‘Shinga’

1. Pane zvimwe here zvatingada kukurukura nezvazvo panyaya yekuratidza ushingi?

ZVATADAI kusvika pamhedziso yebhuku rino, pachiri nezvimwe zvatingada kutaura here nezvenyaya yeushingi? Hongu, zviripo. Mubhuku rino, takakurukura nezvevanhu vakawanda vakaratidza ushingi uye zvatingaita kuti tivatevedzere. Asi pane zvimwe zvakawanda zvatinogona kudzidza kubva muBhaibheri nezveushingi. Semuenzaniso, Bhaibheri rinotaura nezvevamwe vanhu vakaratidzawo ushingi, asi vasina kutaurwa nezvavo mubhuku rino. Uyewo, pane chimwe chinhu chatichakurukura nezvacho chatinofanira kuita kuti tive neushingi.

2. Ndevapi vamwe vashumiri vaMwari vainge vakatendeka vakaratidzawo ushingi?

² Pane vamwe waunoziva here vanotaurwa muBhaibheri vakaratidza ushingi kunze kwevatakadzidza nezvavo mubhuku rino? Pamwe ungafunga nezvevaprofita vanotaurwa muMagwaro echiHebheru, vakadai saIsaya, Jeremiya, Ezekieri, Jona, kana kuti Maraki. Muapostora Pauro anofanira kunge aitaura nezvevarume ivavo paakafemerwa kunyora kuti: “Vamwe vaiva nemiedzo yekusekwa uye kurohwa zvakasimba, vachitosungwa necheni nekuiswa mumajeri.” Akanyorawo kuti vamwe ‘vaishayiwa, vaitambudzika, vachibatwa zvisina kunaka.’ Vamwe vakatourayiwa. (VaH. 11:​36, 37) Asi pasinei nezvese izvozvo, vakaramba vakashinga kuita zvaidiwa naJehovha Mwari.

3-4. Vakadzi vaviri vasingataurwe nemazita avo vakaponesa sei Mambo Dhavhidhi upenyu hwake pahwaiva pangozi?

³ Pane vamwe vakatowanda vakaratidzawo ushingi asi vasina kutaurwa nemazita avo muBhaibheri. Chimbofunga nezvevakadzi vaviri vakararama panguva yaMambo Dhavhidhi. Vakadzi ivavo vakabatsira Dhavhidhi paaida kuurayiwa nemwanakomana wake ainzi Absaromu. Absaromu aizvikudza, aiva neutsinye uye aida kutorera baba vake umambo. Saka Dhavhidhi akatiza muJerusarema kuti asaurayiwe naAbsaromu. Dhavhidhi akakumbira Zadhoki, uyo aiva mupristi ainge akashinga, kuti adzokere kuguta oramba ari ikoko kuitira kuti agare achiziva zvairongwa naAbsaromu. Zadhoki aifanira kutumira mashoko kuna Dhavhidhi. Pashure pekunge Zadhoki aziva zvairongwa naAbsaromu, akatuma “murandasikana” asingataurwe nezita uyo akaisa upenyu hwake pangozi nekuudza shamwari mbiri dzaDhavhidhi mashoko acho. Varume vacho vaviri pavakanga vava kuenda kunoudza Dhavhidhi mashoko acho, rimwe jaya rakavaona uye rakaenda kunoudza Absaromu nezvavo. Vakabva vahwanda mumugodhi. Mumwezve mukadzi asingataurwe nezita uyo aiva mudzimai wemuridzi wemugodhi wacho, akabva awaridza chinhu pamusoro wetsime racho akaparadzira zviyo pamusoro. Varanda vaAbsaromu pavakauya kuzotsvaga varume vacho, mukadzi iyeye akavaendesa kwakasiyana nekwavakanga vakahwanda. Vakadzi ava vaviri vainge vakashinga vakabatsira chaizvo pakuchengetedza mambo ainge asarudzwa naJehovha!—2 Sam. 15:​23-37; 17:​8-22.

