Nugume ubona mu buryo bwiza ingorane zigushikira

1-2. Dukwiye gukora iki kugira twihanganire ingorane zidushikira? (Raba n’ifoto.)

YEHOVA arakunda cane abasavyi biwe. Naho biri ukwo, benshi muri bo usanga ubuzima bwabo ‘bwuzuyemwo ivyago n’imibabaro.’ (Zab. 90:10) Bamwe usanga bariko barashikirwa n’akarenganyo, bariko bararwanywa mu muryango canke bariko barahamwa bahorwa ukwizera kwabo. Abandi usanga bariko barihanganira indwara canke ingaruka z’ubusaza. Hari n’abandi usanga batuntuye kubera babuze ababo canke kubera ikindi kintu kibabaje cabashikiye. Hoba hariho ingorane nawe uriko urihanganira?

² Kugira dushobore kwihanganira ingorane zidushikira, dutegerezwa kuzibona mu buryo bwiza. Kubera iki ico kintu gihambaye? Raba aka karorero: Ingorane zidushikira mu buzima twozigereranya n’intambamyi zishikira umushoferi ariko aranyonga umuduga. Bivanye n’intambamyi iyo ari yo, arashobora gukatira iburyo canke ibubamfu, akagabanya umuvuduko canke agahagarara gatoyi. Kugira amenye ico yokora, ategerezwa kubona neza iyo ntambamyi iyo ari yo. Ntashobora kuyibona neza igihe ibiyo vyiwe biriko ivyondo. Na twebwe rero kugira twihanganire ingorane zidushikira, dutegerezwa kuzibona nk’uko Yehova azibona. Muri iki kiganiro turaza kuraba (1) ingene twobona ingorane zidushikira mu buryo bwiza, (2) ingene kuzibona mu buryo butabereye bishobora kutugirira nabi, (3) n’ivyo twokora kugira tugume tubona ibintu mu buryo bwiza igihe ingorane zadutse.

INGENE TWOBONA MU BURYO BWIZA INGORANE ZIDUSHIKIRA

3. Ni kubera iki tudashobora guhunga ingorane muri ino si?

³ Ntidushobora guhunga ingorane muri ino si. Turashikirwa n’ingorane kubera ko turi abanyagasembwa kandi tukaba tuba mw’isi itwarwa na Shetani. Vyongeye, uko iherezo ry’ino si ryegereza, ni ko n’ingorane zizorushiriza kwongerekana, zaba iziva ku bidukikije canke iziva ku bibi abantu bakora. (Mat. 24:8; 2 Tim. 3:13) Hamwe Yehova yokuraho izo ngorane zose, ni nk’aho yoba ariko arafasha Shetani kuganza ino si. Nta na hamwe dushobora guhungira «ivyago» muri ino si itwarwa na Shetani.—Umus. 9:12.

4. Ni iyindi ngorane iyihe ishikira abakirisu?

⁴ Turashikirwa kandi n’ingorane kubera ko turi abakirisu. Yezu yarabwiye abigishwa biwe akatari gake yuko bohamwe bahorwa ukwizera kwabo. (Mat. 24:9; Yoh. 16:2) Kumenya ico kintu biradufasha kudahungabana mu kwizera igihe dushikiwe n’uruhamo. (1 Tes. 3:​3, 4) Igihe tugumye turi intahemuka mu bihe bitoroshe, tuba twerekanye ko turi muri ya nzira ijana mu buzima budahera. Tuba twerekanye kandi aho duhagaze kuri ca kibazo gihambaye kiri hagati ya Yehova na Shetani. Kimwe mu binyoma Shetani akoresha mu gucafuza izina ry’Imana, ni ic’uko abantu bayikorera kubera gusa ivyo ibaha. Kugira yerekane yuko ivyo avuga ari vyo, aca ateza ingorane zikomeye abasavyi ba Yehova. (Yobu 1:​9-11) Yehova rero arahimbarwa cane igihe tugumye turi intahemuka kubera tumukunda.—Imig. 27:11.

