२ करिंथकर
५ कारण आपल्याला माहीत आहे, की आपले पृथ्वीवरचे घर, म्हणजे हा तंबू जरी पाडण्यात आला, तरी आपल्याला देवाकडून एक इमारत मिळणार आहे; एक असे घर, जे हातांनी बांधलेले नसून, स्वर्गात असलेले व सर्वकाळाचे आहे. २ कारण सध्याच्या या घरात* आपण अक्षरशः कण्हतो आणि आपल्यासाठी असलेले जे स्वर्गातले आहे, ते घालण्याची* आपण तीव्र उत्कंठा बाळगतो, ३ म्हणजे, जेव्हा आपण ते घालू, तेव्हा आपण उघडे असे आढळणार नाही. ४ खरे पाहता, या तंबूमध्ये असलेले आपण ओझ्याखाली दबून जातो आणि कण्हतो, कारण आपल्याला हे काढून टाकायचे नाही, पण ते दुसरे घालायचेही आहे, यासाठी की जे मरणारे आहे त्याला जीवनाने कायमचे गिळून टाकावे. ५ आता याच गोष्टीसाठी ज्याने आपल्याला तयार केले, तो देव आहे. त्याने आपल्याला येणाऱ्या गोष्टींची हमी* म्हणून त्याचा आत्मा दिला आहे.
६ म्हणूनच, आपण नेहमी धैर्य धरतो आणि ही जाणीव बाळगतो, की जोपर्यंत आपण या शरीराच्या घरात राहतो तोपर्यंत आपण प्रभूपासून दूर आहोत, ७ कारण आपण दिसणाऱ्या गोष्टींनुसार नाही, तर विश्वासाने चालत आहोत. ८ आपण धैर्य धरतो आणि हे शरीर दूर करून प्रभूसोबत राहणे अधिक पसंत करतो. ९ म्हणून, त्याच्यासोबत राहताना काय, किंवा त्याच्यापासून दूर राहताना काय, आपण नेहमीच त्याची स्वीकृती मिळवण्याचा प्रयत्न करतो. १० कारण आपल्या सर्वांनाच ख्रिस्ताच्या न्यायासनासमोर उभे राहावे लागेल,* यासाठी की शरीरात असताना प्रत्येकाने ज्या चांगल्या किंवा वाईट गोष्टी केल्या असतील, त्यांनुसार त्याला प्रतिफळ मिळावे.
११ म्हणूनच, प्रभूचे भय बाळगणे गरजेचे आहे हे ओळखून, आम्ही सतत लोकांची मने वळवतो, यासाठी की त्यांनी आमचे ऐकावे; अर्थात, देव आम्हाला चांगल्या प्रकारे ओळखतो;* पण, तुमच्या विवेकांनाही आमची चांगल्या प्रकारे ओळख पटली असेल,* अशी आशा मी बाळगतो. १२ आम्ही पुन्हा एकदा तुम्हाला स्वतःची शिफारस करत नाही, तर आमच्याविषयी बढाई मारण्याचे तुम्हाला प्रोत्साहन देत आहोत; यासाठी की जे लोक अंतःकरणातल्या गोष्टींवरून नाही, तर बाहेरच्या स्वरूपावरून बढाई मारतात त्यांना प्रत्युत्तर देणे तुम्हाला शक्य व्हावे. १३ कारण जर आम्ही वेडे झालो होतो, तर ते देवासाठी झालो होतो; आणि जर आम्ही समंजस आहोत, तर ते तुमच्यासाठी आहोत. १४ कारण ख्रिस्ताचे प्रेम आम्हाला भाग पाडते. आम्हाला ही गोष्ट कळून चुकली आहे, की एकच मनुष्य सर्वांसाठी मेला, कारण खरेतर सर्व मेलेले होते. १५ आणि तो सर्वांसाठी मेला ते या हेतूने, की जे जगतात त्यांनी यापुढे स्वतःसाठी नाही, तर जो त्यांच्यासाठी मेला आणि उठवला गेला, त्याच्यासाठी जगावे.
१६ त्यामुळे, आता आम्ही कोणत्याही मनुष्याकडे मानवी दृष्टिकोनाने पाहत नाही. एकेकाळी जरी आम्ही ख्रिस्ताला शारीरिक दृष्टीने ओळखत होतो, तरीसुद्धा आता आम्ही त्याला निश्चितच त्या प्रकारे ओळखत नाही. १७ म्हणून, जो कोणी ख्रिस्तासोबत ऐक्यात आहे, तो एक नवीन निर्मिती आहे; जुन्या गोष्टी गेल्या आहेत, आणि पाहा! नवीन गोष्टी अस्तित्वात आल्या आहेत. १८ पण, सर्व गोष्टी देवाकडून आहेत. त्याने ख्रिस्ताद्वारे आमचा स्वतःसोबत समेट केला आणि समेट घडवून आणण्याची सेवा आमच्या हाती सोपवली. १९ म्हणजे, देव मानवांचे अपराध न मोजता, ख्रिस्ताद्वारे त्यांचा स्वतःसोबत समेट घडवून आणत आहे हे घोषित करण्याची सेवा, आणि हा समेटाचा संदेश त्याने आम्हाला सोपवला आहे.
२० म्हणूनच, आम्ही राजदूत या नात्याने ख्रिस्ताऐवजी कार्य करत आहोत, जणू देव आमच्याद्वारे लोकांना विनंती करत आहे. ख्रिस्ताऐवजी आम्ही लोकांना अशी विनवणी करतो, की “देवासोबत समेट करा.” २१ ज्याला पाप माहीत नव्हते, त्याला त्याने आपल्याकरता पापाचे बलिदान म्हणून दिले,* यासाठी की त्याच्याद्वारे आपण देवाच्या दृष्टीत नीतिमान ठरावे.