⁴ Bhaibheri rinotaura nezvevarume nevakadzi vakawanda vaiva neushingi, vapfumi nevarombo, vakakurumbira nevasina kukurumbira, vanotaurwa nemazita nevasingataurwe nemazita. Vese ava vakaratidza ushingi nekutsigira Jehovha. Nyaya dzavo dzinotibatsirawo mazuva ano.

Kukosha Kwemunyengetero

5-7. Pauro akawana kupi ushingi hwekuramba achiparidza paaitambudzwa?

⁵ Tingatevedzera sei varume nevakadzi vaiva neushingi vanotaurwa muBhaibheri? Tinofanira kuziva kuti havasi vese vakaberekwa vaine ushingi. Kunyange zvakadaro, vakakwanisa kuratidza ushingi uye kushumira Jehovha vakatendeka. Chii chakavabatsira?

⁶ Chimbofunga nezvemuapostora Pauro. Pavaiva muFiripi, Pauro naSirasi vakarwiswa nemhomho yevanhu, vakabviswa hembe dzavo, vakarohwa neshamhu, ndokuvharirwa mujeri maiva nerima tsoka dzavo dzakasungwa muzvisungo zvematanda. (Mab. 16:​12, 19-24) Pashure pekunge vasunungurwa, Pauro akatanga kutya zvekutadza kuparidza here? Pauro aingovawo munhu sesu, saka hazvishamise kana kuri kuti akambobatwa nekutya. Asi aiziva kuti Jehovha aida kuti arambe achiparidza. Akanga ava kufanira kuenda kuTesaronika. Chii chakamubatsira kuti ave nesimba uye ushingi hwekuramba achiparidza?

⁷ Akazonyora kuti: “Kunyange zvazvo takambotambura pakutanga uye takanyadziswa kuFiripi sezvamunoziva, takazvishingisa tichibatsirwa naMwari wedu kuti tikuudzei mashoko akanaka aMwari tichipikiswa zvakaoma.” (1 VaT. 2:2) Pauro aiziva kuti aitofanira kushinga kuitira kuti akwanise kuita basa raakanga apiwa naMwari. Asi akawana kupi ushingi ihwohwo? Akangozvishingisa semunhu akanga aberekwa atori neushingi here? Aiwa. Akazvishingisa ‘achibatsirwa naMwari wedu.’ Akazvininipisa ndokukumbira Jehovha kuti amupe ushingi. Uye Jehovha akabva amupa ushingi hwaaida.

8. Tingatevedzera sei zvakaitwa naPauro kana tichida kuva neushingi?

⁸ Unogonawo kukumbira Jehovha kuti akupe ushingi sezvakaitwa naPauro. Haufanire hako kunetseka kuti hauzombokwanise kuva neushingi nemhaka yekuti hauna kuberekwa uinahwo. Asi chinongodiwa ndechekuti unyengetere kuna Jehovha Mwari uchimukumbira kuti akupe ushingi.—Mab. 4:29.

9. Nei tichifanira kukumbira Jehovha kuti atiwedzere kutenda?

⁹ Unogonawo kukumbira Baba vako Jehovha kuti vakuwedzere kutenda. Kutenda ndechimwe chezvibereko zvemweya mutsvene waJehovha. (VaG. 5:​22, 23) Uyewo ndechimwe chezvipfeko zvemurwi zvekuzvidzivirira nazvo zvinofanira kupfekwa nemuKristu wese. (VaEf. 6:16) Kutenda kwechiKristu kune simba chaizvo zvekuti Bhaibheri rinoti ‘kwakakunda nyika.’ (1 Joh. 5:4) Kutenda muna Jehovha ndiko kunoita kuti munhu ave neushingi. Kana uchinyatsovimba kuti Jehovha achakubatsira paunenge uchida kubatsirwa, uchaona kuti ushingi hwako hucharamba huchiwedzera. Vaapostora vaJesu vakakumbira kuti: “Tiwedzereiwo kutenda.” (Ruka 17:5) Nesuwo sevateveri vaKristu tinogonawo kuramba tichikumbira kuti tiwedzerwe kutenda.

“Shingai!”

10-11. Nei Pauro akaudza vaKristu vaiva muguta reJerusarema uye vaiva pedyo neguta iroro kuti vave neushingi?

