Kabkabat nen Arin David si Jehova tan lanang ya manmamatalek ed sikato. Nen labay ya pateyen nen Arin Saul si David tan uusilan na arum nin kalaban to, kinmerew na tulong ed si Jehova. Inebatan na Dios so pikakasi to tan inliktar To ed saray kalaban to. Oniay imbaga nen David: “Si Jehova et mabilay!” (Sal. 18:46) Sipor lan manisia si David ya walay Dios. Kanian antoy punto to nen imbaga to ya “si Jehova et mabilay”? Singa to ibabaga ya lapud mabilay ya Dios si Jehova, Sikatoy lanang ya akaparaan ya ontulong ed saray lingkor To. On, apatunayan ya mismo nen David ya say Dios to et mabilay. Nen aliklikna nen David so tulong nen Jehova, lalon apakiwas ya tuloytuloy ya manlingkor tan mandayew ed sikato anggan antoy nagawa. (Sal. 18:28, 29, 49) Singa si David, lalo tayo met ya onseseg ed panaglingkor no kombinsido tayo ya si Jehova et mabilay ya Dios. Nasarag tayo ray subok tan agtayo ontabang ed panlilingkor tayo. Tan napakiwas tayo met ya mas lalon onapit ed si Jehova. w24.06 20-21 ¶3-4

Antoy naaralan tayo ed sayan bilin nen apostol Pablo ed saray agagi ed Tesalonica? No walay naamtaan tayon impormasyon ya kontra ed ibabaga na Biblia o walay narengel tayon makapabiglan balita, agtayo bastabasta manisia ed saratan. Usaren tayoy pakatebek tayo. Diad datin Soviet Union, wala tay agawa ya akaawat iray kongregasyon na sulat ya nanlapud saray kalaban pero pinapaway dan nanlapud world headquarters. Ipapaseseg na satan ya sulat ya manggawa la ray agagi na sarili dan organisasyon. Amay mismon sulat et singa nanlapu met ed world headquarters. Pero amay karga to ey? Ag-aloko iray matoor ya agagi. Atebek da ya say karga na satan ya sulat et kontra ed katuaan ya ibabaga na Biblia. Kaukolan tayo met so manalwar natan ta uusaren na saray kalaban so Internet tan social media pian deralen so pankakasakey tayo tan agtayo la napambiigan so tua tan tila. Antoy gawaen tayo pian agda tayo naloko? Kaukolan tayon usaren so pakatebek tayo tan seguradoen tayo no kasin say sakey ya impormasyon et talagan akabase ed katuaan ya naaralan tayo.—2 Tes. 2:2; 1 Juan 4:1. w24.07 12 ¶14-15

Nen indedikam so sarilim ed si Jehova tan nagmaliw kan parte na pamilya to, atan so sankaimportantian ya desisyon ya ginawam ed bilay mo. Diad tua, labay nen Jehova ya ontan so gawaen na amin ya totoo. Akin ey? On ta inar-aro to tayo, tan labay to ya maliket so bilay tayo. Labalabay to tayon nakaaro tan manbilay ya andi-anggaan. (Deu. 30:19, 20; Gal. 6:7, 8) Pero agto tayo pipiliten nen Jehova ya manlingkor ed sikato. Sikatayo so akauley ya mandesisyon no kasin manlingkor tayo ed sikato o andi. Panon to balet no akagaway seryoson kasalanan so sakey ya bautismadon Kristiano? No agmagbabawi, ekalen ed kongregasyon. (1 Cor. 5:13) Pero anggano ontan so nagawa, labay nen Jehova ya magbabawi itan ya too tan ompawil ed sikato. Diad tua, say sakey ya rason no akin ya intarya to so dondon et pian naperdona to iramay pagbabawian day kasalanan da. On, maar-aron Dios si Jehova. Sikato ni ingen ya mismo so mamapaseseg ed saramay akagawa na seryoson kasalanan ya pagbabawian day ginawa ra.—Zac. 1:3; Roma 2:4; Sant. 4:8. w24.08 14 ¶1-2