Gira Emiteekateekyere Ehikire aha Buremeezi Bwawe

1-2. Twine kukora ki kubaasa kwemera oburemeezi oburikutuhikaho? (Reeba n’ekishushani.)

ORIYO noohikwaho obutari buringaaniza, okuhakanisibwa ab’eka yaawe nari okuhiiganisibwa ahabw’okwikiriza kwawe? Noogumisiririza amagara mabi nari emyaka ya bukuru? Nari ogweriirwe akagwe obundi nk’okufeerwa omukundwa waawe? Nka baingi aha baheereza ba Yehova ab’omuhendo, amagara gaawe nigabaasa kuba gaijwire ‘okufa kubi n’enaku.’—Zab. 90:10.

² Kubaasa kwemera oburemeezi bwaitu, twine kubureeba omu muringo oguhikire. Ekyo nikitwariramu ki? Nitubaasa kukishoboorora omu muringo ogu: Oburemeezi obu orikurabamu ni nk’ebisiriko ebi orikubugana omu muhanda waaba noovuga emotoka. Noobaasa kuvuga orikutoora aha gwa buryo nari bumosho, otuubye aha kwiruka nari oyemereze emotoka kurugiirira aha kisiriko. Kwonka kubaasa kukora ekihikire omu mbeera egyo, oine kureeba gye ekisiriko. Ekirahuri ky’emotoka kyaba kiiragwire nari kiriho ebyondo, torikubaasa kureeba gye ekisiriko. Nikyo kimwe, kubaasa kugumisiririza oburemeezi oburikutuhikaho, twine kubareeba nk’oku Yehova arikubureeba. Omu kicweka eki nituza kureeba (1) oku turikubaasa kureeba oburemeezi nk’oku Yehova arikubureeba, (2) oku emiteekateekyere etahikire aha buremeezi bwaitu kirikubaasa kutuhitsyaho akabi, kandi (3) ebi turikubaasa kukora kuguma twine emiteekateekyere ehikire twahikwaho oburemeezi.

OKUREEBA OBUREMEEZI OMU MURINGO OGUHIKIRE

3. Niki eki twine kuguma nitwijuka twaba tukiri omu nsi ya Sitaane egi?

³ Titurikubaasa kwetantara oburemeezi omu nsi ya Sitaane egi. Ahabw’okugira ngu tituhikiriire, kandi Sitaane niwe ariyo naategyeka ensi, oburemeezi nibwija kuhika ahari buri muntu weena. Ekindi, emperu y’ensi egi yaaguma neyirira haihi, nitwija kwongyera kuhikwaho oburemeezi oburikukira aha bu twine hati, oburaareetweho abantu ababi nari ebihikiirizi. (Mat. 24:8; 2 Tim. 3:13) Ku ogire ngu Yehova naamaraho oburemeezi bwona obu twine hati, naaba ari nk’orikuhwera Sitaane kutegyeka ensi egi. N’ahabw’ekyo nitwija kuguma nituhikwaho oburemeezi Sitaane yaaba akiri omutegyeki w’ensi egi.—Mub. 9:12.

4. Ni buremeezi ki obundi oburikuhika aha Bakristaayo?

⁴ Abakristaayo nibahikwaho oburemeezi obundi. Yesu akagambira abeegi be emirundi mingi ngu bakaba nibaija kuhiiganisibwa ahabw’okwikiriza kwabo. (Mat. 24:9; Yoh. 16:2) Okumanya ekyo nikituhwera kuguma twine okwikiriza kuhami twahiiganisibwa. (1 Tes. 3:​3, 4) Kandi twagumisiriza oburemeezi ahabw’okwikiriza nitubaasa kugira obwesigye ngu tukiri omu muhanda ogurikuhitsya omu magara agatahwaho. Ekindi, nitworeka orubaju oru turiho aha nshonga enkuru eri ahagati ya Yehova na Sitaane. Kimwe aha bishuba bya Sitaane n’okugira ngu abantu tibarikuheereza Yehova ahabw’okumukunda kureka ahabw’ebirungi ebi arikubaha. Ahabw’okwenda kushagika ekishuba kye, naateeraho kuhiiganisa abaheereza ba Yehova n’okubahitsyaho oburemeezi. (Yob. 1:​9-11) Kwonka nitureetera Yehova kushemererwa twagumisiriza oburemeezi, ahabwa rukundo ei tumwiniire.—Enf. 27:11.

