Kutaura Nendimi—Kunobva Kuna Mwari Here?

“HANDIMBOZVINZWISISI,” anodaro Devon. “Vhiki yoga yoga kuchechi kwedu zvinoita sokuti vakawanda vanogamuchira mudzimu mutsvene votaura nendimi. Vamwe vacho vanoita zvounzenza. Asi ini ndinoedza kurarama ndichitevedzera zvinodzidziswa neBhaibheri. Kunyange hazvo ndichigara ndichinyengeterera chipo ichi chomudzimu, handisati ndambochigamuchira. Zvinombofamba sei?”

Gabriel anoendawo kuchechi kune vanhu vanoita sokuti vanogamuchirawo mudzimu mutsvene uye vanotaura nendimi. Anoti, “Chinondinetsa ndechokuti pandinenge ndichinyengetera, vamwe vanobva vatangawo kunyengetera vachishamatata vachitaura mutauro wandisingambonzwi, uye wavasingambonzwiwo ivo. Hapana kana anombobatsirwa nezvinenge zvichitaurwa zvacho. Handiti chipo chomudzimu waMwari chinofanira kunge chiine zvachinobatsira here?”

Zvakataurwa naDevon naGabriel zvinoita kuti tibvunze kuti, Kutaura nendimi kunoitwa mune mamwe machechi nhasi kunonyatsobva kuna Mwari here? Kuti tipindure mubvunzo iwoyo, zvinokosha kuti tiongorore chipo chokutaura nendimi chaiva nevaKristu vomuzana remakore rokutanga.

“Vakatanga Kutaura Nedzimwe Ndimi”

MuBhaibheri, tinoverenga nezvevarume nevakadzi vakapiwa simba rokutaura mitauro yavakanga vasina kumbodzidzira. Izvi zvakatanga kuitika pazuva rePendekosti ya33 C.E., mavhiki mashoma pashure pokufa kwaJesu Kristu. Pazuva iroro muJerusarema, vadzidzi vaJesu 120 “vakazadzwa nomudzimu mutsvene, vakatanga kutaura nedzimwe ndimi.” Vashanyi vaibva kune dzimwe nyika “vakashamiswa, nokuti mumwe nomumwe akavanzwa vachitaura nomutauro wake.”—Mabasa 1:15; 2:1-6.

Bhaibheri rinotaura nezvevamwe vateveri vaJesu vokutanga vaiva nechipo ichi chinoshamisa. Somuenzaniso, azadzwa nomudzimu mutsvene, muapostora Pauro akagona kutaura nendimi zhinji. (Mabasa 19:6; 1 VaKorinde 12:10, 28; 14:18) Zvine musoro kuti chipo chakadaro chomudzimu mutsvene waMwari chive nechinangwa chakanaka. Saka kutaura nendimi kwaibatsirei panguva yakanyorwa Bhaibheri?

Chiratidzo Chokutsigirwa naMwari

Paainyorera tsamba kune vamwe vaKristu vokuguta reKorinde vaitaura nendimi, Pauro akatsanangura kuti ‘ndimi chiratidzo kune vasingatendi.’ (1 VaKorinde 14:22) Saka kukwanisa kuita zvishamiso zvakasiyana-siyana, kusanganisira simba rokutaura nendimi, kune vaiona chaiva chiratidzo chokuti Mwari aibvumira uye aitsigira ungano yechiKristu itsva yakanga ichangotanga. Zvipo zvokukwanisa kuita zvishamiso zvainge zvakafanana nezvikwangwani zvomumugwagwa. Zvairatidza vaitsvaka chokwadi kuti vazive kwavakanga vava kufanira kuwana vanhu vaMwari vakasarudzwa.

Chinonakidza ndechokuti Bhaibheri haritauri kuti Jesu kana kuti vaprofita vaivapo chiKristu chisati chatanga vakaita chishamiso chokutaura mitauro yavainge vasina kumbodzidza. Saka zviri pachena kuti paiva nechimwe chikonzero chakaita kuti vadzidzi vaJesu vapiwe chipo chokutaura nendimi.

