२ करिंथकर

६ त्याच्यासोबत कार्य करत असताना, आम्ही तुम्हाला अशी विनंतीही करतो, की देवाची अपार कृपा स्वीकारल्यावर ती व्यर्थ ठरेल अशा रीतीने वागू नका. २ कारण तो म्हणतो: “कृपेच्या काळात मी तुझं ऐकलं, आणि तारणाच्या दिवशी मी तुला साहाय्य केलं.” पाहा! आताच विशेषकरून कृपेचा काळ आहे. पाहा! आताच तारणाचा दिवस आहे.

३ आमच्या सेवेत दोष दाखवला जाऊ नये, म्हणून आम्ही कोणत्याही प्रकारे अडखळण्याचे कारण होत नाही; ४ तर, सर्व प्रकारे आम्ही देवाचे सेवक म्हणून स्वतःची शिफारस करतो; धीराने अनेक दुःखे सोसून, संकटे, अडचणी, व कठीण प्रसंगांचा सामना करून, ५ मारहाण व तुरुंगवास सहन करून, दंगलींना तोंड देऊन, कष्ट करून, रात्ररात्र जागून, अन्‍नपाण्याशिवाय दिवस काढून; ६ शुद्धतेने, ज्ञानाने, सहनशीलतेने, दयाळूपणाने, पवित्र आत्म्याने, निष्कपट प्रेमाने, ७ खरे बोलण्याद्वारे, देवाच्या सामर्थ्याने; उजव्या* व डाव्या हातात* नीतिमत्त्वाची शस्त्रे घेऊन, ८ गौरवाने व अपमानाने, निंदेने व स्तुतीने आम्ही स्वतःची शिफारस करतो; आम्हाला फसवणूक करणारे असे समजले जाते, तरीही आम्ही खरे बोलतो, ९ आम्ही अनोळख्यांसारखे असलो, तरी आम्हाला ओळखले जाते, मरायला टेकलेल्यांसारखे असलो,* तरी पाहा! आम्ही जिवंत आहोत, शिक्षा देण्यात आलेल्यांसारखे* असलो, तरी आम्हाला मरणाच्या स्वाधीन करण्यात आलेले नाही, १० आम्ही शोक करणाऱ्‍यांसारखे असून नेहमी आनंदी राहतो; आम्हाला गरीब समजले जात असूनही, आम्ही अनेकांना श्रीमंत करतो; कंगाल समजले जात असूनही, आमच्याजवळ सर्वकाही आहे.

११ करिंथकरांनो, आम्ही तुमच्याशी अगदी मोकळेपणाने* बोललो आहोत आणि आम्ही आमचे मन मोठे केले आहे. १२ आम्ही तुमच्यावर अगदी पूर्ण मनाने प्रेम करतो,* पण तुम्ही मात्र आमच्यावर पूर्ण मनाने प्रेम करत नाही. १३ म्हणूनच, मी तुम्हाला स्वतःची मुले समजून असे सांगतो, की तुम्हीसुद्धा तुमची मने मोठी करा.

१४ विश्‍वासात नसलेल्यांसोबत विजोड बंधनात* बांधले जाऊ नका. कारण नीती व अनीतीचा काय संबंध? किंवा उजेड व अंधार यांच्यात काय मेळ? १५ शिवाय, ख्रिस्त व सैतान* यांच्यात काय सारखेपणा? विश्‍वास ठेवणारा* आणि विश्‍वासात नसलेला यांच्यात काय संबंध?* १६ आणि देवाच्या मंदिराचा मूर्तींसोबत कसा काय मेळ बसेल? कारण आपण एका जिवंत देवाचे मंदिर आहोत; जसे स्वतः देवाने म्हटले: “मी त्यांच्यामध्ये राहीन आणि त्यांच्यामध्ये चालेन, आणि मी त्यांचा देव होईन व ते माझे लोक होतील.” १७ “‘म्हणून, त्यांच्यातून निघा आणि स्वतःला त्यांच्यापासून वेगळे करा,’ ‘आणि अशुद्ध वस्तूला स्पर्श करू नका’”; “‘म्हणजे मी तुम्हाला स्वीकारेन,’ असे यहोवा* म्हणतो.” १८ “‘आणि मी तुमचा पिता होईन, व तुम्ही माझी मुले व माझ्या मुली व्हाल,’ असे यहोवा* म्हणतो, जो सर्वसमर्थ आहे.”