Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu—Fa Baebolo ne Kilehile Buluku Ne Kile Kɛzi Bɛsukoa Baebolo Ne La

Deɛmɔti Ɔhyia La: Saa yɛka kɛ yɛ nee menli sukoa Baebolo ne wɔ azua nu mɔɔ bɛndua ɛhwee a, bie a menli dɔɔnwo ɛnrɛde ɔ bo. Bie a bɛ adwenle bayɛ bɛ kɛ ɔwɔ kɛ bɛboka debiezukoalɛ ekpunli bie anwo anzɛɛ bɛtɛnla sua nu bɛazukoa na bɛahɛlɛ nwolɛ sɔnea. Kɛ ɛbaha debiezukoalɛ ne anwo edwɛkɛ sikalɛ la, nzɔne ati a ɛngile bɛ kɛzi bɛsukoa ye la ɛ? Bie a ɛbahola wɔava mitini ekyi bie wɔahile awie adenle sikalɛ mɔɔ yɛ anyelielɛ mɔɔ bɛdua zo bɛsukoa Baebolo ne la.

Kɛzi Bɛyɛ Ye La:

Saa ɛda ɛ nwo ali ɛwie a, biza suamenle ne saa mɔɔ bazi kenlebie la gyegye ye a.
Ka kile ye kɛ ninyɛne ɛhye mɔ bie gyegye awie mɔ noko, na fa Baebolo ne Kilehile buluku ne anu nuninyɛne ne kile ye. Kile nu kile ye kɛ buluku ɛhye anu ɛnyɛ se yɛɛ ɔkile mɔɔ Baebolo ne kilehile fane kenlebie nee edwɛkɛ gyɛne nwo la na biza ye tile mɔɔ ɔ nye die nwo la.
Fa buluku ne ko maa ye na boa ye maa ɔbuke tile ne mɔɔ ɔkpale la. Ka kile ye kɛ bɛbua kpuyia ne mɔ mɔɔ wɔ tile ne mɔlebɛbo la wɔ ɛdendɛkpunli ne mɔ mɔɔ doɔdoa zo la anu.
Saa suamenle ne anye balie nwo kɛ ɔbagenga a, maa ɔgenga ɛdendɛkpunli ne mɔɔ lumua la. Akee biza ɛdendɛkpunli ne anwo kpuyia ne na bɛ mu nwiɔ bɛzuzu nwolɛ. Bɛgenga na bɛzuzu ngɛlɛlera mɔɔ bɛhwe adwenle bɛhɔ zo mɔɔ foa mualɛ ne azo la anwo. Maa ɔnlea kɛzi wɔpepɛ wɔ mualɛ ɛdeɛ ne abo wɔ wɔ buluku ne anu la.
Bɛzuzu ɛdendɛkpunli mɔɔ doa zo la anwo, noko wɔ mekɛ ɛhye anu ɛdeɛ maa suamenle ne ɛbɔ mɔdenle ɛva ye edwɛkɛ ɛmaa mualɛ.
Kanvo ye na ɛ nee ye ɛyɛ ngyehyɛleɛ kɛ ɛbazia wɔara na bɛazukoa mɔɔ ɛha la.
Saa ɔbayɛ boɛ a, kile ye video ne mɔɔ wɔ jw.org ne azo mɔɔ ɔ ti ne se Kɛzi Bɛyɛ Baebolo Ɛzukoalɛ Ɛ? la.

Sɔ Ɛhye Nea Wɔ Siane Ɛhye Anu:

Sɛlɛ Gyihova maa ɔyila mɔdenle mɔɔ ɛlɛbɔ kɛ ɛbɔ Baebolo ɛzukoalɛ bo la azo.—Fel. 2:13.
Bɔ mɔdenle kɛ ɛbava Baebolo ne Kilehile buluku ne wɔahile awie kɛzi bɛsukoa Baebolo ne la anzɛɛ ɛbaye video ne mɔɔ se Kɛzi Bɛyɛ Baebolo Ɛzukoalɛ Ɛ? la ko wɔahile awie wɔ daselɛlilɛ nu.