Ammaꞌno Poletiku Giddora Ea Hasiissannose?

Alamete aana, Yesuusi Kiristoosi ammanneemmo yaannohu batinyu manni poletiku coyira eanno. Mitootu ammaꞌnonsa woganna wodhonsa halashshiꞌrate yite mitto gashshaancho woy mitte poletiku paarte badde kaaꞌlitanno. Poletiku mannooti qolte dagoomu giddo kaꞌanno hajo horoonsidhe ammaꞌno afiꞌrino manna insawa qoꞌlate sharrantanno. Ammaꞌnote murrooti poletiku silxaane afiꞌrate sharrantanna laꞌꞌano rosantinote. Mite gobbara isinni, ninke Kiristaanaho yitannota mite ammaꞌno gashshootu woy gobbate ammaꞌnooti nafa yinanni.

Kuni coyi atera ma lawannohe? Kiristoosa ammaꞌnino manni poletiku coyira ea hasiissannonsa? Yesuusi coyiꞌrinori tenne xaꞌmora dawaro afiꞌrate kaaꞌlannonke. Isi togo yiino: “Ani kiꞌnera assoommore kiꞌneno assitinanni gede lawishsha ikkaꞌnera assoommo.” (Yohaannisi 13:15) Poletiku coye lainohunni Yesuusi lawishsha ikkankera assinori maati?

Yesuusi poletiku coyira einoni?

Dieino. Yesuusi alamete poletikira anga diwodhino.

Yesuusi poletiku silxaane amada dihasiꞌrino. Isi Sheexaanu Daawuloosi “alamete gashshoote baala” eemmohe yiisi woyite mannu gashshoote amada hasiꞌrannokkita xawise coyiꞌrino. (Maatewoosi 4:8-10)a Wole yannarano, Yesuusira dancha gashshaancho ikkate hasiissannoti kaajja akatta noosita laino manni iso poletiku coyira eanno gede xixxiiwinosi. Qullaawu Maxaafi togo yaanno: “Mannu Yesuusa wolqatenni amade moote assasira hedinota afe, callisi fule gaaru widira hige haꞌri.” (Yohaannisi 6:15) Yesuusi qeelame mannu yiinosi gede diꞌꞌikkino. Hatteentenni, isi poletiku coyira ea qorophino.

Yesuusi mitte poletiku hedo woy gaamo bade dikaaꞌlino. Lawishshaho, Yesuusi waro noo Ayihudooti Roomu gashshootira giwire baata dibaxxanno; insa togoo giwire baata gara diꞌꞌikkitino yite heddanno. Insa Yesuusino tenne hajora eꞌꞌe kaaꞌlannonsa gede assate woꞌnaaltu yannara, isi kuni giwiri hasiisannohonso dihasiisannoho yitanno heewo giddora ea dihasiꞌrino. Togo yiinonsa: “Qeesaariha Qeesaarira, Maganunniha Maganoho uuyye!” (Maarqoosi 12:13-17) Isi poletiku heewo woy yekkeero giddora dieino; ikkirono Qeesaari wodhinori Roomu gashshaasine xaꞌmitino giwire baata gara ikkitinota qummi assino. Kayinni isi coyiꞌrinori, gashshootu yiire baala assa hasiissanno yaano ikkinokkita leellishanno. Mittu manchi Maganoho calla uyinannire, lawishshaho magaꞌno uullate gashshootira aa dihasiissannosi.—Maatewoosi 4:10; 22:37, 38.

Yesuusi gordu gashshoote yaano Maganu Mangiste duduwino. (Luqaasi 4:43) Isi poletiku coyira einokkihu, Maganu baattote hedinore wonshannohu mannu gashshoote ikkikkinni Maganu Gashshoote ikkinota afino daafiraati. (Maatewoosi 6:10) Qoleno Yesuusi, Maganu Gashshooti loosannohu uullate gashshooti widoonni ikkinokkitanna insa hune bayichonsa amadannota afino.—Daanieeli 2:44.

Hundi Kiristaani poletiku coyira eino?

Dieino. Yesuusi rosaano isi hajajinonsante gede “tenne gobbare [alamere]” ikkitinokkita leellishshino. (Yohaannisi 15:19) Insa isi lawishsha harunsite alamete poletikira anga wodhitukkinni heedhino. (Yohaannisi 17:16; 18:36) Poletiku coyira eantenni, insa Yesuusi hajajino garinni Maganu Gashshootire duduwatenna rosiisate looso loossino.—Maatewoosi 28:18-20; Soqqamaasinete Looso 10:42.

Hundi Kiristaanira heeshshonsa giddo qaru coyi Maganoho hajajamate; ikkirono insa uullate gashshaasine ayirrisa hasiissannonsatano affino. (Soqqamaasinete Looso 5:29; 1 Pheexiroosi 2:13, 17) Insa gashshootu seera ayirrissanno hattono giwire baattanno. (Roomu Sokka 13:1, 7) Poletiku coyira anga wodhitinokkiha ikkirono, gashshootu assanno agarooshshenna aanno kaaꞌlo maahoyye yite adhitino.—Soqqamaasinete Looso 25:10, 11; Filiphisiyusi Sokka 1:7.

Xaa yannarano Kiristaanu poletikaho anga diwodhanno

Qullaawu Maxaafi xawise kulannonte gede, Yesuusino ikko hundi Kiristaani poletiku coyira dieino. Hakko daafira, Yihowa Farciꞌraasineno Kiristaana ikkitino daafira, aye gobbarano heedhuro poletiku coyira anga diwodhitanno. Hundi Kiristaani assinonte gede, insano Yesuusi uyinoha ‘Maganu Gashshootiha Dancha Duduwo’ duduwate looso loossanno.—Maatewoosi 24:14.