EMINYEETO NIBABUUZA
Baibuli Neebaasa Kumpwera Eta?—Ekicweka 2: Reetera Okushoma Baibuli Kuba Okurikushemeza
“Okushoma Baibuli nikubaasa kukutama, waaba otarikumanya omuringo murungi gw’okugishoma, ” nikwo omunyeeto orikwetwa Will arikugira.
Nooyenda kumanya oku orikubaasa kukunda kushoma Baibuli? Ekicweka eki ninza kukuhwera.
Reetera Ebyahandiikirwe kuba ebyabuzima
Yete omu mbeera y’abu orikushomaho. Noobaasa kukikora oti:
Toorana eby’omu Baibuli ebi orikwenda kwega. Toorana ekyabaireho omu Baibuli nari ekiri omu Ngiri, nari kukuratira ebya Baibuli ebirikushomwa nk’omuzaano ebiri aha jw.org.
Shoma eby’omu Baibuli ebyo. Noobaasa kweshomera wenka, nari omu iraka ririkuhurirwa ori n’abanywani nari ab’eka yaawe. Omwe naabaasa kukora nk’omugambirizi reero abandi bashome eby’abandi omu Baibuli.
Gyendera ahari bumwe aha buhabuzi obu:
Teera ebishushani kworeka ebyabaireho. Nari teera otushushani tukye kworeka okukuratana kw’ebintu ebimwe. Handiikaho obugambo kushoboorora ekiriyo nikibaho.
Teera orukaanga. Nk’eky’okureeberaho, waaba nooshoma aha muheereza wa Ruhanga omwesigwa, hikaanisa emitwarize ye n’ebikorwa bye n’emigisha ei yaatungire.
Ou orikushomaho mwihemu ekitebyo. Ekitebyo ekyo kigambeho omu miringo etari emwe n’emwe, kandi buuza abari omu kitebyo ekyo na baakareebi.
Abu orikushomaho baaba baacwiremu kubi, yeshushanirize ekyabaire nikiija kurugamu kuri baacwiremu okundi. Nk’eky’okureeberaho, teekateeka ahari Petero arikwehakana Yesu. (Mako 14:66-72) Entumwa Petero akaba naabaasa kukora ki kusingura okugyemeserezibwa?
Kyaba nikibaasika handiika omuzaano ogurikukwata aha bi orikushoma. Twariramu n’amashomo agu orikubaasa kwega omu bi waashoma.—Abarooma 15:4.
Noobaasa kureetera Baibuli kuba eyaabuzima!
Condooza!
Waayetegyereza gye obushonshorekye oburimu, noobaasa kujumbura eby’omuhendo bingi. Omu Baibuli, obumwe ekigambo kimwe nari bibiri nibaba biri bikuru munonga.
Nk’eky’okureeberaho, gyeragyeranisa Matayo 28:7 na Mako 16:7.
Ahabw’enki Mako yaagizire ngu Yesu juba akaba naija kweyoreka abeegi “na Petero”?
Ekirikubaasa kukuhwera: Mako akaba atari kareebi naabaasa kuba yaagambiirwe Petero.
Eby’omuhendo ekisherekirwe: Ahabw’enki Petero arikubaasa kuba yaagarukire omutima omunda ku yaahuriire ngu Yesu naayenda kugaruka kumureeba? (Mako 14:66-72) Yesu akooreka ata ngu ni munywani wa Petero owaabuzima? Noobaasa kutooreza ota Yesu omu kunywana abandi?
Waashoma ebyahandiikirwe orikuteeraho kucondooza kumanya obushonshorekye, okushoma Baibuli nikwija kuba okurikushemeza!