Chipo Chendimi Rutivi rwechiKristu Chechokwadi Here?
“NDAKANZWA, sezvo ndakateerera kwaari achinyengetera mundimi, sokunge kwakanga kune magetsi mumhepo,” akadaro Bill pashure pokunge iye navamwe vatanhatu vakanga vaungana pamberi pomuparidzi pedyo neatari yechechi. Ko zvinoitika zvakadaro zvinodzokorora kushanda kwomuzana rokutanga ramakore kwomudzimu mutsvene here? Ko zvinozivisa rudzidziso rweBhaibheri here? Tinogona kuwana mhinduro dzinogutsa kupfurikidza nokusanonzvera Magwaro.
Chinyorwa cheBhaibheri chinozivisa kuti apo chipo chipi nechipi chenenji chomudzimu chakapiwa, anenge mumwe wavaapostora 12 kana kuti muapostora Pauro akanga aripo. Chokutanga chezvinoitika zvitatu zvakanyorwa zvokutaura nendimi chakaitika pakati pe 120 vavadzidzi vaJesu vakaungana paJerusarema paPentekosta 33 N.V. (Mabasa 2:1-4) Makore matatu nehafu gare gare, apo boka ravaItaria vasina kudzingiswa rakanga richiteerera Petro achiparidzira, vakagamuchira mudzimu ndokuvamba “kutaura nendimi nokukudza Mwari.” (Mabasa 10:44-48, NW) Uye makore 19 pashure pePentekosta, munenge muna 52 N.V., Pauro akataura kuboka muEfeso ndokuisa maoko ake pavadzidzi 12. Ivowo “vakavamba kutaura nendimi nokuporofita.”—Mabasa 19:6, NW.
Neiko Kwakava Nechipo Chendimi?
Pamberi chaipo pokukwira kudenga, Jesu akaudza vateveri vake, kuti: “Muchagamuchira simba apo mudzimu mutsvene unosvika pamuri, uye muchava zvapupu zvangu mose muri muviri muJerusarema uye . . . kusvikira kurutivi rwuri kure zvikurusa rwapasi.” (Mabasa 1:8, NW) Cherechedza kuti iye nokudaro akapa chiratidzo chokuti iri basa guru rokupupurira raizoitwa sei chaizvo—nebetsero yomudzimu mutsvene.
Ruzivo rwazvino uno rwokukurukurirana urwo runotigonesa kutumira mashoko mupasi rose mumitauro yakawanda rwakanga rusipo shure panguva iyeyo. Mashoko akanaka aifanira kuparadzirwa zvikurukuru neshoko romuromo, uye muna ikoku chipo chenenji chokutaura mundimi dzokumwe chaizobvumikisa kuva chinobetsera zvikuru. Kwakanga kwakadaro sezvo maKristu omuzana rokutanga ramakore akaparidzira kuvaJudha navaproserite muJerusarema paPentekosta 33 N.V. VaPartia, vaMedhia, vaErami, vaKrete, vaArabhia, vagari veMesopotamia, Judhea, Kapadhokia, Ponto, uye ruwa rweAsia, pamwe chete navagari vechinguvana vakabva Roma, vakanzwa “zvinhu zvakaisvonaka zvaMwari” mumutauro wavo vamene ndokunzwisisa zvakataurwa. Vane zviuru zvitatu vakakurumidza kuva vatendi.—Mabasa 2:5-11, 41, NW.
Idi rinowanzofuratirwa nderokuti kutaura nendimi rakanga riri rimwe chete ramabasa mapfumbamwe omudzimu mutsvene ayo muapostora Pauro akadudza mutsamba yake kumaKristu aiva muKorinte. Kunyange zvazvo Pauro akarangarira kutaura nendimi sechipo chiduku, kwaikosha kuungano yapakuvamba mukuparadzira mashoko akanaka pamusoro poUmambo hwokudenga hwaMwari. Chakanga chiri chimwe che“zvipo” zvakabetsera kukura muchiverengero nokuvakwa kweungano cheche yamaKristu.—1 VaKorinte 12:7-11; 14:24-26.