¹⁰ Jesu akanga aprofita kuti Jerusarema raizoparadzwa. Saka pangosara makore mashoma kuti izvozvo zviitike, Pauro akanyorera vaKristu vechiHebheru vaiva muJerusarema uye vaiva pedyo neJerusarema kuti vagadzirire matambudziko akakura avakanga vava kuda kusangana nawo. (Ruka 19:​41-44; 21:​20-24) Pauro akavabatsira sei kuti vave neushingi? Akavayeuchidza nezvevimbiso yaJehovha. Takambotaura nezvevimbiso iyoyo mumashoko ekusuma ari mubhuku rino. Jehovha akavimbisa kuti: “Handizokusiyi, uye handizokurasi.” Vimbiso iyoyo yaizovabatsira sei? Pauro akawedzera kuti: “Kuti tive vakanyatsoshinga tichiti: ‘Jehovha ndiye mubatsiri wangu; handizotyi. Munhu angandiitei?’”—VaH. 13:​5, 6.

¹¹ Kunyange zvazvo Bhaibheri risingataure haro zvese zvakaitika pakaparadzwa Jerusarema mugore ra70 C.E., tinogona kuva nechokwadi chekuti vaKristu vakatendeka vaiva muguta iroro vakateerera mashoko akafemerwa akataurwa naPauro. ‘Vakatanga kutizira kumakomo’ panguva chaiyo yakanga yataurwa naJesu.—Ruka 21:​20, 21.

12. (a) Ivimbiso dzipi dzichakubatsira kuti uve neushingi paunosangana nematambudziko? (b) Vamwe vashumiri vaMwari wemumazuva ano ekupedzisira vakaratidza sei ushingi hunoshamisa, uye iwewe watsunga kuitei? (Ona bhokisi rakanzi “Tevedzera Ushingi Hwavo.”)

¹² Jehovha anogonawo kukupa ushingi paunosangana nematambudziko. (Ezek. 38:​1, 2, 10-12; Mat. 24:21) Ramba uchiyeuka kuti Jehovha anovimbisa kuti achatidzivirira. (Ezek. 38:19-23; 2 VaT. 3:3) Haazombofi akasiya vanhu vanomuda uye vanotenda maari. Zvakataurwa naJehovha achiudza Joshua zvinoshandawo kwauri. Unogona ‘kushinga, wosimba’! (Josh. 1:​7, 9, 18) Gara uchiyeuka mashoko akataurwa naJesu ekuti: “Shingai!” Jesu akavimbisa kuti achakupa mweya mutsvene waJehovha, uye haazombokurasise. Mweya mutsvene uchakubatsira kuti uve neushingi hwekuramba wakatendeka kuna Jehovha. (Joh. 14:26; 15:​26, 27; 16:33) Saka zvinoita kuti uve ‘neushingi’!

13. Chii chinoita kuti ude kuramba chiratidza ushingi?

¹³ Chimboedza kufungidzira kufara kwatichaita kana panyika pava nerugare uye vakafa pavachamutswa. Fungidzirawo uchisangana nevarume nevakadzi vaiva neushingi vatakakurukura nezvavo mubhuku rino nevamwewo vatisina kukurura nezvavo! Pavakararama munyika yaSatani vanogona kunge vakatambura zvakanyanya uye kutourayiwa nemhaka yekuti vaida kuramba vakatendeka kuna Mwari. Asi pavachazomutswa munyika itsva unofunga kuti vachazvidemba here kuti vakasarudza kushumira Jehovha? Zviri pachena kuti havambozvidembi! Ko iwewe? Pauchange uchishanda navo muchibatsirana kugadzira nyika kuti ive paradhiso, unofunga kuti uchazombozvidemba here kuti wakaratidza ushingi uye kuti wakararama mumazuva ekupedzisira uchiratidza kuti unoda Jehovha? Kana, hauzombozvidembi! Saka tsunga kuramba uchiratidza ushingi kusvikira pamugumo. Ukadaro uchararama nekusingaperi uchifara nekuti ndizvo zvawakasarudza kuita!