EMINYEETO NIBABUUZA

Nshemereire Kubatizibwa?—Ekicweka 1: Eki Okubatizibwa Kirikumanyisa

Buri mwaka, eminyeeto abaingi abakuziibwe nk’Abajurizi ba Yehova nibabatizibwa. Nooteekateeka kuhika aha kubatizibwa? Kyaba nikwo kiri, oine kubanza waamanya okwehayo n’okubatizibwa nibimanyisa ki.

Okubatizibwa nikimanyisa ki?

Okubatizibwa okurikugambwaho omu Baibuli nikutwariramu okwibikwa omu maizi, beitu kutari kushukwaho otwizi. Kandi kwine eki kurikujwekyera.

Okwibikwa omu maizi aha kubatizibwa nikyoreka muranga ngu torikwija kucwamu kukora ebi orikwenda byonka.
Ku ori kuruga omu maizi nooyoreka ngu waatandika orugyendo rusya orw’okukora ebirikushemeza Ruhanga.

Ku orikubatizibwa nooyoreka muranga ngu noikiriza ku Yehova niwe aine obushoboorozi bw’okutaho emitindo y’ekihikire n’ekigwire, kandi nooyoreka omu butongore okuraganisa kwawe okw’okukora ebi arikwenda oyekundiire.

Eky’okuteekateekaho: Niki ekiine kukureetera kwenda kworeka muranga ngu oyehaireyo kworobera Yehova? Reeba 1 Yohaana 4:19 na Okushuuruurwa 4:11.

Okwehayo nikimanyisa ki?

Otakabatiziibwe, oine kwehayo ahari Yehova omu mubonano. Ota shi?

Omu kushaba, noogambira Yehova ngu nooraganisa kumuheereza ebiro byona, kandi ngu noija kukora ebi arikwenda n’obu haakubaho ki, nari n’obu abandi baakukuremesa.

Okubatizibwa nikworeka muranga ngu oyehaireyo omu mubonano. Nooyoreka abandi ngu toriho ahabwawe kureka ahabwa Yehova.—Matayo 16:24.

Eky’okuteekateekaho: Ahabw’enki embeera zaawe nizeeyongyera kuba nungi waayehayo ahari Yehova? Reeba Isaaya 48:17, 18 na Abaheburaayo 11:6.

Ahabw’enki ni kikuru kubatizibwa?

Yesu akooreka ngu abakuratsi be boona baine kubatizibwa. (Matayo 28:19, 20) N’ahabw’ekyo, Abakristaayo baine kubatizibwa. Kandi, Baibuli neegira ngu okubatizibwa nikwetengyesa kubaasa kujunwa.—1 Petero 3:21.

Kwonka, ekiine kukuhiga kwenda kubatizibwa ni rukundo ei oiniire Yehova n’okwenda kumusiima. Emiteekateekyere yaawe eine kuba nk’ey’omuhandiiki wa zaaburi, owaahandiikire ati: ‘N’enki eki ndizimuurira [Yehova], ahabw’ebirungi bye byona ebi ankoreire? . . . Niinyija kutakira eiziina rya [Yehova]. Mpikiirize ebi naahigire ahari [Yehova].’—Zaaburi 116:12-14.

Eky’okuteekateekaho: Yehova akukoreire birungi ki, kandi noobaasa kumugarurira ki? Reeba Eky’ebiragiro 10:12, 13 na Abarooma 12:1.

Ebishuba hamwe n’amazima

EKISHUBA — Abakuru nibo bonka abarikuba bakuzire omu by’omwoyo kubaasa kubatizibwa.

AMAZIMA — Okukura omu by’omwoyo tikurikurugiirira aha myaka ei omuntu aine, kureka ahari rukundo ei ainiire Yehova n’okwenda kumworobera. Yosefu, Samueli na Yosia baakoreka ngu bakuzire omu by’omwoyo bakiri bato. Kandi, abato abarikukira obwingi obunaku obu nibakora nikyo kimwe.

Baibuli neegira eti: “Omwana amanyirwa aha bi arikukora, omurimo gwe gwaba gushemeire, kandi guhikire.”—Enfumu 20:11.

EKISHUBA — Banywani baawe baabatizibwa, naiwe oine kukora nikyo kimwe.

AMAZIMA — Omuntu aine kucwamu ayekundiire kwehayo kandi akabatizibwa. Ti kintu ekiteerairweho obunaku obu kiine kukorwa, nari kukikora ahabw’okugira ngu abandi bakikozire nari nibateekateeka ngu aine kukikora.

Baibuli neegira eti: ‘Abantu ba [Ruhanga] nibaija kwehayo beekundiire.’—Zaaburi 110:3.

EKISHUBA — Waaba otabatiziibwe, torikujunaanwa ahabw’ebikorwa byawe.

AMAZIMA — Nootandika kujunaanwa omu maisho ga Yehova ahabw’ebikorwa byawe, waamanya ekihikire n’ekigwire, beitu ti bwanyima y’okubatizibwa.

Baibuli neegira eti: “Omuntu orikumanya kukora ebirungi, atabikora, ahariwe kiba kibi.”—Yakobo 4:17

AKAKORYO: Waaba nootiina obujunaanizibwa bw’okuba Omukristaayo obatiziibwe, taho oburyo bw’okusingura okutiina kwawe. Ekyo noobaasa kukikora orikushoma Eshuura 37 ey’akatabo Questions Young People Ask—Answers That Work, aka 2.