Hegerera Heeꞌra Dandiinannihu Hiittoonniiti?
Qullaawu Maxaafi mayyaanno?
Qullaawu Maxaafi togo yaanno: “Maganu hedinore assannohu kayinni hegere geeshsha heeꞌranno.” (1 Yohaannisi 2:17) Maganu ati ma assattora hasiꞌranno?
Maganunna Beettisi Yesuusire rosi. Yesuusi Magano huucciꞌranni togo yiino: “Hegere heeshsho afidhanno gede, ati callu halaalaancho Magano ikkoottoha atenna soottoha Yesuusi Kiristoosi afa hasiissannonsa.” (Yohaannisi 17:3, NW) Maganonna Yesuusa ‘afate’ maa assa hasiissannonke? Insa afate Qullaawa Maxaafa xiinxallanna ronseemmore harunsa hasiissannonke.a Qullaawu Maxaafi, heeshsho aanno Kalaqaanchi Maganu Yihowa hedanno gara huwanteemmo gede kaaꞌlannonke. (Soqqamaasinete Looso 17:24, 25) Qoleno Qullaawu Maxaafi, “hegere heeshsho qaali” noosihu Beettisi Yesuusi daafira kulannonke.—Yohaannisi 6:67-69.
Yesuusita wodote kakkalo ammanattota leellishi. Yesuusi uullara dayinohu “soqqamaranna lowo manna wode gatisate lubbosi sayise [aaraati].” (Maatewoosi 20:28) Yesuusiti wodote kakkalo mannu ooso uullate aana Gannatete hegerera heedhanno doogo fantino.b (Faarso 37:29) Yesuusi togo yiino: “Maganu baattote aana noo manna baala baxino daafira, iso ammaꞌninohu baalu hegere heeshsho afiꞌranno gede ikkinnina baꞌannokki gede, Maganu mitto Beettosi uyino.” (Yohaannisi 3:16) Yesuusa ‘ammanneemmota’ leellishate, isi rosiisino rosi garinni heeꞌranna Annisi fajjo wonsha hasiissannonke.—Maatewoosi 7:21; Yaiqoobi 2:17.
Maganu ledo muli jaalooma kalaqiꞌri. Maganu isiwa gamba yinammoranna jaallasi ikkinammora hasiꞌranno. (Yaiqoobi 2:23; 4:8) Maganu hegereho. Isi horonta direyanno; jaallasino hegerera heedhara hasiꞌranno. Maganu iso hasidhannorira baalaho maa halchannoro kulanni Qaalisi widoonni togo yiino: “Heeshshonsa diri baalunkunni [“hegerera,” NW] qawaaxxidhe heedho!”—Faarso 22:26.
Hegere Heeshsho Daafira Mannu Hedannota Soꞌro Ikkitino Hedo
Soꞌro Ikkitino Hedo: Mannu sharronni hegerera heeꞌra dandiinanni.
Halaale: Mite hikkiminnu lopho mannaho diro leddannota labburono, togoo sharro hegere heeshsho afiꞌnanni gede diassitanno. “Heeshshote buicho” Magano ikkino daafira, hegere heeshsho aankera dandaannohu iso callaati. (Faarso 36:9) Isi ‘reyo coꞌo asse hunaranna’ ammanamino manni baalunkura hegere heeshsho aara qaale eino.—Isayaasi 25:8; 1 Yohaannisi 2:25.
Soꞌro Ikkitino Hedo: Hegerera heeꞌrannohu baalante gaꞌre manna diꞌꞌikkino.
Halaale: Maganu mitte gaꞌre woletewiinni roorse dilaꞌꞌanno. “Aye gosano ikkiro Maganu waajjannosihanna dancha loosannoha baxanno.” (Soqqamaasinete Looso 10:34, 35) Woꞌmante gaꞌrenna daga wido ikkino manni Maganoho hajajamannoha ikkiro, hegerera heeꞌra dandaanno.
Soꞌro Ikkitino Hedo: Hegerera heeꞌra ceeꞌmishshanno.
Halaale: Hegere heeshsho aannonkehu baxannonkehonna hagiirraamma ikkinammora hasiꞌranno Maganooti. (Yaiqoobi 1:17; 1 Yohaannisi 4:8) Isi, hagiirraamma ikkate danchu loosi hasiisannonketa afino. (Rosiisaancho 3:12) Maganu, uullate aana hegerera heedhannorira hagiirsiisannohanna umonsano wolootano kaaꞌlanno looso aannonsata coyiꞌrino.—Isayaasi 65:22, 23.
Hakkiinni saeno, hegerera heedhannori Kalaqaanchinsa daafiranna isi kalaqo daafira haaro coye rossanni heedhanno. Maganu mannaho hegerera heeꞌratenna isire rosate hasatto giddonsa wore kalaqino; ikkirono mannu ooso, “halaalaanchu Magani kaimunni gawalote geeshsha loosino looso horonta affe diguddanno.” (Rosiisaancho 3:10, 11, NW) Konni daafira, hegerera heeꞌranno manni rosannohanna loosannoha haaro coye horo dihooganno.
a Yihowa Farciꞌraasine Qullaawa Maxaafa woxe baaxxittokki xiinxallissannohe. Ledde afate, Qullaawa Maxaafa Xiinxallinseemmohu Hiittoonniiti? yitanno viidiyo lai.
b “Yesuusi Gatisannonkehu Hiittoonniiti?” yaanno birxicho lai.