Kɛ Yɛbayɛ Yɛ nee Menli Mɔɔ Yɛmaa Bɛ Magazine Abɔ Baebolo Ɛzukoalɛ Bo
1 Yɛta yɛfa Watchtower nee Awake! magazine ne yɛdi gyima wɔ daselɛlilɛ nu wɔ Folɛ. Noko akee, ɛhye le bodane mɔɔ yɛlɛ kɛ yɛkilehile menli mɔɔ lɛ ahonle kpalɛ nɔhalɛ ne la mɔlebɛbo ala. Ɛbanwu nzuzulɛ mɔɔ kile kɛzi bɛfa Baebolo ne Kilehile buluku ne bɛmaa wɔ siakɔkpɔla ɛyɛlɛ nu na bɛbɔ Baebolo ɛzukoalɛ bo la wɔ ɔ bo ɛke. Ɛbahola wɔaziezie ye wɔamaa yeafɛta bɛ azɛlɛsinli ne na wɔava wɔ edwɛkɛ wɔaha. Ɛbahola wɔalua adenle fofolɛ zo wɔayɛ saa yemɔ a baboa kpalɛ a.
2 Fa Mukenye Edwɛkɛ ne mɔ Di Gyima: Saa ɛsia ɛkɔ a, ɛbahola wɔaha kɛ: “Magazine ne mɔɔ menvale memanle wɔ la twe adwenle kɔ Baebolo ne azo. Yɛ deɛ mɔɔ ɔti Baebolo ɛgengalɛ hyia kpalɛ la nzonlɛ.” Kenga Ayezaya 48:17, 18; Dwɔn 17:3 anzɛɛ ngɛlɛlera fofolɛ mɔɔ fɛta la. Akee saa ɛfa Baebolo ne Kilehile buluku ne ɛkile suamenle ne na ɛmaa ye ko a, ɛbahola wɔaha kɛ:
◼ “Baebolo ne maa yɛnyia kenlebie anyelazo kpalɛ.” Fa mukelɛ 4-5 kile suamenle ne, na biza ye kɛ, “Ɛwɔkɛ ɛhye mɔ boni a ɛ kunlu a anrɛɛ yera nu a?” Kile ye tile mɔɔ ka Ngɛlɛlera nu ɛwɔkɛ mɔɔ yekpa la anwo edwɛkɛ la, na saa ɔmaa adenle a, ɛ nee ye ɛzuzu ɛdendɛkpunli ko anzɛɛ nwiɔ anwo.
◼ Anzɛɛ ɛbahola wɔaha kɛ, “Baebolo ne bua asetɛnla nu kpuyia mɔɔ anwo hyia kpalɛ la.” Fa ye kɔ mukelɛ 6, na biza ye saa yedwenle kpuyia mɔɔ wɔ mukelɛ ne abo ɛkɛ ne la bie anwo ɛlɛ a. Buke tile ne mɔɔ bua zɔhane kpuyia ne la na ɛ nee ye ɛzuzu ɛdendɛkpunli ko anzɛɛ nwiɔ anwo sikalɛ.
◼ Anzɛɛ ɛbahola wɔava edwɛkɛ adile mɔɔ wɔ nuninyɛne ne anu la bie mɔ wɔahile ye na wɔabiza ye mɔɔ ɔ nye die nwolɛ la. Buke zɔhane tile ne, na kile ye kɛzi bɛyɛ Baebolo ɛzukoalɛ la sikalɛ.
3 Fa Kpuyia Sie Ɛkɛ wɔ Ɛkpɔlalɛ Mɔɔ Lumua la Anu: Debie bieko mɔɔ ɛbahola wɔayɛ la a le kɛ ɛbayɛ siakɔkpɔla nwo ngyehyɛleɛ wɔ ɛkpɔlalɛ mɔɔ lumua la anu. Saa suamenle ne die magazine ne a, fa kpuyia sie ɛkɛ, na ka kile ye kɛ ɛbaye ɔ nloa mekɛ bieko mɔɔ ɛbara la. Ɛ nee ye ɛyɛ ngyehyɛleɛ na bɔ mɔdenle kɛ ɛbali zo. (Mat. 5:37) Saa ɛsia ɛkɔ a, kakye suamenle ne kpuyia ne na kenga mualɛ ne fi Baebolo ne Kilehile buluku ne anu na bɛzuzu nwolɛ. Maa ye ko maa ɔnlea nu. Neazo bie mɔ ɛne:
◼ Saa ɛvale magazine mɔɔ ka ewiade ne gyinlabelɛ mɔɔ ɛlɛsɛkye la anwo edwɛkɛ a ɛmanle a, ɛbahola wɔaha kɛ, “Meba bieko a yɛbazuzu kɛzi Baebolo ne bua kpuyia ɛhye la anwo, Duzu nzenzaleɛ a Nyamenle bayɛ wɔ azɛlɛ ye azo a?” Saa ɛsia ɛkɔ a buke mukelɛ 4-5 la kile ye. Anzɛɛ ɛbahola wɔabiza edwɛkɛ ɛhye, “Asoo ɔle Nyamenle ɛhulolɛ kɛ esiane kɛzi ɔ?” Saa ɛsia ɛkɔ a, ɛ nee suamenle ne ɛha tile 1, ɛdendɛkpunli 7-8 la anwo edwɛkɛ.
