Omwatsi wa Solomona oyu amakangania ekyangahikira omuramya wa Yehova wosi-wosi. Anganatoghera omo rilolo rinene, neryo inialengakania ati emyatsi muyikaghenda “luba.” Kutse anganabugha ati, “mungalengawako kitsumbukirania.” Aliwe, amabilengekania ndeke oko mwatsi owalyamuhikira, inianganafumbula ngoko mwakatsuka erikola awandi masoka awalyamukolaya oko rilolo rinene eryo. Kwa muhwa anganabya imwakatsuka eribya n’abira abatanzire Yehova. Kutse alinga mwakatsuka eribya akayitsemesya omo myatsi eyituwene, eriya oko syosite sye Enternete esituwene, kutse erilenderera eyituwene oko Mukristo. Kwa muhwa alue inyabirileka erisaba, erisoma eBiblia, eriya oko mihindano, kutse iriyatulira. Ng’omulwana oyukanibweko omo Emisyo, alinga syangayiteba ati erilolo eryo mulikasa “luba” kutse kitsumbukirania. Twamabana esomo yahi? Litolere itwayihighula oko malolo; aliwe kandi litolere itwayihighula oko myatsi eyangatukolya okw’ikola erilolo erikalire. Ekyo kyo Solomona asonda erikangania akakania oko ebyahikira omulwana oyo n’omukali mumbalaka.​—Mat. 5:29, 30. w24.07 16 enu. 10-11

Ekindu ky’obughuli ekyo, niki? Wo mubiiri w’eritula engulu y’Obwami owakasabula esyongebe. (2 Kor. 4:1) N’ebindu by’eribumba, byo byahi? B’abaghombe b’oMungu abakatulira abandi b’engulu mbuya. Oko mughulu wa Paulo, abahingania ibabeghere erikolesya ebindu by’eribumba erihekamo ebindu byabo eby’obughuli; ng’akalyo, edivai, n’esyofranga. Netu kutya, Yehova akatukolesaya eritulira abandi b’omwatsi w’obughuli bunene, ni bugha ambu engulu mbuya y’Obwami. Omo buwatikya bwa Yehova, twanganabana akaghala ako tulaghireko tutoke erilola embere eritulira. Oko ndambi silebe, twanganubaha abandu kutse itubaha tuti sibendituhulikirira. Twangakinda tuti obuba obo? Lengekanaya oko musabe w’abakwenda omughulu baghanayabo eritulira. Mubatasagha kandi mubataleka eritulira. Omo mwanya w’ekyo, mubasaba Yehova bati awatikayebo erilola mbele eribugha n’obutubaha. Yehova mwalw’iniasubirya oko musabe wabo. (Emib. 4:18, 29, 31) Erisagha abandu kyamabileka itwakwa obuba bw’eritulira, tusabe Yehova atuwatikaye eryanza abandu bo kutsibu. w24.04 16-17 enu. 8-9

Olwanzo lwetu oko Yehova lukatukuna eriyira erina liwe mo libuyirire. Ekyo ni bugha ambu, twanzire eribwira abandi ngoko emyatsi mibi eyo Sitani abugha oko Yehova, ni mabehi. (Enz. 3:1-5; Yobu 2:4; Yoh. 8:44) Omughulu tukatulira, tukabya n’engumbu nene ey’erikanirya abosi abakatuhulikirira Yehova nga nindi kandi nga ni Mungu oyuly’ati. Twanzire ibaminya ngoko olwanzo wo mubere mukulu w’oMungu kandi ngoko enzira yiwe y’eritabala yo yuwene kutsibu kandi yitunganene. Kandi ngambe ibaminya ngoko Obwami b’oMungu bo bukendibuwaho amaligho wosi n’eriletera abandu bosi b’obuholo n’obutseme. (Esy. 37:10, 11, 29; 1 Yoh. 4:8) Omughulu tukabwira abandu bosi oko myatsi yosi eyi, tukayira erina lya Yehova mo libuyirire. Kandi tutsemire kundi tunemuyikasa erikola ebyo tutolere itwakalo nga Bimiri biwe. w24.05 18 enu. 12