No Akin ya Maliket Tayo Anggano Bubusolen Itayo na Arum

1. Siopa ray imbaga nen Jesus ya maliket, tan akin et mairap itan ya panisiaan?

DIAD samay Sermon ed Palandey, oniay imbaga nen Jesus: “Maliket kayo no busolen kayo na totoo.” (Luc. 6:22) No sakey ka ed saramay ondedengel ed si Jesus, seguro mairap mon panisiaan itan ya imbaga to. Ta siempre, anggapo tay too ya labay ton walay manbusol ed sikato. Akin balet et onmay imbaga nen Jesus? Marakep no amta tayoy ebat ed satan ya tepet, lalo la ta dakel so mamubusol ed sikatayo ran papatumbok nen Jesus natan. Pantongtongan tayod sayan artikulo no akin ya wala ray mamubusol ed sikatayo tan no akin ya maliket tayo nin siansia anggano bubusolen itayo na arum.

AKIN ET WALA RAY MAMUBUSOL ED SIKATAYO?

2-3. (a) Siopay walad benegan na saray onsusumpa ed saray tuan Kristiano? (Juan 16:​2, 3) (b) Anto sirin so dapat ya nalikna tayo ed saray onsusumpa ed sikatayo?

² Bubusolen itayo na arum lapud mandadayew tayo ed si Jehova. Siopa ray imbaga nen Jesus ya onsumpa o mamatey ni ingen ed saray papatumbok to? Kuan to: “[Saramay] agda kabat so Ama odino siak.” (Basaen so Juan 16:​2, 3.) Siopay walad benegan da? Si Satanas. Sikato so “dios na sayan sistema na mundo.” (2 Cor. 4:​3, 4) Bubulagen to ray totoo pian agda naamtaay katuaan nipaakar ed si Jehova, tan susugsogan to ra ya kontraen tan pairapen iray mangaaro ed Dios. (Juan 8:​42-44) Agtayo sirin bubusolen iray onsusumpa ed sikatayo, ta aloko labat ira nen Satanas.

³ Imanoen so alimbawa nen Pavela ya manaayam ed bansa ya sebel so kimey tayo. Lapud tuloytuloy ya mandadayew ed si Jehova, sikatoy inaresto, pinepekpek, tan imbartolina na pigaran bulan. No pawilen to kuno man ya agawa, oniay nibaga to: “Mapatpatnag ya si Satanas tan saray demonyo to so rason no akin ya wala ray onkokontra ed dugan panagdayew. Diad tua, wala ray opisyales tan guardia ed prisoan ya agda tayo kabusol. Gagawaen da labat so trabaho da.” Onia met so imbaga na sakey ya brother ed Croatia ya inanosan toy aliwliwan impantrato ed sikato na agmananisian atateng to: “Atalosan ko lanlamang ya si Satanas so talagan kalaban ko, aliwan saray atateng ko.”—Efe. 6:12.

4. Antoy naaralan tayo ed si Jesus tan ed si Esteban? (Nengnengen met so litrato.)

⁴ Imbes ya busolen tayo ray onsusumpa ed sikatayo, ipikasi tayo ra. (Mat. 5:44) Ontan so ginawa nen Jesus. Nen akapasak la ed panamairapan ya poste, oniay impikasi to: “Ama, perdonam ira.” (Luc. 23:34) Kinerew nen Jesus ed Ama to ya perdonaen To iramay sundalo ya angipasak ed sikato ta amta ton gagawaen da labat no antoy ingganggan ed sikara. Nayarin sankanonot to met iramay totoon sinmuporta ed pamatey ed sikato. Impikasi to ra ta amta ton sinugsogan labat ira na saray lider na relihyon, tan agda amtay gagawaen da. Ontan met so ginawa na disipulon si Esteban. Impikasi tod Dios ya agto dudusaen iramay manutupak ed sikato. (Gawa 7:​58-60) Kasin inebatan nen Jehova so pikakasi nen Jesus tan Esteban? On. Dakel ed saramay sinmuporta ed impamatey ed si Jesus et nagbabawi lanlamang. Impatnag day pananisia ed sikato tan nampabautismo ra. (Gawa 2:​36-41) Tan si Saulo ya sakey ed saramay sinmuporta ed impamatey ed si Esteban et nagmaliw lanlamang ya Kristiano, tan pagbabawian ton maong so impamairap to ed saray disipulo nen Jesus.—1 Tim. 1:13.