◼ Saa magazine ne mɔɔ ɛvale ɛmanle la ka abusua nwo edwɛkɛ a, ɛbahola wɔabiza edwɛkɛ ɛhye kolaa na wɔavi ɛkɛ, “Duzu a ɔwɔ kɛ abusua ne anu sonla ko biala yɛ na abusua ne anye alie kpalɛ a?” Saa ɛsia ɛkɔ a ɛ nee ye ɛzuzu tile 14, ɛdendɛkpunli 4 ne anwo.
◼ Saa magazine ne mɔɔ ɛvale ɛmanle la ka Baebolo ne mɔɔ yɛfa yɛ nwo yɛado zo la anwo edwɛkɛ a, ɛbahola wɔabiza kpuyia ɛhye na bɛazuzu nwolɛ kenle fofolɛ, “Asoo Baebolo ne le nɔhalɛ wɔ abɔdeɛ nwo nrɛlɛbɛ nu?” Saa ɛsia ɛkɔ a bɛzuzu tile 2, ɛdendɛkpunli 8 ne anwo.
4 Fa edwɛkɛ mɔɔ bɛbazuzu nwolɛ kenle fofolɛ la sie ɛkɛ wɔ adawubɔlɛ ko biala awieleɛ. Saa debiezukoalɛ ngyehyɛleɛ ne di munli a, bɛbahola bɛabɔ buluku ne abo bɛahɔ ye awieleɛ. Na saa suamenle ne anlie Baebolo ne Kilehile buluku ne ɛ? Ɛbahola wɔahɔ zo wɔamaa ye magazine na ɛ nee ye abɔ Baebolo ne anu adawu. Mekɛ mɔɔ ɛlɛboa ye wɔamaa ye anyelielɛ ne ayɛ kpole la, bie a akee ɔbalie Baebolo ɛzukoalɛ yeado nu.
5 The Watchtower nee Awake! ne kola ka awie maa ɔsukoa mɔɔ Baebolo ne kilehile amgba la. Ɛhye ati, bɔ mɔdenle kɛ ɛ nee menli mɔɔ ɛmaa bɛ magazine la kɛbɔ Baebolo ɛzukoalɛ bo. Wɔ adenle ɛhye azo, ɛnee yɛlɛdi Gyisɛse adehilelɛ ne mɔɔ se “bɛmaa menli ɛrayɛ me ɛdoavolɛma . . . bɛhilehile bɛ” la azo.—Mat. 28:19, 20.
[Debiezukoalɛ kpuyia ne mɔ]
1. Bodane boni ati a yɛfa magazine yɛmaa a?
2. Kɛzi ɛbahola wɔava mukenye edwɛkɛ ne mɔ mɔɔ wɔ Baebolo ne Kilehile buluku ne anu la wɔabɔ Baebolo ɛzukoalɛ bo ɛ?
3. Kɛ yɛbayɛ yɛabɔ Baebolo ɛzukoalɛ bo, saa yɛfa magazine mɔɔ ka (a) ewiade gyinlabelɛ mɔɔ ɛlɛsɛkye (b) abusua (d) yɛ nwo mɔɔ yɛfa yɛado Baebolo ne azo la anwo edwɛkɛ yɛmaa a?
4. Saa awie anlie Baebolo ne Kilehile buluku ne a, duzu a ɔwɔ kɛ yɛyɛ a?
5. Duzu ati a ɔwɔ kɛ yɛbɔ mɔdenle yɛyɛ dɔɔnwo yɛtɛla magazine mɔɔ yɛfa yɛamaa ala la ɛ?