OMWATSI W’ERIGHA 26
OLWIMBO 123 Erisikya obutaratibu bw’ekiteokrasi
Omw’iyikehya ulighe ngoko hane ebyo utasi
“Sitwangatoka n’ahake eriyiteghererya Omutoki w’Ebyosi.”—YOBU 37:23.
ENZUMWA NGULU
Nomo sitwasi emyatsi yosi eyikendisyabya omo biro ebikasa, tukayiyinaya omo maligho twamabilengekania oko myatsi eyo twasi n’eriyiketera Yehova.
1. Yehova mwatuhangyika n’obutoki mbiriri-mbiriri bwahi, kandi busanaki?
YEHOVA mwatuhangyika n’obutoki bw’erilengekania, bw’erigha emyatsi mihya, n’obw’eriminya ngoko twangakolesya emyatsi eyo tuligha. Busanaki mwatuhangyika atya? Ni kundi anzire “itwaminya emyatsi mingyi oko Mungu,” n’erikolesya obwenge bwetu tukamukolera.—Misyo 2:1-5; Rom. 12:1.
2. (a) Ni kyahi ekyo tutolere eriminya okw’itwe? (Yobu 37:23, 24) (Ulebaye n’epitsa.) (b) Eriminya ngoko sitwasi emyatsi yosi kikatuletera ndundi yahi?
2 Nomo Yehova mwatuhangyika n’obutoki bw’erigha emyatsi mingyi, aliwe hane ebyo tutasi. (Soma Yobu 37:23, 24.) Tukanaye oko eky’erileberyako kya Yobu. Yehova mwabulya Yobu amabulyo mangyi, awamuwatikaya eriminya ngoko hane emyatsi mingyi eyo atasi. Omukania oyo mwawatikya Yobu eriminya ngoko atolere iniayikehya n’eribindula amalengekania wiwe. Netu kutya, kyuwene eriminya ngoko sitwasi emyatsi yosi. (Yobu 42:3-6) Omughulu tukibuka ngoko hane myatsi eyo tutasi, kikatuwatikaya eriyikehya n’eriyiketera ngoko mughulu wosi Yehova akatubwira ebyo tutolere eriminya tutoke eriyisogha ndeke.—Misyo 2:6.
Eriminya ngoko hane ebyo tutasi kyanganatuletera endundi, ngoko kyanabya oko Yobu (Ulebaye enungu 2)
3. Tukendikania okuki omo mwatsi ono?
3 Omo mwatsi ono, tukendikania oko myatsi milebe eyo tutasi, kandi busanaki ndambi silebe eritendiminya emyatsi eyo kyanganakalya engebe yetu. Kandi tukendilangira busanaki kyuwene eritendiminya emyatsi milebe. Erikania oko myatsi eyi kikendituwatikya eriyiketera ngoko Yehova “y’oyuhika-hikene omo bwenge,” akatubwira ebyosi ebyo tutolere eriminya.—Yobu 37:16.
SITWASI ENDULI NGA YIKENDISYASA MUGHULU WAHI
4. Ngoko kiri omo Matayo 24:36, ni mwatsi wahi mughuma ogho tutasi?
4 Soma Matayo 24:36. Sitwasi enduli y’ekihugho kibi kino nga yikendisyasa mughulu wahi. Nibya na Yesu omughulu abya oko kihugho mwataminya “ekiro ekyo n’endambi eyo.”a Aho nyuma, mwabwira abakwenda biwe ngoko Yehova yuwite obutoki bw’eriminya emyatsi milebe nga yikendisyabya mughulu wahi. (Emib. 1:6, 7) Yehova abiriyisogha enduli y’ekihugho kino nga yikendisyasa mughulu wahi. Aliwe, sitwasi ndeke-ndeke ekyo nga kikendisyabya mughulu wahi.