5. Antoy naaralan mo ed eksperiensya nen César?

⁵ No ipikasi tayo iray onsusumpa ed sikatayo, makaseguro tayo ya dengelen to tayo met nen Jehova. Imanoen pay eksperiensya nen César ya tagad Venezuela. Wala may panaon ya kontran maong si tatay to ed impan-Tasi nen nanay to tan sikaran sanaagi. Oniay imbaga to: “Maomaong ya ina si nanay ko tan inar-aro day tatay ko. Manunad bilay da so Panarian, pero agdan balot pinaulyanan si tatay. Lanang da kamin bibilinen ya sanaagi ya respetoen mi tatay mi tan lanang mi ran unoren, puera labat no say ipagawa da et kontra ed panlabayan na Dios.” Kalabas na saray taon, linmemek lanlamang so puso na tatay nen César. Oniay kuan nen César: “Aminsan, kayarik ya nampikasi, tinepetan koy tatay no labay da ya iyaralan ko ray Biblia. Nen ‘on’ kuan da, agak makapanisia! Agko naipaliwawa so liket ya aliknak.” Asabi panaon, nampabautismo so tatay nen César. Siempre, agtayo ilaloan ya ontan met so gawaen na amin ya onsusumpad sikatayo. Pero dakel so eksperiensya ya nen naobserbaan day marespeton panagsalita tan maong ya ugali tayo, linmemek lanlamang so puso ra. Malikeliket tayo no ontan so nagawa! Agtayo nanaekalay ilalo ya iyasingger lanlamang ira nen Jehova ed katuaan ta sikato so makasin “Ukom na interon dalin.”—Gen. 18:25.

6. Base ed Marcos 13:​13, anto ni sakey ya rason akin et wala ray mamubusol ed sikatayo?

⁶ Bubusolen itayo na arum lapud susuportaan tayoy Jesus. Imbaga nen Jesus ya busolen na amin ya totoo iray tuan Kristiano “lapud ngaran [to].” (Basaen so Marcos 13:13.) Say tutukoyen dia nen Jesus ya “ngaran” et say reputasyon tan autoridad to bilang Ari ed Panarian na Dios. Susuportaan tayoy Jesus ta sikato so pinili nen Jehova ya manuley ed uniberso. Saray totoo balet ed mundo, say labay da ya manuley ed sikara et kapara da lanlamang ya too, kanian kabusol da tayo. Manuuley lay Jesus bilang Ari ed Panarian manlapu la nen 1914. Asingsingger to lan deralen so amin ya gobiernoy too tan amin ya agmanpapasakop ed autoridad to.

7-8. Akin et balbalawen itayo na totoo? (Juan 15:​18-20) (Nengnengen met so litrato.)

⁷ Bubusolen itayo na arum lapud agtayo manpapaimpluensya ed mundo nen Satanas. Pinasakbayan la nen Jesus iray papatumbok to ya busolen ira na totoo lapud ‘ag-ira kabiangan na mundo.’ (Basaen so Juan 15:​18-20.) Singa saray inmuunan Kristiano, agtayo aaligen iray mauges ya ugali, kagagawa, tan panagsalita na saray totoo ed mundo. Lapud duma tayo, dakel ya agagi tayo so balbalawen na saray kaeskuela tan katrabaho da. (1 Ped. 4:​3, 4) Say makapaliket balet, wala ray datin mamabalaw ed sikatayo ya anguman lanlamang diad inlabas na panaon, tan pambiliban da tayo ni ingen.

⁸ Imanoen so ekperiensya nen Ignacio ya taga Central America. Nen maneeskuela ni, walay maestro to ya mamabalaw ed sikato ta masyado kunon relihyoso tan uunoren to ray ganggan na Dios. Pero antis ya man-graduate si Ignacio, tinepetan na maestro to no akin ya agan balot nampaimpluensya anggano balbalawen na arum. Impaliwawa nen Ignacio ya saray ganggan na Dios so manproprotekta ed sikato. Insan inimbitaan to may maestro to ya miaral. Et akiaral ya tua! Ag-iman inilaloan nen Ignacio. Manbilib imay maestro to ed panangaro ya impaliknad sikato na saray agagi. Kanian manlapud saman, agla tinmundan akiaral. Lapud panaaral toy Biblia, wala met iray kinmontra tan nambalaw ed sikato. Pero tuloytuloy ya inmaligwas ya anggad abautismoan.

9-10. (a) Anto ni sakey ya rason akin et duma tayo ed saray totoo ed mundo? (b) Antoy naaralan tayo ed alimbawa nen apostol Pablo?

