Amahano awangakuwatikya omughulu ukalaba omo maligho

1-2. Omughulu amaligho amatuhikira, tutolere itwakolaki tutoke eriyiyinia? (Ulebaye n’epitsa.)

YEHOVA anzire abandu biwe bo kutsibu. Nomo bine bitya, engebe y’abangyi ba kubo “yoswiremo amaligho n’obulighe.” (Esy. 90:10) Abaghuma ba kubo bakakolerawa muhanda n’abatunga babo kundi abatunga abo banzire ibaleka erikolera Yehova. Abandi banemwaghalibwa kutse erihirwa omo ngomo busana n’eritulira. Abangyi banemwaghalwa busana n’esyondwala kutse busana n’erikekeluha. N’abandi bakaghalawa kundi omundu wabo mwakahola kutse kundi omwatsi mulebe owakalire mwakabahikira.

² Eritoka eriyiyinia omo maligho agho tukalabamo, litolere itwalangiragho ngoko Yehova akalangiragho. Busanaki ekyo ni ky’endundi? Kundi twamatendibya n’amalengekania aghuwene oko maligho wetu, isitwendiminya ekyo tutolere itwakola tutoke eriyiyinia. Kiri ng’erighendya omutoka. Abakaghendaya emitoka bakabya ibanemulusya omutsafu oko biyo, kundi byamabibyako omutsafu sibalitoka erilangira ekindu ekiri omo ndaki ekyangaleka ibakola ekisida. Omo mwatsi ono tukendilangira ngoko litolere itwalangira amaligho wetu, ebitsibu ebyangaluira omw’ibya n’amalengekania awatuwene oko myatsi eyo tukalabamo, n’ebyo twangakola tutoke eribya n’amalengekania aghuwene omughulu amaligho amatuhikira.

ERIBYA N’AMALENGEKANIA AGHUWENE OKO MALIGHO

3. Busanaki tukaghalawa?

³ Tuli omo kihugho kibi, neryo amaligho akendibya inianemutuhikira. Itwe bosi tukaghalawa kundi tuli omo kihugho ekikasondolawa na Sitani, kandi kundi situhika-hikene. Enduli y’ekihugho kino ikaseghera hakuhi, engebe ikendilola embere erikala. Yanganakala busana n’ebitsinduli kutse busana n’emyatsi mibi eyo abandu bakakola. (Mat. 24:8; 2 Tim. 3:13) Yehova amabibughaho amaligho wosi ayo lino, iniakendibya ng’akawatikaya Sitani eritabala ekihugho kino. Mughulu wosi ogho Sitani akendisyabya inianemutabala ekihugho kino, tukendisyabya itunemwaghalwa.​—Omug. 9:12.

4. Ni ghundi mwatsi wahi owakaleka itwahikirwa n’amaligho?

⁴ Kandi tukahikirawa n’amaligho kundi tukakwama Kristo. Yesu iniabeghere eribwira abigha biwe ati bakendisyendereribwa busana n’erimukwama. (Mat. 24:9; Yoh. 16:2) Eriminya ekyo, kikaleka itutasweka kutse itutasisira omughulu twamendereribwa kundi itunasi ngoko tukakwama Yesu. (1 Tes. 3:3, 4) Neryo omughulu tukayiyinaya, tukayiketera ngoko tunemukola omwatsi oghuwene, owakendisyaleka Yehova na Yesu ibatuha engebe y’erikota. Kandi tukakanganaya ngoko twabirisombola eriramya Yehova kundi iye ni mutabali oyuwene n’erikangania ngoko Sitani ni mubehi. Kandi Sitani akabugha oko Mungu kw’amabehi ati abandu bakamukolera busana n’ebyo akahabo butsira busana n’olwanzo. Erikangania ekyo, Sitani akalwa kutsibu n’abandu ba Yehova akasonda ati baleghule. (Yobu 1:9-11) Omughulu tukayiyinaya kundi twanzire Yehova tukamutsemesaya.​—Misyo 27:11.