5. Nitubaasa kwegyera ki omu Omubuurizi 7:​13, 14? (Reeba n’ebishushani.)

⁵ Yehova naikiriza oburemeezi kubaho. Yehova tarikubaasa kukora kubi nari kutugyeza arikukoresa ebintu bibi. (Yak. 1:13) Kwonka, Omugabe Sulemaani akahandiika ngu “izooba ry’akabi” nagwo ‘n’omurimo gwa Ruhanga.’ (Shoma Omubuurizi 7:​13, 14.) Akaba atarikumanyisa ngu Yehova niwe arikureetera ebintu bibi kubaho kureka naabiikiriza bibaho. Sulemaani akaha obuhabuzi burungi oburikubaasa kutuhwera kugira emiteekateekyere ehikire twahikwaho oburemeezi. Eky’okubanza, twine kwebeera ab’amazima ngu turi abatahikiriire, kandi turi omu nsi ya Sitaane. N’ahabw’ekyo obumwe nitugira amazooba marungi n’amabi. Twagira “eizooba” rirungi, nitubaasa kusiima Ruhanga aha bw’oburungi bwe, kandi tureebe eizooba eryo nk’ekiconco kuruga ahariwe. Ekya kabiri, Sulemaani naatwijutsya ngu titurikubaasa ‘kumanya ebiraabeho,’ yaaba eizooba riraagire ebirungi nari oburemeezi. Kandi oburemeezi oburikubaho kitaraariire nibuhika aha abahikiriire n’abatahikiriire.

6. Ahabw’enki obumwe Yehova arikwikiriza oburemeezi kutuhikaho? (Abaheburaayo 12:​7, 11)

⁶ Twareeba oburemeezi bwaitu omu muringo oguhikire, nitwija kwetegyereza ngu Yehova ariyo naatwegyesa kumwesiga, beitu kutari kweyesiga. Butoosha Yehova naareeba oburemeezi obu turikurabamu, kandi naatufaho twaba nitubonabona. N’obu yaakutwikiriza kuraba “omu ruhanga rw’ekibunda,” naagumizamu kutwebembera, atuhamiza ngu naatukunda, kandi atuha amaani agu turikwetenga kugumisiriza. (Zab. 23:4) Oburemeezi oburikutuhikaho nibubaasa kutuhwera kumanya obweremwa bwaitu, n’okuboneza emitwarize yaitu ahabw’obuhwezi bwa Ruhanga. (Shoma Abaheburaayo 12:​7, 11.) Nk’eky’okureeberaho, Yobu akaba aine kwega kuba omucureezi. Yehova taraareeteire Yobu okubonabona, kwonka akaikiriza okubonabona kumuhikaho kandi yaakoresa embeera egyo kumwegyesa amashomo makuru. (Yob. 42:​1-6) Yaaba tuhikwaho mbeera ki, nitumanya ngu oburemeezi obu Yehova arikwikiriza kutuhikaho tiburikubaasa kutuhitsyaho akabi ak’obutwire. N’ahabw’ekyo ku turikugumisiriza okugyezibwa, “nitusingura nangwa n’okukiraho.”—Rom. 8:​35-39.

7. Ahabw’enki orikubaasa kugira okushemererwa n’obu waakuba noohiiganisibwa ahabw’okuheereza Yehova?

⁷ Nitubaasa kushemererwa twaba nituhiiganisibwa. Ku oraabe noohiiganisibwa ahabw’ebi orikwikiriza, otateekateeka ngu tokisiimwa Yehova. Omu mwanya gw’ekyo, nikyoreka ngu noosiimwa Yehova. (Mat. 5:​10-12) Waaguma n’emiteekateekyere mirungi, noija kushemererwa kandi ogume oine ekitiinisa waahiiganisibwa ahabw’okuba Omukristaayo, nk’oku entumwa baayehuriire. (Byak. 5:​40-42) Ekindi, noobaasa kuhwera abatari Bajurizi ba Yehova kwega amazima ‘n’okuhimbisa Ruhanga.’ (1 Pet. 2:12) Teekateeka ahari Yosefu. Yehova akamuhwera kandi yaamuha emigisha n’obu yaabaire akiri omu kihome. Naitwe naabaasa kutukorera nikyo kimwe twaba nituraba omu buremeezi.—Kut. 39:​3, 23.