⁹ Say sakey nin rason no akin ya duma tayo ed saray totoo ed mundo et lapud agtayo mibabali ed politika tan guerra. (Juan 18:36) Tua, pansasagpotan tayon unoren iray batas na gobierno ta atan so labay nen Jehova ya gawaen tayo. (Roma 13:1) Pero no politika lay pantongtongan, neutral tayo—anggapoy papanigan tayon partido, agtayo onkakandidato no eleksion, tan agtayo omboboto. Akin ey? On ta matoor tayo ed si Jehova tan ed Panarian to ya uuleyan nen Kristo. Dakel ya agagi tayo so apriso lapud katooran da, pero manpupulong ni ran siansia diad prisoan. Aaligen day apostol Pablo. Pigaran taon ya aka-house arrest tan apriso si Pablo. (Gawa 24:27; 28:​16, 30) Pero impulong to nin siansia so maong a balita ed amin ya malabay ya ondengel—saray guardia ed prisoan, opisyales ed korte, gobernador, arari, tan ompan anggan saray opisyales na Romanon emperador ya si Nero.—Gawa 9:15.

¹⁰ Diad panaon tayo, pupulongan met na saray aprison agagi iray judge, opisyales na gobierno, tan saray guardia. Walay brother ya apriso na masulok ya anemiran taon lapud neutralidad to. Imbaga to ya legan ya walad prisoan, agto kuno impasen ya dusa imay impakapriso to. Pakalikna to kuno et inyasain nen Jehova ed prisoan pian anapen ditan iray mapaabeban totoo. Seguradon malikeliket tayo no usaren itayo nen Jehova pian ipasabi so maong a balita ed ontan iran totoo. (Col. 4:3) Pantongtongan tayoy arum nin rason no akin ya maliket tayo nin siansia anggano bubusolen itayo na arum lapud panlilingkor tayo ed si Jehova.

AKIN ET MALIKET TAYO ANGGANO BUBUSOLEN ITAYO NA ARUM?

11. Akin et lalon ombiskeg so pananisia tayo no walay manbusol ed sikatayo? Mangiter na alimbawa.

¹¹ Amta tayon nasusumpal so propesiya ed Biblia. Diad samay sankaunaan ya propesiya ed Biblia, impasakbay la nen Jehova ya busolen nen Satanas tan saray alipores to iray mangaaro tan manlilingkor ed si Jehova. (Gen. 3:15) Nen wadiad dalin si Jesus, winarningan to iray disipulo to ya busolen ira na mundo. (Mat. 10:22; Mar. 13:​9-12; Luc. 6:​22, 23; Juan 15:20) Ontan met so impasakbay na arum nin nansulat ed Biblia. (2 Tim. 3:12; Sant. 1:2; 1 Ped. 4:​12-14; Jud. 3, 17-19) Kanian no walay manbusol ed sikatayo, agtayo la nabibigla. Maliket tayo ingen ta nasusumpal la so propesiya ed Biblia. Paneknek itan ya manlilingkor tayo ed tuan Dios. Oniay imbaga na sakey ya sister ya manaayam ed bansa ya nilimitaan na gobierno so kimey tayo: “Nen nandesisyon ak ya idedikak so sarilik ed si Jehova, amtak ya walan-walay onkontra tan manbusol ed siak. Kanian agak la abigla tan ataktakot nen mansasbi iray subok.” Say mismon mister to et kontra ed pandadayew tod si Jehova. Mamaltratoen to, tan pinoolan to ni ingen so Biblia to tan saray literatura tayo. Pero imbes ya ontakot iyan sister, lalon binmiskeg so pananisia to. (Heb. 10:39) Kuan to: “Akapropesiya la ya busolen itayo na totoo, kanian iilaloan ko la itan. Atan ingen so akakombinse ed siak ya tuan relihyon so alooban ko.”

12. Antoy akatulong ed sakey ya brother pian naanosan toy irap ed prisoan?

¹² Anggano iilaloan tayo la ya pairapen tan busolen itayo na arum, no wadman tayo la ed saman ya situasyon, talagan nasubok so anos tayo. Onia kunoy alikna na sakey ya brother nen apriso: “No maminsan, bigla ak labat ya onakis ta nadi-depress tan abupburido ak.” Antoy akatulong ed sayan brother pian naanosan toy irap ed prisoan? Kuan to: “Lanang ak ya manpipikasi. Kabangon koy kabuasan, manpikasi ak lan tampol. Diad loob na sanagew, manpikasi ak kada no naliknak ya singa agko la kaya. No walay manmaltrato ed siak, onla ak ya tampol ed kasilyas insan ak manpikasi.” Dinalepdep met kuno na sayan brother so alimbawa na saray matoor ya lingkor nen Jehova nensaman tan natan. Baleg kunoy nitulong to ’tan pian naanosan toy situasyon to tan nalikna toy deen ya insipan nen Jesus ed saray papatumbok to.—Juan 14:27; 16:33.

