EMINYEETO NIBABUUZA
Nimbaasa Kwetantara nta Emiteekateekyere Mibi?
Nooyereeba ota?
Endeebera birungi
“Niinteeraho kugira okushemererwa n’okuteefeerayo nk’oku kirikubaasika. Ahabw’enki ntarikubaasa kuguma nyine akamwenyo aha maisho buri izooba?”—Valerie.
Endeebera bibi
“Haaba ekintu kirungi, eki ndikubanza kuteekateeka n’okugira ngu eki tikirikubaasika.”—Rebecca.
Ow’amazima
“Okuba endeebera birungi byonka nikibaasa kukureebya, kandi okuba endeebera bibi nikireeta enaku. Okwebeera ow’amazima nikimpwera kureeba ebintu nk’oku biri buzima.”—Anna.
Ahabw’enki kiri kikuru?
Baibuli neegira ngu “oine omutima ogushemereirwe ni nk’omuntu otuura omu bugyenyi.” (Enfumu 15:15) Buzima, abantu abarikwetantara emiteekateekyere mibi etarikwetengyesa, kandi bakagira emiteekateekyere mirungi aha mbeera, nibakira kuba bashemereirwe. Nikibaasa n’okuboorobera kutunga abanywani. Mbwenu shi, n’oha orikwenda kumara obwire n’omuntu orikuba agwirwe kubi obwire bwona?
Kwonka, hariho ebirikubaho n’ebi omuntu endeebera birungi atarikubaasa kuzibira. Nk’eky’okureeberaho:
Amakuru nigabaasa kuba gaijwiremu ebirikukwata aha ntaro, obuzahambuki, n’obuhenda biragiro.
Eka yaanyu neebaasa kuba erimu oburemeezi.
Obundi oine obweremwa obwawe n’enshobe ebirikukuteganisa.
Omunywani naabaasa kukugwisa kubi.
Omu mwanya gw’okwitira eriisho amazima aga, nari kubitaho omutima munonga bikakugwisa kubi, teeraho kuba oringaniire. Okugira emiteekateekyere eringaniire nikiija kukuhwera kwetantara ebiteekateeko bibi ebitarikwetengyesa, kandi oikirize embeera nk’oku ziri zitakureeteire kwehurira kubi.
Noobaasa kwemera oburemeezi oburi nk’eihunga, oine obuhame ngu omushana nigwija kurugaho nigujwa
Eki orikubaasa kukora
Otata munonga omutima aha nshobe zaawe.
Baibuli neegira eti: “Tihariho omu nsi okora ebihikire obwire bwona atashiishe na kakye.” (Omubuurizi 7:20, Good News Translation) Ahabw’okugira ngu oine obweremwa kandi nookora enshobe, nikyoreka ngu ori omuntu, beitu tikugira ngu eremirwe.
Oku oine kuba oringaniire: Kora aha nshobe zaawe, kwonka otateekateeka ngu oine kuba ohikiriire. “Ninyezibira kuta omutima aha nshobe zangye,” omutsigazi orikwetwa Caleb nikwo arikugira. “Kureka, niinteeraho kuzeegyeraho, kugira ngu nsherure oburyo bw’okubonezamu.”
Yetantare okwegyeragyeranisa.
Baibuli neegira eti: “Turekye kwehimbisiza ahari busha, n’obu kwakuba okugwisana kubi nari okugirirana amahari.” (Abagalatia 5:26) Okureeba ebishushani byona ebiri aha mukura gw’empurizana eby’emikoro ei batakwetsireho nikibaasa kwongyera kukugwisa kubi. Eki nikibaasa kureetera banywani baawe ab’aha mara kureebeka nk’abazigu baawe abarikukirayo obubi.
Oku oine kuba oringaniire: Kimanye ngu torikubaasa kwetwa ahari buri mukoro. N’ekindi, ebishushani by’aha mikura y’empurizana nibiba bitarikworeka buri kimwe. “Aha mikura y’empurizana abantu nibataho ebintu ebiboneire byonka,” nikwo omushogoyo omwe orikwetwa Alexis arikugira. “Abantu obwire obwingi tibarikutaho ebirikureebeka kubi.”
Ba ow’obusingye, na munonga omu ka yaawe.
Baibuli neegira eti: ‘Ku kiraabe nikibaasika aha rubaju rwanyu, mutuurane omu busingye.’ (Abarooma 12:18) Torikubaasa kutegyekyera kimwe ebikorwa by’abandi, kwonka noobaasa kucwamu oku oraatwaze. Noobaasa kucwamu kuba ow’obusingye.
Oku oine kuba oringaniire: Mariirira kutongyerera aha buremeezi bw’eka, beitu ba ow’obusingye, nk’oku kishemereire omu mukago gwona. “Tihariho ohikiriire, kandi nitwija kuguma nitugwisana kubi obumwe n’obumwe,” omunyeeto orikwetwa Melinda nikwo arikugira. “Nituba twine kucwamu oku turaatwaze, yaaba kuba ab’obusingye, nari kutwaza okundi.”
Yega kusiima.
Baibuli neegira eti: “Mube abarikusiima.” (Abakolosai 3:15) Okugira omutima gw’okusiima nikiija kukuhwera kuta omutima aha birikugyenda gye, bitari ebirikureebeka nk’ebirikugyenda kubi.
Oku oine kuba oringaniire: Manya oburemeezi bwawe, kwonka oteehuzya ebirungi ebi orikukora. “Buri izooba, niimpandiika ekintu kirungi omu katabo kangye,” omwishiki orikwetwa Rebecca nikwo arikugira. “Nimba niinyenda kweijutsya ngu okutwarira hamwe nyine ebintu birungi eby’okuteekateekaho.”
Shwijuma banywani baawe.
Baibuli neegira eti: ‘Ekigombe kibi nikishiisha emicwe mirungi.’ (1 Abakorinso 15:33) Abantu abu orikukira kuba ori nabo baaba nibakira kwetomboita, nari kugira ekiniga, emitwarize yaabo mibi neija kukushiisha.
Oku oine kuba oringaniire: Abanywani nibatunga oburemeezi, kandi kumara obwire bukye nibabaasa kwegiraho emiteekateekyere mibi. Bashagike, kwonka oteetaatsya munonga omu buremeezi bwabo. “Abantu abaine emiteekateekyere mibi tibo baine kuba banywani baitu bonka,” nikwo omwishiki orikwetwa Michelle arikugira. “Omu kubara, ku orikukwata ekintu ekigwire okakigaitaho ekindi ekigwire, nootunga ekigwereire kimwe.”
Shoma bingi ebirikukwata aha nshonga egi
Turi omu biro ebi Baibuli erikweta ebigumire munonga kwemera. (2 Timoseo 3:1) Noogumirwa kuguma oine emiteekateekyere mirungi omu nsi eijwiremu emiteekateekyere egwire? Shoma ekicweka, “Ahabw’enki Hariho Okubonabona Kwingi?”