Jeová treinu haʼu husi haʼu joven

Haʼu moris durante Funu Mundiál Segundu iha Calgary, Kanadá. Maizumenus tinan 75 liubá, pioneiru joven ida naran Donald Fraser dere ami-nia odamatan no haʼu-nia amá hakarak estuda Bíblia. Nia gosta tebes lia-loos, maibé ninia saúde hanetik nia atu halo atividade oioin iha kongregasaun. Maski nuneʼe, nia hetan batizmu iha tinan 1950. Triste mak tinan rua liu tiha, nia mate. Haʼu-nia apá seidauk sai Testemuña iha tempu neʼebá, maibé nia husik Testemuña sira atu dirije haʼu-nia amá nia funerál.

Loron balu liu tiha, irmán Alice neʼebé iha esperansa atu bá lalehan, konvida haʼu tuir reuniaun. Nia koñese haʼu tanba uluk haʼu bá beibeik reuniaun findesemana hamutuk ho haʼu-nia amá. Tan neʼe, haʼu husu haʼu-nia apá se haʼu bele bá ka lae. Nia konkorda no deside atu bá ho haʼu “dala ida deʼit” atu fó obrigadu ba irmaun neʼebé hatoʼo diskursu iha amá nia funerál. Neʼe mak dala primeiru haʼu-nia apá tuir reuniaun, no nia gosta tebes. Tanba haʼu-nia apá tuir ona kursu kona-ba oinsá atu koʼalia iha públiku, nia gosta tebes rona irmaun sira-nia diskursu. Nia deside atu tuir reuniaun neʼe semana-semana. Lakleur, nia mós komesa tuir reuniaun sira seluk.

Iha tempu neʼebá, irmaun neʼebé dirije Eskola Serbisu Kristaun sei komesa reuniaun hodi lee naran husi irmaun sira neʼebé tau ona naran ba eskola, no ema ida-idak sei hatán “prezente”. Kalan ida, haʼu husu atu temi mós haʼu-nia naran iha reuniaun tuirmai. Irmaun neʼe gaba haʼu maibé la husu haʼu se haʼu komprende kona-ba neʼe ka lae.

Haʼu la hatene katak bainhira haʼu husu atu lee haʼu-nia naran iha reuniaun, neʼe katak haʼu husu atu hatoʼo diskursu, haʼu hakarak deʼit haʼu-nia naran atu lee iha reuniaun! Semana tuirmai, irmaun lee haʼu-nia naran no haʼu ho orgullu hatán: “Prezente.” Depois reuniaun, irmaun-irmán sira gaba haʼu. Semana balu liu tiha, irmaun ida fó knaar neʼebé haʼu temi iha istória neʼe nia hahú.

Haʼu sente nakdedar! Iha tempu neʼebá, estudante sira presiza hatoʼo diskursu ba minutu neen toʼo ualu. La iha knaar atu lee deʼit Bíblia. Haʼu-nia apá ajuda haʼu prepara diskursu no haruka haʼu pratika ba dala 20. Depois neʼe, haʼu hetan konsellu neʼebé diʼak tebes. Durante haʼu-nia moris, Jeová treinu haʼu liuhusi haʼu-nia apá, irmaun-irmán sira, no Ninia organizasaun.

JEOVÁ KONTINUA TREINU HAʼU

Alice, neʼebé haʼu temi ona, treinu haʼu kuandu haʼu foin hahú haklaken. Iha tempu neʼebá, ami sempre lee eskritura tolu ba uma-naʼin no tuirmai oferese livru ida. Bainhira haʼu-nia tempu atu koʼalia, Alice sei fó koñese ninia an, komesa koʼalia, no husu haʼu atu lee eskritura primeiru. Tuirmai, haʼu sei koʼalia, lee eskritura segundu no terseiru, no oferese livru. Liutiha tempu balu haʼu aprende oinsá atu komesa konversa bainhira hasoru ema ba dala primeiru. Depois haʼu-nia apá hetan batizmu iha tinan 1954, nia kontinua treinu haʼu oinsá atu haklaken. Tanba nia mesak deʼit, nia halo buat neʼebé nia bele atu haboot haʼu iha lia-loos. Ba nia, reuniaun no haklaken mak importante tebes. Haʼu sempre hatene katak ami sei asiste reuniaun hotu no haklaken iha findesemana.

