“Ruhanga Orikwesigwa” Butoosha Naahikiiriza ebi Arikuraganisa

1. Kurugiirira ahari Zaaburi 31:​2-5, ahabw’enki nitubaasa kuta obwesigye bwaitu omuri Yehova?

NITUTUURA omu nsi erikutegyekwa Sitaane, kandi eijwiremu ebishuba n’okureebyana. Nikibaasa kutugumira kumanya ou turikubaasa kwesiga. Ab’eby’obushuubuzi nibaiba bagyenzi baabo. Abarikuranga ebirango eby’ebi barikuguza nibagamba ebishuba kugira ngu abantu babigure. Kandi abantu abamwe bashangire ngu tibarikubaasa kwesiga ebi banywani baabo barikuraganisa. Kwonka, nikitushemeza kumanya ngu butoosha nitubaasa kuta obwesigye bwaitu omuri Yehova n’ebi arikuraganisa! Ni “Ruhanga orikwesigwa.” (Shoma Zaaburi 31:​2-5.) N’ahabw’ekyo nitubaasa kwesiga Yehova, ahakuba buri kimwe eki arikugamba nigaba gari amazima.

2. Nituza kugamba ahari ki omu kicweka eki?

² Omu kicweka eki nituza kubanza kugamba aha nshonga ezimwe ahabw’enki nitubaasa kwesiga Yehova n’omutima gwaitu gwona. Bwanyima nituza kureeba oku Ruhanga orikwesigwa araacwekyereze ensi ya Sitaane n’eki ariyo naakora hati kuhikiiriza ekigyendererwa kye. Ekicweka eki nikiza kutuhwera kuba emanzi twaba nitujuririra Yehova.

ENSHONGA EZIRIKUTUREETERA KWESIGA YEHOVA

3. Ahabw’enki nitubaasa kwesigira kimwe Yehova?

³ Nitubaasa kwesiga Yehova ahabw’okuba niwe Muhangi. Niwe yaahangire iguru n’ensi kandi niwe Bukomooko bw’amagara. (Kut. 1:1; Zab. 36:9; Kush. 4:11) Akatebeekanisa ensi kugira ngu ebemu buri kimwe eki turikwetenga kuguma twine amagara nk’omwoya ogu turikwitsya n’amaizi ebitarikuhwaho. Kandi niwe aine obushoboorozi obutaine bugarukiro aha bihangirwe byona. N’ahabw’ekyo nitubaasa kumwesigira kimwe, kandi tute amagara gaitu n’amatsiko gaitu ahansi y’obushoboorozi bwe ahakuba aine obwengye n’amaani ebitaine bugarukiro.

4. Nitumanya tuta ngu Yehova naatukunda?

⁴ Nitubaasa kwesiga Yehova ahabw’okuba naatukunda. Yehova akahanga abantu ahakuba akaba naayenda kubagana nabo ekiconco kirungi eky’amagara. Akooreka ekigyendererwa kye obu yaagamba ebigambo ebi: “Ka tuhangye omuntu omu muringo gwaitu ashushane naitwe.” (Kut. 1:26) Akatuha n’obugabe bw’okwecweramu. Akahanga ensi erikureebeka gye kugira ngu tugyesiimiremu. (Zab. 115:16) Kandi, akaha abazaire baitu ab’okubanza obujunaanizibwa bw’omuhendo obw’okuhindura ensi yoona paradiso. (Kut. 1:28; 2:15) Akabaha ebintu byona eby’omuhendo ebi yaahangire omu nsi nk’eby’okurya birungi, ebimera n’enyamaishwa. Buzima ebi byona nibihamya ngu ‘[rukundo ya Yehova etarikuhinduka] eguma aha barikumutiina okwiha iranaira.’—Zab. 103:17.

