Noobaasa Kusingura Okwehurira Kubi

1-2. Obumwe entumwa Paulo akaba ayehurira ata, kandi ebi yaahandiikire nibitukwataho bita? (Abarooma 7:​21-24)

NOIJUKA ki waateekateeka aha ntumwa Paulo? Nooteekateeka ngu akaba ari omumiisani emanzi, omwegyesa murungi, nari owaahandiikire ebitabo bingi omu Baibuli? Ebyo byona bihikire. Kwonka obumwe, nawe akaba ayehurira kubi, ayetamwa, kandi agira amaganya.

² Shoma Abarooma 7:​21-24. Omu baruha ei Paulo yaahandiikiire Abarooma, akooreka enyehurira nk’ezi baingi ahariitwe turikugira. N’obu araabe yaabaire ari Omukristaayo omwesigwa, akaba naagumirwa kusingura ebyetengo bibi n’okukora ebi Ruhanga arikukunda. Ekindi, obumwe Paulo akaba naayeshinja ahabw’ebi yaakozire enyima, kandi ayehurira kubi ahabw’embeera egumire ei yaabaire naarabamu.

3. Nituza kureeba ki omu kicweka eki? (Reeba n’Obugambo obw’ahansi)

³ N’obu Paulo araabe yaabaire naateganisibwa enyehurira mbia, taraikiriize kusingurwa enyehurira ezo. Omu kicweka eki, nituza kugarukamu ebibuuzo ebi: Niki ekyareeteire Paulo kwehurira ‘nk’enshoberwa’? Akasingura ata okwehurira kubi? Kandi nitubaasa kukora ki kusingura okwehurira kubi?

EKYAREETEIRE PAULO KWEHURIRA KUBI

4. Niki ekyareeteire Paulo kwehurira kubi?

⁴ Ebi yaakozire enyima. Paulo atakabaire Omukristaayo akaba naamanywa nka Saulo, kandi akakora ebintu ebyamureeteire kwefuuza. Nk’eky’okureeberaho, akashagika abaateire Stefano amabaare arikuteekateeka ngu naakora ekihikire. (Byak. 7:58; 8:1) Kandi, akeebembera orukwe rw’okuhiiganisa Abakristaayo.—Byak. 8:3; 26:​9-11.

5. Paulo akaba ayehurira ata ahabw’ebintu ebi yaakozire enyima?

⁵ Entumwa Paulo ku yaahindukire Omukristaayo, obumwe akaba ayehurira kubi ahabw’ebi yaakozire enyima. Ebintu bibi ebi yaakozire arikuhiiganisa Abakristaayo biine kuba byamureetaire kuguma naayeshinja kumara obwire buraingwa. Nk’eky’okureeberaho, obu yaahandiikira Abakorinso ebaruha y’okubanza nk’omu 55 Y.A.K., akagira ati: ‘Tinshemereire kwetwa entumwa, ahabw’okuba [nkahiiganisa ekibiina] kya Ruhanga.’ (1 Kor. 15:9) Bwanyima y’emyaka etaano, omu baruha ei yaahandiikiire Abaefeso, akagira ngu ‘ndi muto okukira orikukirayo obuto omu barikwera boona.’ (Efe. 3:8) Kandi obu yaahandiikira Timoseo akeegambaho ngu akaba ari ‘omurogotsi, [omuhiiganisa], kandi omuntu enshaarizi.’ (1 Tim. 1:13) Noobaasa kuteekateeka oku Paulo yaabaire ayehurira yaataayaayira ekibiina reero akabugana abantu abu yaahiiganiise nari ab’eka zaabo?

6. Niki ekindi ekyareeteire Paulo kugira amaganya mingi? (Reeba n’obugambo obw’ahansi.)

⁶ Eihwa omu mubiri. Paulo akagamba aha kintu ekyabaire nikimureetera amaganya arikukigyeragyeranisa ‘n’eihwa omu mubiri.’ (2 Kor. 12:7) Taragambire kyenyini ekyabaire nikimureetera kwehurira atyo, kwonka ebigambo ebi yaakoreise nibyoreka ngu akaba aine obusaasi bw’amaani aha mubiri nari omu nyehurira.b

7. Obutahikiirira bukaba bureetera Paulo kwehurira ata? (Abarooma 7:​18, 19)

⁷ Obutahikiirira bwe. Paulo akaba naateganisibwa obutahikiirira. (Shoma Abarooma 7:​18, 19.) N’obu araabe yaabaire naayenda kukora ekihikire, omubiri gwe ogutahikiirire gukaba gumuremesa kukikora. Akagira ngu ebyetengo bye eby’omubiri bikaba bihakanisa ekyetengo kye eky’okukora ekihikire. Kwonka nabwo, akakora n’amaani kubisingura. (1 Kor. 9:27) Hatariho kubangaanisa aine kuba yaabaire ayehurira kubi ku yaabaire agaruka kukora ebintu ebi yaabaire naateeraho kusingura!