8. Ni nshonga ki endiijo erikutuhiga kugumizamu nitugumisiriza oburemeezi?

⁸ Oburemeezi bwaitu nibwija kuhwaho. Ebyahikire ahari Yobu nibitwijutsya ngu oburemeezi bwaitu nibwija kuhendera. Nangwa, ‘[Yehova] akaha omugisha ebiro bya Yobu ebya bwanyima okukira eby’okubanza.’ (Yob. 42:12) Nikyo kimwe, Yehova naaraganisa kuha omugisha ebiro by’amagara gaitu “ebya bwanyima” obu turaije kutuuraho ebiro byona. Obwire obwo nibukirira kimwe emyaka mikye ei turikutuuraho omu nsi egi eijwiremu enaku. Buzima twine ekihika ky’okureeba Yehova naahikiiriza okuraganisa kwe. N’ahabw’ekyo, ka tugumizemu nitumuheereza omu bwesigwa kuhika aha muheru!—Mat. 24:13.

OKU EMITEEKATEEKYERE ETAHIKIRE ERIKUBAASA KUTUHITSYAHO AKABI

9. Okugira emiteekateekyere etahikire aha buremeezi bwaitu nikibaasa kutuhitsyaho kabi ki?

⁹ N’obu twakuba nituraba mu mbeera ki, twine kuguma nituzireeba omu muringo oguhikire kubaasa kwetantara kwehitsyaho obundi buremeezi. Nk’eky’okureeberaho, nitubaasa kuteekateeka ngu Yehova niwe arikutureetera oburemeezi. Kumara akaire, Yobu akateekateeka ngu Yehova niwe yaabaire amuhikizeho oburemeezi kandi emiteekateekyere mibi egyo ekamureetera kwenda kweyoreka ‘nk’ohikiriire okukira Ruhanga.’ (Yob. 32:2) Kandi na Naomi omu kubanza akacwera Yehova orubanja ahabw’oburemeezi obwamuhikireho. (Rus. 1:​13, 20, 21) Kuri noogira ngu Yobu na Naomi bakaguma baine emiteekateekyere egyo, bakaba nibaija kushiisha omukago gwabo na Yehova. (Enf. 19:3) Kwonka, Yehova akabahwera kugira emiteekateekyere mirungi aha buremeezi bwabo, kandi yaabaha emigisha ahabw’obwesigwa bwabo.

10. Twaba twine oburemeezi nitubaasa kutandika kuteekateeka ki?

¹⁰ N’obu twakuba nituhamiza kimwe ngu Yehova tiwe areetsireho oburemeezi bwaitu, nitubaasa kutandika kuteekateeka ngu takitufaho. Emiteekateekyere egyo etahikire neebaasa kutumaramu amaani. (Enf. 24:10) Omugabe Daudi na nabi Habakuuki bakahikwaho oburemeezi, kandi bombi obumwe bakeebuuza yaaba Yehova yaabaire naahurira okutaka kwabo. (Zab. 10:1; Hab. 1:2) Kwonka nabwo bakagumizamu nibashaba. Yehova akahurira okushaba kwabo, kandi yaabashagika. Naiwe naabaasa kukukorera nikyo kimwe.—Zab. 10:17.

