Maa Ehyiavolɛma Ɛnyia Anyelazo
1 Gyisɛse anye liele ehyiavolɛma anwo titile. Mekɛ bie mɔ anu, ɔlua nwanwane adenle zo ɔvale nwonane afoa nu moalɛ ɔmanle na ɔyɛle menli mɔɔ ɛnde kpɔkɛ la ayile, noko ɛnee ye adwenle wɔ “edwɛkpa” ne mɔɔ ɔbɔ ye nolo yeahile ehyiavolɛma la azo. (Mat. 11:5) Ɛnɛ, Keleseɛne ɛzonlenlɛ gyima ne kɔ zo boa ehyiavolɛma nee menli mɔɔ ɛha la.—Mat. 24:14; 28:19, 20.
2 Anyelazo Kpalɛ: Keleseɛnemaanle ne anu ɛsɔfo ne mɔ ta bɔ ehyiavolɛma ɛwɔkɛ kɛ, saa bɛfi ahonle nu bɛye ezukoa bɛboa asɔne ne a, bɛbanyia ezukoa. Noko akee, Baebolo ne kilehile kɛ Nyamenle Belemgbunlililɛ ne angomekye a badu ehyia bo na yeali alesama ngyegyelɛ kɔsɔɔti anwo gyima a. (Edw. 9:18; 145:16; Aye. 65:21-23) Saa yɛmaa ehyiavolɛma nwu mɔɔ Baebolo ne kilehile amgba la a, yɛmaa bɛnyia anyelazo na yɛboa bɛ yɛmaa bɛ sa ka mɔɔ bɛhyia wɔ sunsum nu la.—Mat. 5:3.
3 Falasiima mɔɔ ɛnee wɔ ɛkɛ ne wɔ Gyisɛse mekɛ zo la, bule bɛ nye guale ehyiavolɛma anwo zo, bɛambu bɛ bie na bɛvɛlɛle bɛ ‘am-ha·’aʹrets, anzɛɛ “azɛlɛ nwo menli.” Noko akee, Gyisɛse bule “bɛ mogya” anzɛɛ bɛ ngoane kɛ “[ɔsonle] bolɛ.” (Edw. 72:13, 14) Yɛbahola yɛazukoa Gyisɛse na yɛaze ehyiavolɛma ɛhye mɔ “anwunvɔne” ɔlua bɛ ngyegyelɛ mɔɔ yɛbade ɔ bo na yɛamaa yɛ nye alie bɛ nwo la azo. (Mrɛ. 14:31) Yɛngulo kɛ yɛkɛdendɛ yɛkɛtia menli mɔɔ bɛ ɛleka mɔɔ bɛde ɛnle kpalɛ anzɛɛ yɛkɛze ɛvɛlɛ kɛ yɛkɛli bɛ daselɛ. Menli dɔɔnwo mɔɔ ɛlɛtie Belemgbunlililɛ nrɛlaleɛ ne la le ehyiavolɛma.
4 Boa Kɛkala: Baebolo ngyinlazo mɔɔ yɛkilehile ehyiavolɛma la eza boa bɛ maa bɛte ninyɛne mɔɔ fa ehyia ba kɛkala la azo. Kɛ neazo la, Baebolo ne tua nzabolɛ, kyakyadolɛ, mgbovonle, sigalɛte nee tɛba ɛnlonlɛ yɛɛ nyɛleɛ ngakyile mɔɔ fa ehyia ba la. (Mrɛ. 6:10, 11; 23:21; 2 Kɔl. 7:1; Ɛfɛ. 5:5) Ngɛlɛlera ne si nɔhalɛlilɛ nee “ahonle kpalɛ” nu mɔɔ bɛfi bɛyɛ gyima, mɔɔ le subane mɔɔ ɔwɔ kɛ gyimayɛvoma nyia la adua. (Kɔlɔ. 3:22, 23; Hib. 13:18) Nɔhalɛ nu, wɔ neɛnleanu ko mɔɔ bɛyɛle la anu, gyimamenlema “bule nɔhalɛlilɛ nee enililɛ kɛ bɛle subane mɔɔ bɛ nye die nwo kpalɛ wɔ menli mɔɔ ɛlɛkpondɛ gyima la anwo a.”
5 Gyihova dwenle ehyiavolɛma amaneɛnwunlɛ nwo. Ɔnrɛhyɛ Gyisɛse Kelaese ‘balie mɔɔ ɛnlɛ bie mɔɔ su fɛlɛ ye la zo.’ (Edw. 72:12) Kɔkpula zɔhane mekɛ ne, yɛlɛ nwolɛ adenle titile yɛfa Baebolo ne anu edwɛkɛ ne yɛkyekye awie mɔ mɔɔ ehyiavolɛma boka nwo la arɛle.