5. (a) Yehova akahamira ata aha ki yaabaire agambire n’obu Sitaane araabe yaareetaire Adamu na Haawa kugoma? (b) Ni biraganiso ki ebimwe ebi Yehova yaaherize kuhikiiriza? (Reeba akabokusi “Butoosha Ruhanga Naagamba Amazima.”)

⁵ Nitubaasa kwesiga Yehova ahabw’okuba butoosha naahamira aha bi arikugamba. Yehova “tarahangire [ensi] etari mu buteeka, kureka akagihanga kutuurwamu.” (Isa. 45:​18, 19) Adamu na Haawa ku baagomire, bakacwerwa orubanja rw’okufa. N’ahabw’ekyo okaba nooshusha ngu ekigyendererwa eki Ruhanga yaabaire ainiire ensi n’abantu tikiraije kuhikiirira. Kwonka Yehova naahikiiriza ebi arikuba araganiise. (Isa. 46:​10, 11) Ekigyendererwa kye eky’okwijuza ensi abantu abahikiriire tikirahindukire. Egyo niyo nshonga ahabw’enki yaikiriize Adamu na Haawa kuzaara abaana. Kandi, akahayo Omwana we omwe nyamunegyere nk’ekitambo kubaasa kujuna baijukuru ba Adamu n’okubaha amatsiko g’okutuuraho ebiro byona.—Yoh. 3:16.

RUHANGA ORIKWESIGWA NAHIKIIRIZA EKIGYENDERERWA KYE

6. Yehova akaraganisa ki bwanyima y’obugomi obwabaireho omuri Edeni?

⁶ Owaareeteire Adamu na Haawa kugomera Ruhanga ‘n’ekijoka ekihango ekya ira, ekirikwetwa Omuregi kandi Sitaane.’a (Kush. 12:9; Kut. 3:​4, 5; Yoh. 8:44) Yehova akacwera Sitaane orubanja rw’okwija kucwekyerezibwa. (Kut. 3:15) Ekyo kitakabaireho, baingi bakaba nibaija kumushagika kandi batwaze nkawe. Kwonka, abandi bakaba nibaija kuguma bahamiire ahari Yehova.

7. Ni baahi abarikukuratira Omuregi, kandi muheru yaabo neija kuba eha?

⁷ Abarikukuratira Sitaane ni baamaraika abagomi hamwe n’abantu. Ahabw’okugira ngu nibahakanisa ekigyendererwa kya Ruhanga, bahindukire oruzaaro rwa Sitaane. Kwonka omu bwire obu Ruhanga ataireho, Sitaane n’abarikumukuratira nibaija kucwekyerezibwa.—Dan. 2:44; Rom. 16:20.

8. Yesu akakora ki omuri 1914? (Reeba n’ebishushani.)

⁸ Ni buhame ki oburikutuhamiza ngu ekigyendererwa kya Ruhanga eky’okucwekyereza Sitaane n’abashagiki be nikiija kuhikiirira? Omuri 1914, Yesu akatandika kurwanisa Sitaane Omuregi na baadaimoni be kandi yaabanaga omu nsi. (Kush. 12:​7-9) N’obu orutaro orwo ruraabe rwabaireho omu iguru, ebyarurugiremu bibaasize kukwata aha bantu boona omu nsi. Baibuli neegira eti: ‘Kwonka iwe ensi, naiwe enyanja, nimwija kureeba enaku ahabw’okuba Omuregi yaabaizira n’ekiniga kingi, ahakuba naamanya ku aine omwanya mukye.’ (Kush. 12:12) Kuruga omuri 1914, Sitaane atwire naateeraho kureetera abantu kumukuratira, n’ekirugiremu embeera zongyeire kusiisikara omu nsi yoona. Buzima, ‘ensi ereebire enaku’! Kwonka omu bwire butari bwa hare, Yesu naija, “kusingurira kimwe” kandi Sitaane n’abarikumushagika nibaija kucwekyererezibwa kimwe. (Kush. 6:2) Yesu naija kweza eiziina rya Yehova, kandi tiririgaruka kushiishwa bundi. (Zab. 45:​4-6) Buri omwe naija kumanya ngu Yehova ni Ruhanga orikwesigwa!—Ezk. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

