MEI 11-17, 2026
EKYESHONGORO 7 Yehova, Niiwe Maani Gaitu
Yesigye Omutegyeki w’Ebintu Byona
“Niiwe wenka orikwetwa Yehova, okira boona, kandi otegyeka ensi yoona.”—ZAB. 83:18.
ENSHONGA ENKURU
Oku turikubaasa kuhamya obwesigye bwaitu ngu Yehova n’Omutegyeki w’ebintu byona, kandi tukahamiza kimwe ngu naija kutuhwera kusingura oburemeezi obu turikurabamu hati n’oburaatuhikeho omu biro by’omumaisho.
1. Yobu akahikwaho buremeezi ki?
YOBU omushaija omwesigwa akafeerwa buri kimwe eki yaabaire aine, abaana be, ebintu bye, kandi yaarwara munonga. Ekindi, akafeerwa ekitiinisa kye. Kandi banywani be bakamugambira ebigambo ebirikumaramu amaani. Nangwa n’omukazi we akarengwa amaganya reero yaamugira ati: “Yehakane Ruhanga, ofe.” (Yob. 2:9; 15:4, 5; 19:1-3) Oburemeezi obwo bukaba nibubaasa kureetera Yobu kurekyera aho kwesiga Ruhanga ow’amazima n’okubangaanisa yaaba naabaasa kurinda abarikumukunda, kandi bakamuheereza.
2-3. Nitubaasa kutandika kwehurira tuta, kandi nituza kwega ki omu kitabo kya Yobu?
2 Naitwe obumwe nituhikwaho embeera zigumire ezirikugyeza obwesigye bwaitu omuri Yehova. Turi omu “biro by’akabi kaingi” ebigumire kwemera. (2 Tim. 3:1) Twahikwaho oburemeezi bukurataine, nitubaasa kurengwa amaganya tugumirwe kugumisiriza. Embeera nk’ezo zireetaire abamwe kwebuuza yaaba Yehova buzima naabafaho.
3 Ku oraabe orehuriireho otyo, otahwa amaani. Yobu akeetegyereza ngu Yehova naajuna abarikumuhamiraho. Naitwe nitubaasa kugira obwesigye nibwo bumwe omuri Tataitwe ow’omu iguru. Ekyo kubaasa kubaho, ka tushwijume ekitabo kya Yobu, kandi tureebe enshonga ibiri enkuru ezirikutuhamiza ngu: Eky’okubanza, Yehova niwe Mutegyeki w’ebintu byona. Ekya kabiri, Ruhanga waitu ow’Obushoboorozi bwona naabaasa kutegyeka ebirikubaho omu nsi kuhamya ngu ekigyendererwa kye kyahikiirira, kandi arinde abantu be kutahikwaho akabi k’obutwire omu by’omwoyo n’omu by’omubiri.
SITAANE YAABAIJAMU
4. Niki ekyabaireho obu baamaraika bayeteeranira omu maisho ga Yehova?
4 Eizooba rimwe, “abaana ba Ruhanga” ow’amazima bakaija kweteeranira omu maisho ge, omu iguru. Baibuli neeyongyeraho eti: “Na Sitaane yaabaijamu.” (Yob. 1:6) Ogu n’omurundi gw’okubanza ahu Baibuli erikugamba aha muzigu wa Yehova nka “Sitaane” nari “Omuhakanisa.” Obwire obwo, Sitaane akaba atakiri mwana wa Ruhanga orikwesigwa. Akaba ahindukire omuzigu wa Yehova, owa baamaraika abeesigwa n’eka ya Ruhanga ey’omu nsi. Yehova akooreka ngu Sitaane akaba atakiri omwe aha b’eka ye ey’omu iguru obu yaagamba ebigambo ebiri omu Okutandika 3:15. N’ahabw’ekyo Sitaane tari omwe aha ka ya Yehova ey’ebihangirwe by’omwoyo erikujwekyerwa “omukazi” eyaabaire neija kurugamu “oruzaaro.”
5. Nitwega ki twashwijuma ebyagambirwe aha ruteerane orwabaireho omu iguru?
5 Yehova akahandiikisa ebi Sitaane yaagambire aha ruteerane orwo omu Baibuli. Ebi Sitaane yaagambire nibihamiza kimwe ngu n’omuzigu, kandi naabeiherera abaheereza ba Yehova. (Yob. 1:9; Gyeragyeranisa Okushuuruurwa 12:10.) Ahabw’okugira ngu Yehova akahandiikisa omu Baibuli ebintu ebyo ebyabaireho omu iguru, nikyoreka ngu naakoresa obushoboorozi bwe omu muringo oguhikiriire, kandi ogw’oburingaaniza. Kandi nikyoreka ngu ow’Obushoboorozi Bwona naacwamu eki abandi barikubaasa kukora n’eki batarikubaasa kukora.
