Minartir Nisesengeg ed Pananisia ra!
ASAKSAKBAY ed kabuasan na Simba. Sakey ya ulop na 500 a totoon managgulo so nanliktub ed abung diad baryo na Pangi, ed probinsya na Kivu, Zaire. Saray Kristianon mareereen a nanaugip ed abung so agulon aliing diad maingal ya ulop tan maksil a panlalpak na puerta. Nansumpalan? Pitoran Kristianon lalaki so intulaktulak ed paway, andi-panangasin pinekpek tan pinuersan impanakar na pitoran kilometro (4 mi) ed baryo na Kilungulungu ed utel na takel.
Diman et saray kulokulong na sarayan Kristianon lalakin maaro-ed-kareenan so ginerger tan say sakey so pinukolpukol. Saray bangkay da so inkutkut ed sakey ya ilog ya amagaan ed saman. Saginonor say tambak na danum so nilukasan, tan inmagus so ilog ed lubok da, ya agla nasuysuy so inkagawan makapakebbiew!
Akin ya Agawa Iyan Impanpatey ed Andi-kasalanan?
Sayan impanpatey ed saray matoor a tastasi nen Jehova so pantok na sakey a kurang na panamasegsegang a ginmapo nen 1978 ed interon pasen na rehyon na Kivu ya inuleyan na tribu na Rega. Akin a sayan impanpatey so agawa? Lapud saray Tasi nen Jehova so agmalabay a miulop ed “Kimbilikiti.” Saray papangulo ed relihyon na saray atateng na Waregas so manisian saray Tasi so mangipipresenta na sankabalgan a kigtot ed interon paalagey na tribu tan sirin nepeg a punasen.
Nanlapud 1978 ya anggad 1983 pigaran Kingdom Hall na saray Tasi nen Jehova so pinuulan na saray panatikon membro na sayan kulto. Pinagyaw daray dakel a Tastasi, inusilan daran pinataynan ed saray kaabungan da, tan sinamsam daray kaykayarian da. Mabetbet a ginetma ran pateyen iray Tastasi ed panamegley na panagkulam tan panagsalamangka. Lapud anggapo ed sayan gawa so tinmalona, saray managpasegsegang so nanpateypatey lan andi-panangasi ed sikara.—Ipareng so Numeros 23:23.
Say Makapakebbiew ya Inkagawa
Anggaman ontan, nengnengen tayo pan maapit iman ya agawan makapasinagem ed Simba, Agosto 14, 1983. Onnengneng ed 1983 Yearbook of Jehovah’s Witnesses, agaylan matukoy so teksto tan komento ed saman ya agew! Diad samay agew sakbay na impanpatey ed saraman a pitoran matoor a Kristianon lalaki, maslak a membro na melag a kongregasyon na saray Tasi nen Jehova ed Pangi so nanakar a nanlapud kabangibang a baryo pian onatendi ed gendagendat a pantitipon da ed Sabado. Sikara la so naugip diman ta pian akaparaan a para ed kabuasan na Simban pantitipon ed panagdayew da. Pitoran totoo so nanayam ed abung nen Kalumba Malumalu, sakey a sigpot-panaon a ministro tan say manangimaton a manangasikaso na kongregasyon. Saman so tinugyop na 11, a pati si Agin Malumalu, asawa to, tan saray duaran angkelag ya anak da. Saray arum a limara so naugip ed abung nen Agin Kikuni Mutege.
Kayari na tipon ed Sabado, saray Tastasi so nandudupong a malikeliket ed liber na apuy ed labi, a nankanta na saray kanta ed Panarian tan angisalaysay na saray eksperiensia. Naimano ra a saray angkelag ya ulop na totoo so nikadkaduman onsasabi, amin da so mamapaarap ed sakey a baryon duaran kilometro (1.2 mi) a manlapud Pangi. Panoy pikabat na saray Tasi ed kabaliksan na saman a pantitipon na kakabusol da?
Diad ngalngalin alas singko ed ontumbok a kabuasan say abung na manangimaton a manangasikaso so niliktub na sakey ya ulop ya impangulo na hepe na ulop a si Mulamba Musembe. Kinerew da a si Agin Kampema Amuri tan si Waseka Tabu so mangulop ed sikaran onla ed Chief of the Collectivity (Katunda Banangozi) ta pian manggawa na “Salongo” (obligadon kimey ed komunidad diad pangapiger ed kalsada, taytay, tan arum ni). Magalgalang ya impaliwawa nen Agin Kampema ya agawa la so oksuy ed si Hepen Katunda a gawaen so kimey ed ontumbok ya agew. Ingen ta pinili na Hepe na Grupo a moriaen iyan ebat a singa panagmodmora tan ingganggan ton si Agin Kampema so kabilen. Saya so tinumbokan na ganggan a kabilen so arum niran agagin lalaki.