5. Kundi sitwasi enduli nga yikendisyahika mughulu wahi, ekyo kyanganaleka itwabya n’amalengekania wahi?
5 Erikwamana n’ebyo Yesu abugha, sitwasi nga tukendisyalinda mughulu mungahi embere enduli yihike. Ekyo kyanganaleka itwabunika mutima, kutsibu-tsibu twamabya itwabirilindirira ekiro kya Yehova omo mughulu mulebe. Kandi twanganabunika mutima abatunga betu kutse abandi bandu bamabya ibakatusekereraya kundi enduli siyiriyahika. (2 Pet. 3:3, 4) Twanganalengekania tuti twamabiminya enduli nga yikendisyahika mughulu wahi, itukenditoka erilindirira kandi ikikenditolobera eriyiyinia bamabitusekererya.
6. Busanaki kyuwene eritendiminya enduli nga yikendisyasa kiro ki?
6 Kundi Yehova syalyatubwira enduli nga yikendihika kiro ki, tuwite akanya k’erikangania nga tukamukolera kundi tumwanzire kandi ngoko tuyiketere iye. Situlikolera Yehova erihikiraho enduli yikendisyasira, aliwe twanzire erimukolera kera na kera. Omo mwanya w’erilengekania kutsibu “ekiro kya Yehova” nga kikendisyasa mughulu wahi, kyuwene erilengekania oko myatsi mibuya eyikendisyabya ekiro ekyo kyabihika. Ekyo kikendituwatikya eriyitunda hakuhi na Yehova, eriyiketera iye, n’erikola ekyosi-kyosi busana n’erimutsemesya.—2 Pet. 3:11, 12.
7. Ni myatsi yahi eyo twasi?
7 Ni ky’omughaso okw’itwe erilengekania oko ebyo twasi. Tunasi ngoko ebiro by’enduli mubyatsuka oko 1914. Omo Biblia Yehova abirituha amaminyereri awakakanganaya ngoko ebiro by’enduli mubyatsuka oko 1914. Kandi abiritubwira emyatsi mingyi eyikakanganaya ekihugho nga kikendisyabya kiti enyuma w’omwaka oyo. Kundi, amaminyereri ayo abiribererera, twikirirye kundu ngoko “ekiro kikulu kya Yehova kiri hakuhi.” (Zef. 1:14) Kandi tunasi omubiiri ogho Yehova anzire itwakola. Anzire itwabwira abandu bangyi ngoko twangatoka oko “engulu mbuya y’Obwami.” (Mat. 24:14) Engulu mbuya eyo yinemutulaghanibwa omo bihugho nga 240, n’omo mibughe mingyi oko 1 000. Situlaghire okw’iminya “ekiro n’endambi” tutoke eritulira n’omuhwa.
SITULIMINYA YEHOVA NGA AKENDITUWATIKYA ATI
8. Ebinywa ‘eby’oMungu w’ekwenene akakola’ bikakanaya okuki? (Omughambuli 11:5)
8 Mughulu wosi situliminya ‘eby’oMungu w’ekwenene akakola.’ (Soma Omughambuli 11:5.) Ebinywa ebyo bikakanaya oko ebyo Yehova akalighira kutse erileka bibye atoke eriberererya erisonda liwe. Sitwangaminya ndeke-ndeke busanaki Yehova alyalighira omwatsi mulebe eribya kutse nga akendikolaki erituwatikya. (Esy. 37:5) EBiblia ikasosekanaya eritendiminya ebyo oMungu w’ekwenene akakola n’eritendiminya omwana ng’akakula ati omo nda ya mama wiwe. Nibya n’abanasayasi sibalibaminya ndeke-ndeke omwana ng’akakula ati omo nda ya mama wiwe. Kutya, sitwangaminya ndeke-ndeke ebyo Yehova akendisyakola.
