Ingene Yehova adufasha kwihangana

1. Kubera iki dukeneye ukwihangana, kandi ni nde yobidufashamwo? (1 Petero 5:10)

MURI iyi misi ya nyuma itoroshe, abasavyi ba Yehova barakeneye ukwihangana. Bamwe usanga barwaye indwara zidakira, abandi na bo bakabura ababo. Abandi na bo usanga bariko barahamwa n’abagize umuryango canke intwaro. (Mat. 10:​18, 36, 37) Nuhere amazinda ko ingorane iyo ari yo yose woba uriko uracamwo, Yehova ashobora kugufasha kwihangana.—Soma 1 Petero 5:10.

2. Ni igiki kidufasha kwihangana?

² Ukwihangana ni ukwigumya igihe uri mu ngorane, mu ruhamo, mu bigeragezo, canke mu nyosha mbi, ntuce utakaza icizere. Kwihangana ntibiva ku nkomezi zacu, ahubwo biva kuri Yehova we aduha «ububasha burengeye ubusanzwe.» (2 Kor. 4:7) Muri iki kiganiro, turaza guca irya n’ino ibintu bine Yehova yaturonkeje bidufasha kwihangana. Turaza kubona n’ivyo twokora kugira ngo kimwekimwe cose muri ivyo kitugirire akamaro.

ISENGESHO

3. Kubera iki twovuga ko isengesho ari igitangaza?

³ Yehova yaraturonkeje ikintu c’igitangaza kidufasha kwihangana. Yaraduteye iteka ryo kuyaga na we naho turi abantu badatunganye. (Heb. 4:16) Zirikana iki kintu: Turashobora gusenga Yehova umwanya uwo ari wo wose, kandi tukamubwira ikintu ico ari co cose. Ururimi rwose twokoresha canke aho twomusengera hose aratwumva, mbere naho twoba turi aha twenyene canke turi mw’ibohero. (Yona 2:​1, 2; Ivyak. 16:​25, 26) N’igihe duhagaritse umutima cane ku buryo tutaronka ico tuvuga, Yehova aratahura ivyo tuba dushaka kuvuga. (Rom. 8:​26, 27) Mu vy’ukuri, isengesho ni igitangaza!

4. Kubera iki twovuga ko amasengesho dutura Yehova tumusaba ukwihangana ahuye n’ivyo agomba?

⁴ Muri Bibiliya, Yehova aradukura amazinda ko ‘iyo dusavye ikintu cose gihuye n’ivyo agomba atwumva.’ (1 Yoh. 5:14) None twoba twosaba Yehova ngo adufashe kwihangana? Ego cane, kuko bihuye n’ivyo agomba. Tuvyemezwa n’iki? Iyo twihanganiye ingorane Yehova aca aronka ico yishura wa mucokoranyi Shetani. (Imig. 27:11) Vyongeye, Bibiliya ivuga ko Yehova ashashaye ‘kwerekana inkomezi ziwe kugira afashe abamwumirako n’umutima wabo wose.’ (2 Ngo. 16:9) Ivyo rero biratwereka ko Yehova afise ububasha bwo kudufasha kwihangana, kandi ko yipfuza no kubigira.—Yes. 30:18; 41:10; Luka 11:13.

5. Isengesho ryodufasha gute kugira amahoro yo mu mutima? (Yesaya 26:3)

⁵ Bibiliya ivuga ko igihe dutakambiye Yehova tumubwira ibituraje ishinga, ‘amahoro y’Imana arengeye ugutahura kwose arinda imitima yacu n’ububasha bwacu bwo kwiyumvira.’ (Flp. 4:7) Zirikana ico ivyo bisobanura. Abantu badasenga Yehova iyo bashikiwe n’ingorane, usanga bagerageza gukora ibintu bitandukanye kugira ngo barabe ko botekana. Nk’akarorero, hari abakoresha uburyo bwo kuzirikana ngo butuma bikuramwo ivyiyumviro vyose, ushizemwo n’amaganya baba bafise. Mugabo ubwo buryo bwo kwikoropa ubwenge, burashobora gutuma bikwegera amadayimoni. (Gereranya na Matayo 12:​43-45.) Ariko amahoro Yehova aduha igihe tumusenze, ararengeye cane amahoro ayo ari yo yose umuntu yoronka akoresheje ubwo buryo bwo kuzirikana. Igihe dusenze Yehova tuba twerekanye ko tumwizigira tugaherezako, kandi na we aca aduha «amahoro arama.» (Soma Yesaya 26:3.) Uburyo bumwe Yehova aturonsamwo ayo mahoro, ni mu kudufasha kwibuka ukuri tuba twarize mw’Ijambo ryiwe. Ukwo kuri guca gutuma dutekana mu bwenge no mu mutima kuko tuba tuzi ko Yehova atwitwararika kandi ko yipfuza ko turoranirwa.—Zab. 62:​1, 2.