RUHANGA ORIKWESIGWA NAARUNDAANA BOONA ABARIKUKUNDA AMAZIMA

9. Ni baahi abu Yehova ariyo naarundaana obunaku obu?

⁹ Obunaku obu, Yehova ariyo naarundaana ‘byona omuri [Kristo], eby’omu iguru n’eby’omu nsi.’ (Efe. 1:10) “Eby’omu iguru” n’entoore abu Yehova atooraine kuza kutegyeka na Kristo omu iguru. “Eby’omu nsi” n’abaraatuureho ebiro byona omuri paradiso omu nsi. Abaheereza ba Yehova abo bombi nibeejumba omu kusheeshuura ebishuba bya Sitaane n’okuhwera ab’emitima eshemeire kumanya amazima agarikukwata ahari Yehova.

10. Yehova ariyo naahwera ata abantu kuruga omu diini z’ebishuba? (Okushuuruurwa 14:​6, 7)

¹⁰ Yehova ariyo naakoresa omurimo gw’okubuurira ogurikukirayo obuhango ogurabaireho omu nsi yoona kurundaana abantu abarikukunda amazima. (Shoma Okushuuruurwa 14:​6, 7.) N’obu araabe naakoresa abantu kugambira bagyenzi baabo amakuru marungi, na baamaraika nibeejumba omu kurundaana abantu ab’emitima eshemeire kubareeta omu kibiina Ekikristaayo. Okubuurira oku kuriyo nikusheeshuura ebishuba bya Babulooni Orukuru orurikujwekyera ediini zoona ez’ebishuba ezi Sitaane akoreise kujanjaaza ebishuba ahari Yehova kumara emyaka mingi. (Kush. 18:​2, 4) Amadiini goona ag’ebishuba gari haihi kucwekyererezibwa kimwe, kandi boona abarikukunda Ruhanga orikwesigwa nibaija kumuha ekitiinisa ekimushemereire.—Kush. 17:16.

11. Nitubaasa kumanya tuta abaheereza ba Yehova ab’amazima?

¹¹ Abarikukunda amazima nibaruga omu mahanga gatarikushushana, kandi bakuriire omu mbeera zitarikushushana. (Kush. 7:​9, 10) Ku bahuriire amakuru marungi, bakeetegyereza ngu baboine amazima kandi bayegaita aha baheereza ba Yehova. (Mak. 13:10) Obunaku obu, abarikuramya Ruhanga omu muringo oguhikire n’abatarikumuheereza nibareebwa butunu. Nabi Malaki akagira ati: ‘Nimwija kugaruka mumanye kutaanisa abahikiriire n’ababi, abarikukorera Ruhanga n’abatarikukorera Ruhanga.’ (Mal. 3:18) Abaheereza ba Yehova nibooreka ngu nibaheereza Ruhanga orikwesigwa kurabira omu kubuurira n’omu bi barikukora.

12. Omurimo gw’okubuurira niguhwera guta omu kuhikiiriza ekigyendererwa kya Yehova?

¹² Ku turikubuurira ‘amakuru marungi g’Obukama’ nituba nitworobera Yesu, kandi turikuhikiiriza obunabi. (Mat. 24:14; 28:​18-20) N’ekirugiremu, abantu baingi kuruga omu nsi yoona bariyo nibahinduka abeegi ba Kristo, kandi baine ekihika ky’okuramya Ruhanga orikwesigwa ebiro byona. Ka n’omugisha gw’amaani kureeba Yehova naatukoresa kuhikiiriza ekigyendererwa kye!