13. Antoy makatulong pian nitepel tayoy panamairap tan pambusol na arum?

¹³ Mas mabiskeg so panangaro tayo nen say pambusol na arum ed sikatayo. Anggano ansakisakit so impatey nen Jesus, aga asebseban so panangaro tod Ama to anggad sampot ya ingas to. Inar-aro to met iray kakaaro to. (Juan 13:1; 15:13) No ontan kabiskeg so panangaro tayod si Jehova tan ed saray agagi, sarag tayon itepel so panamairap tan pambusol na arum. Akin et ontay nibaga tayo? Pian naebatan itan, nengnengen tayoy alimbawa nen apostol Pablo.

14. Antoy akatulong ed si Pablo ya mansiansian matoor anggano amta to ya bilay to so kasalat?

¹⁴ Nen asingger lan pateyen si Pablo, oniay insulat to ed malet ya kaaro ton si Timoteo: “Say espiritun iiter ed sikatayo na Dios et agmamawala na takot, noagta mamawala na pakayari [tan] aro.” (2 Tim. 1:7) Antoy labay ya ibaga nen Pablo? Singa ibabaga nen Pablo ya no say sakey ya Kristiano et mabiskeg so panangaro to ed si Jehova, ag-antakot ya onarap ed saray subok. (2 Tim. 1:8) Ontan ya mismo so agawad si Pablo. Lapud inar-aro toy Jehova, makpel ton inarap so pambusol na arum tan nansiansian matoor anggano amta to ya bilay to so kasalat.—Gawa 20:​22-24.

15. Panon ya ipapanengneng na saray agagi tayo natan so masakripisyon aro? (Nengnengen met so litrato.)

¹⁵ Talagan inar-aro tayo ray agagi ya mansiasiansian makpel anggano bubusolen ira na totoo ed lugar da. Say arum ingen, iririsga day bilay da pian nipalikna day panangaro ed arum ya agagi, ya singa ginawa nen Aquila tan Priscila nen inrisga day bilay da parad si Pablo. (Roma 16:​3, 4) Singa bilang, diad Russia, dakel ya agagi so oonla ed korte pian nipanengneng day suporta ed saray agagi tayon naaresto. Nen onarap lad korte so sakey ya sister tan anengneng ton dakdakel ya agagi so linma diman, aga kuno makapanisia kanian aga makasel! Binmiskeg so liknaan to ta aliklikna toy masakripisyon aro na saray agagi diad oras ya kakkaukolan to itan. On, malikeliket tayo ta mas mabiskeg so panangaro tayo nen say pambusol na arum!

16. Antoy imbaga nen apostol Pedro ya rason akin et maliket tayo nin siansia anggano bubusolen tan iinsultoen itayo na arum? (1 Pedro 4:14)

¹⁶ Amta tayo ya walad sikatayoy pabor na Dios no itetepel tayoy pambusol na arum. (Basaen so 1 Pedro 4:14.) Imbaga nen apostol Pedro ya no bubusolen tan iinsultoen itayo na arum lapud panlilingkor tayod Dios, maliket tayo nin siansia. Akin ey? On ta paneknek itan ya ‘walad sikatayo so espiritu na Dios.’ Nibaga itan nen Pedro ta asali ton mismo so pinairap tan binusol na arum. Pero maliket nin siansia ta amta ton gagawaen toy panlabayan nen Jehova. Singa bilang, kayari na Pentecostes 33 C.E., linmad templo si Pedro tan arum nin apostol pian manpulong diman. Pero ag-abayag, wala ray nan-aresto ed sikara. Makmakpel ya indepensa nen Pedro so pananisia to! (Gawa 5:​24-29) Anggano nilelewet da ra, ag-ira ataktakot. Intuloy da nin siansia so nampulong. Malikeliket ira ingen ta “awalaan iray pribilehyo a napabanday nisengeg ed ngaran [nen Jesus].” Singa si Pedro tan saray kakaiba ton apostol, maliket tayo met no itetepel tayoy panamairap ta amta tayo ya napapaliket tayoy Jehova.—Gawa 5:​40-42.

17. Antoy impaseguro nen Jesus ed saray disipulo to diad samay labi antis ya ompatey?

¹⁷ Diad samay labi antis ya ompatey si Jesus, oniay impaseguro to ed saray disipulo to: “Siopaman a mangaaro ed siak et aroen nen Amak, tan sikatoy aroen ko.” (Juan 14:21) Onsabi panaon, amin ya totoo et inaro da lay Jehova tan Jesus, kanian anggapo lay manbusol ed sikatayo! (2 Tes. 1:​6-8) Legan tayon aalagaren itan, komon ta agtayo lilingwanan iray rason no akin ya maliket tayo nin siansia anggano wala ray mamubusol ed sikatayo.