5. Ibivugwa mu Musiguzi 7:​13, 14 bitwigisha iki? (Raba n’amafoto.)

⁵ Yehova arareka tugashikirwa n’ingorane. Yehova ntiyigera akora ibintu bibi canke ngo abikoreshe mu kutugerageza. (Yak. 1:13) Naho ari ukwo, umwami Salomo yanditse ko «umusi mubi» ari «igikorwa c’Imana y’ukuri.» (Soma Umusiguzi 7:​13, 14.) None yashatse kuvuga iki? Bibiliya irakunda kuvuga ko Yehova yakoze ikintu, mu gihe we aba yaretse gusa kikaba. Salomo yaratanze impanuro zidufasha kubona mu buryo bwiza ibigeragezo bidushikira. Ubwa mbere, kubera yuko turi abanyagasembwa kandi tukaba turi mw’isi ya Shetani, dutegerezwa kwitega imisi myiza n’imisi mibi. Igihe ‘umusi wagenze neza,’ turakwiye gukengurukira Yehova ku vyiza aba yadukoreye maze tukawubona nk’ingabire yaduhaye. Ubwa kabiri, Salomo aratwibutsa yuko ‘tudashobora kumenya neza ico kazoza katubikiye.’ Ntidushobora kumenya ko umusi ukurikira uzogenda neza canke uzogenda nabi. Abantu bose, baba beza canke babi, barashikirwa n’ingorane batari biteze.

6. Ni kubera iki Yehova areka tugashikirwa n’ingorane? (Abaheburayo 12:​7, 11)

⁶ Kubona mu buryo bwiza ibigeragezo bidushikira, birashobora kutwigisha kwiheka kuri Yehova aho kwiyizigira. Yehova arabona ingorane zose zidushikira kandi yama yiteguriye kudufasha. Naho yoreka tugaca mu «mwonga w’umwiza w’umuzitanya», aguma atuyobora, akaduhumuriza ko adukunda kandi akaduha inkomezi dukeneye kugira twihangane. (Zab. 23:4) Ingorane zidushikira zirashobora kandi kudufasha kumenya aho tugoyagoya maze tukaharyohora tubifashijwemwo na Yehova. (Soma Abaheburayo 12:​7, 11.) Nk’akarorero, Yobu yari akeneye kuryohora kamere yo kwicisha bugufi. Naho atari Yehova yamuteje ibigeragezo, yararetse biramushikira maze arabikoresha kugira amwigishe ivyigwa bihambaye. (Yobu 42:​1-6) Naho twoshikirwa n’ibigeragezo bimeze gute, turazi ko Yehova atazoreka ngo bitume tumuhemukira. Nitwaguma turi intahemuka, ‘tuzotahukana intsinzi bimwe bishitse.’—Rom. 8:​35-39.

7. Ni kubera iki ukwiye guhimbarwa igihe uriko urahamwa uhorwa ukwizera kwawe?

⁷ Turashobora guhimbarwa igihe turi mu ruhamo. Igihe bishitse ugahamwa kubera ukwizera kwawe, ntuce wibaza ko Yehova yaguhevye. Ahubwo ivyo vyerekana ko agushima. (Mat. 5:​10-12) Igihe ubona ibintu mu buryo bwiza, urashobora guhimbarwa nk’uko n’intumwa zahimbawe igihe zariko zirahamwa. (Ivyak. 5:​40-42) Vyongeye, vyoshobora gutuma abatari Ivyabona bamenya ukuri maze ‘bakaninahaza Imana.’ (1 Pet. 2:12) Cokimwe na Yozefu, urashobora kuroranirwa naho woba ukiri mu ngorane, atari igihe gusa zimaze kurangira.—Ita. 39:​3, 23.

8. Ni iyindi mvo iyihe yotuma twihanganira ibigeragezo bidushikira?

⁸ Ibigeragezo bidushikira bizorangira. Ivyashikiye Yobu biratwibutsa ko ata mvura idahita. Kanatsinda, Yehova yaramuhezagiye «mu nyuma kuruta uko yari ya[ra]muhezagiye ubwa mbere.» (Yobu 42:12) Na twebwe Yehova adusezeranira kuzoduhezagira muri kazoza kuruta uko abigira muri iki gihe, muri ubu buzima bugufi kandi bwuzuyemwo ingorane. Emwe, iyo ni imvo yotuma umwe wese muri twebwe yihangana gushika kw’iherezo!—Mat. 24:13.

KUBONA INGORANE MU BURYO BUTABEREYE BIRATUGIRIRA NABI

9. Ni gute kubona ingorane zidushikira mu buryo butabereye bishobora kutugirira nabi?

⁹ Naho twoba turiko turashikirwa n’ingorane zimeze gute, turakeneye kuzibona mu buryo bwiza kugira twirinde kwunyura ibintu. Nk’akarorero, vyoshika tukiyumvira ko Yehova ari we yaduteje ingorane. Yobu yaramaze igihe yiyumvira gutyo. Ivyo vyatumye agerageza «kwerekana ko ari we ari mu kuri, aho kuvuga ko Imana ari yo iri mu kuri.» (Yobu 32:2) N’igihe Nawomi yari mu ngorane, mu ntango yavuze ko ari Yehova yazimuteje. (Rusi 1:​13, 20, 21) Iyo Yobu na Nawomi baguma babona ibintu muri ubwo buryo, vyari gutuma ubucuti bafitaniye na Yehova bwononekara. (Imig. 19:3) Ariko Yehova yarabafashije kubona ingorane barimwo mu buryo bwiza, aranabahezagira kubera bagumye ari intahemuka.

