Ingene ushobora kuroranirwa

KURYA abavyeyi bitwararika abana babo kandi bakipfuza ko baroranirwa, ni ko na Dawe wa twese wo mw’ijuru atwitwararika kandi akipfuza ko turoranirwa. Ushima atwitwararikana ikibabarwe, aratubwira ibitari bike ku bijanye n’ukuroranirwa be n’ukutaroranirwa. Nkako, mu kuvuga ibijanye n’umuntu ashira umutima ku vyo Imana ivuga, Bibiliya ivuga aya majambo arimwo ukwizigira: “Ic’azokora cose kizomubera ko”, ni ukuvuga ko kizomugendera neza.​—Zaburi 1:3.

Ariko none, niba ari ukwo biri, ni kubera iki abantu benshi mu buzima bwabo batashoboye kuroranirwa, kugira agahimbare no kwumva bashize akanyota? Kwihweza twitonze iyo zaburi biraza kuduha inyishu vyongere bitwereke ingene na twebwe nyene dushobora kuroranirwa.

“Inama z’ababi”

Umwanditsi w’iyo zaburi aragabisha abantu ku bijanye n’akaga kari mu kugendera mu “nama z’ababi” (Zaburi 1:1). “Umubi” mukuru ni Shetani wa Mucokoranyi (Matayo 6:13). Ivyanditswe bitubwira yuko ari “umwami w’iyi si” be n’uko “isi yose iri muri wa Mubi” (Yohana 16:11; 1 Yohana 5:19). Ku bw’ivyo, ntibitangaje kuba nyinshi mu mpanuro dusanga mw’isi zigaragaza ivyiyumviro vy’uwo Mubi.

Ni impanuro bwoko ki ababi batanga? Muri rusangi, ababi barakengera Imana (Zaburi 10:13). Inama bagīra umuntu, izo usanga zimwo ukwirengagiza Imana canke ukutayubaha, zirakwiragiye hose. Ikibano ca kino gihe kiraremesha “ivyifuzo vy’umubiri, n’ivyifuzo vy’amaso, n’ubgibone bg’ubu bu[zima]” (1 Yohana 2:16). Ibimenyeshamakuru biraducucagira ivyiyumviro vy’uko ngo twokwironsa ibintu vyose dushoboye kuronka mu gihe tukiriho. Hirya no hino kw’isi, amashirahamwe arakoresha amahera arenga imiliyaridi 500 z’amadolari y’Abanyamerika (nk’amarundi arenga 529.500.000.000.000) ku mwaka mu bijanye no guhayagiza ibidandazwa kugira ahimirize abantu kubigura, baba babikeneye canke batabikeneye. N’ikindi kandi, ukwo guhayagiza ibidandazwa ntikwatumye gusa abantu bagira ivyo bahinduye ku bijanye n’ukuntu bari basanzwe bagura ibintu, ariko kandi kwaratumye babona ivy’ukuroranirwa mu buryo butari bwo.

Ico vyavuyemwo ni uko naho nyene abenshi batunze ibintu batashobora kwironsa mu myaka iheze, baguma bafise inyota idahera yo kuronka ibindi. Iciyumviro abantu bafise ni ic’uko ngo ivyo bintu utabifise, udashobora kugira agahimbare canke kuroranirwa. Ico ciyumviro si co kandi “[ntic]anduruka kuri Data wa twese, ariko [c]anduruka mw isi”.​—1 Yohana 2:16.

Umuremyi wacu arazi icotuma turoranirwa vy’ukuri. Inama atugǐra ziratandukanye n’“inama z’ababi”. Vyongeye, kugerageza kuronka imihezagiro iva ku Mana mu gihe kandi uriko uragendera mu nzira y’iyi si urondera kuroranirwa, bisa n’ukugendera mu mabarabara abiri mu mwanya umwe, ivyo na vyo bikaba bidashoboka. Ntibitangaje kuba Bibiliya itugabisha iti: “Ntimushushanywe n’[“imigenzo y’iyi si”, UB]”.​—Abaroma 12:2.