Haʼu eskola ba tinan 12 no aprende buat barak neʼebé ikusmai ajuda haʼu iha haʼu-nia moris, porezemplu matemátika no gramátika Inglés. Tanba haʼu aprende kona-ba Inglés no oinsá atu hakerek istória, neʼe ajuda haʼu iha haʼu-nia knaar agora iha Komisaun Hakerek nian.

Ema sempre husu haʼu tanbasá haʼu gosta múzika. Haʼu-nia apá no amá mós gosta múzika. Kuandu haʼu tinan hitu, haʼu tuir kursu pianu ba tempu balu, maibé haʼu-nia mestra hanoin katak haʼu ladún iha talentu kona-ba neʼe. Nia fó sujestaun ba haʼu-nia apá atu haʼu para deʼit. Haʼu bele komprende tanba haʼu mós la interese atu aprende ida-neʼe iha tempu neʼebá.

Depois fulan balu liu tiha, haʼu-nia apá buka fali mestra seluk. No haʼu aprende pianu no kanta, no bele halo buat rua neʼe hotu ho diʼak. Bainhira haʼu kiʼik, haʼu iha lian neʼebé diʼak no manán kompetisaun balu. Haʼu-nia planu mak atu sai mestre múzika atu hetan osan natoon hodi apoia haʼu-nia pioneiru. Kuandu haʼu besik ona atu hetan diploma, haʼu rekoñese katak haʼu uza tempu barak liu atu estuda kona-ba múzika no prepara ba ezame. Tan neʼe, haʼu para no serbí nuʼudar pioneiru regulár iha tinan 1963.

SERBISU PIONEIRU LORI KSOLOK

Depois haʼu pioneiru tiha ba tinan ida, haʼu hetan knaar nuʼudar pioneiru espesiál iha Kapuskasing, Ontário. Haʼu-nia pár pioneiru mak irmaun Daniel Skinner neʼebé idade boot liu haʼu. Nia hanorin haʼu kona-ba oinsá atu organiza kongregasaun. Kuandu haʼu tinan 20, haʼu simu knaar atu serbí iha Komisaun Administrasaun ba Kongregasaun, tan neʼe haʼu presiza aprende buat barak. Haʼu kontente tebes katak organizasaun énfaze tan katak importante atu treinu irmaun joven sira. Se irmaun joven sira-neʼe hakaʼas an, Jeová bele uza sira maski sira mak joven deʼit!

Ami hasoru susar balu iha Kapuskasing. Iha tempu malirin, temperatura mak malirin tebetebes. Dala barak haʼu no irmaun Dan laʼo ain ba fatin oioin. Maibé, ksolok boot ida neʼebé haʼu hetan husi haʼu-nia knaar mak hasoru irmán ida naran Linda Cole, neʼebé ikusmai sai Linda Splane.

Linda laran-manas tebes atu haklaken no iha vizita fali barak. Nia hatudu laran-luak, laran-diʼak, no gosta gasta tempu ho ema seluk. Ninia inan Goldie mak irmán neʼebé laran-metin. Ninia aman Allen foufoun la gosta Testemuña sira. Maski ninia aman kontra, maibé ninia inan sempre lori Linda no ninia alin John no Gordon ba reuniaun no treinu sira kona-ba haklaken. Ikusmai ninia inan Goldie, Linda, John, no Gordon sai pioneiru. Tinan balu liu tiha, ninia aman Allen mós sai Testemuña no apoia tebes kongregasaun.

Iha tinan 1965, haʼu simu konvite atu tuir Eskola ba Katuas no Atan ba Kongregasaun ba fulan ida iha Betel Kanadá atu hetan treinu liután. Iha eskola neʼe, haʼu mós hetan konvite atu aplika ba eskola Gilead. Haʼu nunka hanoin katak haʼu bele serbí nuʼudar misionáriu ida, maibé haʼu prenxe deʼit aplikasaun neʼe. Ikusmai haʼu tuir eskola neʼe ba klase 42. Dala barak ami-nia instrutór fó-hatene ami ida-idak nia progresu iha eskola neʼe. Buat primeiru neʼebé haʼu-nia instrutór anima haʼu atu halo mak aprende buat hotu kona-ba Jeová nia organizasaun durante eskola. Iha tempu neʼebá haʼu foin mak tinan 21, entaun neʼe mak sujestaun neʼebé diʼak tebes.

