Salomão nia istória neʼe hanorin ita kona-ba buat neʼebé bele akontese ba Jeová nia atan ida. Karik nia bele monu ba sala neʼebé sériu, no tuirmai sente katak neʼe akontese “derrepente” deʼit. Maibé, se nia hanoin fali kona-ba buat neʼebé akontese, karik nia sei rekoñese katak antes neʼe nia halo ona hakat balu neʼebé la matenek no lori nia ba sala neʼebé sériu. Karik hakat sira-neʼe mak inklui ransu neʼebé la diʼak, atividade halimar nian neʼebé la diʼak, ka sempre loke website ka bá fatin neʼebé la diʼak. Karik nia mós para ona atu halo orasaun, lee Bíblia, tuir reuniaun, ka bá haklaken. Hanesan mane joven neʼebé temi iha Provérbios, karik nia monu ba sala neʼebé sériu laʼós “derrepente” deʼit. Ita aprende lisaun saida? Ita presiza hasees an laʼós deʼit husi sala, maibé mós husi hakat sira neʼebé lori ita ba sala. Neʼe mak buat neʼebé Salomão esplika depois nia konta tiha istória neʼe.—Mt 5:29, 30. w24.07 p. 16 par. 10-11

Saida mak rikusoin neʼe? Neʼe mak serbisu haklaken kona-ba Maromak nia Ukun. (2 Kor 4:1) Sanan-rai reprezenta saida? Neʼe reprezenta Maromak nia atan sira neʼebé fahe liafuan diʼak ba ema seluk. Iha Paulo nia tempu, negósiu-naʼin sira uza sanan-rai atu lori buat neʼebé folin-boot, hanesan hahán, tua-uvas, no osan. Nuneʼe mós ho ita, Jeová fó knaar ba ita atu fó sai mensajen kona-ba liafuan diʼak neʼebé folin-boot. Ho Jeová nia ajuda, ita bele iha kbiit neʼebé ita presiza atu fahe mensajen neʼe ho laran-metin. Dala ruma, karik ita sente taʼuk ba ema ka taʼuk katak ema lakohi rona ita. Oinsá mak ita bele manán sentimentu neʼe? Hanoin toʼok kona-ba apóstolu sira-nia orasaun bainhira tribunál bandu sira atu labele haklaken. Duké taʼuk ba ema, sira husu Jeová atu ajuda sira hodi aten-brani atu kontinua haklaken. Jeová hatán kedas sira-nia orasaun. (Após 4:18, 29, 31) Se dala ruma Ita sente taʼuk, husu Jeová atu ajuda Ita hadomi liután ema, atu nuneʼe Ita sei la sente taʼuk atu haklaken. w24.04 p. 16 par. 8-9

Ita-nia domin ba Jeová book ita atu halo santu ninia naran. Ita hakarak hola parte atu halo santu ninia naran neʼebé Satanás hafoʼer ona liuhusi lia-bosok. (Gén 3:1-5; Job 2:4; João 8:44) Bainhira ita haklaken, ita hakarak tebes atu fó-hatene ba ema hotu kona-ba Jeová no ninia hahalok sira. Ita hakarak ema hotu hatene katak ninia hahalok furak liu mak domin, ninia dalan atu ukun mak loos no tuir justisa, no katak lakleur tan ninia Ukun sei halakon susar hotu no lori dame no kontente ba ema. (Sal 37:10, 11, 29; 1 João 4:8) Bainhira ita defende Jeová nia reputasaun iha serbisu haklaken, ita halo santu ninia naran. No ita mós kontente tanba ita moris tuir duni ita-nia naran nuʼudar Testemuña ba Jeová. w24.05 p. 18 par. 12