Ebi Sulemaani yaagambire nibyoreka ekirikubaasa kuba aha muheereza wa Yehova weena. Naabaasa kukora ekibi ky’amaani kandi bwanyima ateekateekye ngu buri kimwe kyabaho “ahonaaho.” Nari naabaasa kugira ngu, “kyabaho bubaho.” Kwonka yaateekateeka aha byabaho, naabaasa kwetegyereza ngu haine ebi acwiremu omu muringo gutari gw’obwengye ebimureeteire kugwa omu kwohibwa. Ebi acwiremu nibibaasa kuba nibitwariramu okuba n’abanywani babi, eby’okweshemeza ebitashemeire nari okuba butunu omu myanya etahikire nari aha mukura. Obundi naabaasa kuba abaire arekiire aho kushaba, kushoma Baibuli, kuza omu nteerane, n’okubuurira. Nk’omutsigazi orikugambwaho omu Enfumu, ekibi kye nikibaasa kuba kitabaireho “ahonaaho.” Eky’okwega? Twine kwetantara ekibi n’ebirikubaasa kutureetera kukikora. Sulemaani akashoboorora gye nshonga egi.—Mat. 5:​29, 30. w24.07 16 ¶10-11

Obutungi obwo niki? N’omurimo gw’okujuna amagara ogw’okubuurira obutumwa bw’Obukama. (2 Kor. 4:1) Enyabya z’eibumba niki? Nizijwekyera abaheereza ba Ruhanga, abarikutwarira abandi amakuru marungi. Omu bwire bwa Paulo, abashuubuzi bakaba nibakoresa enyabya z’eibumba kutwariramu ebintu by’omuhendo, nk’eby’okurya, viinyo, n’esente. Nikyo kimwe, Yehova atukwatsize obutumwa bw’omuhendo nigo makuru marungi. Ahabw’okuhwerwa Yehova, twine amaani agarikwetengyesa kugumizamu nitubuurira. Obumwe, nitubaasa kutiina abantu nari tutiine kwangwa. Nitubaasa kusingura tuta oburemeezi obwo? Teekateeka aha ki entumwa baakozire obu baaragiirwa kutagaruka kubuurira. Omu mwanya gw’okutiina, bakashaba Yehova kubahwera kugumizamu nibagambisa obumanzi. Kandi akagarukamu okushaba kwabo ahonaaho. (Byak. 4:​18, 29, 31) Obumwe waatiina abantu, shaba Yehova kukuhwera kusingura okutiina abantu ahabwa rukundo ei obainiire. w24.04 16 ¶8-9

Rukundo ei twiniire Yehova neetuhiga kweza eiziina rye. Nitwenda kugira eki twakora kwihaho ekijumo eki Sitaane arikuta aha iziina rye arikumugambaho ebishuba. (Kut. 3:​1-5; Yob. 2:4; Yoh. 8:44) Omu buheereza bwaitu, twine ekihika ky’okujuririra Ruhanga waitu, turikugambira boona abarikuhurikiza amazima agarikumukwataho. Nitwenda buri omwe amanye ngu omutwarize gwe omukuru ni rukundo, kandi omuringo ogu arikutegyekamu guhikire, n’ogw’oburingaaniza, kandi ngu Obukama bwe buri hakye kumariraho kimwe okubonabona, bukareetaho obusingye n’okushemererwa omu bantu. (Zab. 37:​10, 11, 29; 1 Yoh. 4:8) Twajuririra Yehova turikubuurira, nitweza eiziina rye. Kandi twine okumarwa ahabw’okumanya ngu nitukora ebirikuhikaana n’eiziina eri turikwetererwa. w24.05 18 ¶12