Iha eskola Gilead, ami aprende oinsá atu komunika ho jornalista sira no ema neʼebé serbisu iha estasaun rádiu no televizaun. Haʼu kontente tebes aprende kona-ba neʼe. Haʼu la rekoñese katak ikusmai neʼe bele ajuda tebes haʼu.

SERBÍ lHA SENEGÁL

Depois graduasaun, loron balu liu tiha haʼu-nia pár misionáriu Michael Höhle no haʼu bá atu serbí iha Senegál, Áfrika. Iha tempu neʼebá, iha deʼit haklaken-naʼin 100.

Depois serbí tiha ba fulan balu, haʼu simu konvite atu serbí iha sukursál loron ida kada semana. Sukursál neʼe la boot, neʼe mak kuartu ida iha misionáriu nia uma. Maski fatin neʼe mak simples deʼit, irmaun Emmanuel Paterakis neʼebé tau matan ba sukursál neʼe fó-hanoin haʼu katak sukursál neʼe reprezenta Jeová nia organizasaun iha nasaun neʼe. Iha situasaun ida, irmaun Emmanuel deside atu ami hakerek karta ida atu fó laran-manas ba misionáriu sira. Iha tempu neʼebá, la fasil no karun atu halo kopia ba karta sira, tan neʼe ami ketik deʼit karta ida-idak. Neʼe serbisu boot tebes, liuliu tanba ami presiza kuidadu tebes atu la hakerek sala!

Antes haʼu fila ba uma iha kalan, irmaun Emmanuel fó envelope ida mai haʼu. Nia hatete: “David, organizasaun haruka karta ida ba ó.” Kuandu haʼu loke envelope neʼe, haʼu haree katak neʼe mak karta ida neʼebé haʼu hakerek! Neʼe hanorin haʼu atu respeitu Jeová nia organizasaun maski neʼe mak sukursál neʼebé boot ka kiʼik.

Haʼu sai belun ho irmaun-irmán barak iha kongregasaun no sempre gasta tempu hamutuk iha sábadu kalan. Tempu sira-neʼe mak lori duni ksolok! Ami nafatin kontaktu malu toʼo agora. Haʼu aprende língua Fransés tanba neʼe mak língua ofisiál iha Senegál, no haʼu bele uza kuandu vizita sukursál sira iha mundu tomak.

Iha tinan 1968, Linda no haʼu prenda. Ba fulan barak, haʼu koko atu buka serbisu loron sorin atu haʼu no Linda bele kontinua pioneiru iha Senegál, maibé patraun sira fó deʼit serbisu ba ema lokál, laʼós ba ema estranjeiru. Ikusmai, haʼu fila ba Kanadá, ami kaben, no ami simu knaar atu serbí nuʼudar pioneiru espesiál iha Edmundston, New Brunswick, neʼe mak sidade kiʼik ida iha fronteira iha provínsia Kebeke.

SERBÍ IHA NEW BRUNSWICK NO KEBEKE

Antes ami bá atu serbí iha Edmunston, la iha haklaken-naʼin iha área neʼe no iha deʼit estudante Bíblia balu. Relijiaun Katólika fó influénsia makaʼas ba ema. Kuaze uma hotu tau sinál “La simu Testemuña ba Jeová”. Iha tempu neʼebá, ami la hanoin barak kona-ba sinál hanesan neʼe, tan neʼe ami nafatin haklaken ba uma ida-idak. Semana-semana, organizasaun ida husi Katólika fó sai notísias iha jornál lokál nian: “Mai ita buka no halakon tiha Testemuña ba Jeová sira.” Iha tempu neʼebá, iha deʼit Testemuña naʼin-haat iha Edmunston, neʼe mak Victor no Velda Norberg no Linda no haʼu, tan neʼe ami hatene katak sira koʼalia kona-ba ami!

Haʼu nunka haluha katuas área nia vizita ba dala primeiru. Depois gasta tiha semana ida ho ami, nia hatete: “Karik buat neʼebé imi bele halo deʼit mak ajuda ema troka sira-nia hanoin kona-ba Testemuña ba Jeová.” Husi tempu neʼebá, ami fokus atu halo ida-neʼe, no ami hetan susesu! Neineik-neineik, ema komesa haree diferensa kona-ba Testemuña ba Jeová nia haraik an no ulun-naʼin Katólika neʼebé foti an. Agora daudaun iha kongregasaun kiʼik ida iha sidade neʼe.

