Ngoko Yehova akatuwatikaya eriyiyinia

1. Busanaki tutolere eriyiyinia, kandi nindi yukendituwatikya? (1 Petro 5:10)

OMO biro bino by’enduli ebikalire, abandu ba Yehova batolere eriyiyinia. Abalebe bakwire obukoni obutelama. N’abandi banemwaghalibwa busana n’eriholerwa n’omwanzwa wabo. N’abandi banemwaghalibwa busana n’obwikirirya bwabo, kyanganabya omo kihanda kyabo kutse erilua oko bakulu b’eleta. (Mat. 10:18, 36, 37) Uminye ngoko nomo wanganabya ighunemulaba omo maligho awali ati, Yehova akendikuwatikya eriyiyinia.​—Soma 1 Petro 5:10.

2. Itwe Bakristo, tukalusaya hayi akaghala ketu k’eriyiyinia?

² Eriyiyinia ni handa omutima n’eritendiherya amaha omughulu tunemulaba omo myatsi eyikalire, omughulu tunemwaghalibwa busana n’obwikirirya bwetu, kutse omughulu tunemulengwako. Si kaghala ketu ko kakatuwatikaya eriyiyinia, aliwe ni Yehova, oyukatuha “obutoki obulengire obw’abandu.” (2 Kor. 4:7) Omo mwatsi ono tukendikania oko myatsi ini eyo Yehova abirituha eyikatuwatikaya eriyiyinia. Kandi tukendilangira ngoko twangabana endundi muyo.

OMUSABE

3. Busanaki twanganabugha tuti omusabe ni mwatsi owakaswekaya?

³ Yehova abirituha omwatsi owakaswekaya owakatuwatikaya eriyiyinia. Nomo tuli bakoli b’amalolo, Yehova abirituhiriraho enzira eyikatuwatikaya erikania naye. (Ebr. 4:16) Terilengekania oko kino: Twanganasaba Yehova oko ndambi yosi-yosi kandi busana n’omwatsi wosi-wosi. Anganatuhulikirira nomo twangabya itukamusaba omo mubughe wahi, nomo twangabya hayi, nibya nomo twangabya itwibene, kutse omo ngomo. (Yona 2:1, 2; Emib. 16:25, 26) Nibya n’omughulu twamabula eby’eribugha busana n’erihangya-hangya kutsibu, Yehova akaminya ebyo twanzire eribugha. (Rom. 8:26, 27) Oko kwenene, omusabe ni mwatsi owakaswekaya!

4. Busanaki twanganabugha tuti erisaba Yehova atuwatikaye eriyiyinia rihambene n’erisonda riwe?

⁴ Omo Kinywa kiwe, Yehova akatubwira ati “nomo twangamusabaki, akatwowa, twamamusaba erikwamana n’erisonda riwe.” (1 Yoh. 5:14) Twanganasaba Yehova tuti atuwatikaye eriyiyinia? Inga! Erisaba tutya rihambene n’erisonda riwe. Busanaki tukabugha tutya? Omughulu tukayiyinaya, tukaha Yehova y’eky’erisubirya oyukamulengako, Sitani Diabolo. (Misyo 27:11) N’ekindi, eBiblia ikabugha yiti Yehova anzire “erikolesya akaghala kiwe eriwatikya abakamukolera n’omutima wosi.” (2 Emya. 16:9) Neryo kwesi, twanganayiketera ngoko Yehova anzire kandi anawite obutoki bw’erituwatikya eriyiyinia.​—Isa. 30:18; 41:10; Luka 11:13.

