Alame Woꞌmate Hidhinanniri Giira Kaxxino—Qullaawu Maxaafi Mayyaanno?

Alamete Baanke Gaamo pirezidaantichi Ella 2022 fultino rippoortera, “Alamete miinji xaano qarru giddo uwanni no” yee qorowisiisino. Isi lede togo yiino: “Xaa yannara kawaa hidhinanniri giira kaxxino, kawaa mannu gari woxe diafiꞌrino.”

Alamenniti Woxu Uurrinsha yitino garinni, “Nadaajetenna sagalete waagi rahe rahe lexxanni no; tini qolte buxicho gobbuwara noo manni baasa qarramanno gede assitanni no.”

Qullaawu Maxaafi togoohu miinju qarri amadanni noonkehu mayiraatiro, togoo qarra cincine saꞌꞌa dandiineemmohu hiittoonniitironna geedote mali maatiro kulannonke.

“Goofimarchu barra” heedhannota waagu lexxo

• Qullaawu Maxaafi ninke heeꞌnoommo yanna ‘goofimarchu barraati’ yaanno.—2 Ximootewoosi 3:1.

• Yesuusi tenne yannara “waajjishshannoti jajjabba malaatta” leeltannota coyiꞌrino. (Luqaasi 21:11) Hidhinanniri giira kaxxasi mannu waajjanno gede assanno coyeeti. Batinyu manni albillittete heeshshonsa daafira yaadanni no; qoleno mininsa mannira hasiisannore wonsha dandaannoronna teꞌee huluullamanno.

• Ajuujate maxaafi tenne yannara sagalete waagi lexxannota balaxe masaalino. “‘Mittu barri loosi kirira, kiilote darate ikkitanno qamadenna mitte kiilonna darate ikkanno hayixe calla uyinona. . . .’ [yitanno huuro] macciishshummo.”—Yohaannisi Ajuuja 6:6.

‘Goofimarchu barrirenna’ Ajuujate maxaafira kulloonni masaalo daafira ledde afate, Alame 1914 Kawa Soorrantino yitanno viidiyo lai; hattono “Farado Guluffinori Shoolu Ayeooti?” yaanno birxicho nabbawi.

Baalunku miinju qarrira ikkanno mala

• “Manniꞌya, mine miꞌne heeꞌranno; woyineno kaasiꞌre laalose itanno. Insa miꞌnitino minira wolu digalanno; loosidhino jajja allaggichu diꞌꞌitanno.”—Isayaasi 65:21, 22.

• “Baatto gide laashshito; ilaallate aana jajju woꞌmo.”—Faarso 72:16.

• “Kaaliiqi kayinni, ‘Buxanete qarrira, mitiimmaammu raarera xa kaeemmo; halchitino keereno eemmonsa’ yaanno.”—Faarso 12:5.

Maganu mitu durooꞌmanna mitu buxe qarramanno gede assinoha miinju qarra muli yannara hoolanno; konne assannohu mitte gobbara calla ikkikkinni alame woꞌmateeti. Kuni ikkannohu hiittoonniitiro afate, “Miinju Manna Baalaho Taalo Iillanno Yanna Dagga Ikka?” yaanno birxicho nabbawi.

Kayi Qullaawu Maxaafi xa nafa waagu lexxo dandiine heeꞌneemmo gede kaaꞌlannonke. Hiittoonni? Qullaawu Maxaafi woxe hayyotenni horoonsiꞌnanni gede kaaꞌlitanno amaale aanno. (Lawishsha 23:4, 5; Rosiisaancho 7:12) Ledde afate “Loosokki Agadhi” yaannohanna “Shiimu Woxinni Heeꞌra Dandiinanni Gara” yaanno birxicho nabbawi.