Awake! Titile Mɔɔ Yɛbava Yɛamaa wɔ November!
1 Menli dɔɔnwo lɛ kpuyia mɔɔ fɛta la wɔ nvasoɛ mɔɔ wɔ Baebolo ne azo la anwo. Saa menli a hɛlɛle a, kɛ ɔyɛ mɔɔ bɛfɛlɛ ye Nyamenle Edwɛkɛ ɛ? Ndelebɛbo boni mɔ ati a ɔwɔ kɛ medie Baebolo ne medi memaa ɔkile me adenle ɛ? Saa mekenga na mesukoa Baebolo ne a, nvasoɛ boni a mebanyia meavi nu a? Baebolo ngilebɛbo boni a ɔwɔ kɛ mefa medi gyima a? Kpuyia mɔɔ bɛbua wɔ November Awake! titile ne mɔɔ ati se “Asoo Ɛbahola Wɔalie Baebolo ne Wɔali?” la bie mɔ ɛne
2 Yɛbahulo kɛ yɛfa Awake! titile ɛhye dɔɔnwo yɛmaa wɔ yɛ azɛlɛsinli ne anu. Saa ɔkɛyɛ boɛ a, wɔ November siane ne anu, ɛ nee asafo ne anu amra ɛyɛ sua nu nee sua nu daselɛlilɛ gyima ne folɛ biala. Fa Awake! titile ɛhye maa ɛ nwo amra, ɛ gɔnwo mɔ, menli mɔɔ ɛ nee bɛ yɛ gyima, kilehilevolɛma, menli mɔɔ ɛ nee bɛ kɔ sukulu yɛɛ mekɛ mɔɔ ɛkɛyɛ ɛkpɔlalɛ bieko la. Saa ɛlɛkɔ gua nu anzɛɛ ɛlɛtu adenle a, fa bie kɔ. Mgbanyima ne mɔ ɛhɛla bie dɔɔnwo ɛboka nwo amaa asafo ne anu amra anyia dɔɔnwo.
3 Bɔ Baebolo Ɛzukoalɛ Bo: Saa ɛfa magazine ne ɛmaa a, ɛbahola wɔayɛ Baebolo ɛzukoalɛ nwo ngyehyɛleɛ kolaa na wɔava wɔ edwɛkɛ ne wɔara awieleɛ. Kɛ neazo la, ɛbahola wɔaha kɛ, “Kenle fofolɛ, mebahulo kɛ ɛnwu mualɛ mɔɔ Baebolo ne fa maa wɔ kpuyia ɛhye mɔɔ se, ‘Nyamenle atiakunlukpɔkɛ maa azɛlɛ ye a le boni?’” Akee fa Baebolo ne Kilehile buluku ne sia kɔ, na buke mukelɛ 4-5 la kile suamenle ne, anzɛɛ ɛ nee ye ɛzuzu tile 3 ɛdendɛkpunli 1-3 la anwo. Ɛbahola noko wɔaha kɛ, “Kenle fofolɛ, mebahulo kɛ me nee wɔ suzu Baebolo ngapezo mɔɔ ɛlɛba nu ɛnɛ la anwo.” Saa ɛsia ɛkɔ a, buke buluku ne tile 9 kile suamenle ne, na ɛ nee ye ɛzuzu ɛdendɛkpunli 1-3 la anwo. Anzɛɛ ɛbahola wɔaha ye sikalɛ wɔahile suamenle ne kɛ: “Menli dɔɔnwo ɛnde mɔɔ bɛkenga bɛfi Baebolo ne anu la abo. Kenle fofolɛ, mebahulo kɛ mekile wɔ kɛzi ɛbahola wɔade wɔ Baebolo ne abo kpalɛ la.” Ɛsia ɛkɔ a, fa Baebolo ne Kilehile buluku ne kile ye, na kile ye kɛzi bɛsukoa ye la.
4 Baebolo ne angomekye a “Nyamenle edwɛkɛ” wɔ nu, mɔɔ kolaa maa yɛnyia ‘nrɛlɛbɛ mɔɔ kɔ ngoanelielɛ nu la.’ (2 Tem. 3:15) Ɛhye ati, yɛkulo kɛ yɛ muala yɛbɔ mɔdenle yɛfa yɛ nwo yɛwula Awake! titile ɛhye ɛhyehyɛlɛ nu, na yɛfa yɛboa menli yɛmaa bɛnyia Baebolo ne anu diedi!