Nunanire akosho k’isi

Iyi si itwarwa na Shetani iragerageza gusa n’iyitwararika ko tumererwa neza. Yamara rero, turakeneye kuhabera maso. Uribuka yuko Shetani abigiranye ubwikunzi yahenze wa mugore wa mbere Eva, yironderera gusa inyungu ziwe. Yaciye rero amukoresha kugira yoshe Adamu gucumura. No muri iki gihe, Shetani arakoresha abantu kugira bagīre abandi inama mbi.

Nk’akarorero David, umwe twavuga mu kiganiro c’imbere y’iki, vyari vyitezwe ko akora amasaha arenze kandi akama ari mu ngendo z’ivy’akazi. David yavuze ati: “Nava i muhira hakiri kare ku wa mbere mu gitondo maze nkagaruka ku wa kane ku mugoroba”. Kubera ko abagenzi somambike, abo mu muryango be n’abo bikorana babona ko mwene utwo twigoro dukenewe kugira aroranirwe muri iyi si, bamuhimiriza bati: “Bikore sha ku bw’ineza y’umuryango wawe”. Babona yuko yobwirijwe gukora gutyo mu myaka mikeyi gusa gushika amaze gutekanirwa. David yasiguye ati: “Basigura bavuga yuko ngo ivyo vyobaye ari vyo vyiza ku muryango wanje kubera ko noshoboye kuza ndazana i muhira amahera menshi, bikaba vyotumye ndoranirwa kuruta. Naho ntari kumwe n’umuryango wanje, abagenzi baranjijuye yuko vy’ukuri nariko ndushiriza kuwitwararika”. Nk’ukwo kwa David, abantu benshi barakora bagatama kugira baronse imiryango yabo ikintu cose bibaza ko ikeneye. Ariko none, gukurikiza mwene izo mpanuro vyoba vyotuma umuntu aroranirwa? None, vy’ukuri umuryango ukeneye iki?

Igihe David yari ku rugendo rw’ivy’akazi, yarabonye ico umuryango wiwe wari ukeneye. Yavuze ati: “Igihe nariko ndayaga kuri telefone n’agakobwa kanje Angelica, kavuze gati: ‘Da, ni kubera iki udashaka kugumana natwe i muhira?’. Ico kintu carambabaje cane”. Ayo majambo ako gakobwa kiwe kamubariye yarakomeje icipfuzo yari afise co gutanga imihoho. David yarafashe ingingo yo guha umuryango wiwe ico vy’ukuri wari ukeneye, ico na co kikaba cari ukuba ari kumwe na wo.

Gushira mu ngiro impanuro Imana iduha biratuma turoranirwa

Woshobora gute kwirinda ivyo vyiyumviro bitari vyo bikwiye hose muri iyi si? Umwanditsi wa Zaburi atubwira ko umuntu aroraniwe kandi ahimbawe ari urya “ibimuhimbara biri mu vyagezwe vy’Uhoraho, kand’ivyagezwe vyiwe [akaba ari] vyo ashirak’umutima ku murango no mw ijoro”.​—Zaburi 1:2.

Igihe Yosuwa yagenwa n’Imana ngo abe indongozi y’ihanga rya Isirayeli, yabwiwe ati: “Uze wame u[r]irīmbūra [ni ukuvuga, Ijambo ry’Imana] ku murango no mw ijoro”. Ego ni ko, gusoma Ijambo ry’Imana no kurizirikanako vyari bihambaye, ariko Yosuwa yari akeneye kandi “kwitondera ivyanditswemwo vyose”. Mu bisanzwe, gusoma Bibiliya vyonyene ntibica bituma uroranirwa ku gitangaro. Utegerezwa no gushira mu ngiro ivyo usoma. Yosuwa yabwiwe ati: “Ni ho ivyawe bizogenda neza, ukagira amahirwe”.​—Yosuwa 1:8.

