa a gu choleletsè sehatlhōgō sa gagwè, a gu neè kagishō.” Abo mafoko ano ka bontle a dirang jang gompieno go morafe oo boitshepo wa ga Jehofa wa Iseraele wa semoya—mme gape go “bontsi yoa batho yo bo tlhakanyeñ” go tswa mo merafing yotlhe e e neng ya tla go abalana le bone mo go direleng Jehofa! Ele ruri go a kgatlhisa go itse gore basupi ba basha ba ba 138 540 ba ga Jehofa ba ne ba kolobediwa go kgabaganya lefatshe ngogola, koketsego ya 15.6% go feta palo ya ba ba kolobeditsweng ngwaga tlola. Leina la ga Jehofa le ile la bewa go botlhe bano, gammogo le botlhe ba bangwe ba ba leng mo phuthegong, gore Jehofa ka boene a tle a ba “segōhatsè.”—Dipalō 6:24-27; Ekesodo 12:38.

‘Re Bafenyi’

13, 14. (a) Boemojwa bakaulengwe ba rona tlase ga “Mafatshe a Mangwe a a 28” ke bofe? (b) Ke kgothatso efe e re ka e bonang mo sekaong sa bone?

¹³ Mo mafatsheng a le mmalawa Basupi ba ga Jehofa ba tshwanelwa ke go ganelela tumelo ka tlhoafalo tlase ga maemo a a thata. Ka ntlha ya go gakala ga mmaba, le go sireletsa bakaulengwe ba rona, mafelo mangwe go ano ga a a kwalwa ka bongwe mo tšhateng, mme dipalo tsa kakaretso ya tirelo ya bone di bonala mo moleng o o fa godimo ga palo ya kakaretso, ka setlhogwana: “Mafatshe a Mangwe a 28.”

¹⁴ Basupi ba ba emelwang mo dipegong tseno e le ruri ke “bahenyi ka èna eo o [re] ratileñ.” (Baroma 8:37-39) Jaaka re akanyetsa ka tirelo ya bone e e ikanyegang, ekete re ka iketleeleletsa gape, go fenya dikgoreletsi tsotlhe e le go re re tswelele pele re direla Jehofa ka ‘pelo yotlhe, moea, tlhaloganyo le nonoho,’ Jaaka ka lorato re thusa mongwe ka rona go dira jalo. Ka tsela eno re tla bo re bontsha gore ga re “kgakala le bogosi yoa Modimo.”—Mareko 12:29-31, 34.

15-17. (a) Ke dipego dife tse di kgothatsang tse re nang le tsone mo dikgaolong tse di tlhasetsweng ke dintwa tsa lefatshe? (b) Ke dipego dife tse dingwe tse di tshwanang tse o di badileng mo ngwageng o o fetileng? (c) Thapelo ya Basupi ba ga Jehofa mabapi le babusi ke efe?

¹⁵ Mosadi wa molebedi wa potologo kwa Lebanona o ne a kwala jaana: “Mo tirelong, nako nngwe le nngwe fa re utlwa dibomo tse di kgadikanyang difofane di thunya, re ne re iphitlha tlase ga dikgoro tsa dikago gore re sireletsege, ka go bo batho ba le batlhano ba ne ba bolawa fa ba ne ba welwa ke dihawa tsa marumo mo kgaolong eo re neng re dira ka ntlo le ntlo mo go yone ka beke eo. Ka metlha dithapelo tsa rona go Jehofa e ne e le tsa gore a segofatse kopano e e tlang le bakaulengwe ba rona kwa West Beirut. Kopano ya potologo e ne e le ka June 13 ngogola. Re ne ra ipela thata letsatsi pele ga moo ka di 12 fa seromamowa se ne sa bolela ka peo-marumo-fatshe, ka jalo kopano ya tswelela sentle.” Mme morago dipego di ne tsa bontsha gore ga go ope wa Basupi ba ga Jehofa yo o neng a gobala mo West Beirut ka nako eo.