9. Omughulu sitwasi Yehova nga akendituwatikya ati, ekyo kyanganaleka itwalengekania tuti?
9 Omughulu sitwasi Yehova nga akendituwatikya ati, kyanganaleka itwatika-tika eriyisogha oko myatsi milebe. Twanganatika-tika eriyiherera tutoke erikola bingyi omo mubiiri w’eritulira, ng’eryanguhya engebe yetu kutse erihumira eyiri obwagha bunene bw’abatuliri bw’Obwami. Kutse twanganalengekania tuti Yehova syalitutsemera, twamabya itunemuyikasa erikola bingyi omo mubiiri wiwe, aliwe isitulihikira ebyo tukalandamirira. Kutse twanganabya itunemuyikasa erikola bingyi omo mubiiri w’eritulira, aliwe isitulitwabana n’efunzo n’enguma y’eBiblia, kutse twanganabya itunemukola kutsibu omo mubiiri mulebe w’embaghane w’endondeka yetu, aliwe itwabya n’amaligho mangyi. Busana n’emyatsi yosi eyi, twanganalangira Yehova nga syalituwatikaya.
10. Eritendiminya Yehova nga akendituwatikya ati, kikatuwatikaya erikulya emibere yahi y’omughaso?
10 Eritendiminya Yehova nga akendituwatikya ati, kikatuwatikaya erikulya emibere y’omughaso, ng’ow’eriyikehya n’ow’eriyiminya lulengo. Ekyo kikatuwatikaya eriminya ngoko mughulu wosi amalengekania wa Yehova n’esyonzira siwe ni sy’endata kutsibu kulenga syetu. (Isa. 55:8, 9) Kandi tukayiketera Yehova yo kutsibu n’eriyiketera ngoko akendituwatikya omo myatsi yosi. Omughulu tukabana ebihuma ebyuwene omo mubiiri w’eritulira kutse omo mubiiri w’ekiteokrasi, tukaha Yehova y’olukengerwa. (Esy. 127:1; 1 Kor. 3:7) Kandi omughulu emyatsi yamaghenda ngoko tutalwe tulengekenie, tutolere itwibuka ngoko Yehova analangire obuli mwatsi. (Isa. 26:12) Tukakola ekyosi ekyo twangatoka eriyiketera ngoko mughulu wosi Yehova akendituwatikya. Tuyiketere kundu ngoko akendituha obusondoli obo tulaghireko, nomo syendikola atya omo nzira y’ekitiko-tiko ngoko anabya akakola kera.—Emib. 16:6-10.
11. Ni myatsi yahi y’omughaso eyo twasi?
11 Isitwibirirawa ngoko mughulu wosi Yehova atwanzire, atunganene kandi ni w’amenge. Kandi isitwibirirawa ngoko akalangira ebyo tukamukolera n’ebyo tukakolera abaghala n’abali betu mo by’obughuli bunene. Kandi tunasi ngoko mughulu wosi, Yehova akahemba abakasighala bataleghula okw’iye.—Ebr. 11:6.
SITWASI EBIKENDISYABYA OMUNGYA
12. Ngoko kiri omo Yakobo 4:13, 14, sitwasi omwatsi wahi?
12 Soma Yakobo 4:13, 14. Sitwasi ebikendisyatuhikira omungya. Omo kihugho kibi kino, tukahikirawa n’“emighulu eyikalire n’emyatsi eyo omundu atayilindirireko.” (Omug. 9:11) Busana n’ekyo, sitwangaminya omwatsi ogho tunemusonda erikola ng’anemwendisyabya kutse nibya nga tukendisyabya itukineho erikolagho.
13. Eritendiminya emyatsi eyikendisyatuhikira omo biro ebikasa, lyanganaleka itwayowa tuti?
13 Kundi tukabya isitwasi emyatsi eyikendisyatuhikira omo biro ebikasa, kyanganatukalako eriyiyinia. Kiti? Twamabya tukahangya-hangya kutsibu busana n’emyatsi eyangatuhikira, ekyo kyanganaleka itwaherya obutseme bwetu. Engebe yetu yanganabinduka kitsumbukirania kutse emyatsi mibi iyatuhikira kitsumbukirania; ebyo byanganaleka itwahangya-hangya kutsibu n’eribya omo bulighe. Kutse omughulu emyatsi yamaghenda ngoko tutalwe tulengekenie, twanganayowa muhanda n’eribunika mutima.—Misyo 13:12.