Depois serbí tiha iha área izoladu neʼe ba tinan ida, ami hetan konvite atu serbí iha kongregasaun boot ida iha Sidade Kebeke. Ami gasta fulan neen hamutuk ho irmaun-irmán sira neʼebé laran-luak, no tuirmai ami simu knaar atu vizita kongregasaun sira.

Ba tinan 14 tuirmai, ami vizita kongregasaun sira iha provínsia Kebeke. Neʼe mak tempu neʼebé furak tebes! Serbisu haklaken iha Kebeke hetan rezultadu diʼak, no iha kongregasaun barak neʼebé ami vizita, iha família balu neʼebé estuda Bíblia no hetan batizmu!

HANOIN-HETAN SIRA NEʼEBÉ LARAN-METIN

Irmaun-irmán sira neʼebé hela iha área Kanadá neʼebé koʼalia língua Fransés mak fasil atu habelun. Sira mak ema neʼebé koʼalia nakloke, kontente, no laran-manas. Maibé, la fasil ba sira atu simu lia-loos, no sira barak presiza hasoru família neʼebé kontra makaʼas. Inan-aman balu neʼebé laʼós Testemuña bandu sira-nia oan joven sira hodi dehan: “Para estuda ho Testemuña sira ka sai husi uma!” Sira barak hatudu laran-metin maski família kontra. Klaru katak Jeová orgullu tebes ho sira!

Haʼu mós hakarak konta kona-ba pioneiru regulár no espesiál sira neʼebé serbí iha Kebeke. Sira barak mai husi Kanadá nia área seluk. Sira laʼós deʼit presiza aprende língua Fransés maibé mós aprende kona-ba ema iha área neʼe neʼebé hetan influénsia makaʼas husi relijiaun Katólika.

Dala barak pioneiru espesiál sira hetan knaar atu serbí iha área izoladu neʼebé la iha haklaken-naʼin. Tanba ema iha área neʼe la gosta Testemuña, susar atu hetan hela-fatin no serbisu part-time. Maski ema neʼebé foin kaben mós hela hamutuk nuʼudar grupu ho ema naʼin-haat, neen, ka ualu atu bele selu aluga. Susar atu hela mesak. Pioneiru laran-metin sira-neʼe hakaʼas an duni. Bainhira sira halaʼo estuda, sira halo buat hotu neʼebé sira bele atu ajuda estudante sira. Agora, iha haklaken-naʼin lokál barak iha Kebeke, no pioneiru sira-neʼe muda ona ba área sira neʼebé presiza liután haklaken-naʼin.

Bainhira serbí nuʼudar katuas área, ami sempre koko haklaken hamutuk ho joven sira iha sábadu dadeer. Hodi halo nuneʼe ami bele hatene susar neʼebé sira hasoru. Joven sira-neʼe balu agora serbí iha rai seluk nuʼudar misionáriu ka halaʼo knaar oioin.

Iha tempu neʼebá, kongregasaun balu labele taka fali ami-nia gastu kuandu ami vizita, tan neʼe dala ruma iha fulan nia rohan ami la iha osan. Iha situasaun sira-neʼe, ami presiza sadere tomak ba Jeová tanba nia deʼit mak hatene ami-nia situasaun. Nia nunka husik hela ami. No ami sempre bele halo viajen atu vizita kongregasaun sira.

APRENDE HUSI EMA SELUK

Iha Kebeke, ami iha oportunidade barak atu fó sasin liuhusi rádiu, televizaun, no jornál sira, tan neʼe haʼu agradese tebes tanba aprende kona-ba buat sira-neʼe iha eskola Gilead. Haʼu sempre simu knaar atu serbisu hamutuk ho Léonce Crépeault, neʼebé mós serbí nuʼudar katuas área no matenek atu komunika ho média. Bainhira nia koʼalia ho ema neʼebé importante husi média, nia sei la hatudu katak nia hatene buat barak, maibé nia sei hatete deʼit: “Señór, haʼu no haʼu-nia maluk mak haklaken-naʼin deʼit. Ami ladún hatene oinsá atu koʼalia iha televizaun no rádiu. Maibé ami simu knaar atu fó-hatene ema kona-ba reuniaun boot husi Testemuña ba Jeová. Ami sei kontente tebes se Ita ajuda ami.” Tanba ninia haraik an, média barak prontu ajuda ami.

