No Panon To Tayon Tutulongan nen Jehova Pian Makapan-anos Tayo

1. Akin et kaukolan tayoy mananos? Siopa balet so ontulong ed sikatayo pian makapan-anos tayo? (1 Pedro 5:10)

MAIR-IRAP so bilay diad sayan kaunoran iran agew, kanian kakkaukolan tayoy mananos. Wala ray agagi ya abaybayag da lan aanosan so sakit da. Say arum, peles nin maneermen lapud impatey na kapamilya o kaaro da. Wala met iray agagi tayon kokontraen na saray kapamilya da, tan say arum ni ingen et papairapen na gobierno diad bansa ra. (Mat. 10:​18, 36, 37) Sika ey? Anto met so subok ya dadalanen mo natan? Antokaman itan, tandaan mo ya tulongan ka nen Jehova pian makapan-anos ka.—Basaen so 1 Pedro 5:10.

2. Antoy rason akin et makakapan-anos so sakey ya Kristiano?

² Nibagan maanos so sakey ya Kristiano no ag-onsusuko tan maliket nin siansia ya manlilingkor ed si Jehova anggano walay dadalanen ton problema, panamairap, o arum nin subok. Matoor met anggano wala ray tukso. No diad sarili tayo labat ya biskeg, agtayo makapan-anos. Makapan-anos tayo labat diad tulong nen Jehova. Ibabaga na Biblia ya sarag to tayon ikdan na ‘pakayari a mas mabiskeg nen say pakayari na too.’ (2 Cor. 4:7) Pantongtongan tayo sirin diad sayan artikulo so apatiran paraan ya uusaren nen Jehova pian natulongan to tayon makapan-anos. Insan tayo pantongtongan no anto met so nepeg tayon gawaen.

PIKAKASI

3. Akin et nibagan milagro so pikakasi?

³ Walay makapakelaw ya ginawa nen Jehova pian natulongan to tayon mananos—say pikakasi. Diad tua, sakey itan ya milagro! Akin ey? On ta anggano makasalanan tayo, sarag tayoy makaasingger tan mitongtong ed sikato. (Heb. 4:16) Isipen pa: Sarag tayoy manpikasi ed si Jehova ed anggan anton oras, tan sarag tayon ibaga ed sikato so anggan anto. Natalosan to tayo anggan antoy lenguahe tayo tan narengel to tayo met anggan iner so kulaan tayo, anggano arawi tayo ed saray agagi o wala tayod prisoan. (Jon. 2:​1, 2; Gawa 16:​25, 26) No mapagpaga tayo tan agtayo la amtay ibaga tayod si Jehova, nabasa toy walad puso tayo. (Roma 8:​26, 27) On, talagan milagro so pikakasi!

4. Kasin dengelen to tayo nen Jehova no kerewen tayod sikato ya tulongan to tayon mananos? Ipaliwawa.

⁴ Ipapaseguro ed sikatayo nen Jehova ya ‘antokaman so kerewen tayo unong ed linawa to, dengelen to itayo.’ (1 Juan 5:14) Panon to no kerewen tayod si Jehova ya tulongan to tayon mananos? Kasin dengelen to tayo? On, ta unong itan ed linawa to. Akin et ontay nibaga tayo? No aanosan tayo ray subok, walay niyebat nen Jehova ed pangakantiaw nen Satanas. (Pro. 27:11) Sakey ni, ibabaga na Biblia ya akaparaan si Jehova ya “ipatnag [so] biskeg to parad saramay matoor so puso rad sikato.” (2 Awa. 16:9) Makaseguro tayo sirin ya sarasarag tan labalabay to tayon tulongan nen Jehova pian makapan-anos tayo.—Isa. 30:18; 41:10; Luc. 11:13.

