Busha Diilallote Gade—Qullaawu Maxaafi Dandaatto Gede Kaaꞌlannohe?
Kalqete aana diilallote soorro korinni lowo miliyoone ikkanno manni gawajjamanno. Aterano togoo qarri iillinohe? Busha diilallote gade batinye kalaqamu dano abbitara dandiitanno. Harikeen, tayfuun, saykiloon, hattono torneedo yinanni hambabalatte lolahu batiꞌranno gede woy baaru gamira heedhanno qooxeessubba kaajjado bubbe gantanno gede assitanno. Kaajjadu xeenino baatto fottoqantanno gede assanno; togoo yannara dirritanno banqono lowo qooxeessa buluulo assitannoti dubbu giira kaꞌanno gede assitanno. Diilallote gade soorronni dagganno moolle, ruqanu iibbillinna qorruno lowore hune saꞌꞌanno.
Kalqete aana duuchu qooxeessira busha diilallote gade lexxitanninna iillitanno gawajjono batidhanni no. Duumu Masqalinna Duumu Agani Maamarra Kalqete Federeeshiine odeessitino garinni, “kalaqamu danonni gawajjamanno manni kiiro xaano lexxitannilla no.” Rippoorte ledde togo yitanno: “Kaajjadu xeeni, lolahunna moolle yannate kiiro lexxase, lowo manni lubbamanno gedenna heeshshonsa umo-lekkicho baꞌanno gede assitino; togoo dano korinni diru dirunku lowo miliyoone ikkanno manni qaensanni daramanno.”
Kalaqamu dano manninate gawajjitannoha calla ikkikkinni giddiidi xissonna yaaddono abbitanno. Lowo manni danotenni jajjansanna qaensa hooge hattono baxanno manna shiiꞌre xissiisiꞌranno.
Busha diilallote gadenni gawajjo iillitinoheha ikkiro, Qullaawu Maxaafi kaaꞌlannohe. Qullaawu Maxaafi aanno shesho, hexxonna amaale diilallote gade soorro korinni gawajjaminoha lowo manna kaaꞌlitino. (Rooma 15:4) Qoleno Qullaawu Maxaafi duuchu mannira huluullitanno xaꞌmuwara dawaro qolanno: Maganu togoori ikkara fajjinohu mayiraati? Isi cubbinkera qorichishanni noonkekka?
Dirinkera kalaqantannoti busha diilallote gade Maganu hanqo diꞌꞌikkitino
Qullaawu Maxaafi, xaa yannara manchi beettira iillanni noo qarra abbinohu Magano ikkinokkita kulanno. Isinni “Maganu bushu coyinni dijifanno; horontanni isi ayeno dijifanno” yee xawise kulanno. (Yaiqoobi 1:13) Konni daafira, yannankera kalaqantannote busha diilallote gadera kaimu Magano diꞌꞌikkino yaate.
Hige Qullaawu Maxaafi Maganu kalaqamu wolqa horoonsiꞌre bushuulle qorichishino yanna noota kulanno. Ikkirono hattinna dirinkera daggannoti kalaqamu dano iimanna uullaati; mayira yiniro, yannankera kalaqamu dano kulte didagganno; qoleno bushano danchano mitteenni raafo gantanno ikkiina dibaddanno. Wole widoonni kayinni, Qullaawu Maxaafi kulannonke garinni, Maganu qoricha abbanno woyite bunshe assitinokkire bade gatisanno, balaxe qorophishsha sayisanno, hattono qoricha abbanni noohu mayiraatiro xawisanno. Lawishshaho, Maganu Nohi waro Baote Waa abbanni noohu mayiraatiro xawisino, hakkuyira albaanni qorophishsha sayisino, hattono Nohinna minisi manna gatisino.—Kalaqama 6:13; 2 Pheexiroosi 2:5.
Dirinkera ikkitannoti kalaqamu dano Maganu hanqo diꞌꞌikkitino yineemmohu mayiraatiro ledde afate, “Qullaawu Maxaafi Kalaqamu Dano Daafira Mayyaanno?” yaanno birxicho lai.
Busha diilallote gadenni gawajjamino manna Maganu mararanno
Qullaawu Maxaafi, Maganu Yihowaa shaqqadonna mararannoha ikkinota kulanno. Aante noota sheshifachishshanno qummeeshshuwa wodanchi:
Isayaasi 63:9: “Qarrinsa yanna baalantera [Maganu] ledonsa qarramino.”
Tiro: Yihowa mannu shete qarramanna laꞌꞌanno woyite lowo geeshsha dadillanno.
1 Pheexiroosi 5:7: “Kiꞌnere malannohu isooti.”
Tiro: Yihowa keerinkenna hobbaatenke daafira hedanno.