14. Litolere itwakolaki n’eriminyaki tutoke eribya n’obutseme bw’ekwenene? (Ulebaye n’esyopitsa.)
14 Omughulu tukayiyinaya omo maligho tukakanganaya ngoko tunemukolera Yehova kundi tumwanzire. Emyatsi eyiri omo Biblia yikatukanganaya ngoko silitolere erilengekania tuti Yehova akendituteya oko maligho wosi kandi ngoko syalipanga embere emyatsi eyikendisyatuhikira omo ngebe yetu. Anasi ngoko twanganabya n’obutseme nomo sitwasi obuli mwatsi owanganatuhikira. Twanganabya n’obutseme twamabilola embere erisonda obusondoli bwiwe omo ngebe yetu n’erimwowa. (Yer. 10:23) Omughulu tukasondekanaya obusondoli bwiwe tukayisogha, tukabya nga twamabugha tuti: “Yehova amanza, itukendisyabyaho n’erikola kino kutse kirya.”—Yak. 4:15.
Erisondekania obusondoli bwa Yehova n’erimowa kikatuteghaya (Ulebaye enungu 14-15)b
15. Ni mwatsi wahi ogho twasi oko biro ebikasa?
15 Nomo sitwasi emyatsi eyangatuhikira obuli kiro, aliwe tunasi ngoko Yehova abiritulagha engebe y’erikota, ibye elubula kutse oko kihugho. Tunasi ngoko syangabugha amabehi kandi sihali ekyangamukakirya eriberererya emilaghe yiwe yosi. (Tito 1:2) Yehova musa yo wangabugha “ebikendisyaluira omo mwatsi inyakine oko nzuko, n’eribugha emyatsi eyiteyakoleka eyikendisyabya kera kera.” Emyatsi yosi eyo abugha kera muyabererera, n’emyatsi yosi eyo abiribugha busana n’ebiro ebikasa ikendisyabererera. (Isa. 46:10) Tunasi ndeke-ndeke ngoko sihali ekyangaleka Yehova inialeka eritwanza. (Rom. 8:35-39) Akendisyatuha amenge, eritukirania, n’erituha akaghala tutoke eriyiyinia omo maligho wosi. Twanganayiketera kundu ngoko Yehova akendituwatikya n’eritutsumula.—Yer. 17:7, 8.
SITWANGATOKA ERIMINYA NDEKE NGOKO YEHOVA ATWASI
16. Yehova anasi ki okw’itwe, n’ekyo kikaleka iwayowa ghuti? (Esyonyimbo 139:1-6)
16 Soma Esyonyimbo 139:1-6. Omuhangyiki wetu anasi obuli mwatsi okw’itwe. Anasi ekikaleka itwalengekania omo nzira nyilebe n’eriminya ekikaleka itwayowa ngoko tukayowa. Anasi ebyo tukabugha n’eriminya ebiri omo mutima wetu. Kandi anasi obuli mwatsi ogho tukakola n’ekikaleka itwakolagho. Omwami Daudi mwabugha ati Yehova anayiteghekire erituwatikya kandi awite obutoki. Ebyo bikaleka iwayowa ghuti eriminya ngoko oMungu, Omutoki w’ebyosi kandi ow’Endata Kutsibu n’oyo wahangyika obuli kindu akutsomene kutsibu? Daudi mwabugha ati: “Amenge ng’ayo ali endata oko buyiteghererya bwaghe. Ali endata kutsibu okw’ingye, sinangatoka erihika kugho.”—Esy. 139:6, ebinywa by’eyikwa.
17. Busanaki kyanganatukalako erikirirya ngoko Yehova atwasi ndeke?
17 Kwa muhwa, kyanganatukalako erilangira Yehova mo Tata wetu w’olwanzo n’oyututsomene, busana n’emyatsi eyatuhikira omo kihanda kyetu, kutse emibere eyo twakuliramo kutse ebyo twabya twikirirye embere twighe ekwenene. Kutse twanganalengekania tuti amakosa agho twakola kera akalire kutsibu, neryo Yehova syanganza erituminya, kandi tuti ali hali okw’itwe. Nibya ndambi silebe Daudi naye iniakanayowa atya. (Esy. 38:18, 21) Kutse omundu oyunemuyikasa erikola esyombinduka omo ngebe yiwe n’erikola ebikenditsemesya oMungu anganayibulya ati, ‘oMungu amabya iniananyasi busanaki anzire inalekana n’omwatsi mulebe owatuwene owakanikalako erilekana nagho?’