OKU PAULO YAASINGWIRE OKWEHURIRA KUBI

8. Ebaruha ezi Paulo yaahandiikire zikooreka zita oku yaabaire naarwanisa obutahikiirira?

⁸ Omu baruha ezi Paulo yaahandiikire, akooreka oku we n’Abakristaayo bagyenzi be baabaire nibabaasa kurwanisa emitwarize mibi kandi bakagisingura ahabw’obuhwezi bw’omwoyo gurikwera. (Rom. 8:13; Gal. 5:​16, 17) Kaingi akagamba aha mitwarize mibi n’ebyetengo ebitashemeire ebi Abakristaayo baine kurwanisa. (Gal. 5:​19-21, 26) Hatariho kubangaanisa Paulo akateekateeka aha bweremwa bwe, yaasherura obuhabuzi omu Byahandiikirwe, kandi yaamanya eki aine kukora kusingura obutahikiirira bwe. Nitubaasa kuhamiza kimwe ngu akagyendera aha buhabuzi obu yaahaire abandi.

9-10. Niki ekyahweraire Paulo kusingura enyehurira mbi? (Abaefeso 1:7) (Reeba n’ekishushani.)

⁹ N’obu obumwe Paulo yaabaire ahurira ahwairemu amaani, akabaasa kuguma aine emiteekateekyere mirungi. Nk’eky’okureeberaho, akaba ashemererwa ku yaabaire atunga amakuru marungi agarikukwata aha bibiina. (2 Kor. 7:​6, 7) Kandi omukago ogu yaabaire aine n’ab’eishe-emwe bagyenzi be gukaba gumureetera okushemererwa. (2 Tim. 1:4) Kandi akaba naamanya ngu Yehova naasiima ebi arikukora. Buzima, Paulo akaba aine okushemererwa ahabw’okuheereza Ruhanga “n’omutima ogutarikweshinja.” (2 Tim. 1:3) Nangwa n’obu yaabaire akomirwe omuri Rooma akahiga Abakristaayo bagyenzi be ‘kushemererwa omuri Mukama.’ (Fil. 4:4) Buzima, ebigambo ebi yaakoreise bikooreka ngu akaba atasingwirwe enyehurira mbi. Paulo ku yaabaire agira emiteekateekyere mibi, akaba agirwanisa kugira ngu abaase kugaruka kuteekateeka gye.

¹⁰ Paulo akabaasa kusingura enyehurira mbi ahabw’okuba akaba naikiriza ngu ekitambo n’ekiconco ekyahairweyo ahabwe. (Gal. 2:20; shoma Abaefeso 1:7.) N’ahabw’ekyo, akaba aine obwesigye ngu Yehova akamusaasira kurabira omuri Yesu Kristo. (Rom. 7:​24, 25) N’obu Paulo araabe yaakozire ebibi bingi enyima, kandi arikuteganisibwa obutahikiirira, akabaasa “kuheereza Ruhanga” ashemereirwe.—Heb. 9:​12-14.

11. Ahabw’enki eky’okureeberaho kya Paulo kirikutugumya?

¹¹ Naitwe obumwe nitubaasa kwehurira nka Paulo. Butoosha nikiba kitoorobi kwetantara kugamba, kuteekateeka nari kukora ekintu kyona ekiribaasa kugwisa kubi Yehova. Kandi nitubaasa kwehurira nka Paulo owaagizire ati: ‘Ai bambe, ka ndi omuntu enshoberwa!’ Munyaanyazi-itwe ori omu myaka 20 orikwetwa Elizac naagamba oku arikwehurira arikugira ati: “Nikingumya ku ndikuteekateeka aha mbeera ya Paulo. Nikimpumuuriza kumanya ngu tiinye nyenka orikwehurira atyo. Kandi nikinyijutsya ngu Yehova naamanya ebi abantu be barikurabamu.” Niki eki turikubaasa kukora kugira omuntu ow’omunda oshemeire nka Paulo, kandi tukagira okushemererwa n’obu twakuba nitwehurira kubi?