11. Niki ekirikubaasa kutuhikaho twaremwa kugira emiteekateekyere ehikire aha buremeezi bwaitu?

¹¹ Twaba tutaine emiteekateekyere nk’eya Yehova, nitubaasa kuteekateeka ngu oburemeezi tiburatuhikeho, n’ahabw’ekyo nitubaasa kugira ekyekango bwatuhikaho. (1 Pet. 4:12) Abeegi ba Yesu bakagumirwa kwetegyereza ngu akaba naija kuhikwaho okuhiiganisibwa kw’amaani, kandi aitwe. (Luk. 18:​33, 34) N’obu araabe yaabagambiire butunu ebyabaire nibiza kumuhikaho, entumwa Petero akateekateeka ngu ekyo tikirikubaasa kubaho. Yesu akaba naamanya ngu yaikiriza emiteekateekyere ya Petero egyo, nikiija kumuremesa kuhikiiriza ekigyendererwa kya Ruhanga, n’ahabw’ekyo akamukabukira. (Mak. 8:​31-33) Kandi na bwanyima y’okufa kwa Yesu, abeegi be kikabatwarira obwire kwetegyereza ebyabaireho. Kwonka nabwo Yesu akagumizamu naabahwera. Ku yaagambire nabo bwanyima y’okuzooka, akabahwera kugira emiteekateekyere ehikire aha kubonabona okwamuhikireho ‘arikubashuuruurira Ebyahandiikirwe.’ (Luk. 24:​25-27, 32, 44-48) Okuteekateeka aha bi Yesu yaabeegyeise, kikaba nikiija kubahwera kwetebeekanisiza okuhiiganisibwa okwabaire nikwija kubahikaho nk’abakuratsi be. Naitwe twateekateeka aha mazima agari omu Byahandiikirwe nikibaasa kutuhwera kwetebeekanisiza oburemeezi.

12. Okugira emiteekateekyere etahikire aha mbeera yaitu nikibaasa kutureetera kwehurira tuta?

¹² Twagira emiteekateekyere etahikire aha buremeezi bwaitu, nitubaasa kubureeba nk’obw’amaani munonga. Nk’eky’okureeberaho abaheereza ba Yehova abamwe nibabaasa kuteekateeka ngu ti ky’oburingaaniza baaba bataikiriziibwe kuza omu buheereza obumwe nari bakaburugamu. Yesu akooreka oku ekyo kirikubaasa kubaho obu yaaha eky’okureeberaho eky’abakozi b’omu musiri gw’emizaabibu. Abakozi abamwe bakeetomboita ahabw’okuteekateeka ngu tibashashurwa omushara murungi. Kwonka mukama w’omusiri akagambira omwe aharibo ati: “Mugyenzi wangye, tiinyine ki naakushaagiza.” (Mat. 20:​10-13) Tibareetomboisire ahabw’okutwarizibwa omu muringo gutari gw’oburingaaniza, kureka bakaba baine amatsiko gatahikire ngu nibaza kushashurwa sente nyingi. Twine kwegyendesereza kugira ngu ekyo kitatubaho. Ni bintu ki ebi turikubaasa kukora kugira emiteekateekyere ehikire aha mbeera egumire?

EBI TURIKUBAASA KUKORA TWAHIKWAHO OBUREMEEZI

13. Niki ekirikubaasa kubaho waahikwaho oburemeezi?

¹³ Noobaasa kuba noomanya eki Baibuli erikugamba aha kubonabona. Obundi noobaasa kuba ogambiireho abandi ebyahandiikirwe kugira ngu bibahwere omu buremeezi bwabo. Kwonka waahikwaho oburemeezi nikibaasa kukugumira kugira emiteekateekyere ehikire. Nk’eky’okureeberaho, noobaasa kuteekateeka ngu Yehova ariyo naakufubira nari ngu takihurira kushaba kwawe. Mbwenu shi noobaasa kukora ki kuguma oine emiteekateekyere ehikire?

14. Noobaasa kushaba ahari ki waaba oine oburemeezi? (Abafilipi 4:13)

¹⁴ Shaba Yehova obuhwezi. Mugambire aha buremeezi bwawe n’oku burikukukwataho. Noobaasa kumugambira kyenyini eki orikwenda ngu akukorere. Noobaasa kumushaba omwoyo gwe ogurikwera kukuha amaani n’obwengye obu orikwetenga kugumisiriza. Kwonka ijuka ngu, Yehova naabaasa kugarukamu okushaba kwawe omu muringo ogu otarikuteekateeka. (Efe. 3:20) Naabaasa kukoresa baamaraika nari ab’eishe-emwe na banyaanyazi-itwe kukuha obuhwezi. (Zab. 34:7) N’ahabw’ekyo ikiriza obuhwezi bwa Yehova omu muringo gwona ogu araabukuhemu. Yehova n’efura omu kugaba omwoyo gwe, kandi nigubaasa kukuhwera kwemera oburemeezi n’obu bwakuba nibwingana ki.—Shoma Abafilipi 4:13.