Niwihe ishusho y’umwana ariko aratwenga yicaye ku bibero vy’umuvyeyi wiwe w’umunyarukundo, bariko basoma inkuru uwo mwana akunda. Naho boba bamaze kuyisoma incuro zingana iki, baraha agaciro mwene ivyo biringo bihimbaye. Nk’ukwo kw’uwo mwana, umuntu akunda Imana abona ko gusoma Bibiliya ku musi ku musi ari ikintu gihimbaye, akabona ko ari umwanya uteye umunezero amara ari kumwe na Se wiwe wo mw’ijuru. Igihe umuntu nk’uwo akurikije impanuro ahabwa na Yehova be n’ubuyobozi buva kuri we, amera ‘nk’igiti gitewe hafi y’imigezi y’amazi, cama igihe caco, ibibabi vyaco ntivyume, ic’akora cose kikamubera ko’.​—Zaburi 1:3.

Ico giti umwanditsi wa Zaburi avuga ntigikura ku gihamana. Giterwa iruhande y’isoko ry’amazi kikongera kikitwararikwa na nyene kugitera. Mu buryo busa n’ubwo, Dawe wa twese wo mw’ijuru arabogora ivyiyumviro vyacu akongera akabikosora biciye ku mpanuro dusanga mu Vyanditswe. Ico bivamwo ni uko duheza tugasagamba maze tukagira kamere Imana ishima.

Ariko rero, “ababi ntibamera bartyo”. Vy’ukuri, boshobora gusa nk’aho umenga baraguwe neza mu gihe kinaka, ariko impera n’imperuka bakagira iherezo ribi. “[Ntib]azoshobora guhagarara ku musi w’amateka”. Ahubwo riho, “inzira y’abanyavyaha i[zoba]jana mu mahonero”.​—Zaburi 1:4-6.

Ku bw’ivyo, ntureke ngo akosho k’isi kagire ico gakoze ku migambi yawe no ku mico wisunga. Niba ufise ubuhanga bwo gukora ikintu kinaka kandi ukaba ushobora kuroranirwa muri ino si, uraba maso ku kuntu ukoresha ubwo buhanga bwawe canke ku kuntu ureka isi ikaba ari yo ibukoresha. Ugukurikirana amaronko ata co kuvamwo kurashobora gutuma umuntu akabirana, tubivuze mu buryo bw’ikigereranyo. Ku rundi ruhande, kugiranira n’Imana ubucuti bwiza bivamwo ukuroranirwa nyakuri be n’agahimbare nyakuri.

Ingene wororanirwa

Ni kubera iki igihe umuntu akurikije impanuro ahabwa n’Imana, ico akora cose kimugendera neza? Umwanditsi wa Zaburi ntiyariko aravuga ibijanye n’ukuroranirwa muri iyi isi. Ukuroranirwa kw’umuntu akunda Imana kurafitaniye isano n’ukuntu akora ivyo igomba, kandi ivyo Imana igomba vyama nantaryo bituma umuntu aroranirwa. Reka turabe ukuntu gushira mu ngiro ingingo ngenderwako zo muri Bibiliya bishobora gutuma uroranirwa.

Umuryango: Ivyanditswe bihanura abanega “gukunda abagore babo nk’imibiri yabo bgite”, umukenyezi mukirisu na we agasabwa “[‘kwubaha cane’, NW] umugabo wiwe” (Abanyefeso 5:28, 33). Abavyeyi bararemeshwa kumarana umwanya n’abana babo, gutwenga bari kumwe na bo be no kubigisha ibijanye n’ibintu bihambaye mu buzima (Gusubira mu vyagezwe 6:6, 7; Umusiguzi 3:4). Ijambo ry’Imana rihanura kandi abavyeyi riti: “Ntimukaratse abana banyu”. Igihe iyo mpanuro ishizwe mu ngiro, biraheza bikorohera abana “[kwumvira] abavyeyi ba[bo]” (Abanyefeso 6:1-4). Gukurikiza iyo mpanuro iva ku Mana birashobora gutuma ubuzima bwo mu muryango buroranirwa.