OKU TURIKUBAASA KUSINGURA OKWEHURIRA KUBI

12. Okugira entebeekanisa nungi y’eby’omwoyo nikituhwera kita kusingura okwehurira kubi?

¹² Guma oine entebeekanisa nungi y’eby’omwoyo. Twakora ekyo nikituhwera kugira emiteekateekyere mirungi. Nitubaasa kugyeragyeranisa entebeekanisa egyo n’okukora ebintu ebirikutuhwera kuguma twine amagara marungi. Nk’eky’okureeberaho, nitwehurira gye twarya eby’okurya by’ekiriisa, tukakora ebisasayizi obutoosha, kandi tukabyama ekirikumara. Nikyo kimwe, twena tubaasize kureeba oku turikwehurira gye twashoma Ekigambo kya Ruhanga obutoosha, tukaza omu kubuurira, tukatebeekanisa enteerane kandi tukazejumbamu. Ebintu ebyo nibituhwera kusingura ebiteekateeko bibi.—Rom. 12:​11, 12.

13-14. Ab’eishe-emwe abamwe babaasize kugasirwa bata omu ntebeekanisa nungi y’eby’omwoyo?

¹³ Teekateeka aha ky’okureeberaho kya John ow’emyaka 39, owaacebeirwe akashangwa aine ekookoro. Omu kubanza akeehurira kubi munonga. Akeebuuza ati: ‘Nimbaasa nta kurwara aha myaka mito egi?’ Omu bwire obwo mutabani we akaba aine emyaka eshatu yonka. Mbwenu shi niki ekyahweraire John kusingura okwehurira kubi? Naagira ati: “Nkahamya ngu eka yaitu yaaguma eine entebeekanisa nungi y’eby’omwoyo n’obu ndaabe naabaire mba nduhire. Tukaba tuza omu nteerane zoona, twejumba omu kubuurira buri saabiiti, kandi tugira okuramya kw’eka obutoosha n’obu kiraabe kyabaire kitoorobi kukikora.” John ku arikwijuka eby’enyima naayongyeraho ati: “Twahikwaho embeera egumire, nitubaasa kubanza kutiina kandi twehurire kubi munonga, kwonka amaani ga Yehova na rukundo ye nibituhwera kuterarikirira ekirenga. Yehova naabaasa kukuhwera nk’oku yaampweraire.”

¹⁴ Eliza, owaaba yaagambirweho naagira ati: “Okweyegyesa Baibuli n’okuza omu nteerane z’Ekikristaayo, nikinyijutsya ngu Yehova naahurira okushaba kwangye kandi ngu buzima naankunda. Ekyo nikindeetera okushemererwa.” Nolan, omureeberezi wa saketi omuri Africa n’omukazi we Diane nibagira bati: “Nituhamira aha ntebeekanisa yaitu y’eby’omwoyo n’obu twakuba tuhwairemu amaani. Butoosha Yehova naatworeka ngu naatuhwera kugira emiteekateekyere mirungi. Nituteeraho kwijuka ngu Yehova naija kutuhwera kandi atuhe emigisha. Titurikumanya oku araakikore kwonka nitumanya ngu naija kukikora.”

15. Niki ekindi eki turikubaasa kukora kusingura enyehurira mbi? Ha eky’okureeberaho.

¹⁵ Kubaasa kusingura enyehurira mbi, haine ebintu ebindi ebi twine kukora. Nk’eky’okureeberaho, ka tugire ngu waagira obusaasi omu mugongo. Kubaasa kukira obusaasi obwo oine kukora ekirikukira aha kugyendagyenda buri izooba. Nikibaasa kukwetengyesa kucondooza nari kugamba n’omushaho kubaasa kumanya ekireetsire obusaasi obwo. Nikyo kimwe, nikibaasa kukwetengyesa kucondooza omu bitabo byaitu, nari kugamba n’Omukristaayo okuzire omu by’omwoyo kumanya oku orikubaasa kusingura enyehurira mbi ezirikuguma nizigaruka. Teekateeka aha bintu ebindi ebirikubaasa kukuhwera.