10. Igihe turi mu bigeragezo, ni ibiki dushobora gutangura kwiyumvira?

¹⁰ Naho twoba tuzi neza ko ingorane ziriko ziradushikira atari Yehova yaziduteje, vyoshika tugatangura kwiyumvira ko atakitwitwararika. Ivyiyumviro nk’ivyo birashobora kuduca intege. (Imig. 24:10) Umwami Dawidi n’umuhanuzi Habakuki bose barashikiwe n’ingorane, kandi vyarashitse baribaza nimba Yehova yariko arumviriza ugutabaza kwabo. (Zab. 10:1; Hab. 1:2) Yamara bagumye basenga. Yehova yarahumurije abo bagabo b’intahemuka yuko azobafasha, kandi na wewe azogufasha.—Zab. 10:17.

11. Ni ibiki bishobora kudushikira igihe tubona mu buryo butabereye ingorane zidushikira?

¹¹ Igihe tubona mu buryo butabereye ingorane zidushikira, turashobora kuvunika umutima kubera twiyumvira yuko ibintu nk’ivyo bitari bikwiye kudushikira. (1 Pet. 4:12) Abigishwa ba Yezu vyarabagoye kwemera yuko yoshikiwe n’uruhamo rukaze. (Luka 18:​33, 34) Naho Yezu yari yarabatomoreye ivyari biraririye kumushikira, intumwa Petero we yabifatiye mu rwara. Yezu yari azi ko ivyiyumviro nk’ivyo vyari gushobora kumubuza gukora ivyo Yehova agomba, ni co gutuma yaciye akosora Petero. (Mrk. 8:​31-33) Mbere n’inyuma y’aho Yezu apfiriye, abigishwa biwe ntibashotse batahura icatumye yicwa. Ariko Yezu ntiyaciye abakurako amaboko. Igihe yabaganiriza amaze kuzuka, yarabafashije kubona mu buryo bwiza ivyamushikiye mu ‘kubasigurira neza Ivyanditswe.’ (Luka 24:​25-27, 32, 44-48) Kuzirikana ku vyo Yezu yariko arabigisha vyari kubafasha kwitegurira uruhamo rwari rugiye kubashikira. Igihe natwe tuzirikana ku Vyanditswe, birashobora kudufasha kwitegurira ibigeragezo.

12. Kubona ingorane turimwo mu buryo butabereye bishobora gutuma twiyumva gute?

¹² Kubona mu buryo butabereye ingorane turimwo vyoshobora gutuma tuzigira izikomeye kandi atari ko biri vy’ukuri. Yezu yarerekanye uburyo bumwe ivyo bishobora gushika mu kigereranyo yatanze c’abakozi bo mu murima w’imizabibu. Abakozi bamwebamwe baridoze kubera ko biyumviriye ko babahemvye ayadakwiye. Ariko nyene umurima yaciye abwira umwe muri bo ati: «Mugenzi, sindakurenganije.» (Mat. 20:​10-13) Abo bakozi ntibidoze kubera ko barenganijwe, ahubwo bidoze kubera bari biteze ivyo batari bakwiye kwitega. No muri iki gihe birashika abakirisu bamwebamwe bakiyumva muri ubwo buryo. Nk’akarorero, boshobora kwiyumvira ko barenganijwe kubera bitakunze ko bashikira agateka kanaka, canke igihe bibaye ngombwa ko bagatakaza. None ni ibiki twokora kugira tubone mu buryo bwiza ingora zidushikira?

IVYO TWOKORA IGIHE INGORANE ZADUTSE

13. Ni ibiki bishobora kuba igihe ingorane zidushikiye?

¹³ Ushobora kuba uzi ico Ivyanditswe bivuga ku bijanye n’ingorane zidushikira. Ushobora kuba umaze no kubikoresha kugira uremeshe abandi kuzihanganira. Ariko rero igihe nawe zigushikiye, vyoshobora kukugora kuguma uzibona mu buryo bwiza. Nk’akarorero, woshobora kwiyumvira ko Yehova ariko araguhana canke ko atariko arumviriza amasengesho yawe. None bishitse ukiyumva gutyo, ni ibiki wokora kugira ugume ubona ibintu mu buryo bwiza?

