“Maromak lia-loos nian” sempre kumpre ninia hakarak

1. Tanbasá ita bele sente seguru maski ita moris iha Satanás nia mundu neʼebé nakonu ho lia-bosok? (Salmo 31:​2-5)

ITA moris iha Satanás nia mundu neʼebé nakonu ho lia-bosok, lohidór, no traidór. Neʼe halo ita la hatene atu tau fiar ba sé. Negósiu-naʼin barak la hatudu laran-moos. Ema neʼebé faʼan sasán halo promosaun hodi lohi ema. Dala ruma, belun neʼebé besik mós la kumpre sira-nia promesa. Maibé, ita sente seguru tanba ita bele tau fiar ba Jeová! Nia mak “Maromak lia-loos nian”. (Lee Salmo 31:​2-5.) Jeová nunka bosok. Buat hotu neʼebé nia hatete mak loos. Tan neʼe, ita bele tau fiar tomak ba buat neʼebé nia hatete no halo.

2. Iha lisaun neʼe, ita sei aprende kona-ba saida?

² Iha lisaun neʼe, ita sei aprende razaun balu tanbasá ita bele tau fiar ba Jeová ho laran tomak. Tuirmai, ita sei aprende oinsá mak Maromak lia-loos nian sei halakon Satanás nia mundu aat neʼe no saida mak Jeová halo daudaun atu kumpre Ninia hakarak. Diskusaun neʼe sei ajuda ita atu aten-brani hodi fó sai lia-loos kona-ba Jeová.

TANBASÁ ITA BELE TAU FIAR BA MAROMAK LIA-LOOS NIAN

3. Tanbasá ita bele tau fiar tomak ba Jeová?

³ Ita bele tau fiar ba Jeová tanba nia mak Kriadór. Nia mak kria lalehan, rai, no moris hotu. (Gén 1:1; Sal 36:9; Apok 4:11) Nia kria mundu ho buat neʼebé ita presiza atu bele moris, porezemplu anin atu ita bele dada iis no bee atu bele hemu. Nia mak kontrola buat hotu iha universu. Kuandu ita hanoin kona-ba Jeová nia kbiit no matenek, ita bele fiar metin katak Jeová sei dirije ita-nia moris no fó ita futuru neʼebé kapás.

4. Oinsá ita hatene katak Jeová hadomi ita?

⁴ Ita bele tau fiar ba Jeová tanba nia hadomi ita. Jeová kria ema tanba nia hakarak ema mós sente haksolok ho sira-nia moris. Jeová fó sai ida-neʼe kuandu nia dehan: “Mai ita kria ema tuir ita-nia ilas, atu hanesan ho ita.” (Gén 1:26) Nia fó ita liberdade atu halo desizaun. Nia mós kria mundu nuʼudar ita-nia hela-fatin neʼebé furak. (Sal 115:16) Nia haraik bensaun ba ita-nia inan-aman primeiru no fó sira knaar furak atu halo mundu tomak sai paraízu. (Gén 1:28; 2:15) Nia fó ba sira ai-han, ai-horis, animál, no buat barak tan atu sira bele goza moris. Buat sira-neʼe fó prova katak “Jeová hatudu domin neʼebé laran-metin ba nafatin” mai ita.—Sal 103:17.

5. (a) Saida mak Jeová halo bainhira Adão no Eva kontra? (b) Jeová kumpre ona promesa saida deʼit? (Haree kaixa “Maromak sempre kumpre ninia liafuan”.)

⁵ Ita bele tau fiar ba Jeová tanba nia sempre kumpre ninia liafuan. Jeová la kria mundu ho “saugati deʼit, maibé nia kria rai atu ema bele hela bá”. (Isa 45:​18, 19) Tanba Adão no Eva kontra Jeová, ikusmai sira mate. Haree hanesan Satanás konsege hapara Jeová atu kumpre Ninia hakarak ba ema no mundu. Maibé loloos, la iha buat ida mak bele hapara Jeová atu kumpre ninia hakarak. (Isa 46:​10, 11) Nia nafatin hakarak atu ema moris ba nafatin iha mundu. Tan neʼe Jeová husik Adão no Eva atu iha oan. No nia mós fó ninia Oan-Mane mesak nuʼudar sakrifísiu atu salva Adão nia bei-oan sira no fó esperansa ba sira atu moris ba nafatin.—João 3:16.