5. Panon ya makatulong so pikakasi pian ondeen so nonot tayo? (Isaias 26:3)

⁵ Ibabaga na Biblia ya no ipikasi tayo ray pakakaaburidoan tayo, “say kareenan na Dios a palumbasan toy amin a pakatalos so manbantay ed puso tan nonot [tayo].” (Fil. 4:7) Nikadkaduma so kareenan ya manlalapud si Jehova. Saray totoo ed mundo, no naproproblema ira, nambabangil so gagawaen da pian ondeen kunoy nonot da. Singa bilang, wala ray totoo ya bakantien day nonot da. No anggapo kunoy iisipen da, onkalma ira. Pero delikado itan ta no blanko so nonot na sakey ya too, main-inomay ya impluensyaan na saray demonyo. (Ikompara so Mateo 12:​43-45.) Sakey ni, anggano bilang ta ondeen so nonot to, ag-itan makapipara ed tuan kareenan ya iiter nen Jehova. Atan ya klase na deen et iiter labat nen Jehova ed saramay mantitiwala ed sikato, tan insipan to ya ikdan to ra na “mantultuloy a kareenan” anggano mair-irap so dadalanen da. (Basaen so Isaias 26:3.) Panon to tayon iikdan nen Jehova na kareenan? Say sakey ya paraan et ipanonot tod sikatayo iray makaligliwan teksto ed Biblia. Ipanonot na sarayan teksto ya inar-aro to tayo tan labalabay to tayon tulongan kanian onkalma so nonot tan puso tayo.—Sal. 62:​1, 2.

6. No ondadalan kad subok, anto ray ipilam ed pikakasim? (Nengnengen met so litrato.)

⁶ Antoy gawaen mo? No walay problemam, ibagam labat ed si Aman Jehova so amin ya naliliknam. “Ipasakbat mod [sikato] so ambelat ya awit mo” tan ipikasim ya ikdan to kay deen na nonot. (Sal. 55:22) Ipikasim met ed sikato ya ikdan to kay karunongan pian makapandesisyon kay duga. (Pro. 2:​10, 11) Tan siempre, agmo lilingwanan ya pisalamatan si Aman Jehova. (Fil. 4:6) Likas mo no panon to kan tutulongan pian nasarag moy kada agew tan pisalamatan moy amin ya kamaongan ya gagawaen to parad sika. Tua, mairap so ondalan ed subok, pero agtayo komon bulag ed saray bendisyon ya iiter nen Jehova ed sikatayo.—Sal. 16:​5, 6.

BIBLIA

7. Panon ya makatulong so panaral tayoy Biblia pian makapan-anos tayo?

⁷ Say sakey nin inter nen Jehova pian natulongan to tayon makapan-anos et say Biblia. Dakel so teksto ya nabasa ditan ya mangipapaseguro ed sikatayo ya labalabay to tayon tulongan. Say sakey et amay walad Mateo 6:8. Oniay nabasa ditan: “Amta la na Ama yo so nakaukolan yo antis kayon onkerew ed sikato.” Si Jesus ya mismo so angibaga ed satan. Diad interon uniberso, sikato so talagan makapikabat ed si Jehova! Kanian ipapaseguro na satan ya imbaga to ya seguradon iter nen Jehova iray nakaukolan tayo no ondadalan tayod subok. Sakey labat itan ed dakel ya teksto ed Biblia ya manpabiskeg ed liknaan tayo no nasusubok tayo.—Sal. 94:19.

8. (a) Antoy sakey ya prinsipyo ed Biblia ya makatulong pian makapan-anos tayo? (b) Antoy gawaen tayo pian walay nanonotan tayon tampol ya prinsipyo no walay onlesan problema?

⁸ Makatulong iray prinsipyo o bilin ed Biblia pian makapan-anos tayo. No unoren tayo iratan, magmaliw tayon marunong tan makapandesisyon tayoy duga. (Pro. 2:​6, 7) Singa bilang, bibilinen itayo na Biblia ya sansakey agew labat so nepeg tayon isipen imbes ya problemaen tayo lay nagawa nabuas. (Mat. 6:34) Marakep no ipasal tayon basaen ya inagew-agew so Biblia tan dalepdepen tayo ray nababasa tayo. No niyugali tayon gawaen itan, walan-walay nanonotan tayon bilin o prinsipyo ya makatulong ed sikatayo no walay onlesan problema.

9. Antoy epektod sikatayo no basaen tayod Biblia so istoryay bilay na saray lingkor na Dios nensaman?

⁹ Nabasa tayo met ed Biblia so istoryay bilay na saray lingkor nen Jehova nensaman. Ordinaryo met iran totoo ya singa sikatayo pero asarag da ray subok lapud nanmatalek ira ed si Jehova tan tinulongan to ra. (Heb. 11:​32-34; Sant. 5:17) No aralen tan dalepdepen tayo no panon iran tinulongan nen Jehova, diman tayo lalon nanengneng ya talagan si Jehova so “salimbengan tan biskeg [na saray lingkor to], mainomay a nakerewan na tulong diad panaoy gonigon.” (Sal. 46:1) Tan no isipen tayoy impanmatoor na sarayan lingkor nen Jehova anggano mair-irap so situasyon da, napakiwas tayo met ya aligen so pananisia tan impananos da.—Sant. 5:​10, 11.