6. Ni ibiki woshira mu masengesho utura? (Raba n’ifoto.)

⁶ Ivyo wokora. Igihe uhanganye n’ikigeragezo, «terera umuzigo wawe kuri Yehova» wongere umusabe aguhe amahoro. (Zab. 55:22) Numusabe akuronse n’ubukerebutsi bwogufasha kwihanganira ingorane urimwo. (Imig. 2:​10, 11) Vyongeye, igihe utakambira Yehova umusaba ukwihangana, ntiwibagire no kumukengurukira. (Flp. 4:6) Gerageza kubona ibintu bikwereka ko Yehova ariko aragufasha mu ngorane urimwo, maze uce umukengurukira. Ntureke ngo izo ngorane zitume utabona imihezagiro umaze kwironkera.—Zab. 16:​5, 6.

IJAMBO RY’IMANA

7. Kwiga Bibiliya vyodufasha gute kwihangana?

⁷ Yehova yaraturonkeje Ijambo ryiwe kugira ngo ridufashe kwihangana. Bibiliya irimwo imirongo itari mike idukura amazinda ko Yehova yama adushigikira. Raba akarorero kamwe gusa. Muri Matayo 6:8 hagira hati: «So wanyu a[ra]zi ivyo mukenera n’imbere y’uko mubimusaba.» Yezu ni we yavuze ayo majambo, kandi arazi neza Yehova kuruta uwundi muntu uwo ari we wese. Igihe rero turi mu ngorane, ntidukwiye gukekeranya ko Yehova azi neza ivyo dukeneye. Bibiliya irimwo imirongo itari mike nk’iyo, ituronsa inkomezi zo kuguma twihangana.—Zab. 94:19.

8. (a) Tanga akarorero k’impanuro yo muri Bibiliya yodufasha kwihangana. (b) Ni igiki codufasha kwibuka impanuro zo muri Bibiliya tuba dukeneye?

⁸ Bibiliya iraduha impanuro zodufasha kwihangana. Kanatsinda, izo mpanuro zirimwo ubukerebutsi bushobora kudufasha gufata ingingo nziza. (Imig. 2:​6, 7) Nk’akarorero, Bibiliya ituremesha kwitwararika umusi umwumwe ukwawo, aho kuguma twiganyira ku vyoshobora gushika ejo. (Mat. 6:34) Igihe twama dusoma Bibiliya tukongera tukazirikana ku vyo dusoma, bica vyoroha ko twibuka impanuro tuba dukeneye mu bihe kanaka.

9. Inkuru zo muri Bibiliya zidufasha gute kurushiriza kwizigira Yehova?

⁹ Bibiliya irimwo kandi inkuru z’abantu bari bameze nkatwe, bizigiye Yehova na we arabashigikira. (Heb. 11:​32-34; Yak. 5:17) Kuzirikana kuri izo nkuru, biratuma turushiriza kwizigira ko Yehova ari «ubuhungiro bwacu n’inkomezi zacu. Ni umutabazi yoroshe kuronka mu bihe vy’ivyago.» (Zab. 46:1) Twiboneye ingene abasavyi ba Yehova ba kera bagumye ari intahemuka, bica bituvyurira umutima wo kwigana ukwizera kwabo n’ukwihangana kwabo.—Yak. 5:​10, 11.