5. Omusabe anganatuwatikya ati eritulera omo bwenge? (Isaya 26:3)

⁵ EBiblia ikabugha yiti omughulu tukasaba erilua oko mutima busana n’ebikatuhanga-hangaya, “obuholo bw’oMungu obulengire ebyosi ebyo abandu bangalengekania, ibukenditeya emitima [yetu] n’obwenge [bwetu].” (Filip. 4:7) Tukasima kutsibu busana n’ekyo. Abandu abatekolera Yehova omughulu bamahikirwa n’amaligho, bakakolesaya esyonzira mbiriri-mbiriri batoke eritulera omo bwenge. Ng’eky’erileberyako, abaghuma bakakolesaya enzira nyilebe y’erilengekania busana n’erilusya omo bwenge bwabo mw’ebyosi ebikabakenderaya. Aliwe enzira eyo siyuwene kundi yanganaleka omundu iniatsuka erikania n’esyombinga. (Tasyalebya Matayo 12:43-45.) Aliwe, obuholo obo Yehova akatuha omughulu tukamusaba bulengire kutsibu obo abandu bakabana omw’ikolesya enzira yabo eyo y’erilengekania. Omughulu tukasaba Yehova tukakanganaya ngoko tuyiketere iye yo kutsibu. Neryo ekyo kikaleka iniatuha “obuholo obutehwa.” (Soma Isaya 26:3.) Enzira nguma eyo Yehova akakolamo atya ry’erituwatikya eryibuka amasako awali omo Kinywa kiwe. Amasako ayo akatuwatikaya eritulera omo bwenge, kundi akatwibukaya ngoko Yehova atutsomene kandi ngoko anzire erituwatikya.​—Esy. 62:1, 2.

6. Wangakola ghuti omusabe atoke erikuletera endundi? (Ulebaye n’epitsa.)

⁶ Ekyo wangakola. Omughulu uli omo maligho, “ughusire Yehova y’emiheke yaghu” n’erimusaba obuholo bwiwe. (Esy. 55:22) Kandi umusabe amenge agho ulaghireko utoke erilwa n’amaligho waghu. (Misyo 2:10, 11) Kutya ubye ukamusima. (Filip. 4:6) Ubye ukasondekania emyatsi eyikakanganaya ngoko Yehova anemukuwatikya omo maligho n’erimusima busana n’obuwatikya bwiwe. Amaligho isyaleka iwibirirwa emiyisa eyo wabiribana.​—Esy. 16:5, 6.

EKINYWA KY’OMUNGU

7. Eriyighisya eBiblia lyanganatuwatikya liti eriyiyinia?

⁷ Yehova abirituha Ekinywa kiwe busana n’erituwatikya eriyiyinia. Omo Biblia muli amasako mangyi awakatukanganaya ngoko Yehova anayiteghekire erituwatikya. Tulengekanaye oko ky’erileberyako kighuma kisa. Matayo 6:8 yiti: “Tata wenyu w’elubula anasi ebyo mulaghireko nibya isimulimwamusaba.” Yesu yo wabugha ebinywa ebyo, kandi asi Yehova yo ndeke kulenga oghundi mundu. Neryo kwesi, twanganikirirya ngoko Yehova syangabula erituwatikya n’erituha ebyo tulaghireko omughulu tuli omo maligho. Omo Biblia muswire awandi masako awali ng’ayo awakakanganaya ngoko Yehova anganatuha akaghala tutoke eriyiyinia.​—Esy. 94:19.

8. (a) Teka eky’erileberyako ky’akanuni kaghuma k’eBiblia akanganatuwatikya eriyiyinia. (b) Niki kyo kyangatuwatikya eryibuka esyokanuni sy’eBiblia omughulu twamalagha kusyo?

⁸ Esyokanuni sy’eBiblia syanganatuwatikya eriyiyinia. Syanganatuha amenge agho tulaghireko tutoke eriyisogha ndeke. (Misyo 2:6, 7) Ng’eky’erileberyako, eBiblia ikatuhana yiti isitwahanga-hangaya busana n’ebyanganasa omungya, aliwe ngambe itwabya tukayiketera Yehova yo buli kiro. (Mat. 6:34) Twamabibeghera erisoma Amasako n’erilengekania kugho, ekyo ikyanganatuwatikya eryibukagho omughulu twamalagha kugho.

9. Emyatsi eyikanibweko omo Biblia ikatuwatikaya yiti eriyiketera obuwatikya bwa Yehova?

⁹ EBiblia ikakanaya oko myatsi eyo abandu abali ng’itwe balabamo. Mubayiketera Yehova, naye mwabawatikya. (Ebr. 11:32-34; Yak. 5:17) Omughulu tukalengekanaya oko myatsi eyo, tukayiketera kundu ngoko Yehova ni “busayiro bwetu n’amaka wetu, obuwatikya obo twangabana bweghu-bweghu omughulu w’obulighe.” (Esy. 46:1) N’omughulu tukalengekanaya oko baghombe bataleghula ba Yehova ba kera, ekyo kikatukuna erikwama obwikirirya bwabo n’eriyiyinia ryabo.​—Yak. 5:10, 11.