Mabasa akasiana-siana omudzimu mutsvene muzana rokutanga ramakore, kubatanidza kutaura nendimi, aivawo ufakazi hunooneka hwokuti Mwari akanga achisiri kushandisa ungano yakagara makore 1 500 yaIsraeri savanhu vake chaivo. Nenzira isingapanikirwi, tendero yake zvino yaiva neungano itsva yechiKristu, yakatangwa noMwanakomana wake akaberekwa ari mumwe bedzi.—Enzanisa naVaHebheru 2:2-4.
Idzi ratidzirwo dzomudzimu dzakanga dziri zvivakiso zvikuru mukutanga ungano yechiKristu duku nokuibetsera kukura kusvikira kuukuru. Pauro akatsanangura kuti pashure pokunge zvapedza donzo razvo, izvi zvipo zvenenji zvaizoguma: “Zvino kana kuri kuporofita, kuchabviswa; kana dziri ndimi, dzichaguma.”—1 VaKorinte 13:8.
Hungu, Bhaibheri rakajeka kuti chipo chendimi chaizoguma. Asi rini? Mabasa 8:18 inozivisa kuti zvipo zvomudzimu zvakagamuchirwa “nokuiswa kwamaoko avaapostora.” Sezviri pachena, ipapoka, norufu rwomuapostora wokupedzisira, kupfuudzirwa kwezvipo zvomudzimu kwaizoguma—kubatanidza kutaura nendimi. Nokudaro, apo avo vakanga vagamuchira izvi zvipo kuvaapostora vakapfuurawo papasi, chipo chenenji chaizoguma. Pakasvika nguva iyeyo ungano yechiKristu yaizova yava nenguva yokuva yakasanosimba uye yaizova yapararira kusvikira kunyika dzakawanda.
“Ndimi Dzisingazivikanwi” Uye Dudziro Yadzo
Kumukazve kwomuzuva razvino kwokutaura nendimi kwaka“rangarirwa navamwe sokunyanyisa kwemirangariro kwavaratidziri vasina kutsiga, nepo vamwe vachikurangarira sokwakafanana nechishamiso chokutaura nendimi chenguva dzaVaapostora.” Mukuungana kwechechi kwomuzuva razvino uno apo kutaura ne“ndimi dzisingazivikanwi” kunoitika, kunowanzobatanidza kubuda kwokufara kwamanzwi asinganzwisisiki. Naizvozvo, munhu mumwe akataura, kuti: “Ndinoshandisa chipo changu chendimi zvikurukuru ndiri ndoga nokuda kwefungisiso yangu ndimene. . . . Ndinonzwa ndichinzi kwenudzwei pamberi pavamwe vanhu.” Mumwe akarondedzera, kuti: “Ndinonzwa mashoko angu ndimene, handianzwisisi, asi ndinoramba ndichinzwa rurimi rwangu ruchisundwa kuti rutaure.”
Mashokoi oukoshi chaihwoihwo anopiwa nendimi dzakadaro dzisingazivikanwi, uye zvakadini nedudzirwo? Avo vanoti vanodudzira uku kutaura vakapa tsananguro dzakasiana-siana dzokutaura kumwe cheteko kusinganzwisisiki. Neiko pane musiano? Ivo vanoderedza musiano wakadaro kupfurikidza nokutaura kuti “Mwari akapa kumunhu mumwe dudziro imwe yokutaura uye kumumwe munhu imwe dudziro.” Mumwe munhu akabvuma, kuti: “Ndakacherechedza nguva apo dudziro yakanga isiri yorudzi rwakarurama.” D. A. Hayes, mubhuku rake The Gift of Tongues, akanongedzera kuchinoitika apo mumwe murume akaramba kududzira mutauro womukadzi uyo akataura norurimi rusingazivikanwi nemhaka yokuti “mutauro wacho wakanga uri wakaipisisa weyakaipa.” Iwoyo musiano wakadini nokutaura nendimi kwaivapo muzana rokutanga ramakore uye uyo wakanga uri zvomenemene nokuda kwokuvaka ungano!—1 VaKorinte 14:4-6, 12, 18.