MAROMAK LIA-LOOS NIAN KUMPRE NINIA HAKARAK

6. Jeová fó sai nanis saida bainhira Adão no Eva kontra nia?

⁶ Ida neʼebé tenta Adão no Eva atu kontra hasoru Maromak mak “samea uluk nian, neʼebé hanaran Diabu no Satanás”.a (Apok 12:9; Gén 3:​4, 5; João 8:44) Jeová tesi-lia ona ba Satanás katak iha futuru nia sei lakon ba nafatin. (Gén 3:15) Antes neʼe akontese, ema barak sei halo tuir Satanás no hatudu hahalok hanesan nia. Maibé, ema balu sei nafatin laran-metin ba Jeová.

7. Sé mak halo tuir Diabu Satanás, no saida mak sei akontese ba sira?

⁷ Anju no ema barak mak halo tuir Diabu Satanás. Tanba sira kontra Jeová, sira sai Satanás nia bei-oan. Maibé iha tempu neʼebé Maromak deside ona, Satanás no sira neʼebé halo tuir nia sei lakon ba nafatin.—Dan 2:44; Rom 16:20.

8. Saida mak Jesus halo iha tinan 1914? (Haree mós dezeñu.)

⁸ Tanbasá ita bele fiar katak Jeová sei kumpre ninia promesa atu halakon Satanás no sira hotu neʼebé apoia nia? Iha tinan 1914, Jesus komesa halo funu hasoru Diabu Satanás no anju aat sira no duni tun sira mai mundu. (Apok 12:​7-9) Maski funu neʼe akontese iha lalehan, maibé ema hotu iha mundu mós hetan impaktu. Bíblia dehan: “Susar ba rai no tasi, tanba Diabu tun tiha ona ba imi, no nia hirus makaʼas, tanba nia hatene katak ninia tempu hela uitoan deʼit ona.” (Apok 12:12) Husi tinan 1914, Satanás tau fokus ba mundu, no rezultadu mak mundu nia situasaun sai aat ba beibeik. Loos duni, mundu neʼe hasoru susar boot! Maibé, lakleur tan Jesus sei “manán ninia inimigu” no halakon Satanás no sira hotu neʼebé apoia nia. (Apok 6:2) Jesus sei halo santu Jeová nia naran ba nafatin. (Sal 45:​4-6) Kriatura hotu sei hatene katak Jeová mak Maromak lia-loos nian!—Eze 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

MAROMAK HALIBUR SIRA NEʼEBÉ HADOMI LIA-LOOS

9. Ohin loron, Jeová halibur ema hanesan saida?

⁹ Ohin loron, Jeová “halibur buat hotu iha Kristu, inklui buat sira iha lalehan no iha rai”. (Éf 1:10) “Buat sira iha lalehan” refere ba ema neʼebé Jeová hili atu ukun hamutuk ho Kristu iha lalehan. ‘Buat sira iha rai’ refere ba sira neʼebé sei moris ba nafatin iha mundu Paraízu. Sira hotu neʼebé adora Jeová ho badinas fó sai Satanás nia lia-bosok sira no ajuda ema neʼebé laran-moos atu hetan koñesimentu kona-ba lia-loos.

10. Oinsá mak Jeová ajuda ema atu aprende lia-loos? (Apokalipse 14:​6, 7)

¹⁰ Liuhusi serbisu haklaken neʼebé halaʼo iha mundu tomak, Jeová halibur daudaun ema neʼebé hadomi lia-loos. (Lee Apokalipse 14:​6, 7.) Maski Jeová uza ema atu fó sai liafuan diʼak ba ema seluk, maibé anju sira mós envolve an atu halibur ema laran-moos sira atu tama ba lia-loos. Bainhira Jeová nia povu haklaken lia-loos kona-ba nia, sira mós ajuda ema komprende katak Satanás uza Babilónia Boot ka relijiaun falsu atu habelar lia-bosok kona-ba Jeová. (Apok 18:​2, 4) Lakleur tan, relijiaun falsu hotu sei lakon, no ema hotu neʼebé hadomi Maromak lia-loos nian sei fó ba nia glória boot neʼebé nia merese simu.—Apok 17:16.

