Edwɛkɛ Fofolɛ Mɔɔ Yɛbava Yɛabɔ Baebolo Ɛzukoalɛ Bo La
1. Edwɛkɛ fofolɛ boni mɔ a bara The Watchtower ne mɔɔ yɛbava yɛamaa la anu a, na kɛzi bɛyɛ ye ɛ?
1 Ɔvi siane bieko mɔɔ kɔ la, bɛbava edwɛkɛ fofolɛ bɛara The Watchtower ne mɔɔ yɛbava yɛamaa la anu mɔɔ baboa yɛ yeamaa yɛabɔ Baebolo ɛzukoalɛ bo a. Ɔ ti ne se, “Learn From God’s Word” (Sukoa Debie Fi Nyamenle Edwɛkɛ Ne Anu). Menli mɔɔ wɔ azɛlɛsinli ne anu la bie mɔ anye balie ko biala mɔɔ bara la ɛgengalɛ nwo ɛdeɛ, noko bɛyɛ edwɛkɛ ɛhye mɔ bɔkɔɔ kɛ yɛva yɛbɔ adawu.
2. Kɛzi bɛbayɛ edwɛkɛ ne ɛ?
2 Kɛzi Bɛbayɛ Ye La: Bɛyɛ edwɛkɛtile ne nee edwɛkɛtile ngyikyi ne mɔ mɔɔ yɛbahola yɛava yɛabiza suamenle ne kpuyia wɔ adawubɔlɛ ne anu a. Bɛhile ngɛlɛlera titile mɔɔ wɔ edwɛkɛ ne anu la, bɛanva nuhua edwɛkɛ ne bɛamba, amaa suamenle ne ahola azukoa debie avi Nyamenle Edwɛkɛ mumua ne anu. Ɛdendɛkpunli ne mɔ anwa yemɔti bɛbahola bɛazuzu nwolɛ wɔ anlenkɛ ne anloa. Edwɛkɛ ko biala ka Baebolo ne Kilehile buluku ne anwo edwɛkɛ amaa yeaboa wɔ na ɔkɛyɛ boɛ a wɔava yemɔ wɔayɛ debiezukoalɛ ne.
3. Saa yɛlɛdi daselɛ wɔ azua nu a kɛzi yɛbahola yɛava edwɛkɛ ɛhye yɛabɔ Baebolo ɛzukoalɛ bo wɔ anlenkɛnloa ɛ?
3 Kɛzi Yɛbava Yɛali Gyima La: Saa ɛlɛfa magazine ne mɔ wɔamaa a ɛbahola wɔabiza edwɛkɛ mɔɔ yɛ anyelielɛ la wɔ edwɛkɛtile ne anwo. Kɛ neazo la, January 1 ɛdeɛ ne ka nvasoɛ mɔɔ wɔ Baebolo ne azo la anwo edwɛkɛ. Ɛbahola wɔabiza kɛ: “Ɛbu Baebolo ne kɛ ɔle Nyamenle Edwɛkɛ anzɛɛ ɔle buluku kpalɛ ala ɔ? [Maa ɔbua.] Melɛ edwɛkɛ mɔɔ yɛ anyelielɛ la meka ye wɔ ɛhye anwo.” Kile ye kpuyia ne mɔɔ lumua la, kenga ɛdendɛkpunli ne mɔɔ lumua la, na kenga ngɛlɛlera ne mɔɔ wɔ ɛkɛ la. Kenga kpuyia ne bieko na maa suamenle ne ɛha nwolɛ edwɛkɛ. Ɛbahola wɔagyinla kpuyia ne mɔ azo ɛ nee ye azukoa dodo mɔɔ bɛkɛhola la. Kolaa na wɔavi ɛkɛ la, twe ye adwenle kɔ kpuyia bieko mɔɔ doa ye la azo na yɛ ngyehyɛleɛ kpalɛ kɛ ɛbazia wɔahɔ na bɛazuzu nwolɛ. Dapɛne biala kɔ ɛkɛ na bɛzuzu edwɛkɛ ne dɔɔnwo anwo kɔkpula kɛ ɛbava magazine fofolɛ wɔamaa ye la. Ɛbahola noko wɔalua adenle sikalɛ zo wɔaha wɔahile suamenle ne kɛ ɛkulo kɛ ɛ nee ye sukoa Baebolo ne. Akee fa edwɛkɛ ne mɔɔ wɔ magazine ne anu la kile ye kɛzi bɛyɛ debiezukoalɛ ne la.
4. Saa yɛlɛyɛ sia kɔkpɔla a kɛzi yɛbahola yɛava edwɛkɛ ɛhye mɔ yɛali gyima ɛ?
4 Ɛbahola noko wɔava edwɛkɛ fofolɛ ɛhye wɔaboa menli mɔɔ ɛta ɛmaa bɛ magazine yɛɛ menli mɔɔ ɛta ɛyɛ sia kɔkpɔla wɔ bɛ ɛkɛ la kpalɛ. Ɛbahola wɔaha ye sikalɛ kɛ: “Bɛva edwɛkɛ fofolɛ bie bɛra The Watchtower ne anu. Maa mengile wɔ kɛzi bɛsukoa ye la.” Yɛ asɔneyɛlɛ a le kɛ edwɛkɛ fofolɛ ɛhye baboa menli dɔɔnwo yeamaa “[bɛanwu] nɔhalɛ ne.”—1 Tem. 2:4.