10. Wangakola ghuti Ekinywa ky’oMungu kitoke erikuletera endundi?

¹⁰ Ekyo wangakola. Ubye ukasoma eBiblia yo buli kiro n’erihandika amasako awangakuwatikya. Abangyi babiriyilangirira ngoko erisako ry’obuli kiro likabawatikaya eritsuka omusibo n’amalengekania w’eBiblia awakasikaya mutima. Mwali wetu oyukahulawa mo Mariea mwayilangirira ekyo omughulu ababuti biwe bosi bakwa obukoni bw’akasere. Niki kyo kyamuwatikaya eriyiyinia omo misi y’omwiso-mwiso bakasonda erihola? Akabugha ati: “Obuli kiro omo tututu, ingasoma n’erilengekania oko erisako omo katabu Tuyighisaye Amasako obuli kiro. Ekyo mukyaniwatikya eryusulya omo bwenge bwaghe mw’amalengekania aghuwene w’eBiblia awaniwatikaya erihira obwenge bwaghe oko Yehova butsira oko maligho agho nabya ngalabamo.”​—Esy. 61:2.

ABAKRISTO BALIKYETU

11. Busanaki kikasikaya mutima eriminya ngoko situli itw’ibene omughulu tukayiyinaya omo maligho?

¹¹ Yehova akatuha Abakristo balikyetu erituwatikya eriyiyinia. Eriminya ngoko “amaligho maghumerera ayo anemuhikira ekihanda kyosi ky’abaghala betu omo kihugho kyosi” kikatuwatikaya eriminya ngoko situli itw’ibene. (1 Pet. 5:9) Twanganikirirya ngoko nomo twangabya itukalaba omo maligho awali ati, abandi nabo babirilaba omo maligho awali ng’ayo, kandi babiritoka eriyiyinia. Ekyo ni bugha ambu, netu twanganatoka eriyiyinia!​—Emib. 14:22.

12. Abakristo balikyetu banganatuwatikya bati, netu twanganawatikyabo tuti? (2 Abanya Korinto 1:3, 4)

¹² Omughulu tunemuyiyinia omo maligho, Abakristo balikyetu banaganatusikya mutima. Omukwenda Paulo mwayilangirira ekyo. Kangyi-kangyi iniakasima ababya bakamuwatikya omughulu abya inianabohire omo nyumba; nibya iniakahula amena wabo. Mubamukirania, erimusikya mutima n’erimuha obuwatikya obo abya alaghireko. (Filip. 2:25, 29, 30; Kol. 4:10, 11) Netu munabwire twanganawatikania tutya. Abaghala n’abali betu banganatuwatikya tutoke eriyiyinia; netu twanganawatikyabo batoke eriyiyinia.​—Soma 2 Abanya Korinto 1:3, 4.

13. Niki kyo kyawatikaya mwali wetu Maya eriyiyinia?

¹³ Abaghala n’abali betu mubawatikya kutsibu mwali wetu Maya w’omo Risi. Abapolisi babere bakwesa-kwesa enyumba yiwe oko 2020, mwasabwa eriyatonda nga ni busanaki mwakabwira abandi oko myatsi eyo ikirirye. Akabugha ati: “Omughulu nabya ngahangya-hangya kutsibu, abaghala n’abali betu ibakanibirikira n’erinihandikira erinikangania ngoko banianzire. Nabya niasi ngoko niri omo kihanda kinene kandi ekirimo olwanzo. Aliwe eritsuka oko 2020 nabiritasyaligha kutsibu omwatsi oyo.”

14. Twangakolaki tutoke eribana endundi omo buwatikya bw’abaghala n’abali betu? (Ulebaye n’epitsa.)

¹⁴ Ekyo wangakola. Omughulu ukalaba omo maligho, ubye ukasighala hakuhi n’abaghala n’abali benyu. Isiwatika-tika erisaba abasyakulu b’obuwatikya. Abasyakulu bali ng’“ah’eriyibisa oko kihunga, omwanya w’eriyibisamo busana n’ekibula.” (Isa. 32:2) Kutya, ubye ukibuka ngoko Abakristo balikyenyu nabo bakabya ibanemuyiyinia omo maligho. Neryo wamabikolera omundu mulebe oyuli omo bwagha y’omwatsi mulebe oghuwene, ighukenditsema n’eribya n’amalengekania aghuwene oko maligho waghu.​—Emib. 20:35.

