Tau fiar ba Ukun-Naʼin Boot Liu iha universu

1. Susar saida deʼit mak Job hasoru?

JOB mak mane fiar-naʼin husi tempu antigu neʼebé lakon buat hotu. Nia lakon ninia oan, ninia rikusoin no nia mós kona moras todan. Liután neʼe, ema mós la respeitu tan nia. Ninia “belun sira” mai laʼós atu fó kmaan, maibé koʼalia deʼit liafuan neʼebé halo nia laran-kraik. Ninia feen mós estrese tebes toʼo dehan: “Hatete aat Maromak no mate deʼit bá!” (Job 2:9; 15:​4, 5; 19:​1-3) Susar sira-neʼe bele halo Job lakon konfiansa ba Maromak Jeová no duvida kona-ba Jeová nia hakarak atu proteje ema neʼebé hadomi no serbí Nia.

2-3. Situasaun susar bele halo ita hanoin saida, no ita sei aprende saida husi livru Job?

² Ita mós dala ruma hasoru susar neʼebé koko ita-nia fiar ba Jeová. Ita moris iha ‘loron ikus sira neʼebé iha problema barak’. (2 Tim 3:1) Bainhira susar oioin mosu tuituir malu, neʼe halo ita sente laran-taridu toʼo labele tahan. Situasaun hanesan neʼe halo ema balu hanoin katak Jeová la hadomi no lakohi ajuda sira.

³ Se Ita mós sente hanesan neʼe, keta laran-kraik. Job aprende katak Jeová nunka husik hela ninia atan neʼebé laran-metin. Ita mós bele aprende atu tau fiar tomak ba Aman Jeová katak nia sei ajuda no fó kolen ba ita. Iha lisaun neʼe, ita sei aprende oinsá livru Job ajuda ita atu fiar katak: Primeiru, Jeová mesak deʼit mak Ukun-Naʼin Boot Liu iha universu. Segundu, Jeová iha kbiit atu kontrola akontesimentu sira iha mundu hodi kumpre ninia hakarak no proteje ninia atan sira husi buat naran deʼit neʼebé bele estraga sira iha dalan espirituál no fíziku.

SATANÁS TAMA IHA SIRA-NIA LEET

4. Saida mak akontese bainhira Jeová no anju sira halibur hamutuk?

⁴ Loron ida, “Maromak nia oan-mane sira” halibur hamutuk iha Jeová nia oin iha lalehan. Bíblia dehan: “Satanás mós tama iha sira-nia leet.” (Job 1:​6, nota) Neʼe mak dala primeiru Bíblia temi Jeová nia inimigu boot nuʼudar “Satanás” ka “Kontradór”. Iha tempu neʼebá, Satanás laʼós tan Maromak nia oan neʼebé laran-metin. Nia sai ona nuʼudar inimigu ba Jeová no Jeová nia família parte lalehan no rai. Ita hatene ida-neʼe tanba Jeová nia liafuan iha Génesis 3:15 hatudu katak Satanás laʼós tan parte ba “feto”, ka Jeová nia família iha lalehan, neʼebé ikusmai fó moris ba “bei-oan”.

5. Saida deʼit mak ita aprende husi enkontru neʼebé akontese iha lalehan?

⁵ Liuhusi Bíblia, Jeová fó-hatene ita kona-ba enkontru neʼebé akontese iha lalehan. Satanás nia liafuan hatudu katak nia mak bosok-teen neʼebé laran-aat. (Job 1:9; kompara ho Apokalipse 12:10.) Husi enkontru neʼe, ita mós aprende katak Jeová uza ninia kbiit neʼebé la iha limite iha dalan neʼebé perfeitu no justu, no neʼe fó kmaan mai ita. Ita mós bele hatene katak Jeová iha kbiit atu tau limite kona-ba buat neʼebé ninia kriatura sira bele halo.

JEOVÁ TAU LIMITE

6. Oinsá Jeová hatudu katak nia mak iha podér atu kontrola enkontru iha lalehan? (Job 1:​7, 8)

⁶ Lee Job 1:​7, 8. Eskritura neʼe hatudu katak Jeová iha podér atu kontrola enkontru neʼe. Nia husu Satanás: “Ó haree ona haʼu-nia atan Job ka?” Jeová hatene ho klaru katak Satanás hakarak ataka Job. Mai ita buka-hatene oinsá Jeová uza ninia kbiit atu ajuda Job.

7. Tuir Job 1:​10, 11, Satanás hatete saida kona-ba ema neʼebé serbí Jeová?

⁷ Lee Job 1:​10, 11. Jeová mak Ukun-Naʼin Boot Liu, no nia uza ninia kbiit iha dalan neʼebé diʼak liu iha situasaun hotu. (Jer 32:17; Dan 4:35) Maski nuneʼe, Satanás duun katak Jeová uza Ninia kbiit iha dalan neʼebé la diʼak. Satanás hatete katak Maromak fó buat diʼak barak ba ema, inklui Job atu sira serbí Nia. Satanás mós hatete katak ema serbí Jeová tan deʼit hakarak hetan buat diʼak. Jeová deside atu halo saida?