10. No ondadalan kad subok, antoy gawaen mo pian talagan natulongan ka na Biblia?

¹⁰ Antoy gawaen mo? Inagew-agew kan manbasa na Biblia, tan marakep no isulat mo iray teksto ya agusgustoan mo. Dakel met ya agagi so mangibabagan baleg so nitulong ed sikara na pambabasa day daily text kada kabuasan. Lapud asakbay da lan abasa itan, wala lay dalepdepen dad sanagew. Atan kuno so akatulong ed si Sister Mariea nen a-diagnose ya walay kanser na atateng to. Sikato so angasikaso ed sikara anggad impatey da. Mair-irap kuno iman ya panaon lalo lad saramay sampot ya bulan na bilay da. Pero oniay imbaga nen Marie: “Kada kabuasan, babasaen koy teksto diad Usisaen tan dadalepdepen ko itan. Atan so akatulong pian agko kaskasian so sarilik. Imbes ya manpokus ak ed problema, si Jehova la so sankanonot ko tan saray balibalin katuaan ya ibabangat tod sikatayo diad Biblia.”—Sal. 61:2.

SARAY AGAGI

11. Antoy epektod sikatayo no isipen tayo ray agagin nasusubok met ya singa sikatayo?

¹¹ Uusaren met nen Jehova iray agagi pian natulongan to tayon makapan-anos. ‘Naeeksperiensya na amin ya agagi diad interon mundo’ iray subok ya dadalanen tayo, kanian amta tayo ya agtayo bukbukor. (1 Ped. 5:9) Labay ton ibaga sirin, antokaman tay subok ya dadalanen mo natan, walan-walay agi ya ontan met so dadalanen to. Kanian no nasasarag to, nasarag mo met!—Gawa 14:22.

12. Panon itayon tutulongan na saray agagi, tan anto met so gawaen tayo parad sikara? (2 Corinto 1:​3, 4)

¹² No ondadalan tayod saray subok, wadtan iray agagi ya mamaseseg ed sikatayo. Ontan ya mismo so naeksperiensya nen apostol Pablo. Nen aka-house arrest, sikatoy niligliwa tan pinaseseg na saray agagi, tan inter da ray nakaukolan to. Kanian diad saray sulat to, imbalikas toy pisasalamat tod sikara. Binitla to ni ingen so kangaranan da! (Fil. 2:​25, 29, 30; Col. 4:​10, 11) Ontan met natan. No kaukolan tayoy tulong, wadtan iray agagi parad sikatayo. Tan no sikara met so mankaukolan, wadtan tayo met parad sikara.—Basaen so 2 Corinto 1:​3, 4.

13. Antoy akatulong ed si Sister Maya pian naanosan toy subok?

¹³ Imanoen so eksperiensya nen Sister Maya ya tagad Russia. Balbaleg kuno so nitulong ed sikato na saray agagi nen dinmalan ed subok. Nen 2020, in-raid na saray pulis so abung to, insan sikatoy kinasoan tan nilitis ed korte lapud ibabaga tod arum iray papanisiaan to. Oniay imbaga nen Sister Maya: “Wala ray panaon ya singa agko la kaya. Pero maong labat ta wadtan iray agagi, tatawagan tan susulatan da ak. Lanang dan ipapaseguro ed siak ya inar-aro da ak. Datik lan amta ya maar-aro iray agagi, tan pamilya so turing dad siak. Pero manlapu lad samay agawa nen 2020, lalok ya apruebaan ya walay balbaleg tan maar-aron pamilyak.”

14. No ondadalan kad subok, antoy gawaen mo pian napabiskeg ka na saray agagi? (Nengnengen met so litrato.)

¹⁴ Antoy gawaen mo? No nasusubok ka, mas iyapit moy liknaan mo ed saray agagi. Manpatulong ka ed saray elder, agka nababaingan. Ibabaga na Biblia ya singa ra “siroman ed dagem, sakey a pansalimbengan no bagyo.” (Isa. 32:​2, paimanod leksab) Agmo met lilingwanan ya nanduruma met ya subok so dadalanen na saray agagi. No manggawa kay paraan pian natulongan tan napaseseg mo ra, agka akapokus ed sarilim ya problema tan naliknam so liket kanian mas makapan-anos ka.—Gawa 20:35.