Zvakabatsira Kuti Mashoko Akanaka Aziviswe Kwose Kwose

Jesu achangotanga ushumiri hwake, akaudza vadzidzi vake kuti vaparidze mashoko akanaka oUmambo hwaMwari kuvaJudha chete. (Mateu 10:6; 15:24) Izvi zvakaita kuti vadzidzi vangoparidza bedzi nzvimbo dzaigara vaJudha. Asi munguva pfupi izvozvo zvaizochinja.

Jesu achangofa muna 33 C.E., paakamutswa akarayira vateveri vake kuti ‘vanoita kuti vanhu vemarudzi ose vave vadzidzi.’ Akaudzawo vateveri vake kuti vaizova zvapupu zvake “kusvikira kurutivi ruri kure kwazvo rwenyika.” (Mateu 28:19; Mabasa 1:8) Kuti mashoko akanaka azoparidzwa kwose kwose zvaizoda kuti vashandise mimwe mitauro kwete chiHebheru chete.

Asi vakawanda vevadzidzi vokutanga ivavo vaive “vanhuwo zvavo, vasina kudzidza.” (Mabasa 4:13) Saka vaizoparidza sei kunyika dziri kure kwaitaurwa mitauro yavainge vasina kumbobvira vanzwa uye yavasina kumbodzidza? Mudzimu mutsvene wakaita kuti vamwe vaparidzi vaishingaira vakwanise kuparidza vachitsetsenura nemitauro yavasina kumbobvira vadzidza.

Saka chipo chokutaura nendimi chakabatsira munzira mbiri dzinokosha. Kutanga, chakaratidza kuti Mwari aivatsigira. Chechipiri, chakabatsira vaKristu vomuzana remakore rokutanga kuti vaite basa ravo rokuparidzira kuvanhu vemitauro yakasiyana-siyana. Kutaura nendimi kunoitwa nhasi mumachechi akawanda kunozadzisa zvinangwa izvi here?

Kutaura Nendimi Kwemazuva Ano, Chiratidzo Chokutsigirwa naMwari Here?

Ndepapi paungaisa chikwangwani chinobatsira vakawanda vokwaunogara? Ungachiisa mumba here? Haungambodaro! Nhoroondo yezvakaitika pazuva rePendekosti inoti “vanhu vazhinji” vaipfuura vakashamiswa kuona chiratidzo chokutaura nendimi kwaiitwa nevadzidzi. Izvi zvakaita kuti “mweya inenge zviuru zvitatu” iwedzerwe kuungano yechiKristu pazuva iroro! (Mabasa 2:5, 6, 41) Kana vanhu nhasi vachiti vanotaura nendimi asi vachingotaurira muchechi, kutaura ikoko kunobatsira sei vazhinji vasiri vatendi?

Shoko raMwari rinotaura nezvoufeve pamwe ‘nemabasa enyama’ kuti anopesana nemudzimu mutsvene, richiwedzera kuti “vane tsika yokuita zvinhu zvakadai havazogari nhaka youmambo hwaMwari.” (VaGaratiya 5:17-21) Kana uchiona vanhu vane tsika dzisina kunaka vachitaura nendimi, ungatoshamisika kuti, ‘Zvingaita here kuti mudzimu mutsvene waMwari uve pavanhu vanogara vachiita zvinoshorwa neshoko raMwari kana kuti izvi zvingatotsausa vanhu?’ Izvi zvakafanana nekuisa chikwangwani mumugwagwa chinoita kuti motokari dziende kwadzisingafaniri kuenda.

Kutaura Nendimi Kwemazuva Ano Kunobatsira Kuti Mashoko Akanaka Aparidzirwe Here?

Ngatichikurukurai chimwe chinangwa chechipo chokutaura nendimi muzana remakore rokutanga. Kutaura nendimi kunoitwa mumachechi kunobatsira kuti mashoko akanaka aparidzirwe kuvanhu vanotaura mitauro yakasiyana-siyana here? Yeuka kuti vacherechedzi vaive muJerusarema pazuva rePendekosti ya33 C.E. vaibva munyika dzakawanda vakanyatsonzwisisa kutaura nendimi kwakaitwa nevadzidzi. Kusiyana neizvi, vaya vanotaura nendimi nhasi vanowanzotaura mitauro isingambonzwiwi nevanenge vachiteerera.

