Alig Moy Benaias—Manpakpel tan Manmatoor Ka

Si Benaias et makpel ya akilaban ed saray guerra parad si Jehova, tan nanlingkor legan na uley nen Arin David tan Arin Solomon. Anak na saserdote si Benaias, kanian ag-apasal ya manbemben na armas. Pero makmakpel iyan laki! Pinatey toy sakey ya leon diad bobon tan tinalo toy sakey ya higanten sundalo. Balbaleg so tiwala nen David ed si Benaias kanian tinuro to bilang lider na saray guardia to.—2 Sam. 23:​20-23.

Nen nanrebelde si Absalom tan Adonias, si David nin siansia so sinuportaan nen Benaias. (2 Sam. 8:18; 15:18; 1 Ara. 1:8) Tan nen masiken lay David, sakey si Benaias ed saray tinmulong pian naseguron si Solomon so nitrono ya ari. (1 Ara. 1:​32-40) On, anggano nantraidor so arum, nansiansian matoor si Benaias ed si Jehova tan ed saray tinuro Ton ari.

Singa si Benaias, kaukolan tayo met so manpakpel pian nalabanan tayoy mabiskeg ya kalaban tayo—si Satanas tan saray alipores to. Desidido tayo met komon ya manbilay diad paraan ya makapaliket ed si Jehova. (Efe. 6:11; 1 Ped. 5:​8, 9) Tan anggano taynan na arum si Jehova, manmatoor tayo ed sikato, tan seguradon bendisyonan to tayo.—2 Sam. 22:26.