Diad saman anengneng na ulop a si “pastor” Kalumba Malumalu (say manangimaton a manangasikaso) so pinmawil la ed abung to. Kanian sikaran amin so linmubak ed abung ya anggad sikara so akabutbut ed dingding. Diad saman, pigara ed sikara so linmoob ya akaromog ed si Agin Malumalu. Diad agawan talikarkaran saray agagin bibii so kinabilkabil, balet sikara tan saray anak da so akabatik ed lokal a hepe na pulisya pian mansalimbeng.
Kaleganan, duaran agagin lalakin nanayam ed sananey ya abung so akabatik. Sakey ed sikara (Hemedi Mwingilu) so inmamot ed sakey ya abung ya agni asumpal tan atasian to so inkagawa. Say sananey ya agi (Lulima Kazalwa) so binmatik ed takel.
Kaunoran, pitoran agagin lalaki so siningkat, pinekpek, tan saray lima ra so binalor. Kaleganan na interon limaran-kilometro (3-mi) ya impanakar ed takel diad asingger ed Kilungulungu, sikara so dinuksa tan kinabil na saray nandakep ed sikara. Anggaman saray agagi so makapkapuy diad insabi rad’man, sikara so determinadon agmangikumpromiso ed pananisia ra—tan anggaman say ipapatey da so mapatpatnag la. Inarap da so patey a sitetepel tan tekep na dignidad, a singa ginawa na dakel iran arum a matoor a Kristiano nensaman tan diad modernon panaon.—Mateo 24:9; Apocalipsis 2:10.
Sakey nin agin laki, si Amisi Milende, so pinatey kayarin tuloy na saman. Sikato so linman binmiahe ed Kama, balet saray lalakin imbakid’man so angerel ed sikato tan insempet dan binalor ed Binyangi (15 kilometro [9 mi.] a manlapud Pangi) pian onapireng ed arap nen Kibonge Kimpili, sananey a Hepe na Grupo. Legan ya aalagden to so isabi na Hepe, sayan maseseg a Tasi so amaseseg ed saray kakapinsan to diad espiritual tan imbaga to’d saray managpasegsegang ya anggaman sikato la so ompatey, et sikato lambengat so manalagar ed pamaoli nen Jehova a Dios ed sikato diad sayan dalin a magmaliw a paraiso. Sayan matoor a lakin walad kalangweran so pinatey na pigaran lalaki. Say dilin pangamaen to so akinunong ed saya; sikato so sinmanosanok lapud duara ed saray ilalak ton lalaki so nagmaliw a Tasi nen Jehova ed panamegley na tulong nen Agin Milende. Diad tua, sarayan duaran anak, si Malala Ramazani tan Akilimali Walugaba, so kaiba na saraman so pitoran Tastasi a pinatey!
Kumusta Iray Niliktar?
Sarayan makapakebbiew ya inkagawa a nansumpal ed impamatey ed waloran lalaki so anaynan ed saray babalon bibii tan ulila. Saray akaliktar tan arum niran Tastasi ed lokal tan saray interesadon totoo so nagmaliw a puntirya na pinmalalon gula. Kanian sikara so binmatik ed Kindu, say sankaasinggeran a baleg a baley, tan sikara so inasikason maong na saray membro na taloran kongregasyon na saray Tasi nen Jehova. Say sangan opisina na Watch Tower Society ed Kinshasa so tinmulong met ed sarayan ataynanan diad impangipawit da na kawes, ules, tan kuarta. Sayan maaron tulong so inapresyan tuloy tan nansumpal ed maabig a pantasi ed saray agmananisian membro na pamilya tan arum ya akaimaton. (Juan 13:34, 35; Santiago 1:27) Saray autoridad na gobierno so sinmalet met. Saray managpasegsegang so inerel tan inyarap ed panangukoman.
Sarayan makapakebbiew ya inkagawa so amalesa na dakel iran tepet. Anton klase na relihyon so Kimbilikiti? Diad anton nengneng na pananisia tan ugali so anagdag ed onian nengneng na panamasegsegang tan akin a saray Tasi nen Jehova lambengat tan anggapo so arum a relihyon a puntirya na ontan lan panggula?
[Litrato ed pahina 3]
Baryo na Pangi
[Litrato ed pahina 4]
Dalan ya onarap ed nampateyan