Zviri pachena kuti kutaura nendimi kwemazuva ano kwakanyatsosiyana nechipo chomudzimu mutsvene chakapiwa vateveri vaJesu vokutanga. Kutaura zvazviri kubvira pakafa vaapostora hapana panoratidza kuti pane akambogamuchira simba rekuita zvishamiso zvakadaro. Izvi hazvishamisi kune vanhu vanoverenga Bhaibheri. Achitaura nezvezvipo zvokuita zvishamiso kusanganisira kutaura nendimi, muapostora Pauro akafuridzirwa akaprofita kuti: “Zvichagumiswa.” (1 VaKorinde 13:8) Saka mazuva ano munhu angaziva sei kuti uyu ndiye ane mudzimu mutsvene?

Ndivanaani Vanoratidza Kuti Vane Mudzimu Mutsvene?

Jesu ainyatsoziva kuti chipo chokutaura nendimi chaizoguma papera nguva pfupi ungano yechiKristu yatangwa. Jesu ava pedyo nokufa, akataura chiratidzo kana kuti mucherechedzo waizoramba uripo waizoratidza kuti ava ndivo vateveri vake vechokwadi. Akati: “Vose vachaziva kuti muri vadzidzi vangu, neizvi, kana muine rudo pakati penyu.” (Johani 13:35) Ndima iyoyo inototaurawo kuti Shoko raMwari rakagara rati zvipo izvi zvinoshamisa zvaizoguma inoti: “Rudo harumboperi.”—1 VaKorinde 13:8.

Pazvinhu zvipfumbamwe zvinoumba “chibereko” chomudzimu mutsvene waMwari, rudo ndirwo rwakaiswa pokutanga. (VaGaratiya 5:22, 23) Saka vaya vane mudzimu waMwari uye vanotsigirwa naMwari vacharatidza kuti vanodanana zvechokwadi. Kuwedzera pane izvi, chinhu chechitatu chinoumba chibereko chomudzimu rugare. Saka mazuva ano vanhu vane mudzimu mutsvene vanoita kuti pave norugare, vachida nomwoyo wose kuti vasaita zvokufungira vamwe, kusarurana, uye kurwisana.

Yeukawo mashoko akaprofitwa naJesu pana Mabasa 1:8. Akagara ataura kuti vadzidzi vake vaizogamuchira simba rokuva zvapupu zvake “kusvikira kurutivi ruri kure kwazvo rwenyika.” Jesu akaratidzawo kuti basa iri raizoramba richiitwa “kusvikira pakuguma kwenyika.” (Mateu 28:20, Bhaibheri muNdimi yeUnion Shona.) Saka basa iri rokuparidza riri kuitwa pasi rose richaramba richiratidza kuti ndevapi vanotsigirwa nemudzimu mutsvene zvechokwadi.

Unofungei? Iboka ripi revanhu raunoona rinoratidza kuti rine mudzimu mutsvene nhasi? Pasi rose, ndivanaani vanoratidza chibereko chomudzimu, kunyanya rudo uye rugare, zvokuti vanotosvika pakutambudzwa nehurumende nokuti vanenge vachiramba kuenda kuhondo? (Isaya 2:4) Ndivanaani vari kuedza kusiyana nemabasa enyama akadai seufeve, uye vanotobvisa pakati pavo vanhu vanoita mabasa akadaro vasingapfidzi? (1 VaKorinde 5:11-13) Ndivanaani vari kuparidza mupasi rose mashoko akanaka okuti Umambo hwaMwari ndihwo chete tariro yevanhu?—Mateu 24:14.

Vanobudisa magazini ino havazezi kutaura kuti Zvapupu zvaJehovha ndivo vakakodzera rondedzero yeBhaibheri yevanhu vane mudzimu mutsvene. Wadii kumbotaura navo uzvionere kuti vanotsigirwa naMwari zvechokwadi here?