SAY ILALO TAYO

15. Antoy akatulong ed si Jesus pian makapan-anos, tan anto met so makatulong ed sikatayo? (Hebreo 12:2)

¹⁵ Inikdan to tayo nen Jehova na ilalon manbilay ya andi-anggaan diad arapen. (Roma 15:13) Amta tayo ya seguradon nagawa itan. No atan so sankanonot tayo, makapan-anos tayo. Imanoen pay Jesus. Naanosan to so sankairapan ya agew na bilay to diad dalin ta say sankanonot to et saray nagawa diad arapen. (Basaen so Hebreo 12:2.) Singa bilang, amta nen Jesus ya no manmatoor anggad patey, napasanto to so ngaran nen Jehova. Inisip to met so panaon ya nakaiba to lamet so Ama to diad tawen tan say panaon ya sikatoy manuley la bilang Ari kaiba iray alanaan ya agagi to. Nonoten tayo met sirin so ilalo tayon manbilay na andi-anggaan diad balon mundo. No atan so sankanonot tayo, nitepel tayo so anggan anton irap ed sayan mundo nen Satanas.

16. Panon ya akatulong ed sakey ya sister so ilalo tayo, tan antoy naaralan mo ed imbaga to?

¹⁶ Imanoen so eksperiensya nen Sister Anna ya tagad Russia. Balbaleg kuno so nitulong ed sikato na ilalo tayo nen naaresto tan apriso so asawa to. Oniay imbaga nen Anna: “Lanang kon ipipikasi ed si Jehova iray tatalaranan kon nagawa diad arapen, tan atan met so lanang kon dadalepdepen pian agak masyadon nadismaya ed saray nagagawa. Amtak ya manampot lanlamang iyan subok. Si Jehova lanlamang so manalo ed sayan laban, tan seguradon bendisyonan toy impananos tayo.”

17. Panon tayon nipanengneng ya papablien tayoy ilalo tayo? (Nengnengen met so litrato.)

¹⁷ Antoy gawaen mo? Isip mon lanang iray bendisyon ya ipaparaan nen Jehova parad sika. Imadyin mon wala ka lad balon mundo tan kaibam iray kakaarom tan kapamilyam. Malikeliket lan amin so totoo! No sankanonot tayoy bilay diad Paraiso, mas nitepel tayo iray subok ta amta tayon “magano tan anlemew” labat iratan. (2 Cor. 4:17) Marakep met no ibagam ed arum iray balibalin gawaen na Dios diad arapen. No ikompara ed sikatayo, mas mairap so kipapasen na totoo ed mundo ta naproproblema met ira pero agda amta so gagala nen Jehova. Kanian sambot mo so kada pankanawnawa ya ibagad sikara so nipaakar ed Panarian. Anggano magano labat so pitongtong mod sikara, baleg lay nitulong to ’tan pian magmaliw iran interesado ed saray sipan nen Jehova.

18. Akin et napantiwalaan tayo iray sipan nen Jehova?

¹⁸ Nen alampasan nen Job iray dakdakel ya subok, oniay imbaga to ed si Jehova: “Amtak la natan a sarag mon gawaen so amin a bengatla tan anggapo so nononoten mon gawaen ya agmo nagawaan.” (Job 42:2) Atalosan nen Job ya anggapon balot so makaamper ed pakasumpal na gagala nen Jehova. No tandaan tayo itan ya katuaan, ombiskeg so liknaan tayo kanian naanosan tayo ray subok. Niay sakey ya ilustrasyon: Imadyin yo pa so sakey ya bii ya abaybayag lan mansasakit. Amayamay lay nampadoktoran to pero agda napaabig. Kanian singa nanaekalan lay ilalo. Pero akalmon siansiay marundunong tan napantiwalaan ya doktor! Apugta na sayan doktor so sakit to tan impaliwawa to no panon ya onabig. Seguradon akainawa imay bii! Tua, agan tampol naekal may liliknaen to. Pero wala lay rason to natan ya mas mananos ta amta ton onabig lanlamang. Ontan met ed sikatayo ran Kristiano, desidido tayon anosan iray subok ya dadalanen tayo natan ta amta tayon naekal lanlamang iratan ya amin diad Paraiso.

19. Antoy nepeg tayon gawaen pian makapan-anos tayo?

¹⁹ On, dakdakel so paraan ya uusaren nen Jehova pian natulongan to tayon makapan-anos. Wadtan so pikakasi, say Biblia, saray agagi, tan say ilalo tayo. Gawaen tayo met sirin so betang tayo pian talagan minabang tayo ed tulong to. No ontan so gawaen tayo, seguradon ibaan itayo nen Jehova ya arapen so antokaman ya subok ya anggad makasabi tayo la diad balon mundo, ya ditan et agti lan balot manirap.—Fil. 4:13.