Tuirmai, sukursál fó knaar mai haʼu atu serbí hamutuk ho irmaun Glen How, ita-nia advogadu ida, atu tau matan ba kazu ida neʼebé komplikadu neʼebé dada média nia atensaun. Haʼu hetan benefísiu husi treinu neʼebé haʼu simu iha Gilead no husi esperiénsia neʼebé haʼu hetan kuandu serbí hamutuk ho Léonce. Serbí hamutuk ho irmaun Glen mak priviléjiu kapás ida. Nia aten-brani atu defende organizasaun iha dalan legál, maibé buat neʼebé importante liu mak nia iha domin boot ba Jeová.

Iha tinan 1985 haʼu no Linda simu knaar atu serbí nuʼudar katuas área besik haʼu-nia apá nia hela-fatin iha Kanadá oeste, neʼe ajuda ami atu tau matan nia. Haʼu-nia apá mate fulan tolu depois ami muda ba neʼebá. Ami kontinua serbí nuʼudar katuas área iha Kanadá oeste toʼo tinan 1989 no tuirmai simu konvite neʼebé halo ami hakfodak, neʼe mak atu sai parte ba família Betel iha Estadus Unidus. Neʼe katak ami presiza husik ami-nia knaar nuʼudar katuas área neʼebé ami halaʼo besik tinan 19. Durante tinan sira-neʼe, ami hela iha uma barak no han hamutuk ho irmaun-irmán rihun ba rihun neʼebé laran-luak. Ami agradese tebes ba sira neʼebé oferese hela-fatin no ai-han ba ami!

AMI MUDA BA ESTADUS UNIDUS

Bainhira ami toʼo iha Brooklyn, haʼu simu knaar atu serbí iha Departamentu Serbisu nian. Haʼu agradese tebes ba treinamentu neʼebé haʼu simu iha departamentu neʼe. Lisaun ida neʼebé haʼu aprende mak labele hanoin katak haʼu komprende ona buat ruma se haʼu seidauk hatene kona-ba faktu sira. Tuirmai iha tinan 1998, haʼu muda ba Departamentu Hakerek nian, no iha neʼebá haʼu kontinua aprende buat barak tan. Ba tinan barak, haʼu hetan priviléjiu atu serbí hamutuk ho irmaun John Barr, neʼebé mak nuʼudar koordenadór ba Komisaun Hakerek nian. Haʼu sempre hafolin treinu neʼebé haʼu hetan no tempu neʼebé haʼu gasta hamutuk ho nia. Nia mak irmaun neʼebé banati-tuir duni Jesus Kristu.

Neʼe mak bensaun atu serbisu hamutuk ho irmaun-irmán sira neʼebé haraik an iha Departamentu Hakerek nian. Sira sempre husu Jeová atu ajuda sira iha sira-nia knaar no sira hatene katak buat naran deʼit neʼebé sira kumpre mak tanba Jeová nia espíritu, laʼós tanba matenek neʼebé sira iha.

Haʼu no Linda mós hetan priviléjiu atu vizita maluk fiar-naʼin sira neʼebé laran-metin iha rai 110. Ami haree duni oinsá misionáriu barak, membru husi Komisaun ba Sukursál, no sira seluk neʼebé serbí tempu tomak hatudu sira-nia domin ba Jeová. No ami mós haree haklaken-naʼin sira iha rai sira-neʼe neʼebé laran-manas atu serbí Jeová maski akontese funu, problema ekonomia, no ema fó-terus. Klaru katak Jeová hadomi tebes sira!

Ba tinan barak, Linda ajuda tebes haʼu nuʼudar haʼu koko atu kumpre haʼu-nia knaar sira. Nia hadomi ema no sempre buka dalan atu ajuda ema seluk. Nia mós diʼak tebes atu konversa ho ema iha serbisu haklaken. Nia ajuda ona ema barak atu aprende kona-ba Jeová no ajuda ema balu neʼebé la ativu. Nia mak prezente ida husi Jeová! Nuʼudar ami sai ferik-katuas, ami agradese tebes ba irmaun-irmán joven sira neʼebé ajuda ami iha dalan oioin.—Mc 10:​29, 30.

Kuandu haʼu hanoin fali kona-ba tinan 80 liubá, haʼu agradese tebes. Haʼu konkorda ho hakerek-naʼin ba salmo neʼebé dehan: “Oh Maromak, Ita hanorin ona haʼu husi haʼu-nia tempu joven kedas, no toʼo agora haʼu kontinua fó sai buat furak sira neʼebé Ita halo.” (Sal 71:17) Haʼu hakarak kontinua halo ida-neʼe iha haʼu-nia moris tomak.