Miinju Manna Baalaho Taalo Iillanno Yanna Dagga Ikka?
Batinye gobbuwara mannu miinja taalo horoonsiꞌra dandiinokki daafira, tenne giwinota leellishate salfe fulanno. Isinni Koroonu fayya ubbuta kuni qarri roore lexxino; Koroonu fayyanni kainohunni mannu milli-millo agawa, hidhinanniri aja, hattono fayyimmate owaante aja buxanetenna dureeyyete mereero noo badooshshi luphi yee leellanno gede assitino.
Alame baasa mitiinse noohu miinju qarri heeꞌrannokki yanna dagga ikka? Ee dagganno. Qullaawu Maxaafi, Maganu iillanni noonke qarra hoolate maa assannoro kulanno.
Maganu hoolannoha miinju qarra
Qarra: Mannu ooso, baalunku manni miinja taalo horoonsiꞌranno gede assa didandiitino.
Mala: Maganu mannu gashshoote hune hakko bayicho umisi gashshoote xintanno; konne gashshoote Maganu Mangiste yinanni. Tini Mangiste gordoho heedhe baatto woꞌma gashshitanno.—Daanieeli 2:44; Maatewoosi 6:10.
Daanno guma: Maganu Mangiste alame woꞌma gashshitannota ikkitino daafira uullate hajo taashshite laꞌanno. Manna buxima woy miinju anje layinkita diqarrissanno. (Faarso 9:7-9, 18) Hatteentenni mannu loosinsanni afiꞌrinohu danchu guminni maatensa ledo hagiidhanni heeꞌranno. Qullaawu Maxaafi togo yee hexxo aanno: “Manniꞌya, mine miꞌne heeꞌranno; woyineno kaasiꞌre laalose itanno. Insa miꞌnitino minira wolu digalanno; loosidhino jajja allaggichu diꞌꞌitanno.”—Isayaasi 65:21, 22.
Qarra: Mannu qarru amadannonsata woy heeshshote hasiisannore hooganno gede assannonsare hooꞌle diafanno.
Mala: Maganu Mangistesi widoonni mannu waajjannonna yaadanno gede assannore baalankare hoolanno.
Daanno guma: Maganu gashshooti yannara, mannu uminsarano ikko maatensara hasiisannore hooganno gede assannori diheeꞌranno. Lawishshaho olu, sagalete anjenna taraawe gudanno dhibbi diheeꞌranno. (Faarso 46:9; 72:16; Isayaasi 33:24) Maganu togo yiino: ‘Manniꞌya yaaddonna qarru nookkiha heeꞌranno; mininsa keerunnihanna hobbaatenniha ikkanno.’—Isayaasi 32:18.
Qarra: Umonsa calla baxannohunna hafuuraamu manni duucha woyite manniha hanaaqe adhanno.
Mala: Maganu Mangiste qansooti uminsanni roorsite woloota baxxanno gara rossanno.—Maatewoosi 22:37-39.
Daanno guma: Maganu Mangiste gashshitanno yannara, baalunku manni Maganu gede baxille leellishannoha ikkanno; togoo “[baxilli] umisire diroorsiꞌranno.” (1 Qorontoosi 13:4, 5) Qullaawu Maxaafi togo yaanno: “Kaaliiqihura Qullaawu Ilaali aana gawajjannori diheeꞌranno; wayi baaraho woꞌmannonte gede, Kaaliiqa [“Yihowa,”a Haaro Alame Tiro] egennino mannino baatto woꞌmanno.”—Isayaasi 11:9.
Qullaawu Maxaafi heeꞌnoommohu tenne alamehu goofimarchu barri giddo ikkinotanna Maganu miinju qarra baala huneemmo yee eino qaale muli yannara wonshannota kulanno.b (Faarso 12:5) Hatti yanna iillita geeshsha kayinni, xaa yannara iillannoheha miinju qarra qeelate Qullaawu Maxaafi biddishshi kaaꞌlannohe. Lawishshaho, “Shiimurinni Heeꞌra Dandiinanni Gara” hattono “Woxeho Quwa Saꞌinokki Lao Heedhohe” yitanno birxichuwa nabbawi.
a Qullaawu Maxaafi kulanno garinni Yihowa Maganu suꞌmaati.—Faarso 83:18.
b Qullaawa Maxaafa addaxxa dandaattohu mayiraatiro afate, “Qullaawu Maxaafi Addaxxinanni Halaale Kulanno” yaanno birxicho nabbawi.