14. Ni ibiki ushobora gusenga usaba igihe uri mu ngorane? (Abafilipi 4:13)

¹⁴ Nusabe Yehova agufashe. Nubwire Yehova ibiriko biragushikira n’ingene wiyumva. Nudomeko ingene wipfuza ko agufasha. Urashobora kandi kumusaba impwemu yiwe nyeranda kugira ikuronse inkomezi n’ubukerebutsi ukeneye kugira wihangane. Ariko rero, uribuka ko Yehova ashobora kwishura amasengesho yawe mu buryo utari witeze. (Ef. 3:20) Yoshobora no gukoresha abamarayika canke abavukanyi bawe kugira agushigikire. (Zab. 34:7) Niwemere rero imfashanyo akuronsa utarinze kuraba uburyo akoresha mu kuyiguha. Yehova atanga impwemu yiwe atitangiriye itama, kandi iyo mpwemu irashobora kugufasha kwihanganira ikigeragezo ico ari co cose.—Soma Abafilipi 4:13.

15. Ni ibiki vyogufasha kwihanganira ingorane? (Raba n’ifoto.)

¹⁵ Nugumane urutonde rwiza rwo mu vy’impwemu. Nukore ivyo ushoboye vyose naho bitoba bikunda ko ugumana urutonde wari ufise. Igihe uri mu «magorwa n’ingorane» ni ho canecane uba ukeneye kubona ibintu nk’uko Yehova abibona. (Zab. 119:143) Nugume usoma Bibiliya udahorereza, wiyigishe wongere uzirikane ku vyo uriko urasoma. Niwamamaze uko ushoboye kwose, witabe amakoraniro kandi uyagiremwo uruhara. Nugume wiyegereje abo musangiye ukwizera. Niwirinde ikintu ico ari co cose cotuma wigunga.—Imig. 18:1.

16. Ni inkeka izihe ushobora kugira igihe ingorane zadutse, kandi wozitsinda gute? (2 Abakorinto 10:​4, 5)

¹⁶ Nutsinde inkeka. Igihe ingorane zadutse, hari aho wokenera kwikuramwo ivyiyumviro bitari vyo bituma ukekeranya ku bikwerekeye canke ku vyerekeye Yehova. (Soma 2 Abakorinto 10:​4, 5.) Urashobora gutsinda izo nkeka ukoresheje «ubumenyi bw’Imana» dusanga muri Bibiliya no mu bitabu vyacu. Nk’akarorero, woba ukekeranya yuko Yehova akigushima? Nuce usuzuma ivyashikiye intumwa Pawulo. Yarashikiwe n’ingorane zikomeye cane mu gikorwa ciwe. Ariko aho gucika intege, izo ngorane zatumye arushiriza kujijuka ko ari umusuku Yehova na Yezu bemera. (2 Kor. 11:​23-27) Woba ukekeranya ko Yehova yakubabariye amakosa wakoze kera? Nimba ari ko biri, nugire urutonde rw’ivyanditswe vyerekana yuko Yehova ababarira ibicumuro. (Yes. 43:25) Nuce usoma ivyo vyanditswe wongere ubizirikaneko. (Zab. 119:97) Ivyago vyagushikiye vyoba vyaratumye ukekeranya yuko Yehova ashoboye gukingira abasavyi biwe b’intahemuka nk’uko yabisezeranye? Nuce ugira ubushakashatsi ku gituma Imana ireka tugashikirwa n’ingorane, n’ingene idukingira mu vy’impwemu naho twoshikirwa n’ibiki. (Zab. 91:​9-12) Nusome kandi inkuru z’abavukanyi na bashiki bacu bashoboye kwihanganira ingorane zikomeye zabashikiye.a

17. Dukwiye gukora iki igihe dushikiwe n’ingorane?

¹⁷ Kumbure nta ngorane zikomeye ziriko ziragushikira muri iki gihe. Nimba ari ko biri, nukengurukire Yehova kandi ukoreshe neza ako karyo mu kuzirikana ku vyiza akuronsa. (Umus. 7:14) Ariko nizagushikira, uraguma uzibona mu buryo bwiza kandi wizigire Yehova uherejeko. Niwabigenza gutyo, Yehova ‘azogucira inzira kugira ushobore kuzihanganira.’ (1 Kor. 10:13) Bite ho igihe ari abavukanyi na bashiki bacu bashikiwe n’ingorane? Twobafasha gute kuzihanganira? Ikiganiro gikurikira kirishura ivyo bibazo.