YOREKYERERA EBIRO BY’OMUMAISHO OINE OBWESIGYE

13. Sitaane naateeraho kuhiiganisa baahi, kandi ahabw’enki?

¹³ Sitaane Omuregi aine ekiniga kingi ahabw’okuba naamanya ngu “aine omwanya mukye” ensi ye ekacwekyerezibwa. (Kush. 12:​12, 13) Naateeraho kuhiiganisa abarikujwekyera Obukama bwa Ruhanga omu nsi ‘abarikworobera ebiragiro bya Ruhanga, bakahamya ebya Yesu.’ (Kush. 12:17; 14:12) Kandi Sitaane naahiiganisa na buri omwe orikushagika entoore n’omurimo ogu barikukora.

14. Niki ekiraabeho Sitaane ku araataahirire abaheereza ba Yehova? (Reeba n’ekishushani.)

¹⁴ Bwanyima y’okucwekyerera kwa Babulooni Orukuru, abashagiki ba Sitaane nibaija kuteeraho kutaahirira abaheereza ba Yehova kwenda kubacwekyereza. Okutaahirira okwo nikwija kuba entandikiro y’orutaro rwa Haramagedoni. (Kush. 16:​13, 14, 16) Yesu hamwe na ihe ry’omu iguru nibaija kujuna abaheereza ba Yehova, kandi nibaija kucwekyereza buri kintu ekiine akakwate na Sitaane ekiraabe kitsigaireho. (Kush. 19:​19-21) Tiharikwija kugaruka kubaho abantu babi n’ebishuba. (Kush. 21:8) Buri omwe naija kuhamya ngu butoosha Yehova naakora ebihikire kandi naagamba amazima.

15. Ahabw’enki nitubaasa kugira obwesigye ngu Yehova naija kuhikiiriza ebi araganiise? (Isaaya 65:​16, 17) (Reeba n’ekishushani.)

¹⁵ Obunaku obu, abantu beebaganiisemu kukira obundi bwona. Kwonka abaheereza ba Yehova nibagumizamu kukwatanisa ahabw’obuhwezi bwe. Kandi omurimo gw’okurundaana abarikukunda amazima guriyo nigugyenda omumaisho. Tihaine ekirikubaasa kuremesa Yehova kuha abaheereza be omugisha n’omurimo ogu bariyo nibakora. (Shoma Isaaya 65:​16, 17.) N’ahabw’ekyo nitubaasa kugira obwesigye ngu ebi arikuraganisa nibiza kuhikiirira. Ebigambo ebi entumwa Paulo yaahandikire ebiri omu Abarooma 8:​38, 39 nibituhamiza biti: “Okufa, n’obu gaakuba amagara, nari baamaraika, nari abarikutegyeka, nari ebiriho, nari ebiribaho, nari ab’obushoboorozi, nari oburaingwa obwa bwemi nari oburaingwa obw’okuzimu, n’obu kyakuba ekindi kintu kyona ekihangirwe tihaine kiribaasa kututaanisa n’okukunda kwa Ruhanga okuri omuri Kristo Yesu Mukama waitu.”

16. Ahabw’enki nooyesiga Yehova n’omutima gwawe gwona?

¹⁶ Twine enshonga nungi ezirikutureetera kwesiga Yehova Ruhanga orikwesigwa. Niwe Muhangi waitu, kandi naatukunda munonga. Ab’omutwe omuhango nibeeyongyera kukanya ahabw’okuba abantu kuruga omu mahanga goona nibaija omu kuramya okw’amazima. (Isa. 60:22; Zek. 8:23) Nitumanya ngu butoosha Yehova naahikiiriza ekigyendererwa kye, kandi omu bwire butari bwa hare naija kucwekyereza Sitaane n’ebishuba bye. Nitushaba nk’oku Daudi yaashabire arikugira ati: “[Yehova] asiimwe, niwe . . . wenka akora eby’okutangaaza. Eiziina rye ery’ekitiinisa risiimwe ebiro byona, ekitiinisa kye kiijure ensi yoona.”—Zab. 72:​18, 19.