YEHOVA AINE OBUSHOBOOROZI BW’OKUTAHO OBUGARUKIRO
6. Yehova akooreka ata ngu akaba aine obushoboorozi bw’okucwamu aha ruteerane orwabaireho omu iguru? (Yobu 1:7, 8)
6 Shoma Yobu 1:7, 8. Yehova niwe yaabaire naacwamu ekyabaire nikibaho aha ruteerane orwo. Niwe yaatandikire arikubuuza Sitaane ati: “Ebyo waayetegyereza omwiru wangye Yobu?” Buzima, Yehova akaba naamanya ngu Sitaane akaba amaririire kuhitsya akabi ahari Yobu. Ka tureebe oku Yehova yaakoreise amaani ge agataine bugarukiro kuhwera Yobu.
7. Kurugiirira ahari Yobu 1:10, 11, Sitaane akagamba ki aha bantu abarikuheereza Yehova?
7 Shoma Yobu 1:10, 11. Yehova n’Ow’obushoboorozi Bwona omu nsi n’omu iguru, kandi naakoresa amaani ge n’obushoboorozi bwe omu miringo ei arikureeba ngu ehikire. (Yer. 32:17; Dan. 4:35) Kwonka nabwo, Sitaane akagira ngu Yehova akakoresa obushoboorozi bwe omu muringo ogutahikire. Sitaane akaba ari nk’orikugira ngu Ruhanga akaha abantu nka Yobu ekituga kugira ngu bamuheereze. Kandi Sitaane akagira ngu abarikuheereza Yehova nibakikora ahabw’ebirungi ebi arikubaha. Mbwenu shi Yehova akacwamu kukora ki?
8-9. Yehova akateeraho Sitaane bugarukiro ki, kandi ahabw’enki? (Yobu 1:12) (Reeba n’ekishushani.)
8 Shoma Yobu 1:12. Yehova akaha Sitaane omugisha gw’okworeka yaaba ebi yaagambire gaabaire gari amazima. Kwonka akamuteeraho obugarukiro. Akagambira Sitaane ati: “Kwonka we [Yobu], otamukoraho!” Omu maisho ga boona abaabaire bari aha ruteerane orwo, Yehova akateeraho Sitaane obugarukiro aha kabi aku yaabaire naayenda kureeta ahari Yobu. Sitaane akaba ataine maani g’okurenga aha ki Yehova yaamugambiire, n’ahabw’ekyo akaba ataine ky’okukora oyihireho kugyendera aha ki Yehova yaamuragiire. Kandi n’obunaku obu, Sitaane tarikubaasa kurenga aha bugarukiro obu Yehova arikumuteeraho. N’ahabw’ekyo Yehova akakoresa amaani n’obushoboorozi bwe kurinda Yobu n’okworeka ngu ni Ruhanga owa rukundo.
9 Sitaane akaremwa kuhikiiriza ekigyendererwa kye. Yobu akaguma ari omwesigwa ahari Ishe ow’omu iguru. (Yob. 1:22) Kwonka nabwo, Sitaane akaba atakaherize kugyeza Yobu.
Yehova akaha Sitaane omugisha gw’okworeka yaaba ebi yaagambire gaabaire gari amazima (Reeba akacweka 8-9)
10. Ahabw’enki Yehova yaikiriize Sitaane kugumizamu naagyeza Yobu? (Yobu 2:2-6)
10 Shoma Yobu 2:2-6. Aha murundi ogu, Sitaane akoongyeramu amaani omu kugyeza Yobu. Akagira ngu Yobu naija kwehakana Ruhanga kubaasa kujuna amagara ge. Kubaasa kworeka ngu Sitaane n’omubeihi, Yehova akamwikiriza kurwaza omushaija ogwo omwesigwa. Kwonka nabwo, Yehova akagaruka yaamuteeraho obugarukiro arikumugira ati: ‘Kwonka otamwita!’ Sitaane akaba ataine ky’okukora kureka kworobera eki Yehova yaamuragiire. N’aha murundi ogu, nitureeba ngu Yehova akooreka ngu niwe aine obushoboorozi bwona ahabw’okuba Sitaane akaba atarikubaasa kurenga aha bugarukiro obu yaamuteeraireho.
YEHOVA OKUHENDERA OKUBONABONA KWA YOBU
11. Yehova ku yaahendeire okubonabona kwa Yobu, akamuha migisha ki? (Yobu 42:10-13)
11 Shoma Yobu 42:10-13. Ku kyareebirwe butunu ngu Yobu akaba naija kuguma ari omwesigwa, Yehova taragarukire kwikiriza Sitaane kugumizamu naamugyeza. Yehova akahendera okubonabona kw’omuheereza we omwesigwa. N’aha murundi ogu, Sitaane akaba ataine maani g’okuremesa eki Yehova yaacwiremu. Sitaane akaba atakiine rusa kugumizamu naareeta akabi ahari Yobu omuheereza wa Yehova omwesigwa.