8-9. Jeová tau limite saida ba Satanás, no tanbasá? (Job 1:12) (Haree mós dezeñu.)

⁸ Lee Job 1:12. Jeová husik Satanás koko Job atu fó prova katak Job la hadomi Jeová. Maibé Jeová mós tau limite ba buat neʼebé Satanás bele halo, hodi dehan: ‘Ó-nia liman keta kona Job!’ Anju hotu neʼebé tuir enkontru neʼe mós rona Jeová nia mandamentu neʼe. Toʼo ohin loron, Satanás la iha kbiit atu halo buat neʼebé liu fali limite neʼebé Jeová deside ona. Jeová uza ninia kbiit atu proteje Job no hatudu katak Nia mak Maromak neʼebé domin no justu.

⁹ Satanás la hetan susesu. Job kontinua laran-metin ba ninia Aman iha lalehan. (Job 1:22) Maibé, Satanás hakarak kontinua atu koko Job.

10. Tanbasá mak Jeová husik Satanás kontinua koko Job? (Job 2:​2-6)

¹⁰ Lee Job 2:​2-6. Tuirmai Satanás hakarak halo buat neʼebé aat tebes atu hapara Job serbí Jeová. Satanás hatete katak se Job hetan susar toʼo besik atu mate, nia sei koʼalia aat Maromak. Atu rezolve asuntu neʼe, Jeová fó lisensa ba Satanás atu halo Job kona moras todan. Maibé dala ida tan Jeová tau limite hodi dehan: “Ó keta halakon ninia moris!” Satanás la iha kbiit atu oho Job hodi kontra mandamentu neʼe. Dala ida tan, Jeová hatudu katak nia mak Ukun-Naʼin Boot Liu tanba Satanás labele halo buat aat ba Job liu fali limite neʼebé Jeová deside ona.

JEOVÁ HAPARA JOB NIA SUSAR

11. Oinsá mak Jeová fó kolen ba Job bainhira nia hapara tiha Job nia susar? (Job 42:​10-13)

¹¹ Lee Job 42:​10-13. Bainhira Job hatudu ona katak nia laran-metin nafatin, Jeová hapara Satanás atu koko Job. Jeová halakon Job nia susar. Dala ida tan, Satanás la iha kbiit atu kontra Jeová nia desizaun no Jeová la fó tan lisensa ba nia atu ataka Job neʼebé laran-metin.

12. Konta toʼok ezemplu kona-ba Testemuña sira neʼebé tau fiar tomak ba Jeová.

¹² Jeová mós uza ninia kbiit atu ajuda ninia atan durante loron ikus sira. Porezemplu, iha tinan 1945 soldadu Nazi obriga Testemuña naʼin-230 atu laʼo dook husi kampu konsentrasaun toʼo ponte-kais atu oho sira. Maibé Testemuña sira-neʼe hotu la mate. Sira konta sira-nia esperiénsia katak sira mak hanesan ema Ebreu naʼin-tolu neʼebé Jeová salva husi fornu neʼebé lakan no sira-nia roupa deʼit mós la iis ahi-suar bainhira sai husi fornu neʼe. Testemuña sira-neʼe mós sai husi susar neʼebé aat tebes, maibé sira-nia fiar sai metin liu fali uluk tanba Jeová fó kbiit ba sira. Sira mós sente hanesan Daniel neʼebé Jeová salva husi leaun. Neʼe halo sira deside metin liután atu serbí Jeová ba nafatin. No sira hatete katak bensaun boot liu neʼebé sira hetan mak atu kontinua serbí Jeová.—Kompara ho Daniel 3:27; 6:22.

13. Ita bele fiar saida bainhira Ita hasoru susar? (Haree mós foto.)

¹³ Ita mós dala ruma hasoru susar neʼebé boot. (1 Ped 5:​8-10) Karik dala ruma ita sente laran-kraik tebes no hanoin katak ita-nia problema la iha rohan. Iha situasaun hanesan neʼe, Job nia esperiénsia bele ajuda ita. Ita bele fiar metin katak Jeová iha kbiit atu hapara ita-nia susar, no nia bele halo ida-neʼe agora ka iha mundu foun. Jeová deside ona tempu atu halakon mundu aat neʼe no nia sei la husik buat ida atu hanetik ida-neʼe!

JEOVÁ HADOMI NINIA ATAN SIRA NEʼEBÉ LARAN-METIN

14-15. Jeová sente oinsá kona-ba fó kolen ba ninia atan neʼebé laran-metin? (Job 14:15) (Haree mós dezeñu.)

¹⁴ Lee Job 14:15. Ita-nia Aman Jeová hadomi tebes ema neʼebé laran-metin ba nia. Tan neʼe bainhira sira mate, nia hakarak tebes atu fó moris-hiʼas ba sira. Nia sei halakon ema nia sentimentu triste kona-ba mate.—Isa 65:17.