11. Oinsá ita bele hatene sé mak serbí Jeová iha dalan neʼebé loos?

¹¹ Jeová dada ema husi nasaun, kultura, rasa, no situasaun moris neʼebé la hanesan atu hakbesik ba nia. (Apok 7:​9, 10) Bainhira sira rona “liafuan diʼak”, sira rekoñese katak buat neʼebé sira aprende mak lia-loos no sira hakarak sai Jeová nia povu. (Mc 13:10) Ohin loron, sai klaru liután kona-ba sé mak serbí Maromak iha dalan neʼebé loos. Profeta Malaquias fó sai nanis: “Dala ida tan, imi sei haree duni oinsá ema laran-loos la hanesan ho ema aat, ema neʼebé serbí Maromak la hanesan ho ema neʼebé la serbí nia.” (Mal 3:18) Jeová nia atan sira hatudu ho klaru liuhusi hahalok no serbisu haklaken katak sira adora Maromak lia-loos nian.

12. Oinsá mak serbisu haklaken bele ajuda atu kumpre Jeová nia hakarak?

¹² Hodi haklaken “liafuan diʼak kona-ba Maromak nia Ukun”, ita halo tuir Jesus nia mandamentu, no iha tempu hanesan, neʼe kumpre profesia. (Mt 24:14; 28:​18-20) No rezultadu husi serbisu neʼe mak ema barak iha mundu tomak sai Kristu nia dixípulu no hein namanas atu adora Maromak lia-loos nian ba nafatin. Neʼe mak priviléjiu boot tanba Jeová uza ita atu kumpre ninia hakarak!

HEIN BA FUTURU HO KONFIANSA

13. Satanás fokus liu atu ataka sé, no tanbasá?

¹³ Diabu Satanás hirus tebes tanba hatene katak “ninia tempu hela uitoan deʼit ona”. (Apok 12:​12, 13) Nia fokus liu atu ataka sira neʼebé sei sai liurai iha Maromak nia Ukun no “halo tuir Maromak nia ukun-fuan sira no halo serbisu atu fó sasin kona-ba Jesus”. (Apok 12:17; 14:12) Satanás mós ataka ema naran deʼit neʼebé apoia sira no serbisu neʼebé sira halo.

14. Saida mak sei akontese bainhira Satanás ataka Jeová nia povu? (Haree mós dezeñu.)

¹⁴ Depois Babilónia Boot lakon ona, sira neʼebé apoia Satanás sei ataka Jeová nia povu, no neʼe sei lori ba funu Armagedon. (Apok 16:​13, 14, 16) Jesus no tropa sira iha lalehan sei salva Jeová nia povu no halakon buat aat hotu iha Satanás nia mundu. (Apok 19:​19-21) Ema aat, lohidór, no bosok-teen sira sei la iha tan. (Apok 21:8) Ema hotu sei hatene katak Jeová sempre halo no koʼalia buat neʼebé loos.

15. Tanbasá ita bele hein ba futuru ho konfiansa? (Isaias 65:​16, 17) (Haree mós dezeñu.)

¹⁵ Ohin loron, ema iha mundu kontinua kontra malu no bosok malu. Maibé Jeová ajuda ninia povu atu nafatin unidade. Jeová halibur daudaun ema hotu neʼebé hadomi lia-loos atu sai parte ba ninia família. La iha buat ida mak bele hapara Jeová atu haraik bensaun ba ninia atan sira no serbisu neʼebé sira halo. (Lee Isaias 65:​16, 17.) Ita bele hein ba futuru ho konfiansa. Tanbasá? Tanba apóstolu Paulo nia liafuan iha Roma 8:​38, 39 hatete: “Mate ka moris, anju ka governu sira, buat neʼebé iha agora ka buat neʼebé atu mai ka kbiit, aas ka kleʼan, ka kriasaun sira seluk labele haketak ita husi Maromak nia domin neʼebé liuhusi ita-nia Naʼi Kristu Jesus.”

16. Tanbasá Ita tau fiar ba Jeová ho laran tomak?

¹⁶ Ita iha razaun barak atu tau fiar ba Jeová, Maromak lia-loos nian. Nia mak ita-nia Kriadór. Nia hadomi tebes ita. Ema barak husi nasaun hotu mak halibur hamutuk daudaun atu adora Jeová. (Isa 60:22; Zac 8:23) Ita hatene katak Jeová sempre kumpre ninia hakarak no lakleur tan nia sei halakon Satanás no lia-bosok hotu. Tan neʼe, ita hakarak halo orasaun hanesan ho David neʼebé hatete: “Haʼu harohan katak Maromak Jeová . . . sei simu hahiʼi, nia mesak deʼit mak halo buat kmanek sira. Haʼu harohan katak ninia naran neʼebé kmanek sei simu hahiʼi ba nafatin, no ninia glória sai nakonu iha mundu tomak.”—Sal 72:​18, 19.