Vamwe nhasi vanoti vakanzwa dudziro dzinoshamisa, uye vangadavira zvapachokwadi kuti Mwari anoshandisa ichi chipo apo iye “anoda kupa shoko rakananga kuvanhu.” Asi ishokoi rinobva kuna Mwari ratinoda nhasi iro Jesu Kristu navaapostora vasina kugovera nokuda kwedu? Pauro, uyo amene akapiwa chipo chomudzimu mutsvene, akati: “Rugwaro rwose rwakafuridzirwa naMwari uye runobetsera nokuda kwokudzidzisa, nokuda kwokutsiura, nokuda kwokururamisa zvinhu, nokuda kwokuranga mukururama, kuti munhu waMwari agokwanisa zvizere, akashongedzerwa zvakakwana nokuda kwebasa riri rose rakanaka.”—2 Timotio 3:16, 17, NW.
Idi ndeiri, ungano yechiKristu haisati ichisiri muucheche hwayo, uye nokudaro zvizarurwo zvoumwari kana kuti zvipo zvenenji zvomudzimu hazvisati zvichadikanwa kusimbisa basa rayo. Bhaibheri rinonyevera, kuti: “Kunyange kana isu kana kuti ngirozi inobva kudenga tikazivisa kwamuri samashoko akanaka chimwe chinhu chinopfuura [“chinopesana,” The New English Bible] chatakazivisa kwamuri samashoko akanaka, ngaave akatukwa.”—VaGaratia 1:8, NW.
Kutaura nendimi nenzira yenenji hakusati kuchiri madikanwa, uye hapana hwaro hweBhaibheri hwokudavira kuti iko rutivi rwechiKristu chechokwadi nhasi. Zvino izvo Bhaibheri rakakwana uye richiwanika zvikuru, tine chatinoda muShoko raMwari. Iro rinotibvumira kuwana zivo yakarurama yaJehovha noMwanakomana wake iyo inotungamirira kuupenyu husingaperi.—Johane 17:3; Zvakazarurwa 22:18, 19.
Kunyange muzana rokutanga ramakore, muapostora Pauro akagombedzerwa kunyorera ungano yaiva muKorinte kuti iruramise murangariro wavo wechikonzero nei chipo chendimi chakapiwa kumaKristu apakuvamba. Sezvinooneka, vamwe vakanga vava vanonakidzwa nechipo chendimi, uye ivo vakanga vachiita savana vaduku, vasina kukura mumudzimu. Ukoshi hwakanyanya zvikuru hwakanga huchibatanidzwa ne“ndimi.” (1 VaKorinte 14:1-39) Pauro akasimbisa kuti haasati ari maKristu ose omuzana rokutanga ramakore aitaura nendimi dzenenji. Kwakanga kusiri madikanwa kuruponeso rwavo. Kunyange shure panguva iyeyo apo chaivapo, chipo chendimi chaiva chechipiri kukuporofita kwenenji. Kutaura nendimi kwakanga kusati, uye hakusati, kuri chinodikanwa chamaKristu kuti awane upenyu husingaperi.—1 VaKorinte 12:29, 30; 14:4, 5.
Simba Rinotsigira Ndimi Dzisingazivikanwi Nhasi
Vamwe vanodavira kuti simba rinosunda rinotsigira vatauri nendimi vanhasi vatungamiriri vechechi vane mbavarira avo vanosunda mitezo yeboka ravo kuwana iri simba. Muzvinoitika zvakati rinounzwa nokutungamirirwa nemirangariro nokusadzikama. Cyril G. Williams, muTongues of the Spirit, anoti kwazova “muzvinoitika zvakawanda chiratidzo chokuisvonaka mukati meboka” uye kunopa munhu “chimiro nesimba muchiono cheboka uyewo mumeso avo vamene.” Vavariro yacho, naizvozvo, ingagona kuva chishuvo chokuva weboka rorurimi rusingazivikanwi rakaisvonaka.