15. Niki ekiraakuhwere kugumisiriza oburemeezi? (Reeba n’ekishushani.)

¹⁵ Guma oine entebeekanisa y’eby’omwoyo. Kora kyona eki orikubaasa kuguma oine entebeekanisa y’eby’omwoyo n’obu kyakuba kitoorobi kukikora nk’oku obaire nookikora enyima. Oine kuteeraho kugira emiteekateekyere nk’eya Yehova na munonga omu bwire ‘bw’enaku n’obusaasi.’ (Zab. 119:143) N’ahabw’ekyo gumizamu nooshoma Baibuli obutoosha, noogyeyegyesa, kandi ogiteekateekaho. Teeraho nk’oku orikubaasa kuza omu kubuurira, omu nteerane n’okuzeejumbamu. Guma haihi n’ab’eishe-emwe na banyaanyazi-itwe, kandi oyetantare okweshoroora aha bandi.—Enf. 18:1.

16. Noobaasa kubangaanisa ahari ki waatunga oburemeezi, kandi noobaasa kubusingura ota? (2 Abakorinso 10:​4, 5)

¹⁶ Singura okubangaanisa oku oine. Waahikwaho oburemeezi, nikibaasa kukwetengyesa ‘kusheenya ebigo’ nk’okusingura emiteekateekyere mibi ei oyeyineho, n’okubangaanisa ahari Yehova. (Shoma 2 Abakorinso 10:​4, 5.) Noobaasa kusingura okubangaanisa okwo waamanya emiteekateekyere ya Ruhanga orikweyegyesa Baibuli n’ebitabo by’ekibiina. Nk’eky’okureeberaho, noobangaanisa yaaba Yehova naakikusiima? Yega ebyahikire aha ntumwa Paulo. Omu buheereza bwe, akahikwaho oburemeezi bw’emiringo mingi. Kwonka omu mwanya gw’okumumaramu amaani, bukamuhamiza ngu n’omuheereza wa Kristo orikusiimwa. (2 Kor. 11:​23-27) Noobangaanisa yaaba Yehova yaakusaasiire ebibi byawe eby’enyima? Kyaba nikwo kiri, handiika ebyahandiikirwe ebirikworeka ngu Yehova naasaasira ebibi. (Isa. 43:25) Bwanyima, oshome ebyahandiikirwe ebyo kandi obiteekateekyeho. (Zab. 119:97) Mbwenu shi oburemeezi bukureeteire kubangaanisa yaaba Yehova naarinda abaheereza be abeesigwa? Condooza ahabw’enki Ruhanga naikiriza okubonabona kukabaho n’oku arikuturinda omu by’omwoyo n’obu haakubaho buremeezi ki. (Zab. 91:​9-12) Ekindi shoma ebirikukwata aha b’eishe-emwe na banyaanyazi-itwe ababaasize kugumisiriza oburemeezi.a

17. Twine kukora ki twahikwaho oburemeezi?

¹⁷ Oriyo nooshemerererwa eizooba rirungi eritarimu oburemeezi? Siima Yehova, kandi okorese buri kagisha kuteekateeka aha burungi bwe. (Mub. 7:14) Kwonka ku oraahikweho oburemeezi, guma obwineho emiteekateekyere ehikire, kandi ohamye obwesigye obu oine omuri Yehova. Waakora ekyo, Yehova naija kukuteeraho ‘oburyo bw’okuhunga, ngu obaase kubugumisiririza.’ (1 Kor. 10:13) Kandi shi ab’eishe-emwe na banyaanyazi-itwe abakundwa? Nitubaasa kubahwera tuta baahikwaho oburemeezi? Nituza kugamba aha nshonga egyo omu kicweka ekiraakurateho.