18. Busanaki kyuwene okw’itwe erikirirya ngoko Yehova atwasi kutsibu kutulenga? (Ulebaye n’esyopitsa.)
18 Twanganikirirya ngoko Yehova atwasi kutsibu kutulenga kandi ngoko anganalangira ebibuya omw’itwe ebyo sitwangatoka erilangira. Nomo Yehova akalangira amakosa wetu, aliwe anasi nga twanzire eribya bandu ba muhanda wahi, kandi atwanzire. (Rom. 7:15) Omughulu tukaminya ngoko Yehova akalangira ebyuwene omw’itwe, tukayiketera iye n’ekyo kikatuwatikaya erimukolera butaleghuka kandi itunatsemire.
Yehova akatuwatikaya eriwatya obwikirirya bwetu erilabira emilaghe eyuwene eyo abiritulagha. N’omo nzira eyo, akatuwatikaya eriyiyinia oko myatsi eyikalire eyangatuhikira kitsumbukirania (Ulebaye enungu 18-19)c
19. Ni myatsi yahi eyo twasi ndeke-ndeke oko Yehova?
19 Tunasi ngoko Yehova ni lwanzo. N’ekyo sitwangatika-tikirakyo. (1 Yoh. 4:8) Tunasi ngoko obuli mwatsi ogho akatusaba erikola kutse eritendikola ni kundi atwanzire kandi anzire itwabya n’engebe eyuwene kundu. Tunasi ngoko Yehova anzire itwabana engebe y’erikota, n’ekyo kyo kyaleka inyateka embanulo. Kundi Yesu mwatuholera twanganayiketera ngoko nomo twangakola amakosa, twanganakolera Yehova omo nzira eyikendimutsemesya. (Rom. 7:24, 25) Kandi tunasi ngoko “oMungu ni mukulu kutsibu kulenga emitima yetu, kandi asi emyatsi yosi.” (1 Yoh. 3:19, 20) Yehova akalangira obuli mwatsi okw’itwe kandi ayiketere ngoko twanganatoka erikola erisonda liwe.
20. Niki kyo kyangatuwatikya eritendihangya-hangya kutsibu busana n’emyatsi eyo tutasi?
20 Yehova akatubwira obuli mwatsi ogho tutolere eriminya. Neryo situtolere erihangya-hangya busana n’emyatsi eyo tutasi. Aliwe, tutolere eribya tukalengekania oko myatsi y’omughaso. Omw’ikola tutya tukakanganaya ngoko tuyiketere Yehova yo kutsibu “oyuhika-hikene omo menge.” (Yobu 36:4) Nomo sitwasi emyatsi milebe yo lino, tunasi ngoko Yehova akendisyalola embere eritukangirirya emyatsi mihya kera na kera. Kandi tutsemire kundi sitwendisyaleka erigha emyatsi mihya oko Mungu wetu Mukulu.—Omug. 3:11.
OLWIMBO 104 Ekihembo ky’oMungu ky’eKirimu Kibuyirire
a Yesu yukendisyasondola amalwa w’ekihugho kibi kino kya Sitani, neryo ni ky’amenge eribugha tuti lino anasi ekiro ekyo Armagedoni yikendisyahikirako n’endambi eyo ‘akendisyabughirira erikinda riwe.’—Erib. 6:2; 19:11-16.
b ERIKANIA OKO PITSA Y’OKO: Tata n’omughala wiwe banemuteghekania amalete, ekihanda kyabo kibye ikinayiteghekire hamabya omwatsi w’erikola luba.
c ERIKANIA OKO PITSA: Mughala wetu oyunemwaghalwa anemulengekania oko myatsi mibuya eyikendisyabya omo kihugho kihya.