Go Diragetseng ka Go Lebelela ga Bakeresete?

ME SE ke se raeañ lōna, ke se raea botlhe hèla, ka re, Lebèlèlañ.” Mafoko ao a ga Jesu Keresete a ntse a utlwala mo ditsebeng tsa Bakeresete ba ba pelo-e-phepa go ralala makgolo a dingwaga. Mme ke maloko a le kae a Roma Katoliki, Eastern Orthodox kana a dikereke tsa Maporosetanta tse di dikgolo a a santseng a na le tlhagiso eo e e utlwalang mo ditsebeng tsa bone?—Mareko 13:37.

Ke ka ntlhayang fa Bakeresete ba ne ba tshwanetse go nna ba lebeletse? Jesu o sa tswa go bolela gore: “Lebèlèlañ: gonne ga lo itse, go re, morèna oa ntlo o tla tla leñ, . . . E se re kgotsa ha a ka tla ka choganeco a lo hitlhèla lo robetse.” (Mareko 13:35, 36) Jalo he barutwa ba ga Jesu ba ne ba tshwanetse go lebelela go tla ga Morena wa bone, eleng, go tla ga ga Jesu.

Boikaelelo e ne e tla nna bofe ka go tla ga ga Jesu? Taolo ya gagwe ya go lebelela e ne ya neelwa jaaka bontlha-nngwe jwa karabo ya gagwe go potso e e phepafetseng e a neng a e botswa ke barutwa ba gagwe: “Seshupō e tla nna eñ sa go tla ga gago, le sa bokhutlō yoa lehatshe [“tsamaiso ya dilo” NW]?” (Mathaio 24:3) Go ya ka pego e e tshwanang, morago ga go naya sesupo se se dikarolo dintsi, Keresete o boletse gore: “Ediha gōna ba tla bōnañ Morwa Motho a tla ka leru, ka nonohō, le ka kgalalèlō e kgolo. Me e tla re dilō tse di simologa go dihala, hoñ lo lelalè, lo choletsè ditlhōgō tsa lona; ka gonne thekololō ea lona e tla bo e atamèla. . . . Ha lo bōna dilō tse di dihala, itseñ ha bogosi yoa Modimo bo atametse.”—Luke 21:27-31.

Mabaka a a Utlwalang a Go Lebelela

Ka gone, Jesu Keresete o ne a neela barutwa ba gagwe mabaka a a molemo a go nna ba tsogile semoyeng go lebelela tiragatso ya “seshupō.” Se se neng se tla raya gore Morena wa bone o ne a le ‘gone’ ka mo go sa bonaleng, ka go bo go ne go se kitla go tlhokafala sesupo sepe fa go nna gone ga gagwe go ne go tla bonwa ka matlho. Mme go nna gone ga gagwe ga semoya go ne go tla raya gape gore ‘lehatshe” kana “tsamaiso ya dilo” e fitlhile mo ‘bokhutlong’ kana mo nakong ya yone ya bofelo. Mme mo Bakereseteng, go tla raya gore ‘thekololo ya bone e tla bo e atamela.’ Ee, go ne go tla raya gore “bogosi yoa Modimo bo atametse.”

A se ga se yone tlhaloso ya tsholofelo ya Bokeresete? A ga se sone selo se Bakeresete botlhe ba neng ba rutwa go se rapelela, eleng: “Rra echo eo o kwa legodimoñ, Leina ya gago a le itshepisiwè. Bogosi yoa gago a bo tlè. Go rata ga gago go dihwè mo lehatshiñ yaka kwa legodimoñ”? (Mathaio 6:9, 10) Ka mo go utlwalang, a Bakatoliki bao ba boeletsang thapelo ya tshegofatso Paternoster kana maloko a dikereke dingwe ao a rapelang Thapelo ya Morena gaa tshwanela go lebelela go bona thapelo ya bone e diragadiwa? Kana a e ka tswa e le gore dithuto tsa dikereke tsa bone di tlositse mo e ka nnang bokao jotlhe mo thapelong eo, mo go rayang gore go na le mo gonnye mo go ba saletseng go go lebelela?

Lebaka la go bo Ba Bantsi ba sa Tlhole Ba Lebeletse

Bakeresete ba ne ba tshwanetse go lebelela sesupo sa go nna gone ga ga Keresete (Segerika, pa·rou·siʹa, le ranoletswe go “go tla” mo dithanolelong tse dintsi tsa Bibela). Ka ntlhayang? Ka gonne seno se tla raya gore Bogosi jwa Modimo le thekololo ya bone le bofelo jwa “lehatshe,” kana “tsamaiso ya dilo” ya jaanong e e boikepo, bo gaufi. Dikereke tse di farologaneng tsa La-bodumedi di tshwanetse tsa bo di ile tsa thusa maloko a tsone go nna a tsogile semoyeng e le gore ba se fitlhelwe ba robetse fa Morena a goroga. A dikereke di diragaditse thomo ya tsone mo ntlheng eno?

Dibuka tse di gatisitsweng di bega ka gore: “Fa nako e ntse e tsamaya kwa ntle ga gore parousia e tle e ne e katogela kgakalakgakala mo isagweng go ya kafa kereke e bonang ka teng, mme ya re labofelo ya nna mo kotsing ya gore e se ka ya tlhola e tsewa jaaka setlhogo sa tumelo.”—The New International Dictionary of New Testament Theology.

Seno tota, ke se se diragetseng. Dikereke tsa La-bodumedi di latlhile go lebelela ga Bokeresete goo Jesu a go laoletseng barutwa ba gagwe gore ba seka ba go tlhokomologa le eseng. Ga ba sa tlhole ba tsogetse go nna gone ga ga Jesu le go tla ga Bogosi jwa Modimo. Ba latlhetse kgakala go lebelela “bofelo jwa tsamaiso ya dilo,” kana “bokhutlō yoa lehatshe.”

Encyclopedia ya Sefora ya bolomu e le nngwe fela ya QUID 1984 e neela tlhaloso e e mo nakong ya tumelo ya bodumedi malebana le bokhutlo jwa lefatshe. Tlase ga ’‘Characteristics of the Catholic Religion,” e re: “Kereke eno bosheng go bonala e tlhalosa bokhutlo jwa Lefatshe jaaka teko e motho ka bongwe a lebaganang le yone fa a swa.” Fa e tlhalosetsa pele bothata, The New Encyclopædia Britannica e re: “Dikereke tse dikgolo thata tsa Bokeresete di kgaphela tumelo ya bofelo jwa lefatshe kwa thoko [thuto ya “Dilo tsa Bofelo”] jaaka e e senang bokao kana tlhamane e e senang lepele le morago.”

Jalo he, ke karabo efe e e gakgamatsang mme e e ka se tilweng ya potso eno “Go diragetseng ka go lebelela ga Bakeresete?” Go ile ga bolawa ke “dikereke tse dintsi tsa molao tsa Bokeresete,” ke gore, Roma Katoliki, Eastern Orthodox le dikereke tse dikgolo tsa Maporosetanta. Lemororo maloko a dikereke tseno a sa tshwanèlwa ke go bewa molato, bontsi jwa bone ba ka ipotsa gore kereke ya bone e latlhetse kgakala go lebelela ga Bokeresete ga go nna gone ga ga Keresete, go goroga ga Bogosi jwa Modimo le bofelo jwa tsamaiso ya jaanong e e boikepo ya dilo jang le gore ke ka ntlhayang e dirile jalo. Mabaka a ditiragalo a a gogetseng go se a tla tlhatlhobiwa mo setlhogong se se latelang.