Katuaan tan Pananisia Tinmalona
SARAY Tasi nen Jehova so determinadon mandayew ed Dios “diad espiritu tan katuaan.” (Juan 4:23, 24) On, say mensahe na Biblian iyaabawag da so mangiwalwal na katilaan, balet singa si apostol Pablo itepet da: ‘Kasin sikami so nagmaliw a kakabusol yo lapud ibabaga mi so katuaan?’ (Galacia 4:16) Siempre andi! Sarayan Kristiano so mangaaro ed saray kakaabay da tan kaliktan da ran manggayaga na espiritual a kawayangan a nagawaan lambengat na katuaan.—Juan 8:32.
Saray Tasi so determinado met a mamasiansian mabiskeg ed pananisia, anggaman sikara so napasegsegang diad pansalita na katuaan. Peteg, say pananisia na saray mapaabeban Kristiano ed Pangi so mangiter na ebidensya a diad tulong nen Jehova et saray ariripen to so makabemben na katooran ed sikato ya anggad kasampotan. Nayarin satan so unor ya anggaan na sayan marelmeng a sistema na bengabengatla odino say dilin ipatey na sakey ed katooran, angangko diad arap na maruksa, relihyoson panamasegsegang.—Mateo 24:13.
Pananisian Onkikiwas
Saraman a manangaro ed katuaan a pinatey ed probinsya na Kivu so aliwa lambengat a sikara so mangipapatnag na mabiskeg a pananisia. Alimbawa, imanoen si Bingimeza Bunene, sakey ya agin biin matatken. Duara ed saray anak ton lalaki, si Malala Ramazani tan Akilimali Walugaba, so kaiba na saraman so pinatey ed Pangi. Nagkalalo ni, saray mamatatken na tribu so anugsog ed asawa ton miulop ed saray amatey ed si kaanakan to, a si Amisi Melende. Sanen saray duaran anak ton lalaki tan si kaanakan to so pinatey, sikato so tinaynanan na interon pamilya to, a pati say asawa to. Anggaman kuan, aligliwa ed saray salita na salmista: “No bilang ta say dilin amak tan dilin inak so manaynan ed siak, si Jehova a mismo so manayakop ed siak.” (Salmo 27:10) Saray agagi ton lalaki tan bibii ed pananisia so angabrasa tan nanligliwa ed sikato, tekep na maaron panangipanonot ed makapakelaw ya ilalo na kioli.
Sayan asawa na agin bii, si Ramazani Musombwa, so apriso diad inkalanor to’d impatey na kaanakan to, balet diad kaunoran et sikato so nibulos. Kayari to, inako ton sikato so asagyat diad makpel a talindeg na asawa to tan diad aro ya impanengneng na saray katasiyan to tan saray abalon mamanugang ton bibii. Natan et ibabalikas to so baleg a panagbabawi tan uulopen to la so asawa to diad saray pantitipon na Tastasi nen Jehova. Lapud sigpot ya impanguman to, sikato so nagmaliw a puntirya na pirmin panagbalaw tan panagludlurey balet ta sikato so determinadon manserbi ed si Jehova.
Amin na saray arum nin babalon walad kalangweran so impulisay na pamilya ra nisesengeg ed takot diad pamatey nen Kimbilikiti. Amin na sarayan walad kalangweran a bibii so tinmalindeg a malet tan agda labay ya itapat so pananisia ra ed si Jehova. Sikara so sinayakup na kapananisiaan da tan naeksperiensia ra so impasakbay nen Jesus a kuanto: “Anggapo so anaynan ed abung odino agagin lalaki odino bibii odino ina odino ama odino anak odino kaumaan a nisesengeg ed siak tan nisesengeg ed maong a balita ya agmakagamor na maminlasus natan ed sayan panaon, na kaabungan tan agagin lalaki tan bibii tan kainaan tan anak tan kaumaan, a tekep na panamasegsegang, tan ed onsasabin sistema na bengabengatla diad bilay ya andi-anggaan.”—Marcos 10:29, 30.
Pananisia tan Katuaan Tinmalona
Natan, say kipapasen na saray Tasi nen Jehova ed lugar na Pangi so pinmawil la ed dati. Amin na saray ataynanan tan interesadon totoo a naobligan ombatik ed arum a baryo tan baley so pinmawil la ra ed kaabungan da. Saray Tasi so mangipupulong lamet ed mensahe na Panarian diman, tekep na apasimbalon seseg tan determinasyon. Anggaman ed amin a bengatlan asagmak da, sikara so singa ‘saray agagin akalikna na talek nisesengeg ed saray balor na inkipangaw nen Pablo tan ipapanengneng da so nagkalalon tepel a mansalita na salita na Dios ya andi-takot.’—Filipos 1:14.
Siempre, wala so kaermenan diad impanpatey ed amin a waloran matoor a Kristianon lalaki ed Kongregasyon na Pangi. Balet sananey a ministron payunir so manseserbi natan a bilang manangimaton a manangasikaso, tan saray totoo nen Jehova ed saman ya utel na Aprika so walaan na talek ed aro na Dios ed sikara diad panamegley nen Kristo, a singa nibalikas ed saray salita nen Pablo: “Siopa so mangisian ed sikatayo a manlapud aro nen Kristo? Kasin saray kairapan odino gonigon odino panamasegsegang odino eras odino kalakseban odino kaatapan odino kampilan? . . . Diad kasuniyan, ed amin na sarayan bengatla et sikatayo so ompaway a sigpot a mananalo diad panamegley na saman so angaro ed sikatayo.”—Roma 8:35-39
Anggaman kuan, akin ya inyabuloy nen Jehova so inkapatey na saray matoor a tastasi? Diad kaplesan a magulon mundo, dakel iray nagagawan si Jehova so mapatnag a manasalimbeng ed totoo to. Diad panggawa na ontan, ipapatnag to no panon so pangitarok to’d sikaran maligen a makaliktar ed “baleg a kairapan.” (Mateo 24:21; Isaias 26:20) Balet, a singa imbaga nen Jesus ed Juan 16:1-3, nayarin walaray nagawa sano abuloyan toray sumusumpa ya anggad punton pamatey ed saray sinansakey diad limog na Tastasi nen Jehova. Say pamemben da ed katooran diad ontan iran kipapasen, a singa saray matoor ya agagi tayo ed probinsya na Kivu, so manserbin sakey a pantasi tan prueba a saray ariripen na Dios so determinadon mamemben na katooran ya anggan diad patey.—Job 27:5; Uliran 27:11.
Napanonotan itayo ed baleg a pantasin nansumpal diad kayari impatey na inmunan-siglon martir a si Esteban. (Gawa 8:1-8) Sirin nayarin say makapakebbiew ya impanpatey so nansengegan na dakel ed tribu na Rega tan saray arum ed Zaire tan arum a pasen a mangiter na seryoson panisip ed katuaan na Biblia. Agaylan saray Tasi nen Jehova so maliket ya ontulong ed ontan iran masimpit-impanpuson totoo ya onukplos a manlapud takot tan panag-anito a nisiglaot ed relihyon na Kimbilikiti! Tan agaylan kawayangan so panggayagaan na amin a mangabrasa ed makapakelaw a katuaan na Dios!