Abagenzi: Abantu benshi barashaka abagenzi. Mu bwenge bwacu no mu mutima wacu, turafise ubushobozi bwo gukunda no gukundwa. Yezu yabwiye abayoboke biwe yuko bakwiye ‘gukundana’ (Yohana 13:34, 35). Muri abo bayoboke ba Yezu, turasangamwo abagenzi dushobora gukunda no kwizigira ku buryo tunabaserurira ivyiyumviro vyacu be n’inyiyumvo zacu bigera kure (Imigani 18:24). Ikiruta vyose, dushize mu ngiro ingingo ngenderwako zo muri Bibiliya, turashobora “[kwiyegereza] Imana”, maze cokimwe na Aburahamu, tukanashobora kwitwa ‘abakunzi b’Imana’​—Yakobo 2:23; 4:8.

Intumbero mu buzima: Abantu baroraniwe vy’ukuri, aho kubaho batazi iyo bariko baraja, baragira ubuzima buri n’ico buvuze kandi bufise intumbero. Ubuzima bwabo ntibushingiye ku bintu vyo muri iyi si vyama biriko bihindagurika. Amahangiro yabo atuma bagira uguhimbarwa nyakuri kandi kuramba, kubera ko aba ashingiye ku ntumbero nyakuri y’ubuzima. Ni igiki none gituma umuntu agira intumbero mu buzima? “Wubahe Imana, witondere ivyagezwe na yo; kukw ivyo ari vyo bibereye rwose umuntu wese”.​—Umusiguzi 12:13.

Icizigiro: Kuba Imana ari Umukunzi wacu na vyo nyene biratuma tugira icizigiro ca kazoza. Intumwa Paulo yahimirije abakirisu “[kut]ishimira ubutunzi butar’ubgo kwishimirwa, ariko bishimire Imana”. Muri ubwo buryo, bobaye bariko “bībīkir[a] ubutunzi buzoba itanguriro ryiza mu gihe kizoza, kugira ngo bacakire ubu[zima] nyakuri” (1 Timoteyo 6:17-19). Ubwo buzima nyakuri bugiye kuza vuba, igihe Ubwami bw’Imana bwo mw’ijuru buzogarukana Iparadizo kuri iyi si.​—Luka 23:43.

Niwashira mu ngiro ingingo ngenderwako zo muri Bibiliya, ntuzoba ukingiwe ingorane, ariko uzoba wirinze vyinshi mu bintu bivuna umutima kandi bitera intuntu abanyakibi bikwegera. David, umwe twavuga mu ntango, be n’abandi bantu amamiliyoni bameze nka we, barabonye agaciro ko gushira mu ngiro ingingo ngenderwako zo muri Bibiliya mu buzima bwabo. Amaze kuronka akazi kamworohereza, yavuze ati: “Ndakenguruka rwose ubucuti mfitaniye n’umukenyezi wanje n’abana banje be n’agateka mfise ko kuba nshobora gusukurira Yehova Imana ndi umukurambere mw’ishengero”. Ntibitangaje kuba ya zaburi ivuga ku bijanye n’umuntu ashira umutima ku mpanuro ahabwa n’Imana, iti: “Ic’azokira cose kizomubera ko”!

[Igicapo ku rup. 6]

IBINTU BITANU VYOGUFASHA KURORANIRWA

1 Nunanire akosho k’imico y’iyi si.

Zaburi 1:1; Abaroma 12:2

2 Nusome Ijambo ry’Imana ku musi ku musi wongere urizirikaneko.

Zaburi 1:2, 3

3 Nushire mu ngiro impanuro zo muri Bibiliya mu buzima bwawe.

Yosuwa 1:7-9

4 Nugire Imana umukunzi wawe.

Yakobo 2:23; 4:8

5 Niwubahe Imana y’ukuri wongere witondere ivyagezwe na yo

Umusiguzi 12:13

[Amafoto ku rup. 7]

Woba uriko urakurikiza ibintu vyotuma uroranirwa?