¹⁶ Mo lefatsheng lengwe la Amerika Bogare, koo tirelo e e kagiso ya Basupi ba ga Jehofa e sekang ya tlhaloganngwa ke goromente yo mosha, barongwa botlhe ba ne ba lelekiwa. Banyalani bangwe ba barongwa ba ne ba tsewa mme ba tshwarelwa mo sephiring mo dibekeng tse pedi, go fitlhelela Basupi ba ba ikanyegang ba lefatshe leo ba ba bona mme ba bolelela ba boemedi jwa Britani gore ba kae, koo go neng ga dirwa dithulaganyo tsa gore ba emelele. Go ne ga bolelwa gore mo kgaolong eo bagolwane ba puso ba ne ba senka “motlhanka eo o boikañō le eo o botlhale” yo ba reng ba utlwaletse fa e le ene moeteledi pele wa tiro ya Basupi ba ga Jehofa.—Mathaio 24:45-47.

¹⁷ Mo lefatsheng lengwe la Afrika la Zimbabwe, mogolwane wa maemo a a kwa godimo wa ga goromente o ne a bolelela kokoano ya sepolotiki a re: “Fa fela e le Basupi ba ga Jehofa ga re na mathata. Ga se baba ba rona. Mme fa ba khutlisa go nna Basupi ba ga Jehofa he jaanong re tshwanetse go nna pudimatseba.” Ke thapelo ya batho ba boammaaruri ba Modimo gore bagolwane botlhe ba ga goromente ba nne le pono e e ntseng jalo e e sedifaditsweng, go re Basupi ba ga Jehofa botlhe ba tle ba “tshelè mo boiketloñ le mo tidimaloñ, ka poihōmodimo eotlhe le ka tshisimogō.”—1 Timotheo 2:1, 2.

Dikopano tsa Kgaolo tsa “Boammaaruri jwa Bogosi” Di Bula Matlho!

18. Ke buka efe e e tlhomologileng e e neng ya ntshiwa kwa Dikopanong tsa Kgaolo tsa “Boammaaruri jwa Bogosi,” mme boikaelelo jwa yone ke eng?

¹⁸ Ka kgwedi ya June 1982, Dikopano tsa Kgaolo tsa Basupi ba ga Jehofa tsa merafe-rafe tsa “Boammaruri jwa Bogosi” di ne tsa simolola. Mo U.S.A. fela go nnile tlhora e ntšha ya ba ba neng ba le goneya 1 108 022.a Mo dikopanong tseno tsa 1982 mo U.S.A., gammogo le mo mafelong a a mmalwa a mangwe, thuso e ntsha ya go ithuta Bibela e ne ya ntshiwa. Eno ke buka e ntle ya ditshwantsho ya ditsebe tse 256 ya setlhogo O Ka Tshelela Ruri mo Lefatsheng la Paradaise. Mme eno ga se buka ya ditshwantsho fela. Lefa e le gore ke buka e bogolo e diretsweng bana. Ditshwantsho tsa yone tse dintle di ikaeletse go ruta batho ba dingwaga tsotlhe, go re ba tle ba thusiwe go tlhagolela nonoho eo e e nayang botshelo, TUMELO. E ne e le ka ntlha ya TUMELO ya bone e e itsetsepetseng ka go tia mo kitsong ya boammaaruri ya ga Jehofa, Lefoko la gagwe, le maikaelelo a gagwe, go bo basupi ba ba ikanyegang ba bogologolo ba ne ba kgona go fenya dikgoreletsi tse di neng di lebega di ka se ke di fenngwe. Ke ka TUMELO go bo “boidiidi yo bogolo” jwa batho ba ba sekametseng mo tshiamong gompieno ba kopana le kgwetlho ya ‘metlha ya bofelo’ eno mme ba tla bona poloko ka “sepitla se segolo” go tsena mo Thulaganyong e Ntsha ya ga Jehofa.—Tshenolō 7:9, 14; 2 Timotheo 3:1; Bahebera 10:38, 39; 11:32-38.

19. Wena ka bowena o ka akgela jang ka buka eno?

¹⁹ Tlhogo nngwe ya lelapa, moamogedi yo itumetseng wa buka eno, o ne a akgela jaana: “Eleruri ke mpho e e tswang go Jehofa e ke iseng ke e bone fa esale ke kopanela le boammaaruri mo dingwageng tse 25 tse di fetileng. Tsela ya go kwalwa ga yone e tla ikuela go mongwe le mongwe. Ditshwantsho di go suteletsa gore o bone boikutlo bongwe le bongwe jo bo bontshiwang. Maikaelelo a Bogosi jwa Modimo a diragadiwa ka tsela e e tlhatswang pelo tota.” Buka eno e e tlhwatlhwa kgolo e setse e gatisitswe ka dipuo tse 21, tse dintsi di santse di tla latela.