12. Ha eky’okureeberaho ekirikworeka eki Yehova yaakoreire abaheereza be abaayesigire ngu naija kubajuna.
12 Yehova akoreise amaani ge kuhwera abaheereza be baingi omu biro ebi eby’aha mperu. Nk’eky’okureeberaho, omuri 1945 abaserukare bakatambuza Abajurizi ba Yehova 230 barikubaiha omu bihome bya Nazi Germany kuza aha nyanja kugira ngu babiite. Kwonka Abajurizi ba Yehova abo boona bakahonokaho. Bakahandiika aha byabahikireho barikugira ngu Yehova akabajuna nk’oku yaajunire Abaheburaayo bashatu omu kikoomi ky’omuriro, abaarugire omu kikoomi ekyo batarikunuukaho omwika. Omu muringo nigwo gumwe, abaheereza ba Yehova abo bakasingura okugyezibwa okwo, kandi okwikiriza kwabo kukongyera kuhama. Kandi, bakeehurira nk’abu Ruhanga yaajunire nk’oku yaajunire Danieli omu kiina ky’entare. Kuruga obwo bakamariirira kuheereza Yehova ebiro byona. Kandi bakagira ngu, okubaasa kw’okuheereza Yehova ebiro byona nikyo kiconco ekirikukirayo.—Gyeragyeranisa Danieli 3:27; 6:22.
13. Noobaasa kugira bwesigye ki waahikwaho oburemeezi? (Reeba n’ebishushani.)
13 Naitwe obumwe nituhikwaho oburemeezi oshusha ngu turi nk’abanagirwe omu kiina ky’entare. (1 Pet. 5:8-10) Obumwe nituhurira tuhwereiremu kimwe amaani, kandi tuhika aha kwebuuza yaaba oburemeezi bwaitu buraije kuhwaho. Omu mbeera nk’egyo twateekateeka aha byahikire ahari Yobu nikibaasa kutuhwera. Nitubaasa kugira obwesigye ngu Yehova aine amaani g’okuhendera oburemeezi bwaitu, yaaba hati nari omu nsi ensya. Ekindi, taraije kwikiriza entebeekanisa y’obusingye obu kugumaho kurenga aha izooba eri yaataireho kugicwekyereza!
Yehova naija kumaraho okubonabona kw’abaheereza be abeesigwa (Reeba akacweka 13)
YEHOVA NAAKUNDA ABAHEEREZA BE ABEESIGWA
14-15. Yehova aine ekihika ky’okukorera ki abaheereza be abeesigwa? (Yobu 14:15) (Reeba n’ekishushani.)
14 Shoma Yobu 14:15. Tataitwe ow’omu iguru n’omwesigwa ahari abo abarikumwesiga. Naabatwara nk’ab’omuhendo munonga, kandi aine ekihika ky’okubazoora n’obu baakufa. Naija kumariraho kimwe obusaasi obureetsirweho okufa.—Isa. 65:17.
15 N’obu Yobu araabe yaagumiizemu naatuura omu nsi erikutegyekwa Sitaane, nitumanya ngu Yehova akamugaruriza amagara marungi, kandi yaamuha emigisha erikukira ei yaabaire aine atakagyeziibwe. Emigisha egyo ekaba neeyoreka bimwe aha bi Yehova araije kukorera Yobu omu biro by’omumaisho. Yehova akooreka ngu naayenda abaheereza be abeesigwa bashemererwe, kandi beesiimire amagara. Kandi naija kuha boona abarikumuhamiraho omugisha gw’okwesiimira amagara agahikiirire omuri paradiso. (Kush. 21:3, 4) Yehova aine ekihika ky’okukora ekyo ahakuba n’Omutegyeki w’ebintu byona. Buzima ekyo ka nikituhuumuriza twaba nitugumisiririza oburemeezi!
Bwanyima y’oburemeezi, Yobu n’omukazi we bakeesiimira emigisha mingi ei Yehova yaabahaire (Reeba akacweka 14-15)
16. Ni nshonga ki endiijo erikutureetera kwesiga Yehova nk’Omutegyeki w’ebintu byona?
16 Bwanyima y’okutuuraho emyaka mingi, Yobu akafa. Kwonka Yehova Omutegyeki w’ebintu byona, kandi ow’Obushoboorozi bwona, naakiza rufu amaani. (Bir. 32:39) N’ahabw’ekyo tihaine orikubaasa kumuremesa kuzoora abu arikukunda, kandi naija kukikora omu bwire obu acwiremu.—Rom. 8:38, 39.