5. Omughambuli 7:13, 14 yangatwighisyaki? (Ulebaye n’epitsa.)

⁵ Yehova syalikakiraya emyatsi mibi yosi erituhikira. Yehova syalikola omo bubi na hake kutse eritulengako omo myatsi mibi. (Yak. 1:13) Omwami Solomona mwahandika ati: “Ekiro ky’obuhanya . . . oMungu yo wahangyikakyo.” (Soma Omughambuli 7:13, 14.) Solomona syabugha ati Yehova yukaleka emyatsi mibi iyabya, aliwe akanganaya ngoko syalikakirayayo omughulu yamabya. Solomona mwatuha amahano aghuwene awangatuwatikya erilangira amaligho omo nzira eyitolere. Ery’erimbere, litolere itwaminya ngoko kundi tuli omo kihugho kya Sitani, ndambi silebe twanganabya omo mighulu eyuwene n’esindi ndambi itwabya omo mighulu eyituwene. Neryo omughulu tuli omo “kiro ekyuwene” litolere itwasima Yehova kundi obuli kindu kibuya ni kihembo ekikalua okw’iye. Ery’akabiri, Solomona akatwibukaya ngoko abandu sibangaminya ndeke-ndeke “ebikendisyabahikira omo biro ebikasa.” Neryo sitwangaminya omusibo ng’akendyuwana kutse iyehe. Emyatsi mibi eyo tutayilindirireko ikatuhikira itwe bosi, tubye babuya kutse babi.

6. Busanaki Yehova anganalighira amaligho atuhikire? (Abaebrania 12:7, 11)

⁶ Twamabibya n’amalengekania aghuwene oko maligho, itukendilangira ngoko Yehova akatukangiriraya ngoko n’iye yukendituwatikya omo maligho wetu, omo mwanya w’erikwama amalengekania wetu. Yehova akabya inianalangire ebyo tukalabamo. N’omughulu tukaghalawa akayowa muhanda, neryo anayiteghekire erituwatikya. Nibya n’omughulu angaligha ati tulabe omo “musya owasusumenie,” akalola embere eritusondola, eritukangania olwanzo lwiwe, n’erituha akaghala ako tulaghireko tutoke eriyiyinia. (Esy. 23:4) Amaligho anganatuwatikya eriminya obulema bwetu, kandi oMungu anganatuwatikya eryuwania emibere yetu. (Soma Abaebrania 12:7, 11.) Ng’eky’erileberyako, Yobu abya atolere eriyikasa atoke eribya n’omubere w’eriyikehya. Yehova yutaletera Yobu y’amaligho. Aliwe mwaligha amaligho amuhikire atoke erigha esyosomo sy’omughaso. (Yobu 42:1-6) Tuyiketere kundu ngoko omwatsi wosi-wosi ogho Yehova akalighira atuhikire syangatwaghalya kera na kera. Omughulu tukayiyinaya butaleghula okw’iye, akatuwatikaya kandi akendisyatuhemba.​—Rom. 8:35-39.

7. Busanaki twanganatsema nibya itunemwendereribwa busana n’obwikirirya bwetu?

⁷ Twanganatsema omughulu tukendereribawa. Wamabya ighunemwendereribwa busana n’obwikirirya bwaghu, isiwalengekanaya ghuti Yehova syakikulighire. Omo mwanya w’ekyo, wibuke ngoko eryendereribwa eryo rikakanganaya ngoko Yehova akulighire. (Mat. 5:10-12) Eribya n’amalengekania awali ng’ayo, kyanganatuwatikya eribya n’obutseme ngoko abakwenda banabya n’obutseme omughulu bendereribawa. (Mib. 5:40-42) Twamatendileghula omughulu tukendereribawa, itwanganaleka abate Bimiri ibigha ekwenene “n’eripipa oMungu.” (1 Pet. 2:12) Nga Yozefu, Yehova anganatuwatikya omughulu tukalaba omo maligho, kandi iniatuwatikya amaligho ayo abilaba.​—Enz. 39:3, 23.

