Apasegsegang Diad Impangibaga ed Katuaan
AGSUSUPORTAAN na saray Tasi nen Jehova so pananisia tan ag-agamil na Kimbilikiti, lapud saraya so sumlang ed Makasulatan a prinsipyo. Saray Tasi so imbulos na katuaan ya aromog ed Salita na Dios a Biblia. (Juan 8:31, 32) Sirin, agda labay a saray anak da so nagalsiman unong ed kurang na piuulop ed Kimbilikiti. Saray Tasi so agmet malabay a mangiter na tagano, kuarta, odino kayarian a kerewen kaleganan na panaoy piuulop, tan saray bibii ra so agmibiang ed impasoot a panagkemel na sira a naorganisa ed parehon gagala.
Makapasagyat, misiglaotan ed impanpatey ed saray Tasin asaglawi ed akauna, say abogado na estado so angikuan ed saya diad rekomendasyon to ed korte: ‘Si Warenga a diad apalabas et akibiang ed saray kurang nen Kimbilikiti tan mikabat ed saray sekreto so natan et akikasakey la ed saray Tasi nen Jehova. Imparungtal da so sekreto ra, ilautla ed saraman so anggapo-ed-kiwawalan espiritu ya atawag na Kimbilikiti. Kanian sirin, imparungtal da so katilaan na iyaapay a kerewen na nibagan espiritu, unong ed saray Tasi nen Jehova, so malaknab a panamalikdon inorganisa na mamasiken a mangipapakurang ed saray seremonya.’
Legan a say sinansakey ed tribu na Rega so mangawat ed katuaan na saray bangat na Biblia, panag-anito tan takot ed patey so sinandian na katuaan tan say ilalo ed kioli. (Juan 5:28, 29) Saray pananginsulto ed kainaan, kaasawaan a bibii, tan agagin bibii so nansumpal diad panagrespeto ed bibii.—Efeso 5:21-6:4; 1 Timoteo 5:1, 2.
Diad piduman tuloy, saray dakel ya iglesia tan misyon na Kakristianoan so mangabuloy ed saray membro ra a mangagamil na relihyon na tribu diad leksab na maimpis ya ukis na natatawag na Inkakristiano. Diad tua, dakel iran papari tan atagey a saserdote nen Kimbilikiti so impasen a matoor, respetadon membro na nanduruman iglesia. Panon a miduma so awawey nen apostol Pablo! Insulat to: “Agmipapako ed saray agmananisia. Ta anto ta so panulop na inkatunong tan kaugsan? Odino anto ta so pibibiang na liwawa ed kabilungetan? . . . Tan anto ta so pipakna na templo na Dios ed saray talintao?”—2 Corinto 6:14-16.
Mabetbet, saramay walaan na mabiskeg a pisiglaotan ed Kimbilikiti tan ed saray iglesian ortudoks so nanggulo ed saray Tasi nen Jehova. Sarayan sumusumpa so singa saraman so managgaway talintao ed kadaanan ya Efeso. Anengneng dan say negosyo ra so pinakapuy nen Pablo, ya amaneknek a ‘saray ginawa na lima so aliwan dirios.’ (Gawa 19:23-28) Say parehon prinsipyo so onaplika ed katuaan a say espiritun Kimbilikiti so anggapo.
Aliknan obligasyon na saray Tasi nen Jehova so mangipakabat ed saratan a katuaan a singa saraya. Siempre, lapud pansalita na katuaan, sikara no maminsan so napasegsegang. Balet anto so naaralan a manlapud matoor a panagsungdo ra?