Purezidhendi wapanguva iyeyo weLoyola University Donald P. Merrifield akataura kuti “ndimi chingagona kuva chinoitika choupengo, kana kuti, mukuwirirana navamwe, choudhiabhorosi.” Mufundisi Todd H. Fast akati: “Ndimi dzinomutsa nharo. Dhiabhorosi ane nzira dzakawanda dzokutitapura nadzo.” Bhaibheri rimene rinonyevera kuti Satani namadhemoni ake vanokwanisa kupesvedzera vanhu ndokudzora kutaura kwavo. (Mabasa 16:17, 18) Jesu anorwisana nomudzimu woudhemoni uyo wakanga wasunda mumwe munhu kudanidzira ndokuwira pauriri. (Ruka 4:33-35) Pauro akanyevera kuti ‘Satani aizozvishandura amene kuva ngirozi yechiedza.’ (2 VaKorinte 11:14) Avo nhasi vanotsvaka chipo chendimi icho Mwari asati achaisa pavanhu vake vari kuzvizarurira vamene chaizvoizvo kunyengedzo inoitwa naSatani, uyo, tinonyeverwa, aizoshandisa “basa riri rose rine simba nezviratidzo zvokureva nhema nezvishamiso.”—2 VaTesaronika 2:9, 10, NW.
Ndimi—Uye chiKristu Chechokwadi
MaKristu omuzana rokutanga ramakore ayo akagamuchira chipo chokutaura mundimi akachishandisa kutsanangura zvinhu zvakaisvonaka zvaMwari. Simbiso yaiiswa pakudikanwa kwokududzira zvakajeka shoko rakapiwa mundimi kuti rigogona kunzwisiswa navose ndokuguma nokudzidziswa kwavazhinji. (1 VaKorinte 14:26-33) Pauro akapa zano, kuti: “Kana musingatauri norurimi mashoko anonyatsozivikanwa, zvinotaurwa zvichazivikanwa seiko? Nokuti muchangotaura henyu mumhepo.”—1 VaKorinte 14:9.
Nepo mudzimu waMwari wakapa maKristu apakuvamba chipo chendimi, hachina kuvaparira kutaura mhere-mhere isinganzwisisiki kana kuti isingashanduriki. Mutsinhirano nezano raPauro, mudzimu mutsvene wakagovera kutaura uko kwakaguma namashoko akanaka ano“paridzirwa [nokukurumidza zvikuru] muchisiko chose chiri pasi pedenga.”—VaKorose 1:23, NW.
Pamusoro paaya mazuva okupedzisira etsika yazvino, Jesu Kristu akaraira, kuti: “Mashoko akanaka [oUmambo hwakagadzwa] anofanira kutanga kuparidzirwa mumarudzi ose.” (Marko 13:10, NW) Somuzana rokutanga ramakore, chisiko chose chinofanira kunzwa shoko roUmambo. Ikoku kunobvira nemhaka yokuti Bhaibheri zvino rakashandurirwa, rose kana kuti murutivi, mumitauro inodokusvika 2 000. Mudzimu mumwe chetewo wakanyandura maKristu apakuvamba kuti ataure noushingi uye nokusatya zvino uri kutsigira basa guru nerinoshamisa rokuparidzira reungano yomuzuva razvino yeZvapupu zvaJehovha. Kupfurikidza neshoko romuromo uye kupfurikidza nokushandisa ruzivo rwokutsikirira rwazvino uno kuita kuti zvokwadi yapaMagwaro iwanike kupfurikidza nepeji rakatsikirirwa, izvo zvinotaura “mutauro wakachena.” Iri shoko riri kubudira kunyika dzinopfuura 200 nezvitsuwa zvegungwa. Zvapupu zvaJehovha zviri zvoga savanhu vanosundwa nomudzimu waMwari kuzivisa kuvose zvinhu zvakaisvonaka zvaMwari.—Zefania 3:9, NW; 2 Timotio 1:13.
[Mifananidzo iri papeji 7]
Kupupurira pasuo nesuo muJapan
Kupupurira pangarava nengarava muColombia
Pasi: Fundo yeBhaibheri muGuatemala
Pasi: Kupupurira muruwa muNetherlands