¹⁵ Maski Job nia susar lakon ona, nia nafatin hela iha mundu neʼebé Satanás mak domina. Maibé, kolen neʼebé Job simu mak kapás tebes. Jeová kura Job no fó nia rikusoin barak liu fali uluk. Laʼós neʼe deʼit, iha futuru Job sei hetan bensaun barak liután. Jeová hatudu ona katak nia hakarak ninia atan sira atu kontente duni no goza moris. Tuir loloos, Jeová sei fó oportunidade ba ema hotu neʼebé laran-metin atu moris haksolok ba nafatin iha mundu foun neʼebé furak. (Apok 21:​3, 4) Nuʼudar Ukun-Naʼin Boot Liu iha universu, Jeová hakarak duni atu halo ida-neʼe. Hodi hanoin kona-ba neʼe halo ita sei sente kmaan tebes maski iha susar laran!

16. Razaun saida tan mak halo ita tau fiar ba Jeová?

¹⁶ Job moris tinan naruk, maibé ikusmai nia mate. Maski nuneʼe, Jeová iha kbiit atu fó moris-hiʼas ba Job tanba Nia mak Maromak Kbiit Boot Liu Hotu. (Deut 32:39) Tan neʼe, la iha ida mak bele hapara Jeová atu fó moris-hiʼas ba ema neʼebé nia hadomi iha tempu neʼebé nia deside ona.—Rom 8:​38, 39.

TAU FIAR TOMAK BA JEOVÁ

17. Saida mak hatudu katak Satanás la hetan susesu atu halakon Jeová nia povu?

¹⁷ Husi livru Job, ita aprende katak ita iha razaun barak atu tau fiar tomak ba Jeová. Ita agradese tebes ba Jeová tanba Nia la husik Satanás atu halakon Ninia povu! Ohin loron Jeová nia atan maizumenus ema naʼin millaun sia mak fó prova katak Jeová mak Ukun-naʼin Boot Liu no iha kbiit boot liu. Dala barak ita haree katak armas naran deʼit neʼebé ema halo atu kontra Jeová nia atan la hetan susesu. (Isa 54:17) Nasaun sira no relijiaun sira neʼebé iha kbiit boot labele halakon Jeová nia povu neʼebé haree hanesan la iha kbiit. No la iha buat ida mak bele hapara ita atu haklaken lia-loos kona-ba Jeová no fó sai katak Satanás mak bosok-teen no ohodór. Mate mós labele hapara ita tanba ita hatene katak Jeová sei fó moris-hiʼas ba ema neʼebé mate ho laran-metin.—Os 13:14.

18. Tanbasá ita la presiza taʼuk ba futuru?

¹⁸ Kuandu ita hanoin kleʼan kona-ba Job nia istória, neʼe halo ita fiar metin katak ita la presiza taʼuk tanba Jeová sei nafatin hamutuk ho ita maski buat naran deʼit akontese iha futuru. Durante terus boot, Satanás no ninia tropa sira sei hanoin katak Jeová nia povu la iha kbiit no fasil deʼit atu ataka. Maibé Jeová sei uza ninia kbiit hanesan nia uza hodi ajuda Job. Jeová sei la husik Satanás atu halakon Ninia povu ba nafatin. Lakleur tan Jeová sei halakon susar hotu neʼebé Satanás hamosu. Jesus sei soe tun Satanás no anju aat sira ba rai-kuak neʼebé kleʼan tebes durante tinan 1.000. (Lc 8:31; Apok 20:​1-3) Ikusmai, Satanás no sira neʼebé apoia nia sei lakon ba nafatin hodi tuir Jeová nia promesa husi tempu uluk kedas.—Gén 3:15; Rom 16:20; Apok 20:10.

19. Oinsá mak Jeová sei fó kolen ba sira neʼebé tau fiar tomak ba nia? (Haree mós dezeñu.)

¹⁹ Ita hein namanas ba mundu foun bainhira ita sei sai perfeitu no moris kontente tebes. Ita-nia moris sei sai diʼak liu fali buat neʼebé ita imajina. Jeová promete: “Haree bá! Haʼu halo buat hotu sai foun.” (Apok 21:5) Neʼe katak sá? Ba dala primeiru iha tinan barak nia laran, ema sei la hetan tan influénsia husi Satanás no ninia anju aat sira kona-ba hahalok odi, violénsia, no la justisa. Ita sei sente dame no livre! Ita sei toba ho hakmatek tanba la iha buat ida mak halo ita laran-susar. Sira neʼebé moris liu Armagedon sei haree milagre barak. Ikusmai, ita-nia belun no família neʼebé mate ona sei moris hiʼas fali. Iha tempu neʼebá, ita sei sente duni moris neʼebé kontente hanesan Aman Jeová nia hakarak horiuluk kedas!

20. Ita hakarak atu halo saida?

²⁰ Nuʼudar ita hasoru susar naran deʼit iha loron ikus sira, mai ita deside metin atu tau fiar tomak ba Jeová no apoia ninia ukun. Mai ita hatudu ita-nia domin ba Aman Jeová no prova katak Satanás mak bosok-teen. Ita bele fiar katak Jeová, Ukun-Naʼin Boot Liu Hotu hakarak tebes atu fó futuru neʼebé furak ba ninia atan sira neʼebé laran-metin no nia iha duni kbiit atu halo ida-neʼe!