20. (a) Ke ka ntlha yang fa go eletsega gore didikadike tse di oketsegileng di ithute boammaaruri ka sedirisiwa seno? (b) Bao ba tsayang-tsia Isaia 26:2, 4 e tla re gautshwane ba itemogele tiragatso efe?

²⁰ Go solofetswe gore didikadike tsa batho go kgabaganya kgolokwe ya rona ba sa ntse ba tla ithuta boammaaruri ka buka eno e ntsha, O Ka Tshelela Ruri mo Lefatsheng la Paradaise, le gore bano ba tla ema ka tlhomamo ba tshegetsa kganetsano ya Bogosi, fa ka bofefo mafoko a bofelo a “sehela” sa ga Isaia kgaolo 26 a tla diragadiwa: “Ntlo, wèna chaba ea me, u tsènè mo matlunyaneñ a gago, u icwalèlè meyakō u le kwa teñ; u iphitlhè ka lobaka lo lonyenyane, go tsamaee kgakalō e hete. Gonne, bōnañ, Yehofa o cwa mo heloñ ga gagwè, a cwèla go beletsa banni ba lehatshe boikèpō yoa bōnè; lehatshe le yeōna le tla senola madi a yeōna, me ga le ketla le tlhōla le bipa babolaiwa ba yeōna.” Ka gone, morago ga fa Jehofa Morena Modimo a sena go tlotlomatsa leina ja gagwe je legolo ka Hara-Magedona, “morahe o o siameñ, o o tshegetsañ boamarure,” ga mmogo le balekane ba bone ba baobamedi ba “boidiidi yo bogolo,” ba tla tswa ba sa gobala, go bona boammaaruri jwa ditsholofetso tsotlhe tse di kgatlhisang bogolo tse “MORÈNA YEHOFA” ka boikanyegi a ileng a di kwala mo Lefokong la gagwe.—Isaia 26:2, 4, 20, 21; Tshenolō 7:9, 14; 16:13-16.

[Ntlha e e kwa tlase]

O akanyetsa tiragatso ya poletelo pele ya segompieno ya “sehela” sa ga Isaia 26:

◻ Temana 2: Ke mang yo lwantlha a neetseng tshegetso ya lefatshe ka kganetsano ya Bogosi, jang, mme ka matswela afe?

◻ Temana 4: Ke tsholofelo efe eo mafoko ano a tshwanetseng go e gatiseletsa mo motlhankeng mongwe le mongwe wa ga Jehofa?

◻ Temana 15: Dintlha tsa botlhokwa tsa Pego ya Ngwaga wa Tirelo wa 1982 di supa tirafatso efe?

◻ Temana 20: Ke lefelo le fe le Jehofa a le baakanyetsang jaaka botshabelo, mme ka lobaka lo lo kae?

◻ Temana 21: Seno se gatelela jang lebaka la ga Jehofa la go ntsha katlholo?

[Lebokoso/Setshwantsho mo go tsebe 27]

Basupi ba ga Jehofa lefatshe ka bophara ba ne ba ipela fa go gololwa buka; O Ka Tshelela Ruri mo Lefatsheng la Paradaise, ya ditsebe tse 256 e e nang le ditshwantsho, ka nako ya Dikopano tsa Kgaolo tsa “Boammaaruri jwa Bogosi.” Buka eno, e ka phepafalo e tlhalosang dithuto tsa motheo tsa Bibela, e ikuela go batho, bagolo le bannye ka go tshwana, bao ba batlelang lefatshe la rona dilo tse di molemo. Go lebeletswe gore e tla nna le seabe se segolo mo go tsholetseng tiro ya lefatshe ka bophara ya Basupi ya go kgothaletsa thuto ya Bibela mo magaeng.

[Tšhate mo go tsebe 20-23]

PEGO YA BASUPI BA GA JEHOFA LEFATSHE KA BOPHARA YA NGWAGA WA TIRELO WA 1982

(Leba kgatiso)

[Setshwantsho mo go tsebe 19]

Dingwe tsa didirisiwa tsa makala a Watch Tower tse di neng di santse di agiwa kwa Yuropa ka 1982

ENEBAKK, NORWAY

HOLBÆK, DENMARK

AJAVILVIR (MADRID), SPAIN

SELTERS, GERMANY