YESIGIRE KIMWE YEHOVA
17. Niki ekirikworeka ngu Sitaane aremirwe kusingura abaheereza ba Yehova?
17 Ebirikukwata ahari Yobu nibituha enshonga nungi y’okwesigira kimwe Yehova. Nitusiima Yehova ahabw’okugira ngu taikiriize Sitaane kumaraho abaheereza be. Obunaku obu, abaheereza ba Yehova abeesigwa abarikurenga obukaikuru mwenda n’obuhame oburikworeka amaani agu Yehova aine nk’Omutegyeki w’ebintu byona. Kaingi, tureebire ngu ebirwaniso by’abantu tibirikubaasa kusingura abaheereza ba Yehova. (Isa. 54:17) Amahanga g’amaani n’amadiini garemirwe kusingura abaheereza ba Yehova abarikureebeka nk’abataine burinzi. Kandi tihaine ekirikubaasa kuturemesa kujanjaaza amazima agarikukwata ahari Yehova n’okusheeshuura Sitaane ngu n’omubeihi, kandi omwitsi. Nangwa na rufu terikubaasa kuturemesa ahabw’okuba Yehova naija kuzoora abarikumuhamiraho.—Hos. 13:14.
18. Ahabw’enki turikubaasa kworekyerera ebiro by’omumaisho n’obumanzi?
18 Twateekateeka aha byahikire ahari Yobu nibituhwera kuhamya okwikiriza kwaitu ngu nitubaasa kworekyerera ebiro by’omumaisho n’obumanzi. Omu bwire bw’okubonabona kwingi, abaheereza ba Ruhanga nitwija kureebeka nk’abataine burinzi, kandi Sitaane n’abarikumushagika nibaija kureebeka nk’abaine amaani kutukira. Kwonka Yehova naija kukoresa amaani ge nk’oku yaakozire omu bwire bwa Yobu, kuzibira Sitaane kutuhitsyaho akabi k’obutwire. Hatsigaireyo obwire bukye Yehova akahendera okubonabona oku Sitaane areetsire aha abantu. Sitaane na baadaimoni be nibaija kukomwa banagwe omu kiina ekitaine bugarukiro kumara emyaka 1,000. (Luk. 8:31; Kush. 20:1-3) Aha muheru, Sitaane n’abarikumushagika nibaija kucwekyererezibwa kimwe. (Kush. 20:10) Omutwe gwa Sitaane nigwija kwatagurwa nk’oku Yehova yaagambire. Naija kucwekyererezibwa kimwe, kandi tarigaruka kubaho bundi.—Kut. 3:15; Rom. 16:20.
19. Abarikwesigira kimwe Yehova nibaija kutunga bihembo ki? (Reeba n’ekishushani.)
19 Abaheereza ba Yehova ab’amazima baine ekihika ky’okureeba obwire obu turaagire amagara agahikiriire n’okushemererwa okuraabeho omu nsi ensya eri haihi kubaho. Embeera niziija kuba ziri nungi okukira aha ku turikuteekateeka. Yehova naaraganisa ati: “Reeba nimpindura byona bisya.” (Kush. 21:5) Mbwenu shi ekyo nikimanyisa ki? Ogu nigwo guraabe omurundi gw’okubanza obu abantu bataraije kugaruka kuteganisibwa obutegyeki bwa Sitaane na baadaimoni obwijwiremu rwango n’ebintu bibi. Nibwija kuba buri obwire burungi oburaatureetere kwehurira gye. Toraije kugaruka kuteganisibwa amaganya g’ensi egi embi agarikukuraaza nooreeba. Abaraahonokeho ahari Haramagedoni nibaija kureeba abantu omu nsi yoona barikukizibwa omu muringo gw’eky’okutangaaza. Bwanyima y’ekyo, abakundwa baitu abaafiire nibaija kutandika kuzooka. Omu bwire obwo, nitwija kwesiimira amagara nk’oku Tataitwe ow’omu iguru atwire naayenda.
Abaheereza ba Yehova abeesigwa aba ira abaagumisiririize oburemeezi nibaija kwesiimira emigisha ya Yehova (Reeba akacweka 19)
20. Omaririire kukora ki?
20 Omu biro ebi eby’emperu, nitwija kuhikwaho oburemeezi, kandi nitwetenga obumanzi kubaasa kuguma turi abeesigwa. N’ahabw’ekyo ka tumariirire kwesigira kimwe Yehova kandi tumushagike nk’Omutegyeki wa byona. Ka tumariirire kworeka rukundo ei twiniire Tataitwe ow’omu iguru, kandi tworekye ngu Sitaane n’omubeihi. Buzima nitubaasa kworekyerera ebiro by’omumaisho n’obumanzi ahabw’okuba nitumanya ngu Yehova aine ekihika ky’okushumbuusha abaheereza be abeesigwa omu muringo gw’omutaano.
EKYESHONGORO 153 Mpa Obumanzi