Yihowa shaqqadonna shooshaqa ikkino daafira ninke kaaꞌlate qaafo adhanno. Isi Qullaawu Maxaafi widoonni dancha amaale aatenninna albillitte kalaqamu dano horo nookkiha keere heeꞌneemmo hexxo aatenni sheshifachishannonke.—2 Qorontoosi 1:3, 4.
Busha diilallote gade heedhannokki yanna
Qullaawu Maxaafi Yihowa albillitte dancha heeshshonna “hexxo” aahera qaale einota kulanno. (Ermiyaasi 29:11) Isi hasatto mannu gannate ikkitino baatto aana hagiidhanni heeꞌranno gedeeti ikkinnina diilallote gade soorro waajjanni heeꞌrara diꞌꞌikkino.—Kalaqama 1:28; 2:15; Isayaasi 32:18.
Maganu tenne hexxo wonshannohu Gashshootisi widoonniiti; Maganu Gashshooti Yesuusi anga nooho gordu gashshooteeti. (Maatewoosi 6:10) Yesuusira kalaqamu dano hoolate egennono wolqano noosi. Isi uullate aana noo yannara, diilallo hajajate roorre afiꞌrinota leellishino. (Maarqoosi 4:37-41) Isi wodanchatenninna hayyotenni gashshanno; qoleno mannu qarqaransa towaatanno garanna qooxeessa daafannokki garinni heeꞌranno gara rosiisanno. (Isayaasi 11:2) Yesuusi gashshooti giddo manna busha diilallote gade horo digawajjitanno.
Miteekkite, ‘Yesuusi diilallo hajaja mamarolla hanafannoyya?’ yite hedattoha ikkara dandaanno. Tenne xaꞌmora dawaro afiꞌrate, “Maganu Mangiste Uulla Gashshitannohu Mamarooti?” yaanno birxicho lai.
Xa assa dandaattore
Qullaawu Maxaafi amaale kalaqamu dano iillitara albaanni, iillitanno woyitenna iillituhu gedensaanni assa dandaattore afatto gede kaaꞌlitannohe.
Iillitara albaanni: Rakke qaafo adhate qixxaawi.
Qullaawu Maxaafi yaannore: “Egennaamu manchi bushare afiro maaxamanno; hawanyu kayinni eꞌꞌe qarramanno.”—Lawishsha 22:3.
Tiro: Rakke qaafo adhanna maatekki gatisiꞌra dandaatto gede, heeꞌratto qarqarira kalaqantara dandiitanno dano balaxxe hedi.
Woꞌnaalsha: “Dolu giira kaꞌeenna xoonqummo barra, wonanni balanxe qixxaambe heeꞌnoommo. Danote yannara adhine xoonqeemmo borsa qixxeessiꞌne heeꞌnoommo. Xaggano noonke. Uddiꞌnanni uduunneno qixxeessine wodhinoommo. Dano kalaqantuta mannu kade amadannore hooge tootayyaawanni no. Ninke kayinni hasiisannonkere balanxe qixxeessiꞌranke baasa kaaꞌlitinonke.”—Tamaara, Kalifoorniya, Ameerika.
Iillitanno woyite: Roore hasiisanno coye illachishi.
Qullaawu Maxaafi yaannore: “Mittu manchi dureessa ikkiro nafa, heeshshote heeꞌrannohu miinjisinni diꞌꞌikkino.”—Luqaasi 12:15.
Tiro: Jajjunkunni heeshsho roortanno.
Woꞌnaalsha: “Lawiinb yinanni hambabalatte minenke gudisse diigge huntu woyite, asseemmari leella giweennae tultaawoomma. Kay Magano Yihowa eeggifate huucciꞌroomma. Jajjinkella baino ikkinnina lubbonke gattinota wodanchoomma.”—Lesilii, Filippiinsi.
Iillituhu gedensaanni: Techota calla hedi; gaꞌara yaaddooti.
Qullaawu Maxaafi yaannore: “Gaꞌara umisihu yaachishanno coyi noosina, gaꞌara horonta yaaddinoonte.”—Maatewoosi 6:34.
Tiro: Albillitte daara dandaanno qarra heddanni quwa saꞌe yaaddooti.
Woꞌnaalsha: “Erma yinanni hambabalatte korinni lolahu minenke gudise amadi yannara, baca doorsha doodha hasiissinoe daafira baasa yaadoomma. ‘Gaꞌara yaaddinoonte’ yee Qullaawu Maxaafi amaalanno amaale haꞌrunsate woꞌnaalumma. Yihowa kaaꞌlonni, dandeemma yee hedoommahunni sae lowore dandeemmata huwatoomma.”—Saalii, Filoorida, Ameerika.
Ledote amaale afiꞌrate, “Danote Yannara Lubbo Gatisate Kaaꞌlitanno Amaale” yaanno birxicho lai.