8. Ni ghundi mwatsi wahi owakatukuna eriyiyinia erihika oko nduli?

⁸ Amaligho wetu anawite enduli. Ebyahikira Yobu bikatwibukaya ngoko amaligho wetu anawite enduli. “Yehova mwatsumula ebiro by’enyuma by’engebe ya Yobu kwilaba eby’erimbere.” (Yobu 42:12) Netu kutya, omo kihugho kihya-kihya, Yehova akendisyatutsumula omo nzira eyikaswekaya. Engebe yetu yalino eyirimo amaligho ni nguhi erilinganisyayo n’engebe ya kera na kera eyo tukendisyabya nayo omo biro ebikasa. Ekyo kikatukuna eriyiyinia erihika oko nduli!​—Mat. 24:13.

EBITSIBU EBIKALUIRA OMW’IBYA N’AMALENGEKANIA MABI OKO MALIGHO

9. Eritendilangira amaligho wetu ngoko Yehova akalangiragho lyangatukalirya liti emyatsi?

⁹ Twanganayikalirya emyatsi twamatendibya n’amalengekania aghuwene oko maligho wetu. Ng’eky’erileberyako, twanganatsuka erilengekania tuti Yehova yukatuletera amaligho. Oko mughulu mulebe, Yobu mwalengekania ati Yehova yo wabya akamuletera amaligho agho abya akalabamo. Omo malengekania awatuwene ayo “mwasonda eriyikangania ko ni mutunganene, butsira oMungu.” (Yobu 32:2) Naomi naye, oko nzuko, mwabugha ati Yehova yo wamuletera amaligho. (Ruta 1:13, 20, 21) Yobu na Naomi nga balola embere eribya n’amalengekania awali ng’ayo, obwira bwabo na Yehova bwangatsandire. (Misyo 19:3). Aliwe, Yehova mwawatikyabo, bamatasyalangira amaligho wabo ngoko Yehova akalangiragho. Kandi mwatsumulabo busana n’obutaleghula bwabo.

10. Omughulu tukalaba omo maligho, twanganatsuka erilengekania tutiki?

¹⁰ Nomo twangabya itunasi ngoko Yehova yutetuletera amaligho, hanganayira itwatsuka eriyibulya ng’akinatutsomene. Amalengekania awatuwene ayo anganaleka itwabunika mutima neryo ikyatukalako erilola embere erikolera Yehova. (Misyo 24:10) Daudi n’omuminyereri Habakuki mubalaba omo mibere eyikalire. Abosi babiri mubayibulya oMungu ng’anemuhulikirira emisabe yabo y’erisaba obuwatikya. (Esy. 10:1; Hab. 1:2) Aliwe, mubataleka erisaba. Yehova mwasubirya emisabe yabo, kandi mwataleka eriwatikyabo. Naghu Yehova akendilola embere erikuwatikya.​—Esy. 10:17.