10. Wokora iki kugira ngo Ijambo ry’Imana rirushirize kugufasha?

¹⁰ Ivyo wokora. Nusome Bibiliya buri musi, ugire n’urutonde rw’imirongo ubona ko yorushiriza kugufasha. Hari n’abandi benshi basanze gutangura umusi mu gusoma icanditswe c’umusi, bituma baronka iciyumviro co muri Bibiliya kiremesha kuri uwo musi wose. Mushiki wacu umwe yitwa Mariea, ivyo yaravyiboneye igihe abavyeyi biwe bompi barwarira rimwe indwara ya kanseri. Ni igiki none camufashije kwihangana igihe yariko arabitwararika mu mezi ya nyuma bari basigaje kubaho? Avuga ati: «Buri gitondo, narasoma icanditswe muri ka gatabu Twihweze ivyanditswe ku musi ku musi nkongera nkakizirikanako. Ivyo vyaratumye nama mfise iciyumviro co mw’Ijambo ry’Imana, camfasha kugumiza umutima ku bihambaye kuruta aho kuwugumiza kuri izo ngorane narimwo zitesha umutwe.»—Zab. 61:2.

ABO DUSANGIYE UKWIZERA

11. Kubera iki bituremesha kumenya ko tutari twenyene mu ngorane?

¹¹ Yehova yaraturonkeje umuryango w’abavukanyi udufasha kwihangana. Kumenya gusa ko «imibabaro imeze nk’iyo iriko irashikira umuryango wose w’abavukanyi» bacu, biraduhumuriza ko tutari twenyene. (1 Pet. 5:9) Ingorane iyo ari yo yose rero yodushikira, nta nkeka ko yashikiye n’abandi bavukanyi, kandi bakayihanganira. Ivyo bisobanura ko natwe twoshobora kuyihanganira.—Ivyak. 14:22.

12. Abo dusangiye ukwizera bodufasha gute, kandi natwe twobakorera iki? (2 Abakorinto 1:​3, 4)

¹² Abo dusangiye ukwizera baraturemesha igihe turi mu ngorane. Ico kintu n’intumwa Pawulo yaraciboneye. Yarashimiye kenshi abamufashije igihe yari apfunzwe, arabavuga n’amazina. Baramuhojeje, baramuremesha, baramuronsa n’ivyo yari akeneye. (Flp. 2:​25, 29, 30; Kol. 4:​10, 11) No muri kino gihe, ibintu nk’ivyo natwe biradushikira. Igihe turi mu ngorane, abavukanyi baraduserukako bakadufasha kwihangana, ikindi gihe natwe tukabaserukako.—Soma 2 Abakorinto 1:​3, 4.

13. Ni igiki cafashije mushiki wacu yitwa Maya kwihangana?

¹³ Abavukanyi bararemesheje mushiki wacu yitwa Maya wo mu Burusiya. Mu 2020, abapolisi barasatse inzu yiwe, mu nyuma na ho ararengutswa imbere y’intahe ahorwa kubwira abandi ivyo yemera. Maya avuga ati: «Igihe nari nihebuye cane, abavukanyi n’abadada baranterefona, abandi na bo bakanyandikira udukete, bakambwira ko bankunda. Nari nsanzwe nzi ko mfise umuryango munini w’abavukanyi kandi unkunda. Ariko kuva mu 2020, naciye ndushiriza kubitahura.»

14. Twokora iki kugira turemeshwe n’abavukanyi bacu igihe turi mu ngorane? (Raba n’ifoto.)

¹⁴ Ivyo wokora. Igihe uri mu ngorane, nugume wiyegereje abavukanyi na bashiki bacu. Ntiwitinye kwitura abakurambere ngo bagufashe. Barashobora kukubera «nk’ahantu ho kwikinga umuyaga, nk’ahantu ho guhungira imvura y’igihuhusi.» (Yes. 32:​2, akajambo k’epfo.) Uragume wibuka kandi ko abo musangiye ukwizera, na bo nyene bafise ingorane bariko barihanganira. Kugira ico ufashije uwuri mu ngorane bizotuma unezerwa, gutyo nawe bigufashe kwihanganira ingorane zawe.—Ivyak. 20:35.