16. Niki ekirikubaasa kukuhwera kumanya ekirikukureetera okwehurira kubi? (Zaaburi 139:​1-4, 23, 24)

¹⁶ Shaba Yehova kukuhwera kumanya eki orikwenda. Omugabe Daudi akaba naamanya ngu Yehova naamumanya gye. N’ahabw’ekyo akashaba Yehova kumuhwera kumanya ekyabaire nikimureetera kwerarikirira. (Shoma Zaaburi 139:​1-4, 23, 24.) Naiwe, noobaasa kushaba Yehova kukuhwera kumanya ekirikukureetera kwehurira kubi n’oku orikubaasa kusingura enyehurira ezo. Noobaasa kwebuuza ebibuuzo nk’ebi: ‘Niki ekirikundeetera kwerarikirira? Ninkira kuta omutima aha nyehurira mbi omu mwanya gw’okuzeehuzya?

17. Ni nshonga ki ezi orikubaasa kweyegyesa eziraakuhwere kwehurira gye? (Reeba n’ekishushani.)

¹⁷ Yeyegyese ebirikuhikaana n’ebyetengo byawe. Noobaasa kwega aha mitwarize ya Yehova erikubaasa kukugasira omu mbeera yaawe. Nk’eky’okureeberaho, entumwa Paulo akagasirwa munonga ahabw’okuteekateeka aha kitambo n’okusaasira kwa Yehova. Naiwe noobaasa kukora nikyo kimwe. Koresa Akatabo k’Okucondooza ak’Abajurizi ba Yehova, Watch Tower Publications Index, nari ebindi ebirikushoboorora Baibuli, byaba biriho omu rurimi rwawe. Waatunga ebicweka ebirikubaasa kukuhwera, bihandiikye aha rupapura reero orute ahu orikubaasa kurureeba, kandi oyegye ebicweka ebi ohandiikire waatandika kwehurira kubi. Teeraho kugyendera aha bi orikwega kuhikaana n’embeera yaawe.—Fil. 4:8.

18. Ni ntebeekanisa ki ez’okweyegyesa ezibaasize kuhwera Abakristaayo abamwe?

¹⁸ Eliza owaaba yaagambirweho akacwamu kwega ebirikukwata ahari Yobu. Naagira ati: “Embeera yangye neeshushana n’eya Yobu. Yobu akahikwaho oburemeezi bukurataine. Kwonka n’obu araabe yaabaire ari omu mbeera egyo egumire kandi atarikumanya ahabw’enki arikubonabona, tararekyeire aho kwesiga Yehova.” (Yob. 42:​1-6) Diane, owaaba yaagambirweho naagira ati: “Nyowe na ibanyi twine entebeekanisa y’okweyegyesa ekitabo Draw Close to Jehovah. Nitusiima Yehova ahabw’okutubumba nk’oku omubumbi arikunogoora eibumba. Omu mwanya gw’okuta omutima aha ku turikwehurira kubi, nituteeraho kuteekateeka aha ku Yehova arikutubumba, kandi akatuhwera kwongyera kuba abantu barungi. Ekyo nikituhiga kwongyera kumwirira haihi.”—Isa. 64:8.

YOREKYERERA EBIRO BY’OMUMAISHO OINE OBWESIGYE

19. Obumwe nitubaasa kwehurira tuta, kandi niki eki twineho obuhame?

¹⁹ N’obu twakuba twine entebeekanisa nungi y’eby’omwoyo kandi turikwegyesa ebirikuhikaana n’ebyetengo byaitu, okwehurira kubi n’ebiteekateeko bibi tibirikubaasa kurugiraho kimwe. Obumwe haine obu turaayehurire nk’enshoberwa! Kwonka ahabw’obuhwezi bwa Yehova, nitubaasa kutuubya enyehurira mbi buri murundi ogu turikuzigira. Nitubaasa kugira obwesigye ngu obwire obwingi nitwija kuguma n’omuntu w’omunda oshemeire, kandi tugumizemu twine okushemererwa omu kuheereza Yehova.

20. Omariirire kukora ki?

²⁰ Ka tumaririire kutasingurwa enyehurira mbi ezirikureetwaho ebi twakozire enyima, oburemeezi bwaitu n’obutahikiirira bwaitu. Ahabw’obuhwezi bwa Yehova nitubaasa kuguma nitutegyeka enyehurira zitahikire. (Zab. 143:10) Twiniire ekihika ebiro by’omumaisho obu tutaraije kugaruka kuteganisibwa enyehurira mbi. Kureka, nitwija kuguma nitwimuka buri kasheeshe tutaine kirikutwerarikiriza, tushemereirwe ahabw’okuheereza Ruhanga wa rukundo, Yehova!