11. Niki kyo kyangatuhikira twamatendibya n’amalengekania aghuwene oko maligho wetu?

¹¹ Twamatendibya n’amalengekania aghuwene oko maligho, amaligho inianganatusisirya, nibya itwalengekania tuti emyatsi eyiri ng’eyo siyitolere ikatuhikira. (1 Pet. 4:12) Mukyakala oko bigha ba Yesu eriligha ngoko bakendisyahikirwa n’amaligho aw’akalire. (Luka 18:33, 34) Ng’eky’erileberyako, Petro mwalengekania ati Yehova syangalighira Yesu eryaghalwa nomo Yesu anabya iniabiribwira abigha biwe bo burora-rora ngoko akendisyaghalwa. Yesu abya inianasi ngoko amalengekania awali ng’ayo anganaleka iniatakola erisonda rya Yehova, neryo mwakunga Petro. (Mar. 8:31-33) Nibya n’enyuma sy’oluholo lwa Yesu, mukyakala oko bigha biwe eriligha ebiryaleka inyitwa. Aliwe, Yesu mwalola embere eriwatikyabo n’eryanzabo. Omughulu Yesu akanaya nabo abilubuka, mwawatikyabo eriminya ekyaleka iniaghalwa omw’ikumbulirabo Amasako. (Luka 24:25-27, 32, 44-48) Erilengekania oko makangirirya wa Yesu kyangawatikirye abigha biwe eriyiteghekania okw’endereribwa eryabya irikisiya iryabahikira. Netu kutya, twanganalengekania oko ebyo eBiblia ikabugha okwendereribwa n’oko maligho tutoke eriyiteghekania oko maligho awangatuhikira.

12. Eribya n’amalengekania awatuwene oko maligho agho tukalabamo kyanganaleka itwayowa tuti?

¹² Eribya n’amalengekania awatuwene oko maligho agho tukalabamo, kyanganaleka itwalangira ng’akalire kulenga ngoko ali. Yesu, omo musyo w’abahingyi b’omo ririma ry’emizabibu, akakanganaya ngoko ekyo kyangahika. Abaghuma b’oko bahingyi mubayilungumula bakalengekania bati sibetalihwa ndeke. Nikwa omukama mwasubirya omughuma wa kubo ati: “Mulikyetu, sinitakukola nabi.” (Mat. 20:10-13) Abahingyi mubayilungumula, aliwe busana n’eriyilindirira oko ekyo batabya batolere eriyilindirirako. Munabwire abaghala n’abali betu nabo banganayowa batya. Ng’eky’erileberyako, banganalengekania bati sibetakolerwa ndeke kundi sibetahabwa edaraka nyilebe omo ndondeka ya Yehova. Niki kyo kyangatuwatikya eribya n’amalengekania wa Yehova oko mwatsi mulebe owakalire ogho tukalabamo?

EBYO TWANGAKOLA OMUGHULU TWAMAHIKIRWA N’AMALIGHO

13. Erihikirwa n’amaligho kyanganaleka itwabya n’amalengekania wahi?

¹³ Abaghombe ba Yehova banasi ebyo eBiblia ikabugha oko maligho. Nibya wanganabya iwabirisomera abandi b’amasako malebe eriwatikyabo erilwa n’amaligho. Aliwe, omughulu amaligho amatuhikira itwibene-bene kyanganatukalako eribya n’amalengekania aghuwene. Ng’eky’erileberyako, twanganalengekania tuti Yehova akatusuyira kutse tuti syakihulikirira emisabe yetu. Wangakola emyatsi yahi utoke erilola embere eribya n’amalengekania aghuwene?

14. Niki kyo wangasaba omughulu ukalaba omo maligho? (Abanya Filipi 4:13)

¹⁴ Usabe Yehova y’obuwatikya. Ubwire Yehova y’amaligho waghu, kandi ngoko ukayowa. Wanganabwira Yehova ekyo wanzire iniakukolera. Wanganamusaba uti akuhe ekirimu kiwe kibuyirire. Ekirimu ekyo kikendikuha akaghala n’amenge ebyangakuwatikya eriyiyinia. Aliwe wibuke ngoko Yehova anganasubirya oko misabe yaghu omo nzira eyo utalue ulengekenie. (Efe. 3:20) Kandi anganakolesya Abamalaika kutse abaghala n’abali betu erikuwatikya. (Esy. 34:7) Neryo, ulighe enzira yosi-yosi eyo Yehova angakolesya erikuwatikya. Akahitaya ekirimu kiwe butsira buhemu, n’ekirimu ekyo kyanganakuwatikya erilwa n’amaligho wosi-wosi agho wangalabamo.​—Soma Abanya Filipi 4:13.