ICIZIGIRO CACU

15. Icizigiro cafashije gute abasavyi ba Yehova b’abizigirwa, ushizemwo na Yezu? (Abaheburayo 12:2)

¹⁵ Yehova yaraturonkeje icizigiro gikomeye kidufasha kwihangana. (Rom. 15:13) Niwibuke ingene icizigiro cafashije Yezu kwihanganira ivyamushikiye ku musi ugoye kuruta iyindi yamaze ng’aha kw’isi. (Soma Abaheburayo 12:2.) Yezu yari azi ko agumye ari intahemuka, vyotumye izina rya Yehova ryezwa. Vyongeye, Yezu yagumije umutima ku gihe yosubiye mw’ijuru kwa Se, no ku gihe yoganje ari Umwami afadikanije na benewabo barobanuwe. Na twebwe nyene, icizigiro co kubaho ibihe bidahera mw’isi nshasha Imana yasezeranye, kiradufasha kwihanganira ingorane iyo ari yo yose yodushikira muri iyi si ya Shetani.

16. Icizigiro cafashije gute mushiki wacu umwe kwihangana, kandi ni icigwa ikihe ukura ku vyo yavuze?

¹⁶ Raba ingene icizigiro cafashije mushiki wacu umwe wo mu Burusiya yitwa Alla. Umugabo wiwe yarafashwe arapfungwa mu kurindira ko acirwa urubanza. Igihe ivyo vyashika Alla yavuze ati: «Kuguma nsenga Yehova ndamushimira ku vyo yadusezeraniye muri kazoza no kuguma ndabizirikanako, biratuma ntihebura cane. Ndatahura ko ubuzima atari ubu gusa. Yehova azotsinda abansi biwe maze natwe aduhe impera.»

17. Twokwerekana gute ko dukenguruka icizigiro gishingiye kuri Bibiliya Yehova yaturonkeje? (Raba n’ifoto.)

¹⁷ Ivyo wokora. Nufate akanya ko kuzirikana kuri kazoza igitangaza Yehova yadusezeraniye. Niwihe ishusho uri mw’isi nshasha wamaze kwironkera ya mihezagiro Yehova yadusezeranira. Ingorane iyo ari yo yose iduhanze ubu, ica imera ‘nk’iy’akanya gato kandi igahwahuka.’ (2 Kor. 4:17) Vyongeye, nukore uko ushoboye kwose kugira ngo ubwire abandi ivyo wemera. Iyumvire ingene bitegerezwa kuba bibagora kwihanganira ingorane zibashikira muri iyi si ya Shetani, batazi n’ivyo Imana idusezeranira muri kazoza. Naho wobayagisha gatoyi birashobora gutuma bipfuza kumenya vyinshi ku bijanye n’icizigiro cacu ca kazoza.

18. Kubera iki twokwizigira ivyo Yehova yasezeranye?

¹⁸ Inyuma y’aho Yobu ahuriye n’ibigeragezo vyinshi ariko akaguma ari intahemuka, yabwiye Yehova ati: «Ubu rero ndamenye ko ushobora vyose, ko ata kintu na kimwe ushatse gukora kikunanira.» (Yobu 42:2) Nk’uko Yobu yavyiboneye, nta na kimwe gishobora guhagarika umugambi wa Yehova. Ico kintu kirashobora kuturemesha igihe turi mu ngorane. Reka tubitangire akarorero. Niwihe ishusho y’umugore umwe acitse intege kubera yituye abaganga benshi mugabo bikabananira kumuvura. Ariko umuganga umwe w’umuhinga kandi yemerwa, aratoye indwara afise agaca amusigurira n’ingene azomuvura. Uwo mukenyezi aca yumva aruhuriwe, naho bizofata igihe kugira ngo akire. Aca ashobora kwihangana, kubera ko aba yizigiye ko umusi uri izina azokira. Ukwo nyene ni ko icizigiro cacu co kuzobaho mw’Iparadizo kidufasha kwihanganira ingorane.

19. Ni ibiki vyodufasha kwihangana?

¹⁹ Nk’uko twabibonye, Yehova aradufasha kwihanganira ingorane zidushikira biciye kw’isengesho, kw’Ijambo ryiwe Bibiliya, ku bo dusangiye ukwizera no ku cizigiro cacu. Nitwagira akigoro ko kwungukira kuri ivyo bintu vyose, Yehova azodufasha mu ngorane iyo ari yo yose yodushikira, gushika imibabaro yose yo muri iyi si ya Shetani ikuweho.—Flp. 4:13.