संकटांच्या विळख्यात जग

३ | नाती जपा

हे महत्त्वाचं का आहे?

जगातल्या समस्यांमुळे लोकांच्या जीवनात चिंतेचं प्रमाण वाढत चाललं आहे. आणि नकळत याचा प्रभाव लोकांच्या नात्यांवर होतो.

काही लोक मित्रांना टाळतात आणि एकटं राहू लागतात.
काही घरांत नवरा-बायकोंमधले वाद वाढतात.
आपली मुलं कोणत्या गोष्टींना तोंड देत आहेत याकडे आईवडिलांचं दुर्लक्ष होतं.

तुम्हाला काय माहीत असलं पाहिजे?

खासकरून कठीण काळात शारीरिक आणि मानसिक आरोग्य टिकवून ठेवण्यासाठी मित्र असणं आवश्‍यक आहे.
जगातल्या समस्यांमुळे येणारा तणाव तुमच्या कुटुंबात अनपेक्षित समस्या निर्माण करू शकतो.
सतत ऐकायला मिळणाऱ्‍या वाईट बातम्यांमुळे मुलांच्या मनावर किती परिणाम होतोय, हे कदाचित तुमच्या लक्षात येणार नाही.

तुम्ही आत्ता काय करू शकता?

बायबल म्हणतं: “खरा मित्र नेहमी प्रेम करतो; दुःखाच्या प्रसंगी तो भावासारखा होतो.”—नीतिवचनं १७:१७.

तुम्हाला मदत करेल आणि चांगला सल्ला देईल असा एखादा मित्र किंवा मैत्रीण तुम्हाला आहे का? कोणालातरी आपली काळजी आहे, ही जाणीव तुम्हाला दररोजच्या समस्यांना तोंड द्यायला मदत करू शकते.

कसा कराल सामना?—काही उपयोगी सल्ले

संकटांचा सामना करत असताना नाती जपण्यासाठी तुम्ही या गोष्टी करू शकता

आपलं वैवाहिक नातं भक्कम करा

बायबल म्हणतं: “एकापेक्षा दोघं चांगले . . . कारण त्यांच्यातला एक पडला, तर दुसरा त्याला मदत करू शकतो.” (उपदेशक ४:९, १०) एकमेकांच्या विरोधात जाण्यापेक्षा नवरा-बायकोने एकमेकांना सहकार्य केलं पाहिजे.

तणावामुळे मी आपल्या जोडीदारावर राग काढणार नाही असा निश्‍चय करा. सहनशीलतेने वागा, लगेच रागावू नका.
आठवड्यातून एकदा आपल्या जोडीदारासोबत बसून समस्यांबद्दल चर्चा करा. एकमेकांकडे बोट दाखवण्याऐवजी समस्या सोडवायचा प्रयत्न करा.
दोघांना आवडणाऱ्‍या गोष्टी सोबत मिळून करण्यासाठी वेळ काढा.
जुन्या आठवणी ताज्या करा. लग्नाचा अल्बम किंवा इतर फोटो पाहून मागच्या गोड आठवणींना उजाळा द्या.

“एखाद्या जोडप्याला एकमेकांच्या सगळ्याच गोष्टी पटतील असं नाही. पण तरी ते सोबत मिळून नक्कीच काम करू शकतात. यासाठी त्यांनी सोबत मिळून निर्णय घेतले पाहिजेत आणि त्याप्रमाणे काम केलं पाहिजे.”—दिनकर.

मित्रांच्या संपर्कात राहा

मित्रांच्या संपर्कात राहा

नेहमी मित्रांकडून मदतीची अपेक्षा  करण्यापेक्षा त्यांना कशी मदत करता  येईल याचा विचार करा. इतरांना आधार दिल्यामुळे तुमचंही मनोबल वाढेल.
दररोज एक-दोन मित्रांना फोन किंवा मेसेज करून त्यांची विचारपूस करा.
तुमच्यासारख्याच समस्यांना तुमच्या मित्रांनी कसं तोंड दिलंय ते त्यांना विचारा.

“सगळ्या बाजूंनीच समस्या येतात तेव्हा मित्र आधार देतात. समस्यांमुळे आपण गोंधळलेलो असतो तेव्हा ते आपल्याला योग्य दिशा दाखवतात. आपण काय केलं पाहिजे याची आठवण करून देतात. मित्रांना एकमेकांची काळजी असते आणि सुख-दुःखात ते एकमेकांना साथ देतात.”—निकिता.

मुलांना समजून घ्या आणि त्यांना वेळ द्या

आपल्या मुलांना समजून घ्या, त्यांना वेळ द्या

बायबल म्हणतं: “प्रत्येकाने ऐकायला उत्सुक आणि बोलण्यात संयमी असावं.” (याकोब १:१९) सुरवातीला मुलं त्यांना कोणत्या गोष्टींची भीती वाटते, चिंता वाटते ते मनमोकळेपणाने सांगणार नाहीत. पण जेव्हा तुम्ही शांतपणे त्यांचं ऐकून घ्याल, तेव्हा हळूहळू ते आपल्या मनातल्या गोष्टी तुम्हाला सांगतील.

मुलं तुमच्याशी सहजपणे बोलू शकतील असं वातावरण ठेवायचा प्रयत्न करा. काही मुलांना पालकांसोबत समोरासमोर बसून बोलायला अवघड जातं. पण तेच सोबत फिरायला गेल्यावर ते मनमोकळेपणाने बोलतात.
तुमच्या मुलांना धक्कादायक बातम्या जास्त बघू देऊ नका.
कुटुंब सुरक्षित राहावं म्हणून तुम्ही काय योजना केल्या आहेत ते आपल्या मुलांना सांगा.
आणीबाणीच्या परिस्थितीत काय करायचं ते आधीच ठरवा आणि मुलांसोबत त्याचा सराव करा.

“मुलांशी बोला आणि त्यांना मनातलं बोलू द्या. कदाचित त्यांच्या मनात भीती, चिंता किंवा राग असेल, पण ते कोणाला सांगत नसतील. तुम्हालाही अशा भावनांमुळे त्रास होतो आणि त्यासाठी तुम्ही काय करता हे त्यांना सांगा.”—बिना.