15. Niki kyo kikendikuwatikya eriyiyinia omo maligho? (Ulebaye n’epitsa.)

¹⁵ Isiwalekeranaya emyatsi y’obunya-kirimu. Ukole ekyosi-kyosi ekyo wangatoka eriwatya obwira bwaghu na Yehova nibya nomo kyangakukalako erikola ebyo wabya ukakola embere. Omo mughulu ‘w’amaligho n’emighulu eyikalire,’ utolere iwasoma n’erihulikirira emyatsi eyangakuwatikya erilengekania oko Yehova n’oko ebyo akabugha. (Esy. 119:143) Ulole embere erisoma eBiblia y’obuli kiro, erighayo n’erighanirya oko ebyo ukasoma. Uyikase eribya ukatulira, eriya oko mihindano n’erisangira kuyo. Isiwayihighula oko baghala n’abali benyu. Isiwabya ighuwene oko mughulu muli nomo wangayowa ikitolere eribya ighuwene.​—Misyo 18:1.

16. Amaligho anganaleka iwayowa uti, kandi utolere iwakolaki? (2 Abanya Korinto 10:4, 5)

¹⁶ Ukolesaye eBiblia eribindula amalengekania waghu. Omughulu amaligho amakuhikira, kyanganatolera iwayilusyamo amalengekania ‘awabirihanda emirihi.’ Amalengekania ayo anganahiramo eriyitika-tikira kutse eritika-tikira Yehova. (Soma 2 Abanya Korinto 10:4, 5.) Wamabikolesya eBiblia n’ebitsapo byetu, ighukendileka eriyitika-tikira kutya n’eritika-tikira Yehova. Ng’eky’erileberyako, ukanalengekanaya uti Yehova syakikulighire? Uyighisaye oko ebyo omukwenda Paulo alabamo. Mwalola embere eritulira butaleghula nomo anabya akalaba omo maligho, n’ekyo mukyaleka inyikirirya ngoko Yehova na Yesu bakamutsemera. (2 Kor. 11:23-27) Ukanayibulaya Yehova ng’anabirikughanyira amalolo agho wakola kera? Byamabya iko biri bitya, uhandike emilondo eyikakanganaya ngoko Yehova syalitusuyira busana n’amalolo agho abirighanyira. (Isa. 43:25) Neryo usome emilondo eyo n’erilengekania kuyo. (Esy. 119:97) Obuhanya bulebe bwanabirileka iwatika-tikira e ndaghane yiwe y’eriteya abaghombe biwe? Ukwese-kwese omo bitsapo byetu mw’emyatsi eyikakanganaya ekikaleka oMungu inialigha emyatsi mibi ituhikire n’eyikakanganaya ng’akatuteghaya ati bunya-kirimu nomo twangahikirwa n’emyatsi yahi. (Esy. 91:9-12) Kandi usome emyatsi y’abaghala n’abali betu abahikirawa n’obuhanya n’ebyabawatikaya erilola embere erikolera Yehova ibanatsemire.a

17. Litolere itwakolaki omughulu twamahikirwa n’obuhanya?

¹⁷ Oko biro bino, une omo “kiro ekyuwene,” ni bugha ambu emighulu eyitemo amaligho awakala-kalire? Byamabya bitya, usime Yehova n’erimupipa busana n’olukogho lwiwe. (Omug. 7:14) Aliwe n’obuhanya bwamakuhikira, litolere iwalola embere eribya n’amalengekania aghuwene n’eriyiketera Yehova yo kutsibu. Wamabikola utya, Yehova ‘iniakendikuha enzira y’eribalamo utoke eriyiyinia.’ (1 Kor. 10:13) Aliwe ibwa twangawatikya tuti abaghala n’abali betu omughulu bakalaba omo maligho? Omwatsi owakwamire akendisubirya oko ribulyo eryo.