AMAHA WETU

15. Amaha w’omo biro ebikasa mwawatikya ati Yesu, netu amaha wetu akatuwatikaya ati? (Abaebrania 12:2)

¹⁵ Yehova abirituha amaha w’ekwenene awakatuwatikaya eriyiyinia. (Rom. 15:13) Wibuke ngoko amaha mwawatikya Yesu eriyiyinia omo mughulu owakalire kutsibu w’omo ngebe yiwe y’oko kihugho. (Soma Abaebrania 12:2.) Yesu mwaminya ngoko amabisighala mutaleghula iniakendiwatikya eriyira erina rya Yehova mo ribuyirire. Kandi abya alindirire n’engumbu nene eritasyabya na Tata wiwe, n’omughulu ogho angatsukire erikola haghuma n’abaghala babo omo Bwami bw’elubula. Kutya, amaha wetu w’erisyabyaho kera na kera omo kihugho kihya-kihya ky’oMungu akatuwatikaya eriyiyinia omo maligho wosi-wosi agho ekihugho kya Sitani kikatuletera.

16. Amaha mwawatikya ati mwali wetu mughuma eriyiyinia, n’ebinywa biwe byamakwighisyaki?

¹⁶ Langira ngoko amaha w’Obwami mwawatikya mwali wetu oyukahulawamo Alla w’omo Risi. Omwira wiwe mwahambwa, amatwalwa omo ngomo akalindirira eritondesibwa. Ekyamuwatikaya niki? Akabugha ati: “Eribya ngasaba n’erilengekania oko maha wetu w’omo biro ebikasa, mukyaniwatikya eritendibunika mutima kutsibu. Munaminya ngoko emyatsi eyuwene yine embere. Yehova akendisyakinda esyonzighu siwe n’erituhemba.”

17. Twangakangania tuti erisima ryetu busana n’amaha wetu awaseghemere eBiblia? (Ulebaye n’epitsa.)

¹⁷ Ekyo wangakola. Ubye ukalengekania oko myatsi eyuwene eyo Yehova abirituteghekanirya. Terilengekania ighune omo kihugho kihya-kihya ky’oMungu ukatsemera emiyisa eyo abiritulagha. Ekyo kyanganaleka itwikirirya ngoko amaligho wosi-wosi wa munabwire ni ‘w’omughulu muke, kandi syalitohire.’ (2 Kor. 4:17) Kandi, uyikase eribya ukabwira abandi oko ebyo wikirirye. Si kyolo oko bandu abatasi amaha aghuwene w’oMungu erilwa n’amaligho awakabahikira omo kihugho kino kya Sitani. Wanganabawatikya eritsemera amaha wetu w’Obwami omw’ikania nabo nibya ebinywa bike.

18. Busanaki twanganayiketera esyondaghane sya Yehova?

¹⁸ Yobu abere abitoka eriyiyinia omo maligho mangyi, mwabwira Yehova ati: “Lino nabiriminya ngoko ukatoka erikola emyatsi yosi kandi ngoko sihali ekiri omo malengekania waghu ekyo ute wangatoka erikola.” (Yobu 42:2) Yobu mwigha ngoko sihali ekyangakakirya Yehova eriberererya erisonda liwe. Ekwenene eyo yanganatuwatikya eriyiyinia. Ng’eky’erileberyako, tubughe tuti omukali mughuma abiribunika mutima kundi abanganga bangyi babiritaluka erimulamya. Aliwe amasungana n’omunganga oyo wabirikola kutsibu n’oyo abandu bayiketere; omunganga oyo amasunga obukoni bwiwe n’erimubwira ati akendimutunza. Omukali oyo amatulera abyowa atya nomo kikendimya endambi atoke erilama. Amaha ayo w’eriminya ngoko akendilama anganamuwatikya eriyiyinia. Kutya, amaha wetu w’erisyingira omo Paradiso akatuwatikaya eriyiyinia.

19. Tutolere itwakolaki tutoke eriyiyinia?

¹⁹ Ngoko twamabilangira, Yehova akatuwatikaya eriyiyinia omo maligho wetu erilabira omusabe, Ekinywa kiwe, Abakristo balikyetu n’amaha wetu. Twamabikolesya ndeke emyatsi yosi eyo, Yehova iniakendisyalola embere erituwatikya eriyiyinia erihika omughulu amaligho wosi w’omo kihugho